【獅墨書訊第01期】舉頭三尺：係觀音定係上帝？

📖《觀心自在：香港觀音誕與觀音信仰探源》

駱慧瑛｜天地圖書出版｜HKD$188

ISBN：9789888549344

「我又唔拜觀音，呢本書關我咩事？」

雖然未必個個都拜觀音，但觀音信仰其實對香港嘅宗教文化嚟講係好重要嘅構成部分。香港芸芸廟宇入面，天后廟固然最多，但觀音亦不遑多讓，舉凡觀音廟、蓮花宮、水月宮等等，都係拜觀音。好多廟雖然唔係以觀音為主神，都有兼奉，甚至好多人家中都仲會有觀音像。呀，大埔仲

有好大個觀音像。

觀音信仰究竟點嚟？佢同天后唔同，係佛教、道教同民間信仰都有各自供奉唔同版本，係唔同嘅場合會展現好唔同嘅面貌。例如，觀音本來係佛門清淨地供奉嘅菩薩，但去到觀音廟，就變成搵錢求財嘅對象，講緊觀音借庫。

香港人拜觀音，同其他地方原來又唔太一樣。原來觀音借庫本身又係香港先有，而香港嘅中秋節舞火龍習俗，原來都同觀音信仰有關。再講多啲，觀音信仰可能比我哋想象中仲要普及：警察拜關公就大家都知，咁救生員拜咩？除咗拜天后就係拜觀音，因為觀音慈悲為懷，打救眾生。

不過，拜觀音嘅人多，認真研究觀音嘅人少，呢本可以話係近年對香港觀音信仰嘅發展同特色整理得最完整同全面嘅作品。

💡除咗大埔慈山寺之外，香港仲有另一座巨型觀音像，坐落喺淺水灣鎮海樓公園。

阮志偉、余嘉浩、許家朗、敖子亮

中華書局出版｜HKD$158

ISBN：9789888759743

行開山嘅朋友可能都有察覺，喺新界唔同地區行山，走入鄉村，通常都會見到廟，但係去西貢呢，經常都會見到天主教堂。西貢呢個話細唔細，話大亦唔算大嘅地方，竟然有十幾間天主教堂。點解會咁㗎呢？原來天主教喺西貢扎根已經百幾年，而且西貢仲係呢啲傳教士最成功嘅地區。

話說喺香港開埠無幾耐，天主教嘅傳教士就已經嚟到香港傳教，但佢哋嘅活動範圍唔止係香港島，仲包括未納入殖民地嘅新界。點解佢哋要去到咁遠？當地居民已經世世代代信仰原有嘅滿天神佛，啲神父用咩方法改變佢哋？點解佢哋又會願意配合？講返轉頭，原來點解西貢係最成功，係同當時西貢嘅人口結構有關。

不過，啲神父去到西貢原來都唔係一帆風順。中間經歷咗好多困難，包括村民嘅敵意、缺少經費、惡劣嘅工作環境，仲要好多蚊（係呀，因為有瘧疾嘛）。除此之外，可能仲要應付好多外部嘅威脅，例如係自然災害（颱風吹冧教堂）、政治上的爭鬥，甚至係戰亂，二戰期間就有好幾多傳教士同教徒被日軍同山賊殺害。

💡1860年代，有個義大利神父曾經率領十二個西貢村民打敗咗惡霸地主派嚟嘅民兵。

此篇書訊刊於每週一發出的獅墨書訊，免費訂閱