搜尋結果

【最新到貨：新鮮滾熱辣上架】 憶記荔園（增訂版） 梁經緯｜中華書局 ISBN：9789888862153｜HKD$188 荔園喺好多生活喺七、八十年代香港人嘅共同回憶。溜冰場、「天奴」大象、恐龍屋、「宋城」，相信都為當年好多小朋友（以至大人）留低唔少美好畫面。荔園早喺1948年已經落成開放，當時二次大戰剛剛結束，社會百廢待興，荔園出現正好成為當時香港急需用嚟化解沉鬱氣氛嘅娛樂場所。幾十年間，荔園嘅東主都換過好幾個，園內嘅設施亦不斷升級、進化、擴張，去到七、八十年代成為香港最大規模、最先進、最多嘢玩嘅主題樂園。 除咗對入場參觀同遊玩嘅民眾嚟講好重要之外，荔園原來對好多香港藝人嚟講都好重要。六十年代起，荔園越嚟越重視園區內嘅娛樂表演，除咗不斷更新劇場設施之外，亦都好努力豐富娛樂節目嘅內容，包括魔術、雜技、粵劇、流行音樂等。有咗龐大嘅節目需求，荔園同時亦都成為好多未成名表演者初次亮相嘅舞臺。好多後來家傳戶曉嘅藝人，都曾經喺荔園登臺表演，例如梅艷芳、尹光、鄭少秋、陳寶珠、蕭芳芳、七小福等等。喺香港娛樂產業尚未成熟，處處欠缺機會嘅年代，荔園可以話成為香港娛樂圈嘅一個搖籃。 而荔園本身喺香港遊樂場發展史裡面，當然亦要佔好重要嘅地位。佢喺四十年代尾嘅出現，對上承接住戰前嘅早期遊樂場——太白樓、樟園、怡園、虎豹別墅等，都係以園林景觀、文藝表演同簡單遊戲攤位為主——荔園嘅機動遊戲、動物園、表演場地，都為香港遊樂園發展帶嚟新嘅突破。對下，1977年開幕，其後亦陸續擴張發展嘅海洋公園，亦有水族館、機動遊戲，不無荔園嘅影子。荔園最終喺1997年被政府收回土地結業，與香港殖民地同年結束，亦係香港史上留下重要嘅印記。 💡1963年係荔園嘅「巔峰之年」，當年沒有中國自由行，外地遊客也不多，入場人次仍多達三百萬。對比之下，2023年海洋公園亦只有240萬人次入場。 【店長精選：唔好果本唔敢揀】 香港抽象遊戲地景（增訂版） 樊樂怡｜Brownie ISBN：9789887520177｜HKD$168 由太白樓、虎豹別墅、荔園、啟德遊樂場，到海洋公園同迪士尼，香港嘅主題樂園經歷咗唔少起起伏伏，亦有過最風光嘅時代。不過，主題樂園只係香港遊樂場歷史嘅其中一部分。主題樂園再吸引，始終都係較高消費嘅地方，一般人唔會經常去。而真正成為民眾日常生活一部分嘅，係社區內果啲唔顯眼嘅公園遊樂場。雖然呢啲遊樂場面積細，設施唔多唔新亦唔刺激，但卻係實際上大多數小朋友度過絕大部分歡樂時光嘅地方。所以一般遊樂場，其實對研究香港嘅兒童史、日常生活史嚟講，係相當重要嘅元素。 而一般遊樂場其實都相當唔「一般」。喺今時今日嘅香港，好多人都會覺得啲遊樂場幾乎全部都一模一樣，啲遊樂設施基本上都係塑膠預製組建砌成，地板再鋪滿軟墊，非常符合安全標準，成本亦低，但又絕頂無聊。咁呢度要問嘅問題就係，香港嘅遊樂場係咪從來都係咁㗎呢？幾時開始，同埋點解，香港嘅遊樂場會變成咁？更重要嘅係——咁以前嘅遊樂場係點？ 喺而家香港啲遊樂場入面長大嘅小朋友，以後可能好難想象，原來遊樂場都可以係由藝術家操刀設計，充滿創意、趣味、刺激。1969年落成嘅石籬探奇遊樂場，就係由美國藝術家設計，融入抽象藝術嘅元素，係亞洲第一座雕塑式遊樂場。呢個極前衛嘅遊樂場，開啟咗往後二十年香港遊樂場嘅創意發展，坪石邨、常盛街、沙角邨、彩蒲苑，好多本來份屬尋常嘅社區，原來都隱藏住藝術與遊戲結合嘅國際級遊樂場設計。呢啲遊樂場直到今日都仍能為香港社會帶嚟衝擊：塑膠滑梯之外，遊樂場仲可以有咩可能性？  💡眼見香港遊樂場越嚟越「倒模」，一啲本地設計師都開始重新思考同推動獨特嘅遊樂場設計。重新設計後喺2021年開放嘅二陂坊遊樂場就係一個例子。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 香港非物質文化遺產系列：長洲太平清醮 陳子安、盧智基｜中華書局 ISBN：9789888862078｜HKD$168 2010年，《時代雜誌》選出「世界十大最古怪節慶」，其中香港長洲太平清醮榜上有名，而當中佢哋認為最古怪嘅係搶包山。的確，一大班人蜂擁而上三座包山鬥搶最多蒸包，喺外國人眼中應該都真係一個好古怪嘅習俗。除咗搶包山之外，長洲太平清醮仲有好多環節都好吸引遊客嘅目光，例如係飄色巡遊，或者係舞獅表演，以及各種道教科儀等。 相傳長洲太平清醮起源於十八世紀末嘅一場瘟疫，島民為咗酬謝神明驅除病魔嘅大德，就開始每年以玉虛宮（北帝廟）為中心打醮。不過，太平清醮嘅內容都唔係二百幾年嚟都無變過，而係一直有新嘅元素加入，例如飄色巡遊就係二十世紀初果陣由佛山傳入。而同一時間，因為長洲島民大多數都係潮汕地區嘅移民，所以好多儀式同細節亦都同香港其他廣府或客家人太平清醮唔太一樣。 不過，隨住太平清醮被列為非物質文化遺產，去長洲睇打醮嘅遊客越來越多，打醮本身會唔會因此而變質？學者已經注意到長洲太平清醮「迪士尼化」嘅現象，似乎打醮期間成個長洲都要配合「遊客體驗」而改變運作，即使本身同打醮無關係嘅事物都要一齊營造「節慶」，好似只為服務遊客而存在，咁打醮本身嘅意義會唔會黯然失色？ 💡長洲太平清醮嘅包山曾經喺1978年意外倒塌導致多人受傷，政府甚至一度禁止搶包山活動，直到2005年先恢復舉辦。 【店長精選：唔好果本唔敢揀】 野外香港歲時記（第二版） 香樂思｜彭玉文譯｜中華書局 ISBN：9789888861804｜HKD$238 香樂思（Geoffrey Herklots）係香港史上最重要嘅博物學家。我哋對於香港自然生態嘅理解，以及各式各樣物種嘅認識，好多都係嚟自香樂思喺戰前就已經累積落嚟嘅研究。當時香港有一本好重要嘅自然生態期刊《香港博物學家》（Hong Kong Naturalist）就係由佢主編。佢喺1951年寫成嘅呢本《野外香港歲時記》，無疑係香港最重要嘅博物學專著之一，將香港嘅自然生態定格喺1951年，等我哋可以一探舊時香港嘅野外風光。 除咗收集同觀察各種花草樹木、鳥獸蟲魚之外，香樂思本身亦係科學家兼官員。喺戰後初期，身為拓展署署長，香樂思好善於利用科學知識，為政府出謀獻策，其中最重要嘅功績，就係成立蔬菜及漁類統營處，為漁民同農民統一批發漁農產品同提供貸款，徹底解決佢哋被菜欄、魚欄壓榨嘅問題，亦都穩定冷戰時代香港嘅糧食供應，係香港農業史上最重要嘅德政之一。 呢本書面世至今已經七十幾年，譯者彭玉文本身亦係香港生態工作者，前後花咗十年時間，除咗將《野外香港歲時記》翻譯成中文之外，亦都大量地考證、訂正、補充同註解書中嘅各種資料，令呢本書嘅內容去到2024年都仍然準確同有用。如果想了解香港近百年嚟嘅生態環境變遷，呢本書都係絕對唔可以錯過。 💡香港華文界嘅博物學書寫一向以葉靈鳳為首，不過佢本人其實唔鍾意去野外地方，唔少論者都質疑佢嘅作品抄襲香樂思。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 素葉四十年：回顧及研究 王家琪｜中華出版 ISBN：9789888676606｜HKD$128   喺七十年代嘅香港搞一間出版社，難唔難？果個年代，香港嘅嚴肅文學出版社數量相當稀少，投稿去報紙副刊成為好多作家唯一嘅發表方式。問題係，無人會買過期嘅報紙，亦都即係話，呢啲文學作品幾乎只有喺果期報紙發行當日先能被人睇到，而書，則可以喺書店裡面流傳更耐，被更多人接觸到。於是，許迪鏘、西西、何福仁等今日大家都耳熟能詳嘅作家，就自己籌資成立咗素葉出版社，時為1978年。 不過當年經營出版社一啲都唔容易（今日都好難），素葉建立初期基本上出版嘅每本書都蝕錢，而出版社自己都無得到任何外來嘅資金或資助，全靠創辦人自己夾錢。不過，即使喺財政艱難之下，參與素葉嘅作家都依然繼續燒錢做佢哋認為有價值嘅事，甚至喺1980年建立《素葉文學》雜誌，設計雖然簡陋（頭幾期甚至連封面都無），但亦好快成為香港重要嘅文學發表園地。 《素葉文學》最終喺2000年停刊，係香港少數長壽嘅文學雜誌。素葉除咗刊登同出版過好多重要嘅文學作品之外（例如西西《我城》、董橋《在馬克思的鬍鬚叢中和鬍鬚叢外》等），喺香港文學史（以至香港社會）上嘅重要仲包括佢對咩叫「香港本土」嘅衝撞。每期《素葉文學》都會包括外國文學翻譯以及旅行文學作品，同本地文學擺埋一齊。呢啲來自外地嘅作品，以及關於外地嘅書寫，都會形成顯眼嘅「他者」，映照出香港自身嘅獨特，以及香港喺世界上嘅位置。喺香港人面臨身份危機嘅八十同九十年代，《素葉文學》刊登嘅作品正好反映呢個摸索自我嘅過程。 💡好多早期素葉嘅出版品，而家都已經價值連城。例如《在馬克思的鬍鬚叢中和鬍鬚叢外》，就曾經係拍賣會以$55200元成交。 【店長精選：唔好果本唔敢揀】 聽之不完──中大合唱團五十年 李思華｜中大合唱協會 ISBN：9789887509578｜HKD$160 如果你唔係中大畢業，又無玩過合唱團，甚至乎無乜接觸過音樂，咁好合理地你一定會問：「中大合唱團嘅歷史關我咩事？」至少店長我喺思考入唔入呢本書嘅時候都反覆諗緊呢個問題。最直接嘅答案當然係中大合唱團喺香港音樂史上嘅地位。好多喺香港音樂界大名鼎鼎嘅人物，都曾經參與過中大合唱團，例如曾葉發、陳永華、蔣慧民、吳俊凱、麥偉鑄等。 但更重要嘅係，中大合唱團喺推動香港音樂創作上嘅貢獻。除咗演唱已有嘅作品以及外國嘅歌曲之外，中大合唱團咁多年嚟都持續邀請唔同嘅本地作曲家為合唱團創作樂曲。胡銘堯、蘇梓安、楊嘉輝、鄧樂妍、伍華晞、伍卓賢等，都曾經為中大合唱團寫過歌。而不同於果個年代好多合唱團都主要唱英文、華語或其他外語嘅歌，中大合唱團則係好多唔同嘅音樂會裡面（甚至喺世界各地）都表演粵語歌，為粵語合唱藝術喺世界音樂舞臺上留有一席位。 但你話，唔喺喎音樂史真係唔喺我關心嘅嘢喎。咁你睇埋呢段。呢本書有好大部分嘅內容都喺唔同年代團員嘅記憶。今時今日合唱團對好多人嚟講都唔係太陌生嘅事，大家中小學階段學校多數都有。但1972年就難講啦，當年大會堂仍然係市民最主要接觸古典音樂嘅地方，香港藝術節要下一年先開始搞第一屆，而中大自己都不過十歲未到，而好多升斗市民根本未有太多機會接觸合唱藝術。隨住音樂、文化嘅逐步普及，每屆團員喺對合唱產成興趣、取得練習場地資源、爭取演出機會等等嘅經驗都會好唔同。而佢哋嘅呢啲記憶，正好就係由參與者嘅視角，見證咗香港文化環境喺唔同年代嘅演進。 💡除咗表演同創作之外，中大合唱團甚至仲做埋唱片，喺2019年成立唱片廠牌「CUC Records」，製作同發行自己嘅唱片。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 香江茶事：追溯百年香港茶文化（第三版） 林雪紅｜中華出版 ISBN：9789888861408｜HKD$138   仲記唔記得早幾年有個亞洲「奶茶聯盟」？香港、臺灣同泰國嘅網友發起呢個聯盟，以「同樣有自己嘅奶茶」，以及對民主嘅一致追求，成為一時嘅全球話題，而好多其他國家嘅網民亦都紛紛以「我哋都有奶茶」響應。世上好多國家都有自己嘅茶文化，由臺灣嘅珍珠奶茶、日本抹茶、印度拉茶，到英國紅茶、德國花茶、土耳其蘋果茶等等，而茶亦都足以成為一個國家嘅象徵。咁香港呢？香港常以絲襪奶茶為代表，但香港嘅茶文化仲有無更多內涵？ 茶其實喺香港歷史上佔有唔小嘅地位。喺十九世紀，茶葉係中國最重要嘅出口商品之一，而英國亦都係世界上進口最多茶葉嘅國家。所以，當開埠初期嘅香港賴以中國同大英帝國網絡之間嘅轉口貿易維生嘅時候，茶葉自然都係香港經手處理嘅大宗商品。雖然單睇貿易量可能無鴉片或者苦力嚟得多，但茶葉作為合法亦都符合道德期望嘅商品，亦支撐住當年好多主宰香港歷史發展嘅洋行，例如怡和、太古、寶順、旗昌等等。 至於比較近代嘅香港茶文化，呢本書亦都有詳細討論，其中尤其有價值嘅，係後段講「普洱茶在戰後香港的發展」嘅部分。我哋好少喺認知上覺得普洱屬於香港嘅茶文化，但其實喺香港嘅生活之中都唔難接觸到普洱——好多人去茶樓飲茶都習慣叫一壺普洱，甚至喺屋企都常備茶葉，屋企有老人家者更甚；而上等嘅普洱茶葉，亦都係香港好多中產至上流人士嘅品味象徵。咁飲普洱嘅文化喺香港又經歷咗啲咩轉變？同其他國家飲普洱嘅習慣又有啲咩唔同？ 💡為咗滿足龐大嘅普洱茶需求，茶商往往都會為茶葉加工，令佢哋可以模仿出陳年茶葉嘅味道，而呢啲加工方法有唔少都係喺香港發展出嚟，例如渥堆、濕倉等。 【店長精選：唔好果本唔敢揀】 涼茶在民間 張展鴻、田穎儀｜三聯書店 ISBN：9789620454516｜HKD$138   相信喺好多香港人嘅生命裡面，涼茶都係一款老是常出現嘅飲品。由細個被父母強迫飲好苦好苦嘅廿四味，到大個少少都會就去飲菊花茶、五花茶，都後來成日覺得熱氣，可能仲會定時定候飲夏枯草，都仲未計無數嘅人沉迷於「鬼佬涼茶」，即係咁講。涼茶早已成為香港人生活方式嘅一部分，亦都喺香港飲食文化裡面不可或缺嘅一塊拼圖。 涼茶喺香港嘅發展牽涉好多唔同嘅產業。由一碗碗涼茶擺喺檯面等人買嘅涼茶舖、以及擺喺便利店裡面賣，大規模生產膠樽裝涼茶同涼茶茶包嘅大型品牌，到同你講你要飲邊款涼茶嘅中醫師，仲有背後喺中國同東南亞採購生產涼茶所需藥材嘅貿易商人等等。與此同時，涼茶亦都未必一定要落街買先有得飲，好多家庭都會自己煲涼茶俾自己同屋企人清熱、去濕，於是藥材舖，甚至係街市嘅形態，都會影響到香港人飲涼茶嘅文化同習慣。 而當我哋講涼茶，好多時諗起嘅都係城市裡面嘅涼茶舖，或者便利店裡面嘅樽裝涼茶。新界鄉村嘅原居民飲唔飲涼茶㗎呢？佢哋飲嘅涼茶，同喺市區裡面可以搵到，多數可以溯源自廣州嘅涼茶有無唔同？喺新界交通尚未發達嘅年代，住喺鄉郊嘅村民未必可以好似城市人咁方便去得到涼茶舖，咁佢哋取得同飲用涼茶嘅習慣，又會唔會有好大分別？ 💡喺戰後嘅香港，涼茶舖經常都喺勞工階層嘅聚腳點，好多人都會不時聚集喺涼茶舖傾偈社交。箇中原因，原來係因為好多涼茶舖都有電視機。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 星火: 中國地下歷史學家與他們的未來之戰 Ian Johnson｜八旗文化 ISBN：9789888876792｜HKD$187   極權之下，歷史學家要發表不利於政權嘅記錄，總係困難重重，同時極度危險。喺中國，歷朝歷代都有史官同史家為咗書寫自己所相信嘅歷史，而身陷牢獄，以至身首異處。不過，由「在齊太史簡，在晉董狐筆」，到慘遭切啫啫嘅司馬遷，亦總有人願意以身犯險，寫低佢哋心中嘅真相（古代中國史學裡面對於歷史嘅功用同「史實」嘅定義自然同現代唔同，不過此為後話）。但係，如果我哋就咁表揚佢哋嘅「風骨」，讚完佢哋一輪就算，恐怕於世無益。係咪應該仔細啲檢視呢啲人係點樣喺高壓環境之下，仍然能夠做到呢啲事？ 1960年，中國出現咗一本叫《星火》嘅雜誌，收錄唔同嘅文章，揭示在此之前幾年中國因為共產黨嘅統治而引發大規模饑荒嘅事實。當時嘅中國係一個極權國家，呢本雜誌嘅內容明顯批評政權，自然招惹到鎮壓。呢本《星火》嘅創刊號不過八頁，只係印咗三十幾本，但所有參與嘅編輯同作者都被判刑甚至處決，呢本書雜誌亦因此出咗一期就停刊。 2010年，中國依然係一個極權國家，依然唔容許任何違背主旋律嘅言論。不過，又有一群記者、作家重新發掘當年《星火》嘅來龍去脈，希望如實記錄1960年果班大學生被滅聲嘅經過。五十年過去，《星火》本身當然仲係禁忌，而討論《星火》亦同樣成為禁忌。於是，呢本書就成為一班「地下歷史學家」，抵受國家嘅壓力，研究五十年前另一班「地下歷史學家」點樣抵受國家壓力嘅故事。 💡書入面提到，作者們得以完成關於《星火》嘅研究，有賴於香港中文大學嘅中國研究服務中心嘅資源同藏品。不過，呢個服務中心已經喺2021年關閉、「重組」 。 【店長精選：唔好果本唔敢揀】 Son of Hong Kong, Historian of China: The English Writings of Ming K. Chan Ming K. Chan｜Kent Wan edited｜星語者文化 ISBN：9789887672715｜HKD$148   陳明銶教授係香港研究呢門學問裡面最重要嘅學者之一。1975年博士畢業後，陳明銶專注研究戰前港中關係，尤其係呢座城市同廣東之間嘅互動。陳教授嘅研究，為學術界點出1925年省港大罷工喺香港以至中國歷史上嘅重要性，亦都講清楚中國民族主義同呢場大罷工之間嘅關聯。陳教授嘅研究範圍由1870年代一路去到二戰前夕，如果對香港工運史有興趣，佢嘅著作係絕對不能忽略。 除咗香港之外，陳明銶教授亦都相當關注澳門。雖然我哋話香港喺中國近代史上扮演咗好重要嘅角色，由擔當辛亥革命嘅基地，到影響住後續嘅廣東政局（以至被廣東政局所影響），仲有香港——廣東人嘅環太平洋商業網絡，但澳門嘅地位都同樣唔能夠忽略。香港、澳門同廣州之間嘅呢個三角地帶往往都左右住東亞同東南亞嘅歷史發展。 呢本論文集紀念幾年前逝世嘅陳明銶教授，收錄咗佢最重要嘅研究論文，由省港大罷工對英國殖民統治合法性嘅衝擊，講到廣東商人喺上海嘅組織，再到澳門喺中國革命中嘅角色，以至跨越太平洋嘅交通、商貿同社會網絡。如果對二十世紀初嘅香港感興趣，呢本書都係一定要入手嘅。 💡陳明銶教授除咗學術成就之外，亦都好積極參與社會事務，發表佢對香港時局嘅意見，包括喺海外建立關於香港嘅討論空間，以及宣揚香港民主政制改革等。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 香江舊事 葉靈鳳｜中華書局 ISBN：9789888862351｜HKD$98   香港掌故，照計就唔係葉靈鳳最出名嘅作品。葉靈鳳本身係活躍於上世紀二十至三十年代中國嘅文人，擅長寫小說同翻譯。隨住中日戰爭爆發，葉靈鳳喺1938年嚟到當時相對安全嘅香港，繼續從事寫作。喺呢度，除咗主編《星島日報》等報紙嘅副刊，以及文藝創作之外，葉靈鳳亦都積極咁探究香港呢個收容咗佢嘅地方，相繼發表好多關於香港嘅掌故同博物文章（雖然後者涉嫌抄襲香港博物學家香樂思），算係香港早期嘅掌故家之一，而呢啲文章亦都因為佢嘅名氣，發揮相當大嘅影響力。 掌故喺香港並唔係新鮮事，香港第一支行山隊嘅發起人吳灞凌早喺三十年代就已經開始喺《華僑日報》以「鰲洋客」為筆名撰寫掌故專欄。所謂掌故，就係對一啲小歷史故事嘅書寫，內容通常都唔係啲咩重要嘅歷史轉捩點，亦都未必有好嚴謹嘅考證，就單純係關於過去嘅一啲軼事。呢啲掌故嘅價值，除咗內容本身之外，仲可以話俾我地聽唔同年代嘅人點樣看待自身嘅過去，亦多少會透露當時嘅人會想睇邊啲歷史題材。畢竟掌故本身算係幾商業導向嘅出版品，如果讀者唔鍾意睇，基本上就唔會有人寫同出版。 葉靈鳳喺戰後五十年代初開始為《星島日報》編「香港史地」副刊，而佢自己都開始喺呢個版面裡面寫掌故專欄。呢本《香江舊事》最初係1969年以「霜崖」為筆名出版，將之前十幾年喺「霜紅室隨筆」裡面同香港有關嘅文章結集成書，內容泰半都係同英國人「侵佔」香港相關，將佢（以至時人）嘅中國民族主義情緒表露無遺，正好反映出版當時嘅社會氣氛。咁當然，呢啲掌故講好多有趣嘅香港小故事，本身就好好睇。 💡按丁新豹所講，葉靈鳳係香港第一個公開提出九龍城寨主權問題嘅人，指出英國同中國都無法治理該地。 【店長精選：唔好果本唔敢揀】 葉靈鳳新傳 李廣宇｜中華書局 ISBN：9789888862221｜HKD$158   葉靈鳳雖然喺中國出生長大，但其實有半生都喺香港渡過。葉靈鳳嘅人生不乏花生與爭議，例如，早喺未嚟香港之前，佢就已經同魯迅反咗面。直到魯迅喺1936年逝世之前，兩人都會不斷喺文章裡面嘲諷同批評對方。例如，魯迅就鬧過葉靈鳳喺「流氓才子」，因為葉靈鳳寫嘅小說入面都有唔少性愛場面；另一方面，葉靈鳳亦都曾經喺小說裡面寫過「照着老例，起身後我便將十二枚銅元從舊貨攤買來的一冊《吶喊》撕下三頁到露台上去大便」。 葉靈鳳落到嚟香港之後嘅寫作，亦都同樣引起過爭議。1958年出版嘅《香港方物志》收錄好多葉靈鳳嘅博物學文章，介紹咗好多香港嘅鳥獸蟲魚同花草樹木，一直都係影響力巨大嘅作品。好多果個年代嘅讀者都係透過呢本書，先能夠深入認識香港嘅環境。不過，原來葉靈鳳本人根本就唔行山，極少接觸野外生態，咁佢呢啲資料究竟係點樣嚟？有啲研究者，例如彭玉文，就認為葉靈鳳好可能係抄襲當時香港博物學家香樂思（G. A. C. Herklots）嘅《野外香港歲時記》。 然而，葉靈鳳人生最大嘅爭議，可能係佢喺二戰期間嘅作為先啱。香港淪陷之後，政府需要有人主持文化事業，繼續傳播唱好日本嘅新聞消息，製作歌頌日本帝國大東亞共榮圈理想嘅文化內容。而葉靈鳳，當時就喺香港做咗《新東亞》雜誌嘅編輯，成為日軍嘅文化喉舌。戰後，葉靈鳳當然面對來自四面八方嘅「漢奸」、「港奸」指控，但同時都有論者認為（包括呢本《新傳》作者），佢其實係臥底，暗中向國軍同中共提供情報，同時亦都會透過雜誌文章「曲線」寫下抗日訊息。 💡同好多同代嘅南來中國文人唔同，葉靈鳳退休後無移居去民國臺灣或者共產中國，而係留咗喺香港終老。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 香港鐵路百年蛻變（第三版）   陳志華、李健信｜中華書局 ISBN：9789888862214｜HKD$228   「一條巨龍的誕生」——我係講緊1910年通車嘅九廣鐵路，或者話係作者咁樣形容呢條鐵路。九廣鐵路即係九龍同廣州之間嘅鐵路，廣州一路駁到羅湖進入香港境內，然後繼續南下，經過大埔、沙田，穿越九龍山脈，最終抵達尖沙咀。1910年通車嘅係英段，即係香港嘅部分，亦都即係而家嘅東鐵線。 不過，早期嘅九廣鐵路，經營嘅最主要目的其實唔係載客，而係載貨。當然，即使係1910年，喺市區搭火車北上嘅需求都係有嘅，好多人都係搭火車前往中國，點都比搭船安全又舒服。不過，呢條鐵路始終係為咗商貿往來而興建，嚟自廣州同中國其他地方嘅貨物，於是就可以透過九廣鐵路送到香港，而且係去到尖沙咀海邊，亦都即係當年最主要港口設施嘅所在地。後來興建嘅沙頭角支線，亦同樣係為咗運載貨物而推動。 隨住中港邊境喺1949年關閉，跨境貨運同客運都中斷，火車先開始以境內載客為最主要業務。到咗七、八十年代，香港嘅鐵路發展開始越嚟越快。首先係1973年雙軌工程（即係由一條路軌變兩條，咁兩列火車就可以同時反方向行，唔洗遷就對方），然後1975年將總站搬去紅磡、1979年又興建九龍塘站。進入八十年代，仲有新筆架山隧道開通、火車電氣化，火炭、太和、大圍、羅湖等站亦相繼落成，火車就漸漸變成我哋而家所見東鐵線嘅模樣。 💡早喺1930年代，九廣鐵路就已經推出觀光火車，由九龍直通廣州，名叫「大埔美女號」（Taipo Belle）。呢架先進火車仲打破咗遠東最快列車記錄，全程只係兩個鐘頭多啲。 【店長精選：唔好果本唔敢揀】 也道山青：火紅織染百業興 鄭宏泰、周文港｜三聯書店 ISBN：9789888862092｜HKD$148   喺啱啱納入香港殖民地範圍果陣，新界同市區之間嘅聯繫，除咗搭船，就只能係要翻山越嶺行路過去。如果香港政府希望有效治理新界，咁發展陸路交通克服九龍群山呢個天然屏障，就係當務之急。喺1902年，大埔公路通車，接到去香港政府喺新界嘅統治中心大埔，再到毗鄰邊境嘅粉嶺同上水，成為第一條連接新界同市區嘅公路，汽車終於可以駛入新界。不過，大埔公路始終只係照顧到新界東部，咁大西北呢？當時嘅元朗、屯門，其實先係新界人口最多，最富庶嘅地區。於是乎，就有咗青山公路。 1920年，青山公路全部落成通車，由深水埗開始，途徑葵涌、荃灣，再沿住新界西嘅海岸線去到屯門、元朗，最後再屈過去上水，連接大埔公路嘅終點，兩條公路加埋就係所謂舊環迴公路。在此之前有一段時間，雖然維多利亞城已經成為繁華嘅城市，而又只係一步之遙，但新界嘅居民都幾乎極少來往市區，兩邊嘅互動係極少。共同生活經驗係身份認同嘅其中一個關鍵元素，而交通網絡就係促成共同生活經驗嘅原因。青山同大埔公路令新界鄉村同市區之間可以互通有無，可以話係將新界融入香港社會嘅第一步。 當然，人開始流動，錢貨都會開始流動。新界廣闊嘅土地資源，加上公路提供嘅物流便利，形成理想嘅工業環境。嘉頓面包、維記牛奶、南海紗廠（同南豐紗廠無關係）等等，都相繼沿住青山公路建立。呢本書以青山公路為骨幹，介紹沿路發生嘅歷史大小事，以及喺呢條公路上出現過嘅人同物。 💡早期嘅香港公路都會設置里程碑，每隔英里就會有一塊，有時中間仲會再擺多塊以顯示某啲地標。舊時啲人用「咪」嚟表述公路上嘅地點，例如「八咪半」，就係指英文嘅Miles。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 飲食香港：一位人類學家的日常觀察 張展鴻｜譚宗穎譯｜三聯書店 ISBN：9789620455148｜HKD$128   香港究竟有無「香港菜」？個個都話香港係「美食天堂」（well，至少曾經係啦，喺啲餐廳未執曬，市面仲未一片蕭條之前），但呢個形容詞所指嘅，並唔係香港有好多本土特色食物，而係話好多唔同國家嘅食物，都可以喺香港搵到——中、日、韓、台、泰、法、西、意……你數埋落去，連非洲菜式都有。不過，香港明明都有屬於本地嘅飲食文化，點解偏偏我哋幾乎唔會稱呼呢啲食品為「香港菜」？ 以前啲人話，香港嘅飲食文化係「中西合璧」，因為叉燒意粉啲叉燒係「中國嚟嘅」，而意粉係「意大利嚟嘅」。不過，套用另一位飲食人類學者講過嘅說話，「你去意大利如果搵到叉燒湯意粉我乜都得」。係喎，意大利有意粉，但唔會有叉燒意；中國有叉燒，但都唔會有叉燒意，只有香港先能夠搵到叉燒意。而又再諗深一層，其實呢個世界上有邊啲文化唔係同其他文化「合璧」呢？所有文化都一定會吸納外來元素，但咁並唔影響混合後嘅最終成品依然都屬於該文化。香港嘅飲食文化係咪又可以咁樣理解？ 咁當然，要解答呢個問題，香港飲食文化嘅發展脈絡就好重要。呢本書係中大人類學張展鴻教授前年出版《Hong Kong Foodways》嘅中譯本，探討香港唔同嘅飲食文化點樣喺歷史嘅洪流入面受到外來影響嘅衝擊，繼而演變成而家我哋認識嘅模樣。戰後中國移民帶嚟嘅食物同口味、粵菜喺香港嘅流變同國際化，以至係懷舊情緒同飲食文化點樣互為影響，都係呢本小書探討嘅內容。 💡喺1950年代，客家菜式曾經喺香港大行其道，而主要原因係呢啲菜式多用含豐富蛋白質嘅食材，所以大受當時需要密集體力勞動，而為數越來越多嘅工廠工人歡迎。 【店長精選：唔好果本唔敢揀】 香港粵菜 方曉嵐｜三聯書店 ISBN：9789620454790｜HKD$168   好多人都話，一般香港人嘅家常菜式，都係以「粵菜」為主，而喺香港嘅「中式」飲食，亦都同樣以「粵菜」為大宗。不過，香港嘅「粵菜」，又係咪完全同廣東嘅「粵菜」一樣？我諗同好多其他文化元素一樣，粵菜雖然發源自中國廣東，但傳到嚟香港，一個政治上與中國區隔百幾年嘅地方，自然會發展出在地嘅變化，繼而成為本土嘅特色。 咁香港粵菜嘅發展歷程又係點？以廣州飲食為標準嘅粵菜，當然喺開埠初期就已經隨住大量廣東人口移居香港而傳入，唔少中國文人落難或旅行到香港時，都會描述到香港嘅廣東菜式。不過，香港同廣州嘅粵菜發展出顯著嘅分別，主要就由戰後開始。五、六十年代，廣州經歷中國嘅饑荒同政治運動之下，飲食文化發展相對停滯；但同一時間嘅香港，一方面因為濱海緣故，大量使用海鮮，另一方面亦因為中國難民將唔同地方嘅文化引入，例如係順德菜，令香港粵菜嘅技術同煮法都更為豐富。 除咗菜式之外，餐廳本身都係飲食文化重要嘅一環。喺香港要食到粵菜，自然會諗到酒樓，但其實大型酒店喺七、八十年代大量冒起，亦都對香港粵菜嘅發展有好大影響。當時香港經濟起飛，人均消費能力提升，對飲食嘅要求自然提高唔少，當中為咗滿足客人要求而推動香港粵菜精緻化嘅，正正就係呢啲酒店嘅「中菜廳」。方曉嵐係上世紀著名飲食作者「特級校對」陳夢因嘅媳婦，跟隨丈夫同老爺鑽研粵菜文化多年，亦係呢方面嘅專家。 💡相比起香港粵菜極注重海鮮，連唔同品種同產地都非常講究，廣州粵菜基本上都以河鮮為主。無他，廣州都無海，要食魚只有去珠江撈。 此篇書訊刊於 每週一 發出的獅墨書訊，歡迎免費訂閱

～中秋節快樂～ 【最新到貨：新鮮滾熱辣上架】 Sino-British Negotiations and the Search for a Post-War Settlement, 1942–1949: Treaties, Hong Kong, and Tibet  Zhaodong Wang｜De Gruyter ISBN：9783111355689｜HKD$250    大家有無諗過，其實九七果陣嚴格嚟講並唔係第一次「香港前途問題」？早喺二戰期間，英國同中國（當時仲係中華民國）政府就已經開始研究香港殖民地未來嘅主權誰屬。果陣蔣介石對住日本嘅進攻兵敗如山倒，國內經濟瀕臨崩潰，必須要諗辦法籌措資金嚟應付戰爭開支。於是，佢就諗到——新界只係租借地，主權仍在中華民國手上，不如將新界主權賣俾英國啦！ 唔知算係幸定不幸，英國係無買到嘅。事關英國自己喺歐洲戰場面對納粹德國都同樣係節節敗退，都無咩多餘錢可以用嚟買新界。況且，當時倫敦政府判斷日本總有一日會向英國宣戰，而香港亦必然會成為攻擊目標，更係一個無可能抵擋日軍入侵嘅地方。既然如此，咁又做咩要花費真金白銀買一塊可能過幾年就會被日軍佔領嘅土地呢？ 但更重要嘅理由，可能係在於英國同中國政府之間，都頗缺乏互信。事關英國本身就喺中國身上設立咗唔少殖民地、租界同條約港，由天津、威海衛、上海、寧波，一路到廈門、香港等等。但除咗呢啲城市之外，英國同中國之間嘅領土問題仲包括西藏。當時西藏仲係一個王國，而中國同英國又分別有利益係入邊。所以當香港同西藏同時擺上談判桌嘅時候，自然會有好多阻滯，尤其去到1949年都未傾掂，咁國民政府都已經敗走臺灣，咁就更加唔洗再傾落去了。 💡1903年，英國曾經由印度出兵入侵西藏，最終迫使清朝同西藏與英國簽訂《拉薩條約》，規定英國唔準侵佔西藏，但中國都唔可以容許西藏被其他國家涉足。 【店長精選：唔好果本唔敢揀】 Traitor By Default: The Trials of Kanao Inouye, the Kamloops Kid Patrick Brode｜Dundurn Press ISBN：9781459753693｜HKD$220   1945年，一個曾經駐紮喺香港嘅日本兵被帶上軍事法庭審判。加拿大軍人對佢尤其痛恨，紛紛期出嚟指認佢喺戰爭期間所犯下嘅罪行。咁除咗係因為呢個日本兵成日針對啲加拿大人之外，仲因為呢個日本兵，其實係加拿大人。點解咁講呢？原來呢個日本人並唔係生於日本，而係喺1916年生於加拿大卑詩省嘅甘露市（Kamloop），所以喺加拿大兵眼中，呢個「甘露仔」（Kamloop Boy）其實係加拿大人。 但佢又係咪真係有被視為加拿大人呢？佢屋企喺1905年移民加拿大，佢爸爸仲加入加拿大軍，打過第一次世界大戰添。不過，日本人同其他亞裔人一樣，喺當時嘅加拿大都係受盡歧視，無辦法融入當地社會。於是喺1935年，甘露仔回流咗翻日本，繼而喺戰爭期間被徵召入伍，然後因為識得講英文被派到香港擔任戰俘營裡面嘅翻譯員，到戰爭末期更成為咗憲兵。 戰爭期間甘露仔固然犯下好多另一髮指嘅罪行，包括以各式各樣嘅酷刑嚟招呼受佢監管嘅盟軍士兵。但係同一時間，佢嘅戰後審訊並唔見得完全公平——其他同佢做咗差唔多嘢嘅戰犯，所受到嘅懲罰明顯比佢輕得多，只係監禁就可以；而甘露仔則係被加拿大政府入佢「叛國罪」，最終判處絞刑，死於1947年。甘露仔係日本裔，拎日本護照，參加日本軍，究竟算唔算係叛加拿大國？ 💡實際上，甘露仔並唔止一次被審判。佢係先被軍事法庭判死刑，但因為佢被視為係英聯邦公民，唔受軍事法庭管轄，所以又再被英國法庭判多次死刑。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 尋蹤覓蹟：香港古宅故事   陳國豪｜非凡出版 ISBN：9789888862405｜HKD$138   每一間舊屋，都有屬於呢間屋嘅故事。雖然我哋成日話香港係石屎森林，因為地少人多只能夠起一棟棟超密集又一模一樣嘅樓，但其實除咗高樓大廈之外，喺城市嘅唔同角落，其實都仲有好多你我好容易走漏眼嘅古宅，而呢啲古宅都有自己一段不容錯過嘅精彩歷史。我哋透過研究呢啲古宅建造同演變嘅歷史，可以睇到香港社會發展嘅歷程；透過觀察古宅嘅建築細節同內部裝修，亦可以睇到唔同年代、唔同階層、唔同群體嘅香港人係點樣生活。   喺市區裡面就有好多富麗堂皇嘅大宅，都曾經住過好顯赫或重要嘅歷史人物。而呢啲大宅嘅設計風格，又往往隨主人而不同——西洋大班嘅大宅，喜歡清幽嘅環境，但又要離公司近，就好似太古糖廠對上嘅林邊屋咁；政府高層嘅官邸，就好適合殖民地式建築風格，會有通風遊廊等，例如係大埔嘅前政務司官邸；華裔領袖嘅府第，就當然會有好多中國文化嘅元素，大坑虎豹別墅就係其中嘅表表者。呢啲都反映香港歷史上嘅上層精英，其實都係相當文化多元。   不過，仲有好多大宅其實埋藏咗喺新界鄉間，好多時因為缺乏保育，日久失修，我哋以為係廢墟爛屋，而遺忘咗佢曾經輝煌嘅過去。梅窩嘅袁氏大屋，代表昔日國民黨軍人袁華照嘅威風；沙田嘅吳園，係衙前圍建築師吳子美設計俾自己嘅作品；元朗橫洲嘅娛苑，係元朗鄉紳蔡寶田嘅別墅，仲曾經招待過港督金文泰。可惜嘅係，好多呢啲大宅都未必有幸被列為古蹟，一旦不幸被拆毀，呢啲故事就只能喺書本裡面繼續流傳落去。 💡梅窩袁氏大屋嘅主人袁華照本身係山賊，後被國民黨收編成為軍人。逐漸厭倦戰爭後，袁華照率領部下同家人嚟到梅窩定居，後人至今仍然係梅窩主要族群。 【店長精選：唔好果本唔敢揀】 遊香港廟宇聽故事 徐佩君｜中華書局 ISBN：9789888862290｜HKD$98   常言道，入村搵廟，入廟搵碑。每個鄉村群都一定至少有一間廟，除咗發揮宗教作用之外，亦係公共同社區場地。而入到廟，就一定會搵廟入面嘅石碑，因為呢啲石碑往往都能話俾我哋聽間廟嘅歷史，以至間廟同週遭鄉村之間嘅互動。香港嘅廟宇好多都有唔少文物，除咗石碑之外，仲有牌匾、對聯、銅鐘、大鼓、雲版、香爐、神像等，好多都有悠久嘅歷史。 不過，好多人參觀廟宇會睇漏嘅，就係屋簷下嘅壁畫。嶺南建築有所謂「三雕二塑一畫」，三雕即係木雕、石雕、磚雕；二塑係陶塑同灰塑；畫就係壁畫，都係嶺南建築上常見嘅裝飾設計。外部壁畫係嶺南建築嘅特色，喺其他地方，例如係閩南或臺灣嘅廟宇，都比較少見到。呢啲壁畫嘅內容間間廟都唔同，有山水、花鳥、人物等等，通常都仲會有題詩。 而最特別嘅，都係畫故事。好多呢啲壁畫都係畫緊一啲神話或者歷史故事，但通常都同間廟本身無關。例如，天后廟嘅壁畫可以係畫「武松打虎」，關帝廟可以係畫「八仙過海」，北帝廟可以畫《紅樓夢》，觀音廟可以係畫《西遊記》（OK呢個勉強有啲關事）。呢啲壁畫未必同信仰有連結，但往往反映當地村民嘅喜好、價值觀同道德教化。 💡除咗廟宇外部屋簷下會有壁畫之外，有時廟內都會有壁畫，尤其如果間廟有偏廳，咁就通常會出現喺連接主殿同偏廳之間嘅天井牆上。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 Man in a Hurry: Murray MacLehose and Colonial Autonomy in Hong Kong   Ray Yep｜HKU Press  ISBN： 9789888842926 ｜HKD$295   其實麥理浩，係咪真係大家口中咁完美嘅港督呢？佢喺1971年就任港督，去到1982年，呢段時間有啲人會叫做香港「黃金十年」。我哋而家所認識嘅香港，有好多重要嘅元素都係呢十年裡面慢慢形成。由制度上嘅建設，包括廉政公署、區議會、舊年免費教育、生果金，到硬體建設，例如公屋、新市鎮、地鐵、火車電氣化、萬宜水庫、郊野公園等等，好多而家香港人人稱羨，引以為傲嘅「德政」，都係麥理浩在任期間完成。 除此之外，麥理浩任內都處理過唔同大大小小嘅危機——股災、石油危機、越南船民、金禧事件、葛柏案，以至係九七前途問題。不過，喺面對唔同挑戰嘅時候，麥理浩應對嘅方式都為佢帶嚟唔少爭議，例如係東江水問題、抵壘政策等等，而唔少人亦認為佢對中國態度唔夠強硬，又無拒絕聯合國對收容越南船民嘅要求，十年建屋計劃嘅目標亦都無按時完成等等，更重要嘅係，佢無喺香港實行民主改革。 無論稱讚定係批評佢，都無可否認麥理浩時代締造咗現代嘅香港。一位如此重要嘅人物，好多唔同嘅學者都用社會學、政治學嘅角度嚟研究過，而喜歡沉澱翻幾十年先郁手嘅歷史學家，終於亦都開始書寫呢個時代。葉健民教授嘅呢本新書，就係以歷史學專業寫成，最全面咁梳理同分析麥理浩「黃金十年」嘅著作。 💡 打工仔星期日可以有紅日放假留喺屋企瞓到自然醒，都係拜麥理浩時代「每週休息日」政策所賜。 【店長精選：唔好果本唔敢揀】 中英關係與殖民管治：金文泰在香港1925-1930 陳學然、吳家豪 ｜中華書局 ISBN： 9789888862320 ｜HKD$148   如果話麥理浩係戰後香港最重要嘅一任總督，咁戰前可能就係金文泰。雖然任期只有四年幾，但同麥理浩一樣，金文泰喺任內完成咗好多制度同實體嘅建設，包括香港大學中文學院、啓德機場、九龍醫院、城門水塘、維港海底水管、禁止妹仔買賣、限制童工、新界鄉議局、擴大立法局非官守成員等等。 金文泰亦同時面對緊好多地緣政治帶嚟嘅衝擊同危機，由省港大罷工、中國內戰到共產黨出現、海盜猖獗，以至英國喺第一次世界大戰之後亞洲利益同部署嘅轉變，都令金文泰夾喺中國軍閥政權、倫敦政府、香港白人同華人精英之間，要平衡各方利益，又要完成自己想推行嘅政策。 金文泰任期最為人記得嘅部分，係佢喺香港推動中文教育以及保存中國文化。金文泰本身都係一位漢學家，對中國素有研究，亦都相當重視。喺中國經歷咗五四新文化運動，主動唾棄原有「舊文化」嘅同時，金文泰就收留咗好多前清文人，喺香港大學執教。當時好多中國文人例如魯迅都劇烈抨擊佢，但後人就得以享受文化保存嘅成果。 💡 金文泰同麥理浩一樣，都係民望極高嘅總督。佢被調任海峽殖民地果陣，仲有好多士紳上書挽留。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 近代的尺度：兩次鴉片戰爭軍事與外交（增訂本）   茅海建｜中和出版  ISBN：9789888869442｜HKD$138    鴉片戰爭都可以話係一個講到爛嘅題目。唔同立場、角度、重點都有好多人寫過，幾乎每場戰役、每艘戰艦、每個將軍，都有人鉅細無遺咁寫過曬。不過，正正就係關於鴉片戰爭嘅書實在花多眼亂，先令人想搵出一本全面、實淨、可靠嘅研究。尤其係，鴉片戰爭直接催生咗香港殖民地，係我哋歷史上最重要嘅事件之一，更加唔可以求其。    如果撇除佢嘅私德不談，茅海建係研究鴉片戰爭最重要嘅學者之一。相比起佢嘅成名作《天朝的崩潰》專注於第一次鴉片戰爭，呢本《近代的尺度》係作者早年論文嘅結集，研究範圍就橫跨曬第一同第二次鴉片戰爭。雖然話係論文結集，但呢啲論文都相當重要，佢哋主要都係詳細嘅資料考證，由戰爭經過、雙方部署、外交角力、戰術運用，都相當鉅細無遺。睇曬呢本，應該就對兩次鴉片戰爭嘅好多細節都了然於胸。    呢本書關注嘅係兩次鴉片戰爭之間，究竟清國同英國之間嘅實力如何。係，當然，英國實力勁過清朝，所以鴉片戰爭咪英國贏，咁阿媽始終係女人。不過，有時就係要有人下功夫去挖掘、爬梳同驗證各種細節證據，先能夠實淨咁講得出，究竟差距有幾遠、相差喺咩地方，從而先可以準確地分析得到，究竟清朝打輸鴉片戰爭，仲要打輸兩次嘅原因係咩，而唔係一句「英國船堅砲利」就算數。學術研究嘅嘢，本當如此。  💡 第二次鴉片戰爭期間，香港範圍內其實都發生過戰事。1857年，英軍攻擊九龍寨城，輕易地將清軍擊敗，仲將指揮官張玉堂俘虜咗返殖民地添。 【店長精選：唔好果本唔敢揀】 East Sails West The Voyage of the Keying, 1846–1855  Stephen Davies｜Hong Kong University Press ISBN：9789888208203｜HKD$320    我哋經常都將兩次鴉片戰爭理解為中國開始認真同全面地接觸現代世界嘅開端。不過，就喺兩次鴉片戰爭之間，其實仲發生咗一件事，就調翻轉令英國接觸到更多中國嘅事物，而香港，就係促成此事嘅地方。    1846年底，英國商人投資嘅一艘中式帆船耆英號由香港啓航前往倫敦。呢艘耆英號係第一艘能夠跨過好望角（當時從未有蘇彝士運河）抵達歐洲嘅中式帆船，不過，呢段旅程一啲都唔順利。由香港出發，繞過好望角到達大西洋之後，就係開始出現勞資糾紛——原來當初啲中國船員簽嘅合約，係去新加坡同印尼嘅。為咗平息眾憤，船長應承帶佢地去紐約，然後安排其他船俾佢哋返廣州。於是，耆英號就成為史上第一艘抵達美國嘅中式帆船。之後，耆英號又由美國前往倫敦，中間仲經歷咗暴風雨添。到咗倫敦，耆英號馬上成為英國人最感興趣嘅研究對象，好多英國市民都特登上船參觀。不過，幾年間英國人似乎就對呢艘船失去興趣，佢最終喺1853年被賣咗去利物浦，後來更加拆咗。    但耆英號始終都係世界海洋史上重要嘅一段航程，而隻船本身喺歷史發揮嘅作用，亦都就好似呢段航程嘅起點香港咁，成為中英之間交流嘅橋樑同契機，不論係邊一種交流。本書作者Steven Davis係著名嘅香港海洋史權威學者，仲曾經係中環海事博物館嘅館長，除咗耆英號之外，仲有研究過添馬艦、香港海員之家等等。  💡 耆英號喺美國同英國期間，都曾經開放俾市民上船參觀，不過美國嘅入場門票係美金兩毫半，換算翻當時幣值，其實係仲貴過英國門票嘅一先令。 此篇書訊刊於 每週一 發出的獅墨書訊，歡迎免費訂閱