搜尋結果

【最新到貨：新鮮滾熱辣上架】 椰殼碗外的人生 Benedict Anderson｜李宛蓉 譯｜時報出版 ISBN：9786263967397｜HKD$133   歷史孕育民族主義，同樣孕育民族主義大師。Benedict Anderson嘅《想象的共同體》係當今民族主義研究最重要嘅著作（應該都可以唔洗加「之一」）。佢提出所謂「民族」其實都係我哋想象出嚟嘅連結，畢竟呢個「民族」裡面九成九嘅成員我哋係畢生都唔會有機會接觸到，咁點解我哋會覺得彼此都屬於同一個群體？答案就係印刷媒體嘅出現，令到同一個國家裡面嘅陌生人都可以同步咁交流同接收一樣嘅資訊，並產生文化、歷史、語言等方面嘅連結。   須知道，本來主流嘅民族主義論述係「原生論」，即係覺得民族係自然形成，同「自古以來」。咁係咩環境令Benedict Anderson可以諗出咁新穎（當時嚟講）嘅理論？Benedict Anderson原本喺愛爾蘭同英格蘭混血家庭長大，但父親喺中國海關做官，佢就喺雲南出生，然後年幼時輾轉移民美國同愛爾蘭，最後喺英、美讀書受教育。佢最初嘅研究集中喺印尼嘅民族主義同解殖鬥爭，後來更因為揭發六十年代印尼政府以反共名義屠殺異見者而被印尼驅逐，後來就開始研究民族主義理論。   而Benedict Anderson對民族主義嘅見解，好可能都係嚟自於佢自己輾轉流離唔同國家成長嘅經歷，以及佢所身處嘅大時代變遷——一歲果陣中日戰爭爆發、五歲太平洋戰爭開打、讀緊大學果陣係蘇彝士運河危機、去美國讀博果年馬來西亞獨立、歐洲經濟共同體簽約成立，到博士畢業果年，文革、印尼政變、越戰都已經如火如荼。大戰記憶、解殖浪潮，以及冷戰氛圍都係佢成長同求學階段嘅重要元素，喺咁樣嘅背景之下，對民族主義有個人獨特嘅見解，好似亦可以理解了。 💡Benedict Anderson擁有愛爾蘭血統，不過，一方面家族有成員長期參與愛爾蘭革命，但因為佢哋唔係天主教徒，亦常年被排拒於愛爾蘭主流社會之外。 【店長精選：唔好果本唔敢揀】 霍布斯邦論民族主義：被發明的傳統與全球化下的險境 Eric J. Hobsbawm｜馮奕達、黃中憲 譯｜麥田出版 ISBN：9786263105096｜HKD$207   Eric Hobsbawm 比Benedict Anderson年長三十年左右，因為英國殖民網絡嘅緣故，喺埃及生於波蘭同奧地利猶太人混血嘅家庭，輾轉喺維也納同柏林成長，最後定居英國，經歷過一戰、打過二戰，逃離過納粹黨壓迫，又加入過英國共產黨，亦因此喺冷戰期間升遷遭逢阻滯。   某程度上，Eric Hobsbawn同Benedict Anderson嘅背景都有點相似——喺混血家庭同殖民地網絡裡面出生，成長時期經歷戰爭同政治動盪，又經常喺唔同國家之間遷徙，見證冷戰嘅降臨同殖民帝國嘅分崩離析。而兩者亦都同樣認為「民族」係社會建構嘅產物，而唔係自有永有嘅存在。Eric Hobsbawn嘅名作  The Invention of Tradition  （中譯《被發明的傳統》）就係講緊唔同嘅民族國家點樣自行想象同創造一個「傳統」，然後用嚟塑造國族認同。   而呢本On Nationalism，就係Eric Hobsbawn自己對民族主義更細緻嘅分析同解讀，包括民族主義喺「漫長的十九世紀」由法國大革命嘅後遺之中被創造，最終去到德國同意大利嘅統一建國與擴張。但同Benedict Anderson唔同嘅係，Eric Hobsbawn始終反對民族主義，覺得民族主義係非理性同由人工建立嘅幻象，並且會為日益國際化嘅世界帶嚟延綿不絕嘅壓迫同衝突，亦不符左翼理想中嘅世界大同。 💡Hobsbawm嘅自傳裡面有提到，大學果陣佢係頗唔顯眼嘅學生，因為佢既唔鍾意做運動，又成日摺圖書館，仲要「ferociously ugly」，點估到以後會成為大師。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 懷舊的力量： 從存在心理學的視角，探索被塵封已久的生命潛能 Clay Routledge｜劉宗為 譯｜時報出版 ISBN：9789888862108｜HKD$127 張國榮永遠都會比姜濤優勝，點解？有時其實唔係講緊唱功、舞技或者個人魅力，而係講緊時代。只要我哋知道「歷史」同「過去」只係人嘅詮釋而唔係事實本身，咁就唔難明白懷舊係擁有非常強大力量嘅一種集體情緒，可以完全定義我哋對過去嘅理解。 懷舊係好多人都會有嘅情感，喺社會大部分人眼中，每個時代都比下一個時代好，而而家亦一定比以前差。呢個當然可以係一個客觀嘅觀察，但更多時候往往都係主觀嘅想像。 不過，懷舊又唔純粹係將對現世嘅不滿同忿恨投射喺過去，佢亦都可以產生比較正面嘅效果，例如係提醒自己擁有過嘅美好記憶，甚至可以話俾我哋聽「我哋曾經做得到啲咩」，繼而提供前進以至突破現有極限嘅動力。如果我哋覺得八、九十年代嘅香港不論喺文化實力、經濟水平、社會發展、人權自由、國際地位都處於歷史巔峰，咁又憑咩覺得我哋唔可以再次攀上我哋嚮往嘅高度？然而，懷舊同一時間都係一把雙刃劍。如果懷舊只限於討論張國榮定係姜濤叻啲，似乎真係無傷大雅，但既然懷舊情緒可以喺社會裡面有強大嘅推動力，自然亦都會有人想操控。由古至今都總有好多統治者喺社會中鼓動懷舊情緒，塑造對過去嘅美好想像，然後引導民眾將實現呢個美好想像嘅願望投射喺自己身上。由漢朝時奪權，提倡「復古改制」嘅王莽，到宣稱要「Make America Great Again」嘅當撈侵，其實都係用一樣嘅套路嚟爭取支持同鞏固自己嘅權力。 呢本可能係敝店唯一嘅心理學書，畢竟我哋係歷史專門店。不過，既然懷舊有如此強大嘅力量，同歷史一樣可以為掌握話語權嘅人動員群眾同扭轉政治形勢，咁似乎都好值得睇開歷史嘅我哋了解一下呢種情緒喺心理學層面上，點樣喺每個個體嘅心中塑造情感，繼而改變集體行為。 💡歐洲嘅懷舊研究最早可以追溯到1688年嘅瑞士，當時有醫生發現士兵打仗太耐會思鄉，而希臘文嘅「返鄉」nostos同「痛苦」algos合併，就係「懷舊」nostalgia。 【店長精選：唔好果本唔敢揀】 被推倒的偶像：十二座塑造歷史的雕像 Alex von Tunzelmann｜楊芩雯 譯｜聯經出版 ISBN：9789570876000｜HKD$157 早幾年席捲全球嘅拉倒銅像運動，唔知大家仲有無印象，或者仲記唔記得自己當時嘅立場係咩——係支持「抗爭者移除壓迫、暴行嘅象徵」，定係反對「暴徒抹除歷史、消滅認同」？究竟呢啲擺喺公園同街邊嘅金屬物體，有啲咩咁強大嘅力量，可以令全世界分裂成兩邊，各自痛恨對方，甚至引起暴力衝突？又或者，引起衝突嘅究竟係呢啲銅像本身，定係事件當刻埋藏喺社會當中嘅暗湧？ 而雖然香港基本上未受早幾年果場破壞銅像風潮嘅影響，甚至當時社會都無乜太多討論，畢竟香港本身就唔係話好多銅像，但係事件背後關於點樣處理歷史記憶嘅脈絡，同樣值得喺香港嘅我哋思考。將一個歷史人物製作成銅像，代表當時嘅人歌頌呢位人物嘅事蹟，係當時社會對呢個歷史人物生平嘅定義。不論係選擇邊個人物嚟樹立銅像、銅像點樣設計、人物擺乜嘢動作、有無附帶文字，甚至係銅像嘅大細同位置，都反映當時有權力建立銅像嘅人（通常係政府，但唔一定）想強調嘅重點。 另一方面，當銅像被拆毀，都同樣反映當刻社會對同一段歷史嘅詮釋已經改變咗。不論係由政府移除定係由示威者破壞、移除係得到社會共識下進行定係有人夾硬嚟、拆咗落嚟嘅銅像係摧毀定係轉移定係點樣處理，通通都代表住呢個國家或社會點樣看待自己備受爭議嘅歷史，以及癒合歷史傷痕、撮合唔同群體和解共生嘅意願同能力。香港雖然無乜呢類爭議，但隨住越嚟越多歷史傷痕得到認識（甚至累積），其實早晚都需要討論呢個問題。 💡香港極少發生銅像被破壞事件，最出名果次可能就係1941年，佔領香港嘅日軍將維園嘅維多利亞女王銅像拆走，到戰後先歸還，仲斷咗隻手要由工匠修復。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 濟州四．三：跨越沉默，讓真相走向世界 許湖峻｜鄭乃瑋 譯｜黑體出版 ISBN：9786267512753｜HKD$187 為咗反共，可以殺幾多人？講起近代韓國嘅政治慘劇，我諗好多人都會諗起1980年嘅光州事件，當時韓國總統全斗煥下令軍隊開槍鎮壓示威民眾，造成現今韓國難以磨滅嘅歷史創傷。但係，原來光州並唔係韓國唯一被獨裁者血洗嘅城市，而光州事件甚至唔係最血腥嘅一次。南韓政府鎮壓平民嘅歷史，可能就係要由1947年嘅濟州開始講起。 二戰結束後，日本投降並撤出韓國，美國同蘇聯分別佔領朝鮮半島南北兩邊。然而，因為對韓國社會了解不足，亦都無打算投入資源，美國軍政府喺南韓嘅統治反而為韓國人帶嚟更多苦難，亦為早已深入滲透嘅共產黨地下組織提供機會。濟州本來就好似沖繩之於日本咁，從來都唔係太喜歡被朝鮮半島嘅人統治，加上民不聊生嘅環境，以及共產組織嘅支持，就喺1947年掀起大規模嘅抗議運動。共產黨嘅參與令美國軍政府派出警備部隊（都係韓國人）鎮壓起事，甚至引起一啲濟州人組織起武裝對抗。 而1948年李承晚建立大韓民國，就任總統之後，情況更加急轉直下。新政權無法容忍共產黨喺自己境內活動，李承晚隨即派遣大批軍隊到濟州，開始「格殺勿論」。共產黨武裝隊活動、右翼民兵嘅攻擊、民眾對現況嘅不滿、濟州同韓國本土嘅衝突、李承晚嘅冷血命令，最終導致三萬濟州島民遇害。大屠殺到1949年就慢慢減緩，但針對濟州嘅「禁足令」同政治壓迫就去到1954年先完。事件至今都係濟州社會裡面極深嘅傷痕，但偏偏仍然有唔少人為李承晚辯護。若反共就係絕對正義，要死幾多人先算過份？ 💡濟州四・三事件經常被拎嚟同臺灣同時發生嘅二二八比較。不過其中好唔同嘅係，濟州嘅加害者並唔只係南韓政權，仲包括美國軍政府，又令追究責任變得更困難。 【店長精選：唔好果本唔敢揀】 殺戮的季節：一九六五至六六年印尼大屠殺史 Geoffrey B. Robinson｜陳信宏 譯｜春山出版 ISBN：9786267478110｜HKD$230 喺亞洲，以「反共」為名，鞏固權力為實，肆意屠殺同壓迫平民嘅獨裁者比比皆是，好多大家都好熟悉——南韓嘅李承晚、全斗煥，臺灣嘅蔣介石、蔣經國，南越嘅吳廷琰等等。不過，印尼嘅反共大屠殺，就似乎未必咁多人聽過了。喺冷戰背景之下，印尼總統蘇哈托藉詞打擊共產黨，喺社會中大肆捕殺政敵同無辜民眾，喺1965-1966短短一年間，就血刃超過五十萬人。 戰後，「國父」蘇卡諾帶領印尼反抗荷蘭殖民統治，走向獨立。成功趕走咗荷蘭人之後，印尼亦因此佈滿各式各樣原本因為爭取獨立而團結，但而家互相睇唔順眼嘅政治同軍事力量，而共產黨就係其中之一。蘇卡諾為咗保護新建立嘅印尼共和，分別同美國、中國各自交好，前者提供好多資源，增強印尼陸軍嘅實力，而後者亦提供唔少援助，但就令印尼共產黨勢力漸漸擴張，兩者嘅互相衝突嘅意識形態，以及喺印尼施展嘅影響力，都漸漸為悲劇埋下伏線。 1965年，羽翼漸豐嘅陸軍司令蘇哈托以共產黨企圖推翻政權為由，迫使蘇卡諾下臺，取而代之成為總統，隨即展開大規模「肅清共產黨」嘅行動。舉國上下，但凡係政權睇唔順眼嘅人，或者被密報篤背脊嘅人，仲有大量無辜平民，甚至只係有華裔面孔，都慘遭逮捕、監禁、酷刑、處決。大屠殺維持一年，但蘇哈托嘅獨裁統治要到1998年先被推翻。民主化三十年未夠嘅印尼，目前似乎都仍未搵到轉型正義，以至正面反思呢段歷史嘅方式。 💡印尼雖然已經成為民主國家，但反共大屠殺仍然係政治禁忌，以至官方論述都依然為蘇哈托嘅暴行背書，而介紹事件嘅雅加達「共產黨叛國博物館」就係最好例證。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 福爾摩沙意識形態： 東方式殖民主義與臺灣民族主義的興起，1895-1945 吳叡人｜春山出版 ISBN：9786267478356｜HKD$227 吳叡人教授嘅新書終於上架有貨喇！臺灣人究竟係唔係一個民族？呢個恐怕係我哋無辦法亦都可能唔敢輕易回答嘅問題。如果臺灣人係一個民族，咁呢個民族係喺幾時開始形成？吳叡人係臺灣享附盛名嘅民族主義學者，專門研究臺灣人喺唔同時代及政治環境之下，點樣形成自己獨特嘅身份認同。呢本書係吳教授嘅博士論文，由臺灣嘅日治時代開始，討論臺灣人喺殖民體制裡面，搵出自己究竟係邊個嘅過程。 因為殖民經歷而產生新嘅民族認同，喺世界史上都唔係罕見嘅事。印度、印尼、新加坡，以至無數非洲、美洲國家， 都係因為殖民地而建立嘅國家，而臺灣當然亦都唔例外。當臺灣喺1895年成為日本殖民地，臺灣人就喺地理上同政治界線上都同中國分割，於是隨住社會同差異越嚟越大，原有嘅「漢」、「華」認同就開始漸漸減弱。同一時間，殖民政府刻意推動唔同程度嘅同化政策，由上而建構一種將臺灣、朝鮮、北海道、沖繩等日本殖民地或邊陲地區連結埋一齊嘅獨特認同，但係又仍然維持住日本人同臺灣人之間嘅階級分野。於是，唔再係中國人，但又做唔成日本人，就唯有做臺灣人。 殖民時代，臺灣人透過模仿、複製、學習、跟從日本人，建立自己嘅現代社會，而呢種現代性亦同時令臺灣人察覺自身與其他族群嘅差異，日本殖民者於是成為臺灣身份嘅「母體」；然而，臺灣人喺透過同化爭取權益失敗後，開始轉而反抗殖民統治，極力擺脫支配嘅渴望催生更強烈嘅本土認同，殖民者於是亦同時成為臺灣身份嘅「他者」。臺灣民族主義嘅發展喺二戰結束，接受中華民國統治時被時代生硬咁斬斷，到解嚴後反而又以另一種形態重新冒起，更承受截然不同嘅挑戰。當弱小民族必須透過國家建構嚟抵抗威脅，臺灣人嘅未來又可以往邊個方向前進？ 💡除咗政治上嘅民族主義之外，臺灣人亦喺1930年代開始發展文化民族主義，發掘何謂臺灣文化，逐步建構出臺灣人嘅民族文化論述，最終成為建構國族嘅重要資源。 【店長精選：唔好果本唔敢揀】 臺灣史是什麼？ 吳密察｜大家出版 ISBN：9786267561256｜HKD$193 應該點樣擺脫外來史觀嘅宰制，書寫自己國族嘅歷史？臺灣嘅主流歷史空間，被外來論述侵佔咗好多年，由殖民年代被灌輸日本史觀，到戰後被中華民國以中華史觀覆蓋，臺灣自己嘅聲音則極難被聽見，直到近四十年嚟先慢慢重新建構。不過，其實咩先係「臺灣自己嘅聲音」？ 實際上，有零開始建立一個本土史觀，係聽落好容易，但一落手做就會發覺極困難嘅任務。係咪打破咗以往宰制歷史話語嘅中華天朝史觀，推翻咗以往嘅觀點，就直接等於本土論述？太過魯莽地批判以往嘅所有主流觀點，又會唔會好容易矯枉過正，失卻學術研究應有嘅客觀同專業？況且要話要打破中華史觀，本身都好難，過往主流史觀深入民心嘅程度通常都比我哋想象中更加無孔不入，好快大家就會發現，可以雕琢、思考同批判嘅主題同細節都實在太多太多，沒完沒了，而好多觀念亦喺大眾之間根深蒂固，難以改變。 所以，呢本書嘅主要部分，介紹臺灣史學史嘅歷程，深入咁討論「臺灣主體歷史」應該係點，唔應該係點，亦都針對性咁透過一啲歷史事件為例子，講述既有中華史觀同臺灣本土史觀之間描述嘅差異，以及點樣破除舊有嘅觀念。更重要嘅係，咁樣嘅臺灣經驗實在非常值得香港參考——擺脫咗中華史觀，係咪會好容易唔小心跌入殖民史觀裡面？為咗擺脫中華史觀對本土社會嘅貶低，會唔會過分抬舉某啲本地人事喺歷史上嘅重要性？身為邊陲地帶，擺脫咗中國研究嘅框架之後，又點樣說服國際學術界，呢個地方嘅歷史仍然值得研究，對世界歷史學術討論有所貢獻？但凡希望從事香港本位歷史書寫嘅同工，其實都好值得參考臺灣嘅經驗。 💡本土研究唔能單靠個別學者嘅熱情，而需要體制上嘅資源同空間。臺灣喺1993年先開始籌備建立第一個臺灣史研究所，亦反映在此之前體制對臺灣史嘅擠壓同蔑視。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 博物館歷史學（I + II） 黃貞燕、謝仕淵｜國立臺灣歷史博物館 ISBN：9789865324681｜HKD$380 一個社會嘅主要博物館，通常都係由政府公家經營，並且有一定權威嘅機構，向大眾展示一種歷史、文化嘅論述。所以，博物館點樣呈現歷史，係會喺好大程度上影響大眾如何看待某段歷史。喺威權嘅國度，政府往往會利用博物館嚟宣揚統治者嘅意識形態，而喺民主嘅國度，雖然都無可避免會有政治宣傳嘅成分，但更多時候亦會嘗試透過博物館，引導民眾反思歷史、以更多元嘅視角理解過去，甚至係容許大眾參與博物館嘅策展。 臺灣解嚴之後，由過去國民黨嘅極權統治，慢慢轉型成為民主政治。社會上唔同層面，都需要慢慢適應同調整出新嘅行事方式，而博物館都一樣。歷史博物館需要由威權時代嘅政治宣傳機器，轉型為民主體制下幫助民眾思考同學習嘅場所，究竟具體應該點樣做？移除同修正獨裁者嘅意識形態論述，只係第一步。投放資源喺之前被忽視嘅地方歷史、將策展過程民主化、更改博物館典藏同收集文物嘅準則等等，都係重要嘅步驟。 而博物館亦都唔係單向嘅灌輸同教育工具，而係政府、學者同公眾之間嘅對話平台。政府有本土意識需要培植、學者有自己嘅專業需要維持、大眾亦有自己嘅熱情同興趣，呢三股力量可以點樣喺博物館嘅策展裡面得到充分嘅表達同平衡？呢本書收錄幾十篇文章，利用臺灣嘅案例，探討博物館喺一個新興嘅民主社會裡面，可以對政治、學術、公眾發揮乜嘢作用，仲有一間博物館，可以喺實務上如何幫助知識生產、塑造身份認同、促進公民實踐，同埋回應社會課題。當然，臺灣嘅經驗，未來亦會成為香港重要嘅借鑑。 💡臺灣民族主義，其實唔完全係近代喺中華民國威權統治下嘅產物，早喺日治時代，臺灣就已經因為對殖民宗主嘅排拒，而移植中華民族主義。呢點，某程度上亦與香港相似。 【店長精選：唔好果本唔敢揀】 不是博物館指南 默泉、余寶茵、唐冠聰、劉德欣、李挽靈、麥穗、鄒頌華、馮靜雯 毫末書社｜HKD$188 博物館並唔單止係一堆文物同藝術品擺出嚟俾大家睇同影相打卡嘅地方，呢點相信都唔難明白。博物館透過唔同嘅設計同策展，可以為入場嘅民眾提供截然不同嘅參觀體驗，亦可以令民眾袋到唔同嘅嘢走。所以，當我哋走入博物館嘅時候，除咗館藏嘅文物、藝術品之外，博物館本身，都可以係一個鑑賞對象。接下來要問嘅問題當然就係，咁博物館應該點睇好？ 確實，喺我哋參觀博物館嘅時候，係有好多種唔同嘅方法，去觀察同欣賞設計同策展者喺建立呢座博物館嘅時候所花嘅心思（又或者係察覺出懶惰嘅策展者點樣喺應該花心思嘅地方無花心思）。例如係，博物館點樣設計參觀路線？大家係必須要跟從特定嘅路線，一個一個展區咁睇，定係可以喺一個無先後次序之分嘅空間裡面，自由地選擇自己想睇邊個部分先？又或者，喺展覽裡面，邊啲文物或主題被放大、最吸引注目、得到最多介紹？而邊啲部分又只能瑟縮於展廳邊緣，甚至根本無擺出嚟？ 唔同國家嘅博物館，所關注嘅議題、需要回應嘅社會期待、策展行業嘅傳統、文物保存嘅程度，通通都唔一樣。所以，參觀唔同地方嘅博物館，自然都可以參透出唔同社會觀念、文化土壤，以至政治氣候，如何產生出唔一樣嘅博物館參觀體驗。呢本書有八個作者，分別書寫包括香港在內，八座遍佈歐亞城市嘅博物館。唔同領域出身嘅博物館迷，又如何以香港視點，透過博物館，解構世界唔同文化嘅呈現方式？  💡相比起其他國家習慣收費，英國好多主要公營博物館都有免費入場傳統，鼓勵民眾參觀，提升社會文化同時達到政治宣傳。不過呢個傳統成為正式政策，其實係2001年嘅事。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 A Medical History of Hong Kong: 1842–1941/1942-2015 Moira M. W. Chan-Yeung｜CUHK Press ISBN：9789882370852｜HKD$360 香港係一個瘟疫中誕生嘅城市。由開埠無幾耐開始，維多利亞城就爆發「香港熱病」（瘧疾），導致大量白人死亡，亦都為香港帶嚟疫埠嘅名聲。之後果百幾年，鼠疫、肺癆、霍亂、天花、腳氣病等等亦都反覆侵擾呢座城市，甚至到近幾十年，禽流感、沙士、登革熱、豬流感、武肺，好多香港人 相信都依然歷歷在目。 點解香港咁多病痛？事關香港喺對抗任何傳染病嘅侵襲，都有好多先天嘅限制同難處。例如係潮濕炎熱嘅氣候導致疾病好容易傳播；極高密度嘅人口令傳染病快速蔓延；人口長期流動，而毗鄰大國一直處於動亂而無法普及疫苗，都導致當地每有瘟疫爆發都必然波及香港。喺咁嘅環境之下，香港嘅醫療體系喺開埠後逐步建立，並喺百幾年間不斷擴張。政府、英商、華商相繼建立服務唔同對象嘅醫院，形形式式嘅疫苗喺十九世紀末開始陸續引入香港。好多昔日不斷輪迴爆發嘅瘟疫，例如天花、鼠疫、霍亂，都已經係今日嘅香港徹底消失。 不過，殖民政府推動香港醫療體系進步嘅同時，亦都曾經推出過唔少爭議政策。唔少醫療衛生措施，都係以維護殖民政權嘅目的推行，例如強制娼妓定期驗身，就係急切要解決性病喺軍隊中蔓延嘅問題。而當殖民者無視本地既有嘅文化同生活習慣，將歐洲對疾病嘅理解強行套用喺本地人身上，自然都會引嚟反抗，例如係鼠疫期間嘅強制隔離。所以，呢百幾年間香港所慢慢建立嘅，唔單止係科學化同現代化嘅醫院同設施，仲有顧及香港人生活方式同文化習俗嘅醫療體系。 💡香港第一間醫院係位於威靈頓軍營內嘅皇家海軍醫院，喺開埠當年就建立，不過呢間臨時倉促搭建嘅醫院好快就被颱風破壞而要轉移到船上，到1873年先同海員醫院合併。 【店長精選：唔好果本唔敢揀】 A Documentary History of Public Health in Hong Kong Yip Ka-che, Wong Man Kong, and Leung Yuen Sang｜CUHK Press ISBN：9789629968366｜HKD$420 公共衛生係一個都幾廣闊嘅範疇，包山包海，由起醫院同清掃街道，到滅鼠、處理污染，再到精神心理健康、疫苗政策、殯葬設施，以至醫療教育以及醫生護士嘅培訓，都係公共衛生嘅一環。要寫一部完整嘅香港公共衛生史，難度亦實在係高。呢部書亦唔算係一套完整嘅歷史論述，但係透過一系列關鍵嘅史料文獻，到算係拼湊出香港公共衛生發展嘅畫面。 呢本書有兩個比較重要嘅視角，首先係政府嘅公共衛生政策同體制，包括一系列官方衛生機構。由開埠初期嘅殖民地總醫官（Colonial Surgeon）、潔淨局（以及之後改組而成嘅市政局），到戰後陸續建立嘅衛生署、醫管局等。呢啲官方同半官方架構，既有處理同改善公共衛生問題嘅任務，同時亦都有唔少政治難關要面對——推行西醫普及，要點樣處理華人嘅反抗同排斥？針對食肆頒佈嚴格嘅衛生標準，要點樣令商界條氣順啲？面對人口過度密集造成嘅衛生問題，可以點樣令其他政府部門配合？ 另一方面，呢本書亦都提供咗好多社會各界自願投入嘅角度。當政府無財力提供醫療建設，教會就落力贈醫施藥，一方面填補政府做唔到嘅空缺，亦都提升傳教嘅效果；當西醫醫院被廣大華人社群排斥，香港嘅一眾紳商就籌錢建立東華醫院，照顧民眾嘅同時，亦都增強自身嘅政治影響力。隨住各大教會同慈善團體規模日益壯大，而國際局勢瞬息萬變，佢哋亦各自承擔咗一啲醫院以外嘅服務，例如係運送客死異鄉華工嘅遺體、協助戰後中國難民等。 💡香港歷史上唯一一次官方認可嘅全民公投，係1896年潔淨局公投，內容係潔淨局議員應否以非官守成員佔大多數，結果以民主一方九成得票勝出，但最終仍被倫敦否決。 此篇書訊刊於 每週一 發出的獅墨書訊，歡迎免費訂閱

文：Isaac 【最新到貨：新鮮滾熱辣上架】 榮歸君國:香港戰役中的加拿大軍團  周家建｜三聯書店  ISBN：9789620453144｜HKD$138    「幫緊你幫緊你……」而家提供救生艇計劃，以前又派人嚟幫手打仗。加拿大呢個國家唔知由幾時開始，就同香港結下不解之緣，喺重大嘅歷史時刻總會見到佢嘅蹤影。 今時今日，香港保衛戰嘅描述好似慢慢融入咗成為中國抗日戰爭嘅一部分咁。但其實喺當時而言，香港同新加坡，關島等地，更加屬於一個太平洋嘅重要據點。加拿大同香港當時都係英聯邦嘅一份子，喺面對共同敵人時，兩地之間嘅守望相助，更加值得我哋去深入了解。     二戰爆發之後英國時刻評估日本攻打香港嘅可能性，以及預計幾時發兵。加拿大同香港一樣最高君主係英皇，加上英國有意去營造國際壓力去阻嚇日本，於是喺香港保衛戰正式爆發前就已經有一班加拿大士兵被派往香港接受訓練，隨時準備應戰。雖然最終加軍嘅增援都無阻止日軍侵略香港，而香港守軍亦喺十八日激戰之後投降，但加拿大人並無喺戰事結束而翻屋企。相反，佢哋同其他戰敗香港軍人一樣，都淪為階下囚，被送往戰俘營。呢本書亦都有著墨當時嘅環境，以及加拿大人喺當中嘅經歷。當年嘅戰俘營亦係現今港人所熟悉嘅地點，包括深水埗，北角等。    加拿大兵喺香港保衛戰損失慘重，使到佢哋喺二戰時有一個口號 – Remember Hong Kong。連遠在北美嘅國家都會好好記錄佢哋曾經喺呢片土地上留下嘅印記，咁屬於香港嘅歷史，我哋又點可以咁輕易遺忘？  💡 香港保衛戰期間，率領皇家來福槍營同溫尼伯榴彈兵營來港嘅羅遜准將，喺黃泥涌峽奮戰身亡，係加軍在港陣亡最高級將領，現葬於西灣國殤紀念墳場。 【店長精選：唔好果本唔敢揀】 Target Hong Kong: A True Story of U.S. Navy Pilots at War  Steven K. Bailey｜Osprey Publishing  ISBN：9781472860088｜HKD$320    隨著日本在1945年8月投降，香港保衛戰後嘅三年零八個月終於結束。香港好似乜都無做，痛苦歲月就隨著日本無條件投降等外部環境嘅變化而完結。然而事實上又係咪真係咁？     呢本書正正就係補充番呢段歷史嘅缺口。原來, 當香港喺1941年淪陷之後，盟軍對香港嘅關注並無因此而消失。喺呢本書裡面，六名美國海軍飛行員同埋一名英國戰俘會帶你返到世界大戰完結前嘅七個月，飛行員 John Lamade 將空襲目標放喺日佔香港，探索解放香港以及其他東南亞地區嘅可能性，呢個作戰被賦予代號「感恩行動」。 1945年一月，美國第三艦隊成功炸毀多艘日本船隻及飛機，加上空襲對貨船及油輪的破壞，成功切斷日本的戰爭供應路線。連番空襲使戰爭踏入三月時，日本更加停止派出船隻到南海，使日軍喺亞太地區嘅勢力日趨減弱。    當然，故事遠比上述文字更為複雜有趣。究竟咩係「第八目標」，「三個X」又係指咩？香港日治時期唔淨止係「三年零八個月」呢個數字咁簡單，背後世界大局，亦好值得我哋發掘。   💡 「感恩行動」並非個個都感恩。喺香港對面，葡萄牙政府認為美國呢個軍事行動破壞咗澳門嘅中立性而提出抗議，使到美國政府為事件道歉。 此篇書訊刊於 每週一 發出的獅墨書訊，歡迎免費訂閱

📖 《觀心自在：香港觀音誕與觀音信仰探源》 駱慧瑛｜天地圖書出版｜HKD$188 ISBN：9789888549344 「我又唔拜觀音，呢本書關我咩事？」 雖然未必個個都拜觀音，但觀音信仰其實對香港嘅宗教文化嚟講係好重要嘅構成部分。香港芸芸廟宇入面，天后廟固然最多，但觀音亦不遑多讓，舉凡觀音廟、蓮花宮、水月宮等等，都係拜觀音。好多廟雖然唔係以觀音為主神，都有兼奉，甚至好多人家中都仲會有觀音像。呀，大埔仲 有好大個觀音像。 觀音信仰究竟點嚟？佢同天后唔同，係佛教、道教同民間信仰都有各自供奉唔同版本，係唔同嘅場合會展現好唔同嘅面貌。例如，觀音本來係佛門清淨地供奉嘅菩薩，但去到觀音廟，就變成搵錢求財嘅對象，講緊觀音借庫。 香港人拜觀音，同其他地方原來又唔太一樣。原來觀音借庫本身又係香港先有，而香港嘅中秋節舞火龍習俗，原來都同觀音信仰有關。再講多啲，觀音信仰可能比我哋想象中仲要普及：警察拜關公就大家都知，咁救生員拜咩？除咗拜天后就係拜觀音，因為觀音慈悲為懷，打救眾生。 不過，拜觀音嘅人多，認真研究觀音嘅人少，呢本可以話係近年對香港觀音信仰嘅發展同特色整理得最完整同全面嘅作品。 💡除咗大埔慈山寺之外，香港仲有另一座巨型觀音像，坐落喺淺水灣鎮海樓公園。 📖 《先賢之路：西貢天主教傳教史》 阮志偉、余嘉浩、許家朗、敖子亮 中華書局出版｜HKD$158 ISBN：9789888759743 行開山嘅朋友可能都有察覺，喺新界唔同地區行山，走入鄉村，通常都會見到廟，但係去西貢呢，經常都會見到天主教堂。西貢呢個話細唔細，話大亦唔算大嘅地方，竟然有十幾間天主教堂。點解會咁㗎呢？原來天主教喺西貢扎根已經百幾年，而且西貢仲係呢啲傳教士最成功嘅地區。 話說喺香港開埠無幾耐，天主教嘅傳教士就已經嚟到香港傳教，但佢哋嘅活動範圍唔止係香港島，仲包括未納入殖民地嘅新界。點解佢哋要去到咁遠？當地居民已經世世代代信仰原有嘅滿天神佛，啲神父用咩方法改變佢哋？點解佢哋又會願意配合？講返轉頭，原來點解西貢係最成功，係同當時西貢嘅人口結構有關。 不過，啲神父去到西貢原來都唔係一帆風順。中間經歷咗好多困難，包括村民嘅敵意、缺少經費、惡劣嘅工作環境，仲要好多蚊（係呀，因為有瘧疾嘛）。除此之外，可能仲要應付好多外部嘅威脅，例如係自然災害（颱風吹冧教堂）、政治上的爭鬥，甚至係戰亂，二戰期間就有好幾多傳教士同教徒被日軍同山賊殺害。 💡1860年代，有個義大利神父曾經率領十二個西貢村民打敗咗惡霸地主派嚟嘅民兵。 此篇書訊刊於每週一發出的獅墨書訊，免費訂閱

【最新到貨：新鮮滾熱辣上架】 All at Sea:  A Memoir   Alan Loynd｜Proverse Hong Kong  ISBN：9789888492190｜HKD$98    原來呢，貨櫃係六十年代先開始出現嘅產物嚟，以前嘅貨船，係唔用貨櫃的。香港係一座海洋城市，亦都係世界最重要嘅港口之一（well，至少曾經係），每日都有無數嘅大小船隻出入。呢個係我哋一直以嚟對香港喺呢個世界上定位嘅想象，好似香港本來就係一個繁忙嘅貨櫃碼頭咁。但究竟對於真正揸船駛入維多利亞港嘅船長而言，佢見到嘅又係點樣嘅景象？    呢本回憶錄嘅作者Alan Loynd係一個英國船長，喺貨櫃啱啱出現嘅六十年代末成為海員。Alan最初係加入皇家輔助艦隊做水兵，喺六年之間累積咗豐富嘅航海經驗，之後就加入咗太古集團旗下嘅航運公司，成為二副，後來更升任船長，指揮過客輪、貨船，仲有好多港內船隻，例如拖船，甚至仲有好多專門喺鑽油台工作嘅船。當然，亦都經歷過香港嘅港口設施由只能處理散裝貨，到興建貨櫃碼頭，可以大量吞吐貨櫃嘅轉型過程。    Alan嘅呢本回憶錄唔止係記低咗佢個人嘅經歷同故事，仲係側寫緊香港以至成個西太平洋嘅航運史喺近五十年嚟嘅變化。由散裝貨變成貨櫃，由各國都有自己嘅商船隊（Merchant Navy）去到船公司可以自由揀喺咩地方註冊（通常係海事法律最寬鬆或最容易逃稅嘅國家），甚至係好多太平洋島國都開始發展航運嘅過程，當中自然不乏驚險刺激，但亦有唔少細膩嘅觀察。  💡 1993年颱風艾拉吹襲期間，中華航空一架波音747客機喺啟德機場降落失敗，衝出跑道墮入海中。幸好事件中無人遇難，但就造成啓德機場嘅跑道需要關閉。飛機兩星期後先喺觀塘碼頭對出海面打撈翻上嚟，而負責打撈嘅，就係本書作者Alan Loynd。 【店長精選：唔好果本唔敢揀】 Coolie Ships of the Chinese Diaspora (1846 - 1874)  John Asome｜Proverse Hong Kong  ISBN：9789888491988｜HKD$320    航運交通嚟講，通常唔係靠貨船運貨，就係用客輪運人。不過，如果人本身就係貨呢？咁係用貨船定喺客輪嚟運？事關喺十九世紀中後期，中國最大嘅出口商品，就係「勞工」。隨住美洲、大洋洲同東南亞急速開發，產生大量勞動力需求，好多中國人開始被送往當地工作賺錢，當中有好多係自願冒險，亦有唔少係被迫被騙被賣。而香港，就係絕大部分呢啲工人出發嘅港口。    有啲讀者可能已經有睇過冼玉儀教授嘅《穿梭太平洋》（如果你未睇就㩒呢度），當中好詳細咁分析咗呢種勞工貿易嘅興起同發展，以至係佢點樣構成殖民地早期香港嘅經濟支柱。不過，如果由一個微觀啲嘅角度討論，咁果啲勞工究竟係坐點樣嘅船由香港前往外埠？佢哋喺呢啲船上面會有點樣嘅待遇？呢段航程裡面佢哋可能會經歷過啲咩事？係咪所有呢啲華工，都好似主流敘事裡面講，一定全部都受盡虐待，慘無人道呢？    呢本書詳細研究咗七百幾段來往香港同各地外埠嘅苦力貿易航程，分析佢哋嘅航海日誌同相關檔案，提供咗大量嘅數據，嚟呈現十九世紀跨太平洋苦力貿易嘅面貌。呢本書比較側重於「以數字說話」，包含大量統計數據，如果係喜歡呢種論述風格嘅讀者，應該會對呢本書有興趣。  💡 前往中南美洲嘅航程往往都係最危險同不人道，喺1846至1874年之間，有將近三十萬華工出洋到祕魯、古巴，以至英屬、法屬、荷屬西印度等埠，但其中有超過百分之十五嘅乘客，係無抵達目的地，有啲喺船上身故，有啲遇上意外葬身大海。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 南洋書話：香港、南洋、民國舊書刊記述  蕭永龍｜季風帶出版  ISBN：9786269672257｜HKD$130    好多人都覺得而家嘅書好貴，究竟書應該賣幾錢先叫「平」？當然低處未算低，不過原來五、六十年代，香港曾經流行過「三毫子小說」，就係售價低至三毫嘅薄裝小說。低廉嘅售價好容易俾人品質參差嘅印象，而確實唔少三毫子小說都係愛情、偵探、鬼怪等流行題材嘅通俗作品。不過，同一時間，其實都有好多文學名家嘅作品都係以三毫子小說（或後來加咗價嘅四毫子小說）形式出版，例如係劉以鬯、亦舒、西西、蔡炎培等等。    五、六、七十年代，可以算係香港文化界相當豐富精彩嘅時期。冷戰格局下，喺香港活動嘅各種政治派別，不論係美國、中國、臺灣，定係所謂「第三勢力」，都會想盡辦法投入資源支持各種文藝生產，以期搶佔輿論市場，完成文化上壓制敵人嘅目標。三毫子小說，最初就係美國政府新聞處贊助嘅《小說報》出版同發行。    除咗三毫子小說之外，當年仲有好多唔同形式嘅書刊出版物，提供咗好多唔同嘅發表園地，亦都孕育咗唔少後來名聲昭著嘅大作家。冷戰果幾十年，東亞時局不穩，經濟仲未起飛，多方角力之下出版亦多有審查，不過偏偏就係咁樣嘅時代，造就咗一批當代香港文學嘅大前輩。  💡 三毫子小說喺七十年代逐漸沒落，因為本身係廉價品，加上紙質粗糙不易保存，所以好多書當時都無留低，到近年先成為收藏家高價競購嘅寶物。 【店長精選：唔好果本唔敢揀】 想像與形塑：上海、香港和台灣報刊中的張愛玲 梁慕靈｜秀威資訊  ISBN：9786267088241｜HKD$160    問大家一個問題：張愛玲算係香港作家、中國作家，定係美國作家？    張愛玲喺上海成長，喺香港讀大學，好多經典作品都係喺呢兩座城市完成，但後來又遷居美國並喺當地度過餘生，所以話佢係三地作家，好似都唔算錯；如果計埋佢大量嘅作品都係靠臺灣嘅皇冠出版社再版發行（佢本人都係靠皇冠版稅維生），咁可能都會有人認為佢可以算係臺灣作家添。    就算本身唔多睇文學，我諗都好難有人真係未聽過張愛玲呢個大名，《傾城之戀》、《第一爐香》、《色戒》都係大家耳熟能詳嘅作品。不過，其實張愛玲係一個點嘅人？重點係，張愛玲本人嘅模樣係一回事，透過佢嘅作品認識嘅張愛玲係另一回事，而喺媒體、報刊同文學評論裏面建構出嚟嘅張愛玲就更加未必一樣。甚至——呢啲媒體嘅描述之中，張愛玲仲在世果陣嘅形象，同佢已經過身之後幾十年間嘅形象，都可以有好多變化。    其實歷史學本來就係咁樣嘅一回事——歷史人物嘅形象往往就係由唔同嘅書寫者不斷建構同改寫而成。香港、中國、臺灣報刊中所描繪嘅張愛玲，往往又會因為各自嘅立場同讀者風向而有所唔同。三者堆疊，又係咪可以得出比較貼近真實嘅版本呢？  💡 因為張愛玲曾經喺日佔上海生活，所以戰後初期曾經有啲中華民國同臺灣嘅學者指責張愛玲係「文化漢奸」、「女漢奸」等等。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 林護：孫中山背後的香港建築商 陳慕華｜馮以浤 譯｜中大出版 ISBN：9789882370005｜HKD$180 起樓救國，聽落真係非常適合香港人嘅政治理想。講起「地產」，可能好多讀者我諗都已經直接聯想到「霸權」，能夠諗到地產商參與革命嘅人恐怕唔多。林護出生於1871年嘅廣東，年幼去咗澳洲生活同受教育，之後嚟到香港，為設計第二代滙豐總行一炮而紅嘅建築商巴馬丹拿（又名公和洋行）打工，正式入行。喺行內累積經驗，羽翼漸豐之後，佢先後創辦自己嘅合益公司同聯益建造公司，到二十世紀初已經成為香港建築界嘅主要企業。 因為識講英文，又係聖公會教徒，所以林護亦都接到好多政府以及教會嘅建築項目，包括聖保羅堂、拔萃男書院、聖士提反書院、港大馮平山圖書館，以至係立法局大樓等。除此之外，好多對香港歷史發展舉足輕重嘅建築項目，都係出自林護手筆， 例如係擴建黃埔船塢、大埔公路同青山公路部分路段、灣仔填海、油麻地小輪碼頭、永安百貨等等。可以話，林護係有份「建設」二十世紀初嘅香港。 香港嘅地產商，又點可以無政治影響力？林護係備受尊重嘅華商，自然喺華人社會之中都有幾分話事權。例如，林護參與過「反對蓄婢會」，主張禁止買賣同蓄養妹仔奴隸。而好似當時其他華人紳商一樣，林護一半出於民族主義嘅號召，另一半出於長遠商業利益嘅考量，亦積極介入中國嘅政治。林護相信商業救國，喺清末民初大量投資中國各地嘅建築項目，一方面推動中國現代化，另一方面亦用所得利潤嚟支持孫中山嘅革命。 💡葵涌嘅聖公會林護中學，大家可能都聽過，當然係紀念林護；與此同時，荃灣嘅聖公會林裘謀中學，則係紀念林護個阿哥林裘謀（林護原名林裘焯）。 【店長精選：唔好果本唔敢揀】 香港利氏家族史 利德蕙｜顧筱芳 譯｜中大出版 ISBN：9789629965068｜HKD$100 銅鑼灣希慎廣場，同鴉片有咩關係？話說希慎廣場個「希慎」，係指二十世紀初香港大地產商利希慎。利希慎係當時香港最有影響力嘅其中一位華商，利氏甚至人稱香港早期四大家族之一。佢係銅鑼灣嘅超級大地主，好多建築物都關佢嘅家族企業事，例如利舞臺、利園山等。銅鑼灣嘅希慎道當然係以佢命名，而點解希慎道又連接住四條平排以四邑地名為名嘅街道（新會、開平、恩平、新會）？因為利希慎係四邑人嘛。 二十世紀初嘅銅鑼灣，軒尼詩道以北都係怡和嘅工商業重鎮，怡和嘅總部、貨倉、碼頭、冰廠、糖廠都喺呢度。軒尼詩道以南，至禮頓道之間呢，就係利希慎嘅地產王國。1920年代，利希慎大量購入銅鑼灣嘅土地，命名為利園山，先後發展利園遊樂場、利舞臺戲院、利園酒家、利園酒店等，今日銅鑼灣係港島人習慣出沒嘅娛樂消遣商業區，原來都有一百年歷史。 咁關鴉片咩事？咁，你覺得利希慎買咁多地嘅資金喺邊度嚟？利希慎老竇早年喺美國淘金熱發跡後嚟到香港做生意，並誕下利希慎。利希慎喺香港讀書成長，識英文、可以同鬼佬打交道，於是順利取得鴉片專營權，搵到自己嘅第一桶金。利希慎好快就成為香港嘅「鴉片大王」，甚至當初會買銅鑼灣嘅地，本來就係諗住起鴉片提煉廠，只不過政府開始禁鴉片先作罷。至於1928年，利希慎離奇被暗殺死亡，係咪真係同鴉片生意有關，就信不信由你了。 💡1928年4月30日利希慎喺中環被人連開三槍射殺，至今仍未破案，不過利氏家族就認為係同利希慎之前喺澳門爭贏鴉片專賣權，因此與人結怨有關。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 Where Empires Collided: Russian and Soviet Relations with HK, Taiwan, and Macao Michael Share｜CUHK Press ISBN：9789629963064｜HKD$400 共產黨嘅陰霾籠罩香港近一百年，不過唔係講緊中共，而係講緊蘇聯。成日話香港歷史上位處大國夾縫，通常都係講緊英國同中國之間，或者美國同中國之間。但咁講似乎就會忽略咗國際博弈老是常出現嘅大國俄羅斯（後來變咗蘇聯，之後又變返俄國）。喺俄羅斯同西方世界嘅算計之中，香港處於一個咩位置？百幾年間，香港由大英帝國遠東最重要嘅殖民地，到冷戰期間資本主義陣營嘅前線據點，對於長期與英美不合甚至敵對嘅俄國同蘇聯嚟講，香港必然有重要嘅戰略意義。 早喺開埠之初，香港就已經捲入英俄「大博弈」之中，尤其係喺俄國面對嘅戰爭裡面，香港都成為反俄軍隊嘅基地——克里米亞戰爭中皇家海軍派出嘅艦隊就係喺香港出發北上、日俄之爭期間香港亦都因為英日同盟而容許好多軍事物資出口到日本；當然，到一戰期間英俄變返同盟果陣，香港亦都輸出咗唔少物資支持俄國。十月革命後，蘇聯對香港嘅政策可以話就同中共一樣係長期利用，充分打算。例如二十年代，蘇聯就透過支持省港大罷工等，希望造成香港內部動盪，甚至希望利用香港嚟支援中國同東南亞嘅共產革命；但到三十年代，又希望支持香港發展成重要嘅貿易同軍事基地，以制衡日本嘅擴張；冷戰果陣，蘇聯亦都同中國一樣，利用香港取得西方嘅技術、外匯同情報。 香港嘅涉外關係史一向有唔少學者關注，寫過好多關於香港同英國、美國、臺灣、中國、日本，以至東南亞關係嘅研究。不過，似乎俄國同蘇聯就甚少有人研究，畢竟要熟悉香港史嘅同時，又要識俄文以及能夠進入俄羅斯檔案館，實屬不易。呢本書同時亦都涵蓋蘇聯對澳門、臺灣關係，尤其提到蔣介石政權驚被美國放棄而開始親近蘇聯，同樣精彩。 💡喺十九世紀，俄羅斯帝國就已經喺香港設有領事館，收集好多關於大英帝國嘅情報，到蘇聯時代先撤出；而六十年代中蘇交惡後，蘇聯連廣州嘅領事館都關閉埋。 【店長精選：唔好果本唔敢揀】 China, Britain and Hong Kong 1895-1945 Chan Lau Kit-ching｜CUHK Press ISBN：9789622014091｜HKD$195 陳劉潔貞教授1990年出版嘅呢本經典，可以話係香港涉外關係史早期嘅重要作品之一。當年正好係香港面臨九七大限，唔少學者都不斷思考香港可以點樣喺中國同英國嘅政治角力之中搵到自己嘅生存空間。喺咁樣嘅時代背景之下，陳劉潔貞研究嘅二十世紀初同樣都係政治劇烈變動嘅時期，而佢寫呢本書就係由香港嘅視角出發，討論中國嘅混亂、英國嘅回應，甚至係日本嘅影響，而香港又點樣係呢個環境裡面爭取自己嘅發言權。 二十世紀初呢段時間可能係香港喺歷史上最能夠介入中國政局，同埋左右英國外交政策嘅時代。中國嘅反清革命係以香港為基地，透過香港嚟做意識形態動員同集結資源，呢點大家都耳熟能詳了；辛亥革命之後，中國嘅局面變得更為混亂，香港嘅商人亦分別由貿易發展嘅立場，支持過孫中山、陳炯明等軍閥；隨後海員同省港大罷工爆發，國民政府喺背後支持工運，香港嘅華商拒絕依從民族主義嘅號召，亦都對平息罷工發揮關鍵作用；蔣介石掌權同埋收服各大軍閥之後，香港政府亦都積極同國民政府談判，維持穩定關係。到中日戰爭爆發，香港嘅處境就更為微妙——一方面香港對中國對日作戰有重要嘅角色，包括轉口戰爭物資、情報蒐集、收容難民、抗日宣傳等，但另一方面亦唔可以太高調支持中國，以免招致日本嘅攻擊，影響香港自身嘅安危。 以上種種，時至今日好多都已經係學界嘅共識，並有唔少學者更深入地討論。但咁並唔影響呢本書成為經典，事關陳劉潔貞正係好早由香港嘅角度提出呢啲觀點嘅人之一，而時值香港身份危機嘅1990年代，佢嘅研究亦恰如其分地回應時代嘅叩問。 💡不滿於孫中山政權嘅需索無度同貪污腐敗，一批商人喺1924年策動廣州商團事變，反抗孫中山。雖然事變最終失敗，不過背後支持廣州商團嘅，正係香港華商。 此篇書訊刊於 每週一 發出的獅墨書訊，歡迎免費訂閱