搜尋結果

【最新到貨：新鮮滾熱辣上架】 致賈梅士  馬瑩瑩｜澳門人出版  ISBN：9789998180991｜HKD$130    賈梅士係四百年前曾經喺澳門生活過嘅一位詩人。葡文名叫做Luís Vaz de Camões，佢係葡萄牙文學史上公認最優秀嘅詩人之一。佢喺1572年寫咗一首史詩《葡國魂》，稱頌葡萄牙建立帝國嘅歷史，被譽為葡國史上最重要嘅文學作品。而呢首詩歷時三十年先寫好，相傳其中一部分就係喺澳門完成。    賈梅士喺十六世紀初生於里斯本嘅沒落貴族，之後喺摩洛哥嘅葡萄牙佔領地開展一段軍事生涯，並喺當地嘅戰事中失去右眼。輾轉之下，佢隨住葡萄牙海軍嚟到東方，先去印度，再到澳門，喺度逗留咗一段時間，相傳仲因此結識咗一位女子蒂娜妹（Ti-Na-Men）。可惜返回葡萄牙嘅途中，佢哋喺湄公河附近遭遇船難，蒂娜妹因此離世，而賈梅士亦輾轉流落到非洲莫三比克（當時係葡萄牙殖民地），被朋友救起。    呢本繪本由賈梅士嘅生平故事開始講起，喺傳說同史實之間穿插，將澳門嘅文學脈絡重新同本應遠在天邊嘅葡萄牙連接埋一齊，亦都描寫喺時代變遷之中，賈梅士同蒂娜妹嘅愛情悲劇。  💡 而家澳門仲有一個賈梅士公園，公園內有一個石洞，相傳當年賈梅士就係喺呢個石洞裡面創作一部分嘅《葡國魂》。 【店長精選：唔好果本唔敢揀】 我和阿嫲的小故事 張月敏｜澳門人出版  ISBN：9789998163003｜HKD$128    《我和阿嫲的小故事》係「澳門人」出版社出版嘅另一本繪本作品。香港近年都有越來越多以本土題材、歷史、懷舊做主題嘅繪本同童書，向小朋友傳達情感同價值觀之餘，都可以帶佢哋認識多啲自己所身處嘅家園。澳門近年亦都多咗呢一類嘗試，呢本繪本就係其中之一。    作者將自己細個同阿嫲喺澳門（以及後來移居嘅臺北）一齊生活果陣嘅各種小互動同細微畫面，畫成一幅又一幅嘅圖畫故事。透過呢啲回憶同片段，除咗係作者自己緬懷阿嫲，亦同大家分享自己嘅成長故事之外，其實亦都側寫咗好多澳門（以及臺灣）社會由以前到現在嘅唔同面貌。    書入面固然畫咗好多舊時澳門嘅街景風光同城市面貌，但對澳門以外讀者（尤其係香港）嚟講，更重要嘅可能係籍住呢啲故事，感受一下澳門其實都係一個多元、豐富同有活力嘅地方。除咗賭場同旅遊景點之外，其實澳門本身都仲有好多值得留意嘅文化同風情。  💡 澳門本土出版越來越多之外，獨立書店嘅數量亦都有逐漸增加嘅趨勢。井井三一就係其中一間澳門重要嘅繪本書店。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 粵語流行曲七十年 朱耀偉 等｜亮光出版  ISBN：9789888820870｜HKD$200    今日，粵語流行曲已經成為香港文化嘅象徵之一，更加係好多外國人對呢座城市嘅第一印象。現今意義上嘅粵語流行曲（即係唔計粵曲或廣東音樂果種），其實早喺上世紀二、三十年代已經出現，有成一百年歷史咁耐。當時，廣東歌基本上都係以電影主題曲嘅形式出現（無錯，香港用廣東話製作嘅電影，亦都有一百年歷史喇）。不過，一直到戰後初期，雖然香港絕大部分人口即使唔識講粵語，基本上都聽得明廣東話，但因為對廣東話嘅歧視以及國語時代曲嘅流行，廣東歌依然都唔係最主流嘅音樂。    按照學界現時嘅主流說法，廣東歌嘅真正興起，大約始於七十年代。學者對於呢個時間點嘅解釋有好幾個。首先係最大規模嘅移民潮已經去到尾聲，香港嘅人口結構大致穩定落嚟，亦意味住廣東話喺香港人口之中嘅地位逐漸鞏固：早期最為人熟悉嘅廣東歌，基本上都係電視劇集嘅主題曲，而無綫電視，正正就係七十年代開始轉用彩色廣播，以及大量製作本地劇集同節目；七十年代，卡式錄音帶喺香港慢慢普及，價錢低廉以及簡單易用嘅優點，都令儲存喺卡式帶裡面嘅廣東歌大行其道。    呢本書集合九位不同世代學者嘅研究，討論咗二次大戰後，廣東歌由無人問津到膾炙人口嘅發展歷程，以及呢段歷史裡面嘅重要議題。  💡 目前認定嘅最早一批廣東歌之一，係1930年由黃壽年主唱嘅〈壽仔拍拖〉，歌詞詼諧較少，但唔太啱音。啱音嘅廣東歌，仲要少少時間先發展出嚟。 【店長精選：唔好果本唔敢揀】 被遺忘的香港管樂史 連家駿｜香港城市大學出版社  ISBN：9789629376857｜HKD$188    究竟西方管樂同印度咖喱有咩共通點？就係兩者都係經由英國嘅軍隊，喺殖民地早期傳入香港。喺1841年1月26日，香港正式開埠，升旗儀式裡面就有英軍嘅軍樂團演奏。於是，管樂第一次出現喺香港嘅土地上（至於咖喱，則係由英軍裡面嘅印度裔軍人帶嚟）。香港早期嘅管樂都係以軍樂嘅形式存在，不過，喺軍隊以外，其實戰前嘅香港就已經有民間嘅管樂團，亦經常有演奏表演。除咗白人之外，華裔居民亦都漸漸開始接觸管樂，甚至係透過管樂，首次接觸西洋音樂。    到咗戰後，管樂開始喺香港相對普及一啲，除咗演出門票嘅售價更為怡人之外，好多學校都開始組織管樂團，俾學生有機會見識同參與呢啲演出。同廣東歌一樣，管樂喺1970年代開始發展更為蓬勃，自1977年政府喺教育司署之下成立咗音樂事務統籌處之後，更開始投放更多資源喺教育同推廣呢種音樂藝術形式。不過，管樂嘅演奏除咗係一種藝術之外，亦都有相當嘅政治或時代意味，例如係冷戰期間美軍艦隊訪問期間嘅軍樂，又或者係警察銀樂隊長期都係政府唯一管樂隊嘅發展等等。  💡 現代意義下嘅軍樂團其實都唔係源自西歐，而係十八世紀初嘅土耳其鄂圖曼帝國。後來西歐國家漸漸學建立起自己嘅軍樂團，更加喺法國大革命後發揚光大。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 比較的幽靈： 民族主義、東南亞與全球  Benedict Anderson｜陳信宏譯｜衛城  ISBN：9786267052242｜HKD$225    「民族」究竟係點嚟？近代世界嘅各種紛爭，由恐怖襲擊到世界大戰，都離唔開民族主義呢個元素。但其實民族係咩，民族主義又係咩，又由邊度變出嚟？相信好多人文社科出身嘅讀者，都有聽過《想像的共同體》呢本書。呢本係民族主義研究嘅經典，奠定咗我哋一般對「民族」嘅理解，佢重要到，我哋而家都成日借用咗「共同體」呢個詞嚟指涉好多其他意思。我哋知道，民族並唔係一個自古以嚟就存在嘅東西，只係去到近代，出於政治、經濟或科技嘅因素，某啲人互相產生咗一種「我哋屬於同一個群體，有共同嘅歷史同文化，並且同其他群體唔一樣」嘅想像。一旦呢個想像喺呢群人之間普遍獲得認同，咁一個新嘅「民族」就算係誕生咗。    呢本《比較的幽靈》呢，就係Benedict Anderson 嘅續作。今次呢本係《想像的共同體》嘅延伸，集中喺東南亞，亦都即係作者本身嘅研究專長。Benedict本身係東南亞研究嘅專家，對印尼、泰國同菲律賓都瞭如指掌。簡單嚟講，Benedict喺呢本書入面，將佢諗出嚟嘅民族主義理論，套用返落去呢三個國家身上，睇下呢三個國家嘅近代民族主義發展，係咪都遵循佢前一本書所提出嘅形式。曾經嘅殖民經驗，撞啱帝國嘅退潮，加上新資訊科技同媒介嘅出現，造就咗東南亞嘅民族主義。作者亦都特別由東南亞嘅案例中觀察到，離散嘅族群係點樣同母國維繫連結，繼而成為母國民族主義嘅一部分，甚至係推動緊母國嘅民族主義發展，或者係喺海外形成另一種民族主義。  💡 Benedict Anderson 最初開始研究嘅就係印尼，不過因為講嘅嘢政府唔啱聽，所以印尼嘅獨裁者蘇哈托就將佢驅逐出境，跟住佢先開始研究泰國同菲律賓。 【店長精選：唔好果本唔敢揀】 Violence and Emancipation in Colonial Ideology  Robert Price｜香港城市大學出版社  ISBN：9789629374495｜HKD$208    如果我哋話，Benedict Anderson 研究東南亞，着重於資訊、文化、思想嘅傳遞點樣成為民族主義發展嘅重要因素，咁Robert Price關注嘅，就係更現實層面裡面嘅政治操作、暴力衝突以至共產勢力嘅出現如何直接催生民族主義。相對於前者主要講緊印尼、泰國同菲律賓，Robert Price 就集中研究馬來西亞尤其係喺戰後年代，英國殖民政府嘅各種判斷同策略，點樣影響意識形態嘅運作。更重要嘅係，「暴力」係點樣被殖民政府同民族主義者置入喺佢哋嘅意識形態包裝裡面，例如係佢哋點樣界定邊啲「暴力」係可以被接受，或者針對邊個嘅「暴力」係可以容忍，甚至係鼓勵。    馬來亞共產黨喺戰後嘅1950年代開始活躍，甚至組成游擊隊同英軍作戰，都係一場反殖民戰爭，不過英國政府為咗喺表面上減低呢場戰爭嘅重要性，就將之描述為「馬來亞緊急狀態」（Malayan Emergency）。作者認為，正正係因為有馬共嘅出現，所以殖民政府推動馬來亞民族主義，作為對抗共產黨嘅一種手段。馬共受中共嘅影響同支持，所以透過建立馬來亞民族主義，凝聚巫族人口，並將所有嘅怨氣都轉移到華人、中國，同共產黨身上。只要將所有社會嘅問題推曬落去啲華人同共產黨人（而同時夾硬放一個等號喺呢兩群人之間），就可以擺脫針對殖民政府嘅各種不滿同指控。咁嘅話，我哋喺咪可以話，其實馬來亞獨立運動，都係殖民政府自己一手搞出嚟？  💡 喺馬來亞緊急狀態期間，其實有香港人參與英軍嘅作戰行動。佢哋係二戰期間喺緬甸作戰嘅香港志願連，喺戰後就被調派到馬來亞參與打擊共產黨嘅行動。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 歷史是擴充心量之學 王汎森｜聯經出版 ISBN：9789570873931｜HKD$117 讀歷史有叉用？呢條其實唔但止係社會對文科生搵唔到食嘅拷問，同時亦都係幾千年嚟世界各大文明哲學家同歷史學者日夜叩問嘅題目。而每一個世代嘅學者，都會因應時代嘅演變，而各自提出唔同嘅答案。例如，最上古時期嘅社會，好多時都會以歷史為預言嘅材料，美索不達米亞同商朝中國都會利用歷史記錄嚟占卜未來；又有啲時代，歷史會成為可以借鑑嘅明鏡，由個人到統治者都可以參考過去嘅事例嚟幫助自己做決定；到咗近代，歷史甚至可以扭轉文化、身份認同。 咁歷史仲可以係乜？現代嘅歷史學家，都已經得出一個共識，就係歷史學可能真係無乜實務上嘅作用。一來，當我哋逐漸明白歷史書寫嘅過程，知道歷史學家無可避免地受制於（甚至主動融合）佢身處嘅時代背景，而寫出嘅內容必然出現唔同程度嘅偏頗，咁歷史仲值唔值得參考？二來，隨住世界變化越嚟越快，我哋同上一刻嘅社會已經差天共地，過去發生嘅事對今日嘅我哋嚟講仲有幾大嘅參考價值？ 於是王汎森教授就提出「擴充心量之學」嘅觀點，將「歷史之用」帶返到個人身上。無論世界如何變化，歷史學都仍然能夠為我哋提供無限嘅想像空間。過去嘅事雖然唔能夠成為我哋行事同決策嘅參考同借鑑，但依然可以啓發我哋思考未來嘅各種可能性；透過由此人嘅視角閱讀世事，亦可以令我哋成為更有同理心嘅人。某程度上，學習歷史並唔單只係累積史實知識繼而淪為談資，而係真正將史學思維內化為修養。 💡唔同早期文明都有記錄歷史嘅習慣，包括上古中國、古羅馬、古埃及等。不過，印度文明係一個特例，除咗融入神話同傳說之外，相對唔太重視歷史書寫同記錄。 【店長精選：唔好果本唔敢揀】 當代歷史學新趨勢 蔣竹山｜聯經出版 ISBN：9789570852684｜HKD$193 舊時代嘅歷史學（包括你我喺中小學階段讀果啲），通常都係集中於帝王將相嘅經歷同行事，以至政治制度嘅演變等等，好多時都係由「上而下」嘅視角嚟書寫。而學習歷史嘅方式，亦不外乎要消化大量人名、年份、制度、事件，難以令人產生興趣。咁又唔係話帝王將相同政治史唔重要，始終呢啲嘢都仍然係我哋理解歷史嘅骨幹同基礎。不過，嚟到二十一世紀，歷史呢門學問已經有長足發展，不論係研究嘅主題視角，以至研究方法都已經有好多新突破。 研究主題上，喺帝王將相同政治史以外，越來越多學者開始由底層社會嘅視角重新書寫歷史。究竟中央朝廷嘅各種政策同改革，喺地方社會上實際係點樣執行？唔同時代嘅普通百姓其實係點生活？喺戰場上嘅勝負以外，戰爭對牽連在內嘅社會帶嚟乜嘢衝擊？呢啲新嘅視野同時亦都帶嚟更多嘅研究主題同面向——性別史、思想史、文化史、生態史、科學史、食物史、情緒史、日常生活史、感官史，全部都係以前歷史學者聞所未聞嘅領域，而家都各自有唔同嘅研究成果睇得到了。 至於研究方法就更加日新月異。學者由以前傾注比較多注意力嘅政府檔案，到而家越嚟越能夠利用多元化嘅史料，包括地方文獻、文學作品、圖像、聲畫、口述訪問、文物等等。呢啲新材料代表更多元嘅視角，令更多唔同人嘅聲音同經歷得以被歷史學家記錄落嚟。而科技發展就更加為歷史研究提供好多新嘅工具。學界越嚟越重視數碼人文學，GIS地理資訊系統、電子資料庫、視覺化數據分析，以至AI應用等等，除咗提高學者工作效率之外，更重要嘅係提供新嘅分析資料工具，繼而幫助學者建構新嘅觀點。當代歷史學已經離「歷史佬埋頭寫書」嘅沉悶刻板印象越嚟越遠，係一門不斷推陳出新嘅學問。 💡感官史係近年新興嘅領域之一，強調由古人嘅感官出發觀察社會，例如係生活喺中世紀歐洲城市會聞到嘅氣味同聽到嘅聲音，可以重構點樣嘅日常生活圖景等等。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 歷史記憶的倫理：從轉型正義到超克過去 許家馨｜臺大出版中心 ISBN：9789863508106｜HKD$247 今個禮拜就係臺灣二二八屠殺七十八週年。1947年二月廿八日，臺北民眾聚集遊行、罷市，抗議政府人員喺查緝私煙期間濫用暴力，導致兩名市民死亡。不過，面對大規模示威，國民政府嘅衛兵就決定用機關槍掃射，殺害長官公署門前嘅市民。暴力鎮壓就當然只會招致更大規模嘅反抗，好快抗爭同衝突就蔓延至全臺北，甚至全臺灣各縣市，而抗爭訴求亦都由單純為遇害市民討回公道，變成抵抗中華民國喺臺灣嘅獨裁同殖民統治。不過，臺灣省行政長官陳儀就決定向蔣介石請求援兵，大量中國軍隊由基隆同高雄登陸，開始大規模屠殺臺灣平民。二二八後，臺灣進入白色恐怖時代，承受國民黨高壓統治，直到八十年代後先逐步民主化。 咁樣嘅歷史，自然會喺社會裡面留低極大嘅創傷。好多臺灣人都會識得一啲親戚或朋友，或朋友嘅親戚，係喺二二八或白色恐怖期間被捕、被虐待，甚至被殺。民主化嘅社會需要重新撫平過去極權體制造成嘅傷痕，就需要推動轉型正義。所謂轉型正義，最終目的係希望過去嘅苦難可以得到公正嘅處理，然後社會就可以真正和解。查清真相（包括所有細節）、建立紀念同保存記憶嘅方式、補償受害者，以及追究加害者嘅責任，都係轉型正義常見嘅做法。 不過，轉型正義當然唔只係搵曬啲加害者出嚟打靶咁簡單。點樣阻止不合乎比例嘅報復？咩為之合理同公正嘅補償方案？支持加害者嘅人又點處理好？仲未計加害者好多時同時係受害者，例如外省人享有某啲特權嘅同時，亦係最常被懷疑係共匪嘅一群；而受害者好多時都有參與加害，舉報鄰居、監視同學、賄賂官員、見死不救……咁要補償佢好，抑或係定佢罪好？乜嘢處理方式，先能真正達致和解，而唔會淪為政治鬥爭嘅工具？ 💡臺灣喺1949年再次戒嚴直到1987年先解除，係世界歷史上第二長嘅連續戒嚴，總共無間斷維持咗三十八年，僅次於1963至2011年間長達四十八年嘅敘利亞戒嚴。 【店長精選：唔好果本唔敢揀】 5.18光州！光州！：決定韓國命運，光州民主化運動全記錄 黃晳暎、李在儀、田龍浩｜林瑞 譯｜二十張出版 ISBN：9786267445693｜HKD$227 舊年十二月，南韓總統以肅清親北韓派系為由，宣佈戒嚴，並派軍隊試圖佔領國會，最終事敗被彈劾下臺。尹錫悅如此粗暴嘅政治自殺，立即就引起南韓社會激烈反對，即使搬出抵抗北韓滲透呢種大義，都無辦法得到任何人支持，除咗因為佢咁做破壞咗韓國民主制度之外，亦都好大程度上係因為佢勾起咗好多韓國人嘅創傷歷史記憶，喚醒近半個世紀前韓國威權統治以及民主運動期間留低嘅傷痕。 而呢個傷痕嘅核心，當然就係光州事件。1979年，時任韓國總統朴正熙遇刺身亡，軍人全斗煥發動政變奪權，隨後實施戒嚴，引發舉國上下新一波民主運動。近代以嚟一直都係政治變革思想重鎮嘅光州，亦都順理成章地成為呢一波抗爭最重要嘅中心。如同所有獨裁者一樣，全斗煥選擇武力鎮壓所有異見，喺1980年五月十八日派遣精銳部隊開入光州，大肆屠殺參與或無參與示威嘅光州市民。事件隨後激發更大嘅民主抗爭，最終喺1987年恢復民主選舉。 呢本書係研究光州事件嘅經典著作，唔單只係因為內容詳盡仔細，而且仲因為佢係由倖存者嘅視角嚟寫（三位作者之中就有兩位親歷過光州事件，佢哋亦訪問咗好多其他倖存者），而且成書於事發後無幾耐。呢本書最初喺1985年出版，即係光州事件僅僅五年之後，所有記憶同痕跡都仍然鮮明嘅時候。經過幾十年由地下刊物，經過修訂同翻譯，終於有中文版面世。光州事件本身就係觀察八十年代亞洲民主化浪潮嘅上佳切入點，由光州事件嘅經過、抗爭者嘅應對、轉型正義嘅執行，通通都能帶俾香港嘅我哋唔少啓發。 💡學者認為八十年代有所謂亞洲民主浪潮，除咗韓國同臺灣之外，菲律賓、緬甸、中國等都掀起大規模抗爭，而香港嘅民主運動，亦同樣喺八十年代開始活躍同冒起。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 Talk Radio, the Mainstream Press, and Public Opinion in Hong Kong Francis Lee｜HKU Press ISBN：9789888208579｜HKD$240 其實JFF Live 嘅【屌你老🔥】算唔算係一種烽煙節目？如果大家有印象，一直去到2010年代，烽煙節目都仍然係大眾輿論嘅重要組成部分，亦孕育出一代廣為人識嘅名嘴主持，好似黃毓民、鄭經翰、吳志森等。所謂烽煙（Phone-in），即係容許聽眾直接打電話到電台同主持人對話。喺香港，政治主題嘅烽煙電台節目最早出現於1969年港台嘅《電話訴心聲》，由民政主任親自擔任主持，直接同市民對話。九十年代同千禧年初就更加係烽煙節目嘅高峰期，單喺港台就試過同時有十四個烽煙節目。 世間無完美嘅社會，每個社會都一定存在大大小小嘅問題以至不公義。社會問題往往導致市民心中累積怨氣，咁當然就需要有自由宣泄嘅渠道。即使係九十年代、千禧年代嘅香港，都唔係日日有遊行，而就算有，都唔係一個「個人」嘅宣泄方式。「城市論壇」係一個俾市民發表個人意見嘅節目，但又唔係人人都想「拋頭露面」。所以，烽煙節目呢種平台對市民嚟講，人人都有機會發聲，個人嘅意見會得到主持嘅回應同重視，同時可以保持匿名，鼓勵暢所欲言。 喺從未享有過民主嘅香港，可以俾市民匿名月旦時政嘅方式唔多。自七十年代起，烽煙節目全部都係現場直播，內容唔經刪剪，縱使主持可能會以個人風格主導同聽眾嘅對話，但大抵上都仍然係最直接呈現市民想法嘅節目。所以喺烽煙節目蓬勃嘅年代，甚至可以係突顯社會對某啲事件嘅回應、反映輿論走向嘅指標，備受政府官員同媒體嘅關注。當然，隨住社會言論空間逐漸收窄，好多烽煙主持離職，節目亦無以為繼。而互聯網興起，亦漸漸產生各種可以取代烽煙節目嘅輿論宣泄渠道。某程度上，JFF Live呢一類嘅YouTube直播節目，亦都做到昔日烽煙節目嘅一部分功能。 💡最早期香港同英國嘅烽煙節目，都有所謂「七秒延播」規定，即係節目上講嘅說話會延遲七秒先喺聽眾嘅收音機播出，目的係俾時間工作人員刪剪內容，例如粗口等。 【店長精選：唔好果本唔敢揀】 Desiring Hong Kong, Consuming South China: Transborder Cultural Politics, 1970-2010 Eric Kit-wai Ma｜HKU Press ISBN：9789888083466｜HKD$160 主流文化往往都反映當時社會環境、氣氛、風氣、觀念、認同。外部嘅變化會影響文化產品嘅內容同呈現方式，而文化產品同社會輿論亦都經常互相影響、互為因果。而無可避免地，「中國因素」喺戰後嘅香港文化發展影響深遠。不論係受眾定係創作人，都當然地將自己對於「香港」同「中國」嘅想像投射到相關作品身上。由電視、電影，到書刊、雜誌，都唔會例外。 七十年代，香港流行文化崛起，大放異彩。呢個時代，戰後本地出生嬰兒潮逐漸長大、香港身份認同逐漸抬頭、廣東話作品更加流行。喺中國文革以及逃港難民潮嘅映照之下，香港人眼見自己經濟起飛，開始培養出優越感，以香港嘅成就為榮，將香港視為摩登、先進、繁榮嘅代表。呢種感情自然都會反映喺流行作品之中，所以就有好似《網中人》一類電視劇，講述中國移民阿燦「學習」做一個香港市民嘅故事。但同時，大部分香港人都仍然保留某種同中國嘅連結，所以對阿燦以至喺中國逃難嘅人，又帶有幾分憐憫嘅情緒。 但九七後嘅媒體世界，好似就唔太一樣。香港人嘅身份認同更加鮮明，但香港同中國之間嘅政治邊界卻日漸模糊。當中國同香港經濟實力同發展程度之間嘅越收越窄，人口流動嘅方向亦都又中國人逃難落嚟尋求一線生機，變成香港人北上去中國搵快錢，文化作品裡面呈現嘅中國同香港形象都開始出現微妙嘅變化。而隨住媒體環境嘅轉變，香港同中國之間嘅來往越嚟越頻繁，香港人再無辦法單純地以「先進 – 落後」嚟理解香港同中國，而必須正視同思考香港嘅定位、身份，以及優勢。 💡本書喺2012年出版，正值北京奧運後嘅中國熱潮、本土派亦未興起，所以作者結論認為當時香港人同中國人之間嘅文化邊界漸漸消失。不過後事如何就自有公論啦。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 聽說長洲 余知樂、何光｜Nous出版 ISBN：9789887078005｜HKD$220 長洲賓客…好大機會喺假日登島遊覽嘅時候，其實遺漏咗好多真正嘅本地特色。遊客聚焦嘅景點，包括大魚蛋、北帝廟、張保仔洞，以至一年一度嘅太平清醮，固然都係歷史悠久嘅特色，但同時亦只係長洲呢個漁港社區生活裡面其中一環。今日嘅長洲仍然保存住唔同時期嘅特色，由史前時代嘅石刻，到鶴佬人最早聚集嘅學佬巷、寶安東莞人定居後建立嘅會所、市鎮形成自治所衍生嘅方便醫院，再到英治時代政府建立嘅界石、戰後逐漸興起又沒落嘅工業，每一個時代都喺長洲留低過痕跡，而又仍然可以被我哋見到。 長洲喺歷史上好長時間裡面，都係一個繁盛嘅漁港市鎮。隨住近三、四百年嚟漁業興盛，同漁業相關嘅工商業，包括修船、木工、魚欄等逐漸聚集，形成小鎮。隨後因為位置方便嘅緣故，長洲亦都開始充當鄰近地區嘅墟市，農民可以喺呢度買賣農產，亦都可以補給生活所需，於是市鎮嘅規模就逐漸擴大。當市鎮變得越嚟越繁榮，嚟自五湖四海嘅人開始喺市鎮內定居同工作，長洲就開始形成自己嘅自治組織，管理鎮內大小事務，提供城市服務，例如倒夜香等，以至擁有自己嘅保安隊伍，抵擋海盜嘅侵擾。到二十世紀初，長洲已經發展到好似一座小城市咁嘅模樣。 當然，有香港呢個更大嘅城市係隔離，其實係好難感覺到長洲係一座「城市」。因為我哋另外有咗「市區」，於是長洲就成為「離島」。咁對喺長洲生活嘅居民嚟講，佢哋係城市人，定係鄉村人？唔同世代對於自己喺長洲嘅位置，以及同香港「市區」之間嘅距離同關係，又有咩睇法？透過呢啲島民有血有肉嘅人生故事，我哋可以睇到一個相當異樣嘅香港「城市」。 💡魚蛋本來係潮州人嘅產物，喺香港再變成炸魚蛋。長洲鶴佬人多，有製作魚蛋嘅傳統不足為奇，不過所謂大魚蛋，始終都係近二、三十年推動旅遊嘅產物。 【店長精選：唔好果本唔敢揀】 歷史虛幻：打鼓嶺的歷變 黃競聰｜中華書局 ISBN：9789888912292｜HKD$108 鄉村應該係咩模樣？講起鄉村，大家會諗到嘅係間耕田種菜嘅農夫，定係盤算緊起丁屋嘅原居民？現實中嘅鄉村可能有更多值得探索嘅面向。打鼓嶺位於新界東北，常聞曰北區「上粉沙打」個「打」就係佢了。喺香園圍口岸落成啟用之前，相信香港好多人其實從來未進入過打鼓嶺，甚至可能連打鼓嶺喺邊都未必知。咁當然，出得書，即係話呢個地方有好多值得探究嘅故事啦。 打鼓嶺自然有好豐富嘅歷史可以講，淨係近三百年嘅事已經多到其實一本書係唔會講得曬。十八世紀客家人大量進入啱啱經歷完遷界令，百廢待舉嘅香港。由於客家人主要由廣東東北面沿住東江一路南下，所以亦係由新界東北開始最早進入香港。沙頭角、打鼓嶺一帶於是成為香港其中一個最多客家人嘅地區。隨後嘅二百年之中，打鼓嶺嘅鄉村透過互相結為聯盟（打鼓嶺六約），以及聯同其他客家鄉村爭取科舉平權，擺脫咗廣府地主嘅操控，自成一國，直到香港接管新界，更多中國移民聚集，形成磚廠等工商業，再到戰後成為禁區。 閱讀打鼓嶺嘅同時，其實都好值得深思究竟何謂「邊境」，又何謂「偏遠」。其實喺殖民地之前嘅打鼓嶺，位處深圳墟、沙頭角墟同大埔墟之間嘅必經之路上，亦都喺南頭縣城同大鵬所城嘅交通要道，打鼓嶺嘅長山古寺甚至經常提供住宿服務俾頻繁往來嘅旅客。只係隨住香港開埠，我哋以新嘅市區視角嚟睇打鼓嶺，先會覺得果度係偏僻、遙遠；又隨住邊界劃咗喺深圳河，打鼓嶺喺戰後被劃入禁區，外人不得進入，又再加深咗我哋對「邊境」嘅想像。 💡打鼓嶺、新屋嶺至羅湖一帶，喺二十世紀初都係磚業重鎮，包括雙英磚廠、木湖瓦窯等，都係因應九廣鐵路工程應運而生，及後供應北區嘅鄉村建築需求。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 何處不他鄉？小眾宗教在東亞 孔德維 編｜一八四一出版 ISBN：9786269901715｜HKD$140 其實性交轉運可唔可以係一個正當嘅信仰行為？當然，我哋知道現實中有好多以性交轉運為名目周圍呃神騙鬼嘅神棍，而社會往往亦都以「騙徒」同「受害者」嚟理解參與呢件事嘅雙方。但係，如果事件當中沒有欺騙嘅成分，接受儀式嘅人真心相信性交可以轉運，以施行儀式嘅人亦都真心相信自己有能力透過性交幫人轉運，又假設成個過程之中都係喺雙方合意而且安全衛生嘅情況下進行，咁性交轉運係咪可以被接受？ 正統道教係無茅山法師，亦都無性交轉運。但係，道教典籍之中，「房中術」又的確會同「消災解禍」等扯上關係，仲未計以至性行為喺唔同嘅主流宗教之中其實都存在——印度教嘅《慾經》、佛教嘅雙身等等。調轉講，好多今日被社會完全接納嘅民間信仰，其實都唔存在於正統道教。道教其實無觀音借庫，年初二要拜嘅車公亦唔係正統道教神明。當性行為都可以喺主流宗教出現，而宗教正統以外嘅行為有時亦可被接受，咁其實我哋係用咩準則去決定「去車公廟買風車轉運」就係宗教信仰，但「搵茅山法師性交轉運」就係詐騙性侵？ 再講落去，點解有啲信仰被視為正統，而另一啲信仰就被視為邪教？當然，邪教本身係有相對明確定義，例如係個人崇拜、封閉嘅信仰群體、犯法嘅儀式行為等等。但係同一時間，有啲信仰唔符合呢個定義，例如法輪功、一貫道，但係依然被人叫做邪教。而邪教嘅標籤本身都可以流動，基督教被羅馬人認為係邪教，所以耶穌被釘十架；唐朝皇帝認為佛教係邪教，所以要「滅佛」。世界上又有幾多信仰無作奸犯科，但只因為信徒屬少數或邊緣族群，被貼上「邪教」標籤？ 【此為純粹學術討論，本店絕不鼓勵任何人參與性交轉運，如覺諸事不順，請尋求俗世人事幫助】 💡古代中國人研究性學或「房中術」，除咗道德文化之外，亦多從醫學及信仰角度出發，前者關注性行為可以點樣影響身體，後者講究男女交合與天地陰陽嘅關聯。 【店長精選：唔好果本唔敢揀】 半透明鏡：清帝國意識形態下的歷史與身份認同 柯嬌燕｜賴芊曄 譯｜八旗文化 ISBN：9786267509111｜HKD$217 喺十七世紀之前，滿洲人只係大明帝國邊陲以外嘅一個遊牧民族，被中原漢人視為唔夠文明嘅野蠻人。但係喺1644年，呢批所謂野蠻人就以勝利者嘅姿態進入北京城，打住清朝嘅名號正式征服咗漢人嘅文明。不過，軍事上嘅征服可能都只係最容易嘅部分。身為邊疆民族，滿族嘅人口同要統治嘅漢人相比實在少得可憐，而同時亦都長時間被漢人鄙視睇唔起，更加唔洗講滿州人難以符合中原王朝強調咗千年以上嘅「道統」。滿洲人可以點樣將自己變成中原嘅合法統治者？佢哋點樣處理統治者與被統治者嘅關係？或者，佢哋點樣挑戰中原對「道統」嘅理解？ 舊時嘅主流論述，一般以「漢化」嚟形容呢啲征服者嘅變化，由更古老嘅契丹、鮮卑，到蒙古、女真，當喺中原建立政權之後，都會調整自己嘅政治制度、採用儒家治國思維、甚至改變自身文化，然後漸漸被漢人文明同化。當然我哋而家已經體認到呢個係一個漢人中心史觀之下嘅論述。二戰後嘅國際漢學界提出「征服王朝」嘅概念，指出寮、夏、金、元、清等政權都同之前嘅「滲透王朝」唔一樣，佢哋只會工具性地挑選適合嘅漢文化元素為己所用，但仍然好刻意地保留自身嘅認同，甚至有辦法迫使漢人改從征服者嘅文化，清朝「留頭不留髮」就係一例。 然後到九十年代，世間有了新清史學派。呢個新學派嘅歷史學家主張使用滿文史料，並且由滿洲統治階層嘅史觀嚟重新詮釋清朝嘅變遷。與其強調漢人即使政權被武力打敗，但仍然能依靠「先進文明」嚟「漢化」滿洲人，不如由滿洲人嘅角度，探討佢哋點樣成功征服中原王朝，建構出統治者身份之餘，呢個身份又同漢人嘅被統治者身份互相塑造。甚至，清朝係咪就係單純嘅征服者同被征服者？柯嬌燕係新清史學派嘅領軍人物之一，呢本書亦係新清史四大書其中一本，佢就主張清朝嘅統治者其實好清楚意識到自己係一個多民族國家，帝國內每個民族都互相影響，喺呢個多元嘅國度下，其實唔係「滿人統治漢人」咁簡單。 💡新清史學派係九十年代興起嘅學術流派，而家已經逐漸成為國際主流，好多希望研究清朝嘅學者都要學習滿、蒙、藏文。不過喺中國呢個學派就被人抵制同排斥。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 Chinese Middlemen in Hong Kong's Colonial Economy, 1830-1890 Kaori Abe｜Routledge ISBN：9780367878078｜HKD$480 邊一個發明了返工？好似好難界定，但將返工提升到今時今日呢個新境界嘅，就一定有香港人份。香港人最鍾意返工，幾乎可以將「打工」本身視為一種技藝，而最叻返工嘅人，就叫做「打工皇帝」。早喺香港開埠之初（甚至開埠之前），第一批「 打工皇帝」階層就已經逐漸形成，佢哋就係所謂「買辦」（Comprador）。 買辦也者，乃係歐美企業喺東亞營商時，最重要嘅人物。由於呢啲公司嘅老闆都係外人，唔識本地語言，唔了解本地文化，亦都唔懂得本地商業規矩，因此必須聘僱一批本地人為代理人，為佢哋實際打點同運作呢啲生意。而呢啲買辦因為得到老闆完全嘅信任同依賴，身價以至權力都達到無可比擬嘅高度，從而成為打工皇帝。而呢啲買辦喺老闆身上學識營商嘅技巧、知識同經驗後，亦都陸續開設自己企業，由打工變成老闆（或者both）。 不過，以往嘅香港史研究似乎都尚未投放足夠嘅注意力喺呢啲買辦身上，好多時都認為佢哋始終都只係果啲歐美洋行嘅打工人，而殖民早期主力開發香港，主宰香港政經局面嘅，始終都係呢啲大洋行嘅老闆。然而，曾經喺英國布里斯托大學研究香港史，後來將博士論文改寫成呢本書嘅日本學者阿部香織（Kaori Abe）就提出，呢啲買辦不論係實質掌管住洋行嘅運作，以至開拓自己嘅事業版圖，都有巨大嘅影響力。其實呢啲買辦，可能先係開埠早期真正主宰香港社會發展命脈嘅一群人。 💡好多十九世紀事業成功嘅華裔香港名人，都係買辦出身，例如何東、何甘棠、莫仕揚等等，呢啲買辦都各自建立自己嘅公司。 【店長精選：唔好果本唔敢揀】 香港製造：跨太平洋網絡與全球化新史 韓墨松｜鄺健銘 譯｜季風帶出版 ISBN：9786269672271｜HKD$197 喺香港，透過協助外國企業經營而拓展自己事業嘅，又唔只得戰前嘅買辦階層。戰後嘅香港進入冷戰時代，對中國嘅經貿往來中斷，而與美國之間嘅交流則越來越多。戰後越來越多香港人到美國求學，繼而喺香港發展生意。呢啲人喺美國求學期間（或者係送子女到美國求學期間），往往都能夠喺當地建立重要嘅人脈、知識同其他無形資源，喺日後就成為香港發展嘅重要動力。韓墨松教授喺書裡面就稱呢批人為「跨商」（Straddling merchants）。 隨住冷戰時代美國政治力量以至資本主義體系進入亞洲，呢批跨商積極利用佢哋嘅人物，引入美國嘅知識同資金，投資香港嘅發展，唔單只係商業，仲包括教育、文化、住宅、甚至係基建。紅十字會甘迺迪中心、中文大學、美孚新邨、紡織業等等，都係呢種例子。 以往戰後香港史嘅論述都係圍繞中國難民帶住資本同技術推動香港工業化轉型，但呢批跨商嘅能動性以至與美國嘅聯繫反而甚少被提及。而同戰前嘅買辦一樣，佢哋亦都唔喺單純地為美國人工作，而係主動引入佢哋需要嘅美國資本，推動自己嘅生意，亦都推動香港嘅發展。好多學者都認同香港早喺九七之前就已經「非正式地去殖」，七、八十年代嘅香港亦早已唔似係一個殖民地。而韓墨松教授就認為，與其話係美國促成香港嘅非正式去殖，不如話係香港嘅呢批跨商利用咗美國嘅力量完成去殖。 💡中大首任校長李卓敏教授本身就係美國接受教育嘅學者，至於中大無成為英式大學，而採取咗美式制度，本身亦唔係巧合。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 Steamships across the Pacific: Maritime Journeys between Mexico, China, and Japan, 1867–1914 Ruth Mandujano López｜HKU Press ISBN：9789888876761｜HKD$500 1910年爆發嘅墨西哥革命，同香港有咩關係？話說原本墨西哥（仲係西班牙殖民地果陣）係中國重要嘅對外接觸對象，嚟自美洲（以至歐洲）嘅事物會由墨西哥出發橫越太平洋，經同樣係西班牙殖民地嘅菲律賓，再北上到澳門或廣州。而呢個連結喺自從1815年墨西哥獨立之後，就算係斷裂咗……直到1841年。 呢一年，香港開埠，英國人喺香港建立港口，連結中國、日本、東南亞，以至世界各地。隨住英國等大國陸續廢除奴隸制，美洲、澳洲同其他殖民地開始需要大量替補勞動力，而當時普遍陷入貧窮嘅中國人正好適合。開埠無幾耐就開始嘅淘金熱， 更加將呢股勞動力需求推上高峰。而邊個港口能夠俾外商最容易招募華工，又俾華工最容易搵到去海外嘅船？咪就係香港囉。 透過香港，嚟自美洲嘅貨物可以進入中國，而中國嘅勞工，亦都經香港前往墨西哥。唔好忘記，淘金熱，以至美洲嘅開發需要，從來都唔限於美國同加拿大。中、南美洲同樣都吸引咗大量華工前往冒險。蒸汽輪船嘅出現，就更加拎到跨越整個太平洋到中美洲更加容易，從而令香港成為中國勞工前往墨西哥嘅最主要港口。如果想睇香港與北美之間嘅航運聯繫，可以睇冼玉儀教授嘅《穿梭太平洋》，而如果想睇中、南美果邊嘅方向，就要睇呢本了。 💡墨西哥喺1810年脫離西班牙獨立後，不斷喺帝國同共和制度之間擺盪，亦產出過一啲獨裁者。1910年嘅墨西哥革命，正係要推翻獨裁統治墨西哥三十五年嘅總統。 【店長精選：唔好果本唔敢揀】 Outlaws of the Sea: Maritime Piracy in Modern China Robert Antony｜HKU Press ISBN：9789888876778｜HKD$350 一本「華南海盜全史」應該點寫？活躍於十八、十九世紀之交張保仔當然係一定要包括在內，但張保仔之前仲有啲咩？上溯十八世紀嘅越南西山集團？十七世紀嘅鄭芝龍？十六世紀嘅林鳳？更早嘅倭寇？張保仔之後又有好多海盜，由十九世紀嘅十五仔、徐亞保，可以一路數到二十世紀嘅黎財山、澳門路環幫，以至蒸汽船騎劫潮等等。 但除咗一一列出海盜人物同佢哋嘅故事之外，可能更重要嘅，係討論海盜究竟喺社會裡面扮演咩角色——咩人會做海盜，或被官府標籤為海盜？海盜同地緣政治有咩關係？政府要打擊海盜，但啲對策又係咪真係有效？海盜喺地下經濟裡面扮演啲咩角色？海盜嘅生活係點？究竟海盜係咪真係賺到錢？海盜世界嘅道德觀念又同陸上社會有幾大差距？ 安樂博教授（Robert Antony）係研究古代中國地下秩序嘅專家，由社會邊緣嘅犯罪分子，到天地會、洪門等祕密會社，再到乘風破浪嘅海盜。安樂博比較強調嘅係「由海盜嘅角度嚟書寫海盜史」，咁係咩意思？唔少學者都傾向由官府嘅視角嚟研究海盜，分析政府針對海盜嘅對策，以至海盜對社會、經濟嘅影響等。不過，咁係咪淹沒咗海盜本人嘅聲音？點解佢會成為海盜，點解佢要攻擊某啲特定嘅村莊或船隻，點解佢有時會同官府對抗，有時又甘願投降，可能都係重要嘅叩問。 💡學者關注嘅其中一個問題，係好似張保仔咁嘅海盜集團究竟只係單純求財，抑或有反清復明或自立為王嘅野心？張保仔本人似乎無，不過同時代嘅其他海盜就難講了。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 Governing Hong Kong: Administrative Officers from the 19th Century to the Handover Steve Tsang｜Bloomsbury Publishing ISBN：9780755655847｜HKD$420 殖民地年代普遍算唔算良政善治？可能好多人都會同意。不過，呢種「良政善治」係點樣產生？姑勿論呢個判斷係咪準確（研究唔同年代與範疇嘅人可能有唔同答案），究竟殖民地政府嘅政策（德政也好、惡法也罷），係點樣產生出嚟？早十年八年前（可能而家都仲係），AO（Administrative Officer，政務主任）係好多大學生趨之若鶩嘅職位，夢想一畢業就考入政府，以求生活安穩、官運亨通。 而喺政府嘅日常運作以至決策之中，政務主任都係一個不可或缺嘅角色。畢竟長官意志並唔會自動執行，需要有人居中管理基層公務員處理；同樣地，前線公務員都唔會事事自己判斷，要有知道發生咩事嘅中層上級下達指示。呢批人就係AO，佢哋能夠發揮專業，政府就可以運作順暢。 不過，呢種文官制度並唔係大英帝國向殖民地頒佈施行嘅政策，而係喺開埠早期香港自行發展出嚟嘅一套培育人才方式。政務主任又叫政務官，前身係早年嘅官學生（Cadet Officer），係香港政府為咗培養中文行政人員而建立嘅制度。唔少後來嘅港督其實都係官學生出身，例如金文泰、梅含理、葛量洪等等，以至清朝末代皇帝溥儀嘅老師莊士敦，都曾經做過香港政府官學生。曾銳生教授係香港政治史嘅神枱級人物，呢本政務官歷史，正係佢嘅代表作之一。 💡官學生制度喺香港出現之後，好快亦有其他英國殖民地爭相仿效，例如二十年後，1882年嘅遠東官學生計劃，就涵蓋香港、錫蘭同海峽殖民地。 【店長精選：唔好果本唔敢揀】 Governors, Politics and the Colonial Office Gavin Ure｜University of Hong Kong Press ISBN：9789888083947｜HKD$295 其實香港有無擁有過「高度自治」？香港政治史研究上經常探討嘅一個問題就係，究竟殖民地年代嘅香港政府，有幾大嘅自主權力？一方面，雖然喺九七之前，香港同中國處於國界嘅兩邊，但受到地緣政治嘅影響，香港政府嘅決策好難完全唔顧慮中國政府嘅取態；另一方面，縱使總督理論上擁有好大嘅權力，但始終殖民地都係大英帝國嘅一部分，政府亦總會受制於倫敦。 咁究竟總督係制定政策嘅時候，有幾大嘅自主權力？或者話，當香港政府推出政策嘅時候，有幾多係港督本人嘅想法同意志？而呢本書嘅作者就認為，隨住制度、同倫敦嘅關係，以至政治環境嘅演變，可能每個時期都好唔同。而佢喺呢本書集中研究嘅，就係由戰前嘅1918年去到戰後初期1958年之間呢四十年。作者深入分析1922年嘅租金管制政策、1929-36年嘅貨幣管理、二戰期間同倫敦之間嘅財政問題、戰後公共房屋政策、防務開支談判，以至1958年爭取財政完全獨立嘅過程。 作者嘅結論認為，呢段期間嘅香港政府其實自治程度相當低。當時香港政府推出政策，往往都仍然跟隨倫敦嘅政治方向，以唔違背英國嘅利益為優先；另一方面，政策制定嘅過程亦都好容易被城中重要嘅商人、政客所左右。但咁亦唔代表香港政府就只係被倫敦同本地政客擺佈嘅木偶，因為佢哋亦一直努力爭取俾政府擁有更大決策權。而呢一番努力，亦為七、八十年代香港可以擁有幾近完全自主地位嘅基礎。 💡防務開支可以話係香港同倫敦政府之間長期爭持不下嘅問題，倫敦覺得香港應該負擔駐軍洗費，但港府亦會話無權控制軍隊就唔應該俾咁多錢。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 Villages and Market Towns in Hong Kong: Settlement and History Patrick Hase｜Chinese University of Hong Kong Press ISBN：9789882373174｜HKD$350 如果香港無成為英國殖民地，會演變成一個點樣嘅城市？或者，仲會唔會發展成一個城市？城市嘅起源，好粗略咁可以分為兩種，一種係有計劃、有設計地喺一片空地上由零開始建設；另一種，則係隨住鄰近經濟活動嘅發展而自然形成。香港照道理係第一種——1841年殖民地建立後，政府有系統地規劃、建設出維多利亞城，然後喺百幾年裡面發展成而家咁樣。 不過，如果香港無成為殖民地呢？咁係咪就會好似第二種方式咁，自然形成一座城市？咁形成嘅中心係乜嘢，同喺邊度？須知道人口增加本身唔會形成城市，只會令多出嚟嘅人口搬去第二度建立新嘅村莊。要形成城市，需要有貿易同工商業，亦需要發展出自己嘅政治體制。當啲人嘅生產越嚟越專業，以至唔能夠自己生產所有日常所需，而同時產量提高，足以自用之餘再賣俾人，就有咗貿易嘅需要，而貿易嘅場所——墟市，亦因此誕生。隨住墟市逐漸發展，越嚟越多從事手工業、商業、服務業嘅人開始住喺墟市裡面（因為唔再耕田，所以亦不必住喺塊田隔離），然後人口增長到一個地步，墟市開始成為城鎮，眾多人口亦產生出自治組織嘅需要，城市嘅雛形就喺度了。 雖然夏思義呢本書本身並唔打算討論呢個問題，但佢嘅著作對我嚟講其中一個好重要嘅啓發，係刺激我思考平行時空下嘅香港，如果行咗唔同嘅歷史軌跡，可以係一座點嘅城市。事實上呢本新書點出咗香港早喺殖民年代之前，就已經有好多「market towns」嘅存在。由東涌、大澳、長洲，到深水埗、鯉魚門、西貢，香港其實有好多地方都已經發展出相當規模嘅墟市，有貿易活動、有交通網絡、有工商人口，甚至有自治組織（嘅雛形）。諗下，如果香港無成為殖民地，會唔會北大嶼山可以發展成一座城市？咁呢座城市甚至唔會叫「香港」，而可能係「大嶼」。金融中心可能就喺東涌，中環變返做郊遊聖地，而元朗繼續維持酋長國。諗下都興奮～ 💡事實上，香港好多「新市鎮」亦都係由原本嘅墟市為中心發展而成，例如大埔墟、上水石湖墟、元朗新舊墟等等；而西貢市中心，正係由墟市自然發展出嚟嘅市鎮。 【店長精選：唔好果本唔敢揀】 Settlement, Life, and Politics: Understanding the Traditional New Territories Patrick Hase｜City University of Hong Kong Press ISBN：9789629374419｜HKD$278 店長我讀咗咁多年香港古代史同新界史，或者睇咗咁多夏思義嘅著作，教識我嘅事係，鄉村並唔係為咗供養城市而存在，亦都唔係為咗成為城市生活嘅對照而存在，更加唔係為咗成為城市人嘅後花園而存在。喺理解香港歷史同文化嘅時候，必須注意嘅係城市只佔香港嘅四分之一（地理面積上），單靠市區而忽略新界嘅鄉村並唔能夠真正而完整地理解香港。而同一時間，新界本身又係一個極其多元而複雜嘅社會，每條鄉村都有自己嘅生命力，有自己嘅文化生態，有自己嘅生活方式。將「新界」視為一個整體，將所有「原居民」都視為利益一致嘅集體，可能都係有問題嘅。 呢本書粗略地分，可以將前三章歸納為「陸」，而後三章歸納為「海」。前半本書由元朗廈村、洪水橋，講到沙田，描述緊嘅係平原、Continental、農業為主嘅新界社會。岸上嘅新界，有清晰嘅階級，分為地主、佃農；有根基深厚嘅古老宗族，透過創造唔同嘅神話同書寫自己嘅歷史嚟奠定自己嘅領導地位；有時而合作，時而衝突嘅廣府、客家族群；有複雜嘅禮教同信仰體系，包括更多嘅傳統、習俗，無不宣示緊權力同資源嘅分配；仲有一邊依附帝國衍生，一邊維持自治權力嘅政治制度，建立儼如封建嘅世界。 後半嘅「海」，則包括南丫島、馬灣同東平洲。呢個係由島嶼構成、依賴海洋交通、亦以海維生嘅另一種新界社會。呢個版本嘅新界，每個社群人口相對比較少，無咁依賴農耕但有更多漁夫同商人；階級同禮教界線相對模糊（因為得好少人可以做到地主），海盜與漁民兩個身份之間彈出彈入都唔係新鮮事；不論係地域定係職業與地位嘅流動都相對多，處於相對邊緣嘅地位，但亦因此更靈活同更有韌性；另加上喺岸上族群以至帝國之間穿插於狹縫以求生嘅狀態，比起岸上群體更容易受中華帝國嘅壓迫，但亦比佢哋更容易接觸到殖民地帶嚟嘅機會同現代產物。香港史固然係一部讀唔完嘅書，但新界本身亦係探索唔完嘅世界。 💡史前香港人類基本上都係臨海生活，而唔係內陸農耕，例如最早嘅考古發掘喺西貢海邊、最早嘅人類骸骨喺馬灣，而南丫島更加係香港考古發現最豐富嘅地方之一。 此篇書訊刊於 每週一 發出的獅墨書訊，歡迎免費訂閱