搜尋結果

【最新到貨：新鮮滾熱辣上架】 克麗歐的轉世投胎：影視史學與大眾史學  周樑楷｜國立臺灣師範大學出版中心  ISBN：9789865624880｜HKD$200    講起巴黎，舊年上映嘅電影《拿破崙》受盡法蘭西舉國上下歷史學家所唾罵，因為戲中由英國導演拍嘅「偉大領袖」，形象似乎「與史實不符」。姑勿論究竟電影裡面係點樣呈現拿破崙，但其實文藝創作喺咪必須貼合史實？如果唔係，點解法國人會對《拿破崙》「與史實不符」咁大反應？    影視史學係八十年代興起嘅學術概念，係指以圖像同影像嚟呈現歷史論述，同以文字書寫為主嘅傳統史學相對。圖像畫面同文字書寫係兩種完全唔同嘅介面，表現出嚟嘅歷史敘事可以完全唔同——圖像敘事需要補足嘅細節比文字多好多。好簡單，假設我哋唔知道拿破崙個鼻係咩樣，文字可以唔洗咁細緻咁描寫拿破崙個鼻，但電影就無辦法拍拿破崙塊面但影唔到個鼻。呢個時候，我哋就只能夠合理地推測拿破崙個鼻係咩樣，然後安排個鼻最似嘅演員（假設佢個鼻好重要）。於是乎，影視史學究竟喺咪必然無辦法準確呈現歷史嘅辯論，就由此而生（未計各種因藝術同商業考量而修改同想象嘅部分）。    亦因為如此，影視史學亦都經常同大眾史學掛勾，即係歷史點樣離開學院嘅象牙塔，走入社會面對大眾。影像能夠喺社會發揮巨大嘅影響力，都係不爭嘅事實，畢竟透過電影接觸歷史嘅人，點都係多過睇書。所以，影視史學所呈現嘅論述、畫面同視角，都比起書本更能扭轉大眾對歷史嘅理解。咁，又難怪法國啲歷史學家如此勞氣了。  💡 拍攝歷史題材電影嘅時候，好多劇組都會請一啲學者或專家擔任歷史顧問，提供史實相關意見。不過導演係咪真係會聽曬專家話，就係另一回事。 【店長精選：唔好果本唔敢揀】 影視史學與歷史教學 陳登武｜國立臺灣師範大學出版中心  ISBN：9789865624965｜HKD$167    承上一篇影視史學書介，講到以電影為媒介所呈現嘅歷史論述，一方面可能未必能夠精準地反映史實，但另一方面又更能貼近一般人嘅興趣，因此都係大眾史學裡面嘅重要範疇。咁接下來就可以將影視史學嘅問題延伸到歷史教育裡面——究竟老師喺歷史課利用電影或影視資源輔助教學，可以得到啲咩效果，又會衍生乜嘢問題？    隨住科技發展，而家嘅中學歷史課堂，好多時都無辦法只係由老師自己把口講解內容，而必須要有多媒體嘅輔助。不過，好多老師同學者都相繼開始思考嘅問題係，究竟「上堂播片」，除咗可以勾起學生嘅興趣，令佢哋專注啲之外，本身係咪真係可以幫助學生理解同思考歷史？    呢本書諸位作者各自舉咗唔同嘅歷史課題同相關電影為例子，講咗好多「上堂播片」可以發揮嘅效果。店長我個人嘅經驗（教過幾期大專歷史課）其實都同專家嘅觀點吻合——播片係有用嘅，但係要小心用。閱讀課文，或聽老師講解，其實係需要多啲想象力，先能夠將文字描述轉化為大腦更能理解或記憶嘅圖像，所以影片實際上能夠為學生嘅大腦省略咗轉化嘅功夫，令佢哋可以輕鬆地明白古人所身處嘅環境，更能設身處地感受歷史。不過，亦因為消化同轉化資料嘅工序已經由導演代勞，所以好容易會造成學生思考懶惰，未加批判地接受影片提供嘅論述同觀點。呢樣就係老師需要多加注意同小心嘅部分。  💡 隨住科技日漸發達，學生對老師教學方式嘅期待亦慢慢增加。除咗播放電影或動畫之外，有啲香港嘅老師甚至開始探索利用AR等媒介輔助教學。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 香如故：南海十三郎戲曲片羽 南海十三郎｜朱少璋編｜商務印書館  ISBN：9789620757600｜HKD$168  南海十三郎係香港其中一位最重要嘅粵劇作家，曾經跟隨過薛覺先，又係唐滌生嘅老師。活躍於1930年代嘅佢，本名係江譽鏐，兩歲就已經嚟過香港，之後相繼喺廣州同香港接受教育，讀過皇仁書院，都喺香港大學讀過醫科。不過大學未畢業，佢就搵到比醫學更吸引到佢嘅事業，就退咗學就去廣州，加入薛覺先嘅劇團，成為一名編劇。  只係一年之間，佢就寫下成名作《心聲淚影》，開始走紅。1930年代，南海十三郎成為香港同廣東粵劇界最出名嘅劇作家，寫過好多部非常賣座嘅作品，包括《梨香院》、《燕歸人未歸》、《女兒香》等。到咗中日戰爭爆發，南海十三郎又再寫咗唔少「抗日」劇作，藉此維持士氣。佢亦都有拍過電影，唔少係改編自佢自己嘅粵劇作品。可惜喺戰後，南海十三郎嘅生活相當潦倒，雖然都有寫作賺稿費，但多數時候都要靠朋友接濟，更幾度被送入精神病院。  呢本書收錄咗南海十三郎早期最重要嘅粵劇作品《女兒香》，描寫一位古代將軍嘅千金，同一個渣男之間糾纏不清嘅悲劇故事，最終後者拔劍自刎而死。除咗劇本之外，呢本書亦收錄咗一啲南海十三郎戰後撰寫嘅文章，回憶早年劇團嘅生活，係探索呢位劇作家心路歷程嘅重要材料。 💡 「南海十三郎」係佢嘅藝名，佢生於廣東南海縣，又喺屋企排行十三，因而為名，時人多稱呼為「江十三」、「十三哥」等。 【店長精選：唔好果本唔敢揀】 小蘭齋雜記   南海十三郎｜朱少璋編｜商務印書館  ISBN：9789620756894｜HKD$420  「小蘭齋主」係南海十三郎嘅別號，取自佢細個喺廣州太史第讀過嘅「蘭齋私塾」。南海十三郎係戰前最出名嘅粵劇作家之一，寫下超過一百部作品。但同一時間，佢嘅人生都經歷過大起大落，由大紅大紫嘅明星編劇，變成半瘋半癲嘅傻佬，流落灣仔街頭。寫過粵劇，亦拍唔少電影，甚至仲做過演員，南海十三郎見證咗由三十年代到六、七十年代香港文藝影視業界嘅起跌同變遷。  《小蘭齋雜記》一套三冊，收錄咗好多南海十三郎寫過嘅文章。第一冊《小蘭齋主隨筆》，主要係關於佢個人嘅回憶同經歷，包括佢本身都算顯赫嘅家族（佢父親係清末最後一屆科舉進士，翰林太史江孔殷），以及喺廣州、香港同上海成長嘅故事；第二冊包括《後台好戲》同《梨園趣談》，就係佢自己喺戲曲界嘅所見所聞，包括唔同嘅軼事或者同梨園人物來往嘅感受等；末冊《浮生浪墨》就講多啲自己成年後嘅經歷同見聞，既記低咗自己嘅生活、狀態同情感，亦都留低咗佢對社會同時事嘅睇法。  呢套書嘅編者朱少璋博士係從事香港文學研究嘅學者，尤其專注喺收集同整理香港粵劇發展史相關嘅資料同文獻。《小蘭齋雜記》所收集嘅文章，除咗記錄南海十三郎個人嘅人生軌跡之外，亦都係了解香港早期粵劇發展嘅重要資料，甚至亦側寫戰前嘅香港社會。 💡 相傳佢晚年曾經報警話自己被人偷咗對鞋，左腳被毛澤東偷咗，右腳就被蔣介石所偷，所以「左右都唔行得」。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 小島說話：當馬祖遠離戰地，成為自己   劉亦｜離島出版 ISBN：9786269832927｜HKD$133   馬祖列島地理上就喺中國福州對出，但行政上就歸於中華民國嘅連江縣，係臺灣嘅一個離島群。呢個地方本來都係人煙唔多，安安靜靜嘅幾個小島，但自從1949年民國政府遷往臺北，而中共喺北京建政之後，馬祖就忽然同金門一樣，成為國共對抗嘅前線。就喺眨下眼之間，馬祖就被政府建設成一座軍事堡壘，實行軍法管治，持續咗幾十年。   由馬祖居民嘅角度睇，佢哋嘅角色極為尷尬——就好似金門一樣，被一個嚟自臺灣嘅極權政府控制，擺上前線對抗另一個嚟自中國嘅極權，金門嘅話甚至仲要捱埋砲擊添。大部分嘅馬祖居民都知道自己係中華民國嘅一部分，但中華民國係喺臺灣嘅政權，我又係唔係臺灣人？而同一時間，通常講起所謂冷戰前線，都會先諗起真係有戰事發生過嘅金門，而馬祖雖然都同樣經歷過軍事管制同戒嚴，但又感覺自己嘅角色經常被金門所掩蓋。   呢本書並唔係單純嘅馬祖歷史，而係透過馬祖嘅近代文學史，梳理自1949年以嚟，呢幾十年間馬祖人點樣詮釋自己嘅身世，講述自己嘅故事。就好似香港一樣，馬祖長時間都夾咗喺兩個大強權（中國同臺灣）之間，都有賴馬祖自己嘅島上居民不斷嘗試同書寫，先能夠搵返屬於自己嘅位置。 💡 由於馬祖列島嘅緯度其實比臺灣本島更高，所以中華民國嘅領土最北端，其實唔係新北市富貴角，而係馬祖嘅西引島。 【店長精選：唔好果本唔敢揀】 昂船光影：從石匠島到軍事重地 劉潤和、周家建、高添強｜三聯書店 ISBN：9789620445064｜HKD$88   昂船洲曾經係西九龍對出嘅一座島，如今因為填咗海嘅緣故，已經同九龍半島融合埋一齊。1861年，昂船洲成為咗香港殖民地嘅一部分，由於島上有豐富嘅花崗岩資源，所以好快就成為咗石礦場，亦因而被命名為「石匠島」（Stonecutters Island）。同香港好多唔同地方嘅石礦一樣，昂船洲出產嘅石材成為咗九龍半島開發同建設嘅基礎。 不過，政府好快亦都發現咗昂船洲嘅軍事價值，並將呢個島改為軍事基地。炮台、軍營、彈藥庫以至監獄都係島上建設起嚟。所以喺二戰期間，昂船洲都係日軍重點攻擊嘅對象，炸到面目全非。戰爭過後，昂船洲重新成為海軍基地，由印度軍人駐守，但主要成為官兵休憩嘅俱樂部同相關設施。畢竟去到二十世紀，炮台能夠發揮嘅效果已經好有限，一早就淘汰曬了。 但與此同時，冷戰年代嘅香港係各國情報機關相當活躍嘅地方，呢點都人盡皆知。而好多呢啲情報活動，其實就喺昂船洲上發生，因為政府早喺戰前就已經喺島上興建情報截聽站，係英國喺遠東兩大截聽站之一（另一個喺新加坡）。呢啲情報設施喺戰時經日本人擴建，戰後就更加發揮作用，俾英國監視共產勢力嘅一舉一動。到咗1997，昂船洲基地就轉交俾解放軍，直到而家。 💡 昂船洲監獄喺1874年甲戍風災中夷為平地，事後政府將幾千具囚犯屍體葬咗喺雞籠灣墳場嘅「遭風義塚」。雞籠灣墳場後來改建為華富邨，義塚遷至和合石。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 邁向現代工運第一炮：1920年機工罷工百年紀念文集   梁寶龍｜新銳文創  ISBN：9786267326176｜HKD$130    喺工會一個又一個被迫解散，逐漸沉寂嘅時代，我哋有時好難想象，香港曾經都有過百年嘅工運史。唔少朋友可能都聽過一百年前嘅海員大罷工（1922年）同省港大罷工（1925年），兩者都係香港好早期嘅工人運動，雖然喺廣州國民政府嘅介入下，有極濃厚嘅地緣政治氣息，但至少初心上都係由工人參與，為咗維護勞動權益而發起嘅運動。呢兩場工運都對香港嘅政治、社會、經濟造成巨大衝擊，甚至改變咗香港政府的治理方式，以至係香港社會嘅身份認同。    不過，原來香港最早嘅工運，都唔係呢兩場大罷工，而係1920年發生嘅機工罷工。「機工」即係機器工人，當年泛指好多專業技術勞工，包括喺船塢、工廠工作嘅人，相比起低技術工種（例如係碼頭苦力），已經屬於待遇較好嘅一群。然而，喺第一次世界大戰剛剛結束，百廢待舉、貿易未興嘅年代，佢哋依然都會遭受各種唔同方式嘅剝削。    1920年嘅機工罷工雖然規模無後來嘅海員大罷工、省港大罷工咁大，但其實開創咗香港現代工運嘅先河，衍生出好多往後香港工運嘅特色，例如係召集工人北上廣州、國族主義嘅拉扯、嚟自中國政治勢力嘅介入等等。可以話，機工罷工係後來兩場大罷工嘅前奏。  💡 二十世紀初，中國各地都有機器工人組織，其中好多都係受香港華人機器總工會所啓發而建立，可以話香港有份將現代工運帶入中國。 【店長精選：唔好果本唔敢揀】 政府內部的吶喊：香港公務員工運口述史   梁寶龍｜新銳文創  ISBN：9789865540647｜HKD$220    公務員一般俾人感覺「薪高糧準」，準時放工，待遇優厚，好少會將佢哋同剝削嘅勞動環境聯想埋一齊，而公務員係政府嘅一部分，更加離「社會運動」好遠。但現實中嘅公務員，當然都有權（亦有必要）持續為自己爭取更好嘅待遇同工作環境，而身而為人，亦都會有參與社會嘅權利。    香港嘅公務員維護自己權益嘅歷史，喺開埠初期就已經開始。但當然，有組織嘅工運，就要到二十世紀先逐漸成形。隨住政府體系逐漸擴大，而社會日漸成熟，公務員工運喺七、八十年代走向高峰，幾乎每個政府部門都有工會（甚至有多個工會），不斷與政府（以及彼此）角力，為會員爭取更大嘅權益。與此同時，好多工會亦都相繼參與勞工以外嘅議題，為社會上發生嘅大小事發聲，成為香港不可忽視嘅一股政治力量。    梁寶龍是研究香港工運史嘅重要學者，佢嘅著作跨越咗好多唔同年代，唔同行業嘅工運。喺呢本書入面，佢訪問咗十三位八十年代香港公務員工會嘅領袖人物， 為果個年代嘅公務員工運史留低咗重要嘅記錄。  💡 公務員組織工會通常比起其他行業難度更高，因為公務員體系階級分明，加入工會之後，得罪長官、影響仕途嘅風險更高。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 香港漁民教會   彭淑敏｜基督教中國宗教文化研究社  ISBN：9789627706410｜HKD$110    講起漁民同信仰，首先諗起嘅肯定係天后娘娘，就算要講「上帝」，都會係「北極玄天上帝」，即係北帝。基督教似乎好少會同漁民扯上關係，莫非耶穌都會保佑海上平安，風調雨順？須知道教會本來就唔係咁運作，唔會幫漁民消災解難，唔會喺海上呼風喚雨。不過，原來喺水上人嘅信仰世界，基督教會都依然佔一席位。    或者咁講，對於呢啲漁民而言，真正「有求必應」嘅唔係上帝本人，而係代表教會嘅傳教士。呢啲傳教士會建立學校、贈醫施藥、派衫又派糧，幫手解決漁民生活嘅大小難題，因而贏得漁民群體嘅信任，最終達到傳教嘅目的。所以，喺審視漁民信仰演變嘅時候，教會都係一個必不可少嘅元素，而每一個傳教士喺呢啲漁民群體裡面嘅作風、經歷，聲譽，又尤為重要。    正正因為基督宗教喺呢啲水上人群體之間傳播，係極依賴傳教士本人能夠累積嘅漁民網絡，所以研究漁民教會嘅專著，就唔可以只係睇教會檔案，淨喺呢啲文字資料嚟拼湊漁民教會嘅發展。彭淑敏教授嘅呢本書就特登用咗好多口述歷史，將好多傳道人同漁民之間嘅故事寫低。呢啲故事分別睇，都好似無乜代表性，但傳播福音嘅事業，往往就係由呢啲細眉細眼嘅日常點滴慢慢累積而成。  💡 除咗建立岸上嘅教堂之外，為咗更有效向漁民傳道，呢啲漁民教會仲會有自己嘅快艇（後來東方水上基督教會更加有三艘較大型福音船），穿梭於避風塘同漁港之間做外展服務。 【店長精選：唔好果本唔敢揀】 一個華南客家教會的研究：從巴色會到香港崇真會 湯泳詩｜基督教中國宗教文化研究社  ISBN：9789627706298｜HKD$60    講起客家同教會，如果有睇開香港古事記嘅讀者，可能都會記得有介紹過天主教喺十九世紀嘅大埔同西貢傳教非常成功，仲引起咗好似和神父咁樣嘅人物，能夠帶領西貢村民對抗地主嘅壓迫。不過，除咗天主教之外，其實基督新教都投入過客家族群嘅傳教。喺粉嶺、上水以至深圳唔同地區，巴色差會都係相當活躍嘅教會嚟。    巴色會嚟自瑞士北部，1847年時已經派遣瑞典籍傳教士韓山明嚟到香港，設立上環同西營盤嘅教會（即係而家嘅救恩堂），用客家話做禮拜，專門服務客家人（當時喺維多利亞城內從事體力勞動嘅工人、苦力好多都係客家人）。好快，筲箕灣、土瓜灣、深水埗等石礦區都建立咗教會，服務果度嘅石匠。    而除咗市區入面嘅客家工人之外，巴色會嘅傳教工作亦都好快拓展到去城市以外嘅客家鄉村，西貢黃宜洲、南圍窩美，以至粉嶺龍躍頭亦都先後建立崇真堂（龍躍頭果間叫崇謙堂）。有趣嘅係，由於地理阻隔嘅緣故，由香港殖民地出發，難以翻越九龍群山進入新界，所以喺粉嶺活動嘅傳教士，其實都係以位於深圳李朗嘅巴色會傳教站為基地。香港巴色會喺1924年改名為崇真會，仍然以服務客家人為主，甚至成為客家人身份認同嘅一部分。  💡 喺十九世紀嘅北區，鄉村同宗族之間不斷發生械鬥衝突，甚至將傳教站都牽連入去。所以，喺呢度服務嘅巴色會傳教士，往往都要好小心維持「中立」嘅形象，儘量唔好得罪任何一邊。 此篇書訊刊於 每週一 發出的獅墨書訊，歡迎免費訂閱

文：Isaac 【最新到貨：新鮮滾熱辣上架】 余達之路：糖薑大王與戰後香港    余皓媛、區志堅｜香港城市大學出版社  ISBN：9789629374228｜HKD$188  如果有朋友去過城市大學，除咗知道果邊上莊要反枱之外，可能都會對城大中間嘅「達之路」有啲印象。達之路聽落總有少少奇怪，唔似一般街名，原來係人名嚟。呢條達之路，就係紀念緊今日嘅主角，昔日糖薑業大亨余達之。  綜觀香港歷史，同時活躍於政商界嘅人物不可勝數，時至今日都不乏例子。余達之勁嘅位，就係佢除咗政商兩界，甚至教育同埋城市規劃都有涉獵，瓣瓣都掂。香港戰後經濟不景氣，糖薑業作為競爭激烈嘅行業，首當其衝。余達之身體力行，三次親自率領行家去英國嘅工展會，推銷香港糖薑，成功令訂單逐步回升。  佢嘅威水史當然並不止於此。呢本書主要分為兩部分，首先記述余達之點樣幫香港嘅工業推上去50－60年代嘅高峰，其中包括向港府提倡喺觀塘起工業區等，觀塘一日到黑俾人問候老母，佢都真係功不可沒。當佢賺到錢之後，佢並沒有攞晒去自己享福。書嘅第二部分，就係帶出佢點樣貢獻社區，例如不斷辦學，包括以前嘅嘅工廠學校，同埋仍然喺度嘅又一村學校，都有佢嘅心血，令佢成為受人敬重嘅大人物。  💡 糖薑喺歐洲嘅地位不容忽視，英國人就好鍾意食。特別係倫敦，多霧嘅環境令佢哋愛上咗可以辟治濕氣嘅糖薑。早喺百幾年前，維多利亞女王初嚐過一次之後，亦都立即上癮，鍾意咗食糖薑！ 【店長精選：唔好果本唔敢揀】 Where There Are Asians, There Are Rice Cookers: How “National” Went Global via Hong Kong   Yoshiko Nakano｜香港大學出版社  ISBN：9789888028085｜HKD$180  食咗飯未? 呢句百搭嘅開場白，相信香港人都用唔少。「飯」喺亞洲社會嘅地位講得上係超然，而背後嘅幕後功臣——電飯煲，更加彷彿已經融入咗我哋嘅生活。我哋甚至想像唔到如果唔用電飯煲，可以用咩方便快捷地煮到熟飯。  不過，電飯煲初到香港嘅時候，原來唔係人人受落。果陣講緊嘅係日本撤出香港之後不過十年，大部分嘅香港人對日本軍政府管治依然記憶猶新，心有餘悸，更何況電飯煲係日本鬼子嘅發明？不過，當時嘅信興集團創辦人蒙民偉見到呢個盞鬼嘅新嘢，深深被吸引。香港居住環境擠迫，經常要共用廚房，佢認為電飯煲非常方便，將其引入，成為咗家傳戶曉嘅好幫手。香港作為一個自由港，蒙民偉除咗將電飯煲引入來港之餘，其實亦成功將其轉口至東南亞，又造就了一番事業。香港人嘅身體係誠實的，如果個樣嘢性價比高，唔通仲同你計較昔日嘅仇日情緒？而家要開飯喎。  不過你可能會問，攞一個未見過嘅機器嚟煲飯，點信得過？我點知佢會吾會爆炸？同埋最緊要，我點知啲飯已經熟，可以安全食用？電飯煲係發明咗，但果陣當然未有自動計時功能，究竟蒙生又做咗啲乜嘢，令到佢咁成功？香港唔係發明電飯煲嘅地方，但係佢嘅成功，不能抹煞香港人同埋香港地理位置嘅功勞。喺而家呢個咁講創意嘅世界，透過我哋上兩代嘅諗頭去借鑒，亦都係一件津津有味嘅事。唔講，食飯先！   💡 香港足足有八間大學有以蒙民偉嚟命名嘅設施，包括城大，理大，中大，港大都有嘅「蒙民偉樓」，科大嘅「蒙民偉奈米科技研究所」，浸大嘅「蒙民偉廣場」，教大嘅「蒙民偉圖書館」同埋嶺大嘅學生宿舍「蒙民偉樓‧東亞堂」。 此篇書訊刊於 每週一 發出的獅墨書訊，歡迎免費訂閱

文：Isaac 【最新到貨：新鮮滾熱辣上架】 南涌講古：被遺忘的香港故事  蘆葦花開生態教育基金  ISBN：9789887046707｜HKD$138    三年疫情期間，當香港人無處可去嘅時候，唔少遠離市區嘅地方都成為咗郊遊勝地，俾香港人呼吸一下新鮮空氣。唔知當時嘅你有無因為咁而去過呢個叫「南涌」嘅地方？當社會復常後，出埠旅行重新變得方便時，大家又仲有無呢個興致去探索香港？    南涌位於鹿頸旁邊，被群山及沙頭角海包圍，可以話係城市嘅邊陲。一個與世隔絕嘅地方，但係靠住幾代人嘅努力，三百年來依然屹立不倒，無被城市裡面嘅主流經濟模式所淹沒。究竟點解佢哋可以自給自足？被山包圍住彷彿俾人一種好唔方便嘅感覺，但係正正就係山上面嘅樹林，令南涌嘅居民有食物，藥物甚至建築材料。村民開鑿河道，建造水稻田同埋濕地，加上背靠山林，面向沙頭角海，依個優美嘅環境亦都吸引咗唔少嘅雀鳥駐足，可謂真正嘅鳥語花香。    當然，你可能話，香港靚嘅地方大把，做咩一定要去南涌？不如咁講，我哋成日討論香港喺世界嘅獨特性，而香港每一個地方嘅獨特性，我哋又有無花時間留意？南涌嘅地理位置，使到佢經歷到同香港其他地區唔太一樣嘅日治時期，以及宗教，教育等發展。南涌係一個點嘅「香港故事」，不妨打開本書，了解一下。  💡 喺南涌後山，除咗有日軍機槍堡建築群之外，附近山頭上仲有一塊寫住「張宅」嘅石碑，原來就係標記住南涌張氏擁有土地嘅界碑。 【店長精選：唔好果本唔敢揀】 再現梅窩： 從香港離島農業社區史看鄉郊復育新未來， 探索超越城鄉對立的地方營造  龍子維、黃山、陳寧生、費越｜手民出版社  ISBN：9789887416272｜HKD$320    梅窩對你嚟講係一個點樣嘅印象？度假好去處？定甚至乎會以為係一個好似長洲咁嘅離島？    梅窩代表住嘅係香港第一產業曾經嘅興盛。除咗漁業，農業都係令英治時期香港得以自給自足嘅重要產業。原來，以前漁農署仲要係有指定嘅農業站，而梅窩就係其中一個。農業站用嚟提供技術支援，甚至當係課室，俾農民學習唔同嘅耕作知識。梅窩甚至成為咗一個「農業樞紐」，建立咗一個同西環，長洲連接嘅街渡運輸網絡，有一個成熟嘅產業鏈。與此衍生出嚟嘅就係一批專業農人，書入面嘅華嫂就係一個例子。    不過，無一個地方可以永久興盛，如果跟唔上外部急劇嘅變化，總會被時代淘汰。呢本書可以分成兩部分。喺第一部分，我哋可以好宏觀地睇到呢幾十年嚟梅窩嘅興衰史，由二戰後越來越繁盛，去到70－80年代蔬菜漸漸以進口為主而衰落嘅過程。去到第二部分，作者搵咗12位新舊梅窩居民，分享喺呢個小鎮嘅故事。有人想維持家族生意而留守果園，亦有人希望保存梅窩農村社會嘅獨特而毅然成立合作社。佢哋嘅故事當然唔會一樣，但係佢哋所做嘅原因，大致都係對梅窩有感情，有愛。    如果有機會嘅，不如攞住呢本書帶入梅窩，嘗試搵下書中人物嘅蹤影？  💡 梅窩喺舊版嘅大富翁遊戲屬於最平嘅一塊地，同赤鱲角一樣售價係六百蚊，而最貴嘅太平山係佢嘅六倍有多，要成四千蚊。 此篇書訊刊於 每週一 發出的獅墨書訊，歡迎免費訂閱

文：Isaac 【最新到貨：新鮮滾熱辣上架】 香港製造：跨太平洋網絡與全球化新史 韓墨松｜鄺健銘譯｜季風帶  ISBN：9786269672271｜HKD$197    「香港好，你我都也覺自豪」, 歌仔都有得你唱，曾經作為英國殖民地, 同宗主國嘅緊密聯繫使香港得以引入先進法規, 從而建立良好營商環境。呢番陳腔濫調，大家都聽過無數次。然而除咗英國以外，我哋又點可以遺漏世界第一強國美國，喺二戰後對香港嘅社會、經濟發展發揮咗咩影響力？與此同時，香港逐漸建立起嚟嘅教育體系，亦都開始培養出一批本地精英。佢哋透過自身學問，經驗，喺香港嘅優越地理位置幫助下，建立咗跨越亞洲太平洋嘅人際及技術網絡。呢啲優勢亦都令佢哋成為新興中國市場嘅帶路人，變成叱咤風雲的一代。    呢本書大概可以分為兩部分。第一部分就係講述喺二戰之後，解殖浪潮下，香港經歷咗一個「美國化」嘅現代化。歐美傳教士喺香港建立咗唔同程度嘅學校，例如係崇基學院等。香港學生學識越來越豐富，更多學生遊美旅美，引致書中所提及嘅「跨商效應」，人才冒起，令到呢個城市喺亞太區嘅影響力日趨顯著。去到第二部分，香港經濟得以起飛之後，適逢中國改革開放，呢班被譽為「香港跨商」嘅精英當然把握機會，成為咗中國連接世界各地嘅引路人，包括協助其融入資本主義制度，簽訂協議等。香港喺亞太平洋嘅角色，變得舉足輕重。    經濟發展下帶領嘅思想浪潮亦都不容忽略。除咗民主同專制嘅爭鋒，新自由主義嘅興起係無人可以忽略的，究竟香港喺呢方面又受到點嘅影響？定會唔會甚至乎影響返呢個思想嘅發展？睇香港史有萬千個理由，香港喺冷戰世界裡面常被忽略嘅影響力，係其中一個，而講冷戰香港，必不可忽略韓墨松嘅呢本著作。  💡 以前嘅香港與其「搶人才」，索性自己培訓人才，香港中文大學更加係咗東南亞首個開設工商管理碩士課程（MBA）嘅學校。 【店長精選：唔好果本唔敢揀】 香港僑資與臺灣紡織業（1951-1965） 彭琪庭｜國史館  ISBN：9789860280364｜HKD$50    傳媒日報夜報香港同新加坡，以及其他亞洲地區嘅分野，唔知道大家又有咩嘅感受？唔講而家，講以前。究竟亞洲四小龍之間，係一個充滿競爭，汰弱留強，定還是充分合作，互利雙贏嘅局面？    呢本書以臺灣為中心，紡織業為主體，記述外資如何影響當地戰後嘅社會及經濟發展。其中，同為亞洲四小龍嘅香港華僑資本家更加被認為係當時最重要嘅外資。1950年代嘅香港因為聯合國對中國實施禁運，其經濟結構由轉口貿易改為製造業為主，人所共知。但原來，亦正因如此，有一群香港商家決定將業務拓展至臺灣，以尋求更為安全穩定嘅投資環境。臺灣當時工廠規模細，設備老舊，缺乏專業技術，香港資金以及隨之而來嘅工業知識，正正填補咗呢個缺口。以紡織業而言，臺灣紡織業者原材料生產不足，藉此期望利用華僑到台投資嘅名義，輸入人造纖維等原料。臺灣及香港商人各自面對著自身環境嘅不利因素，連成一線。    香港同臺灣都各自有一個「戰後工業化」嘅神話，因為成功發展工業，完成產業轉型，於是經濟起飛，成為所謂「亞洲四小龍」。喺一般論述裡面，四小龍好似兄弟爬山，各自努力咁，互不相干 地發展自己，但原來現實之中，香港同好多國家都有相輔相成嘅關係。  💡 除咗商業合作外，唔少香港人亦在1950年代代表中華民國足球隊，其中18位退休球員更在2015年獲發臺灣護照，以示感謝。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 中華民國革命祕史   謝纘泰｜商務印書館  ISBN：9789620758829｜HKD$88    1911年嘅辛亥革命推翻咗清朝，建立中華民國，我諗就係人都知，甚至好多讀者都對成個革命過程，以至孫中山當中嘅角色瞭如指掌。咁點解重要特登睇多一本革命史？喺我哋以往嘅認知裡面，孫中山睇唔過眼滿清嘅腐敗，一心希望以革命扭轉局面，建立一個以「三民主義」為本，民主、共和嘅中國。不過，呢個係由細到大教科書餵俾我哋嘅主流論述。現實中嘅孫中山，又係咪真係咁理想？    呢本係謝纘泰所寫嘅革命史。謝纘泰我哋之前已經介紹過佢嘅英文傳記，佢喺澳洲出生，香港成長，後來積極參與中國革命，係重要嘅成員之一。孫中山如果無咗謝纘泰，宣傳革命理念以及籌措革命經費嘅能力都會大打折扣。不過，似乎謝纘泰同孫中山嘅關係又無想象中咁好。    呢本「革命祕史」最重要嘅地方，就係記載住謝纘泰對孫中山嘅諸多批評，包括孫中山本人嘅反民主、獨裁、個人崇拜嘅傾向。同時，佢亦都被形容為一個「莽漢」，而且空有漂亮嘅說辭，但根本無執行嘅能力。孫中山雖然係革命嘅重要領袖，但係同佢身邊嘅同伴似乎關係都唔算十分好。當然，唔係話謝纘泰所寫嘅孫中山就一定係真實，不過加入另一種角度，都令孫中山呢個人嘅形象更立體。  💡 謝纘泰呢本書除咗批評孫中山之外，亦都花唔少筆墨敘述楊衢雲喺革命事業入面嘅角色，認為佢嘅貢獻喺國民黨論述裡面被貶低咗。 【店長精選：唔好果本唔敢揀】 如果那天到來：韓國民主化進程  鍾樂偉｜蜂鳥  ISBN：9789887992387｜HKD$118    革命係一個令人絕望嘅漫長過程。喺一個極度高壓嘅環境底下，要為社會帶嚟任何改變，都必須要付出難以想象嘅高昂代價，以及耗費好幾十年持續抗爭。東亞好多國家都經歷咗大半個世紀先能夠擁有民主，例如係臺灣，又例如係韓國。而韓國比較特別嘅地方，係佢哋嘅民主運動，的確多次帶嚟過曙光，包括李承晚嘅倒台，或者係朴正熙遇刺後，繼任嘅崔圭夏亦曾經有推動民主化嘅跡象。但可惜嘅係，好幾次出現嘅民主化希望，都殘酷地幻滅咗——李承晚倒台後無耐，朴正熙政變奪權，實行更獨裁嘅統治；崔圭夏仲未有機會實現民主，就已經被全斗煥發動政變趕走咗。    韓國人又無放棄過。1960年打倒李承晚嘅419革命之後，韓國人喺朴正熙嘅治下忍受咗二十年嘅「維新體制」，即係獨裁統治；朴正熙一死，韓國人一直被壓抑嘅民怨馬上爆發，席捲全國，直到1980年嘅光州，被政府血腥鎮壓。終於去到1987年嘅六月運動，先成功得到民主。然而，有咗民主選舉，都唔代表韓國人可以停落嚟——脆弱嘅新生民主需要努力保護同維繫，阻止其他野心家同軍人重新奪權；民主社會亦都會有不公義嘅地方，抗爭亦唔會完結。不過，堅持始終會帶嚟希望。  💡 李承晚早喺南韓建立之前就已經做過大韓民國臨時政府第一任總統，不過1925年被彈劾下台，由曾經喺香港活動過嘅朴殷植接任。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 簡明香港足球史  賴文輝｜三聯  ISBN：9789620443084｜HKD$88    香港嘅足球史，並唔只係一個運動文化史咁簡單，而係同香港嘅身份認同以及地緣政治緊緊扣連埋一齊。正如大家近日明白到，香港自身嘅地位，會好影響到足球運動喺呢座城市入面嘅發展。如果我哋講遠少少，冷戰年代就更加如是。    其中最重要嘅一個問題，就係香港出身嘅足球員，究竟應該喺國際賽事入面以邊一支代表隊嘅身份參賽呢？以今日嘅角度嚟講，大家可能都會理所當然咁答「香港隊」（呀唔係，係「中囯香港」先啱）。但係喺七十年代之前，原來香港最優秀嘅球員，都會選擇以「中國隊」名義參賽，而呢個「中國隊」，講緊嘅係統治臺灣嘅中華民國。理由好簡單，就係臺灣足球風氣唔強，選手比較少，而當時嘅華裔香港人，喺臺北政府眼中，「首先都係一個中國人」，因此會徵召佢哋參賽，於是比賽場上就會經常出現「中國隊」對戰「香港隊」嘅場面，但雙方球員幾乎全部都來自香港。    而當中華民國一直要求香港球員以中國隊參賽，香港政府為咗阻止國民黨勢力喺香港擴張，亦都希望遏止中國民族主義情緒，亦都一直要求香港球員留低為港隊效力。更有趣嘅係，為咗打擊國民黨嘅勢力，同埋反對中華民國對「正統中國」嘅主張，中共亦都支持香港球員加入港隊。於是足球運動就導致喺冷戰背景下非常罕有地，形成香港政府寧願同中共企喺同一陣線，對付同屬「自由陣營」國民黨嘅情形。仲未計六、七十年代，香港嘅各大球會仲會被分為「左派」同「右派」球會。所以話體育運動，又點會同政治無關呢？  💡 冷戰年代，如果香港隊喺比賽中贏過中華民國隊，港隊球員甚至會被輿論指責為「漢奸」，認為佢哋為咗「民族大義」，應該放水俾中國隊。 【店長精選：唔好果本唔敢揀】 Britain’s Cold War in Cyprus and Hong Kong: A Conflict of Empires  Christopher Sutton｜Palgrave Macmillan  ISBN：9783319815282｜HKD$580    提到冷戰時代可以同香港比較嘅地方，大家會諗起邊個？係新加坡、臺灣，定係澳門？原來同樣身為「反共前線」，值得同香港對照嘅，竟然係位於地中海嘅塞浦路斯。作者認為，香港同塞浦路斯最大嘅共同點，除咗都係英國殖民地之外，就係兩者境內都有大英帝國治下最活躍嘅共產黨，即係香港嘅中共地下組織，以及塞浦路斯嘅勞動人民進步黨（簡稱AKEL）。    同香港一樣，塞浦路斯嘅共產組織即使喺政府嘅禁制之下，仍然非常活躍，喺暗中滲透社會各個階層，甚至仲可以喺後來合法化之後，參加市議會選舉並贏得唔少議席。除此之外，AKEL亦都同香港嘅共產組織一樣，同境外嘅共產勢力有聯繫（香港地下共產黨係中共分支，AKEL亦都同希臘共產革命有關）；同時，兩者亦都積極利用戰爭帶嚟嘅機會發展自己，例如係香港面對嘅日佔時代以及國共內戰，以及塞浦路斯面對嘅二戰空襲同希臘內戰。    當然，英國殖民政府應對香港同塞浦路斯共產組織嘅方式，亦都會有相當嘅可比性。塞浦路斯同香港政府一樣，都想阻止共產勢力壯大，想消減佢哋喺社會入面嘅影響力，但同一時間，又唔能夠用太強硬嘅態度趕盡殺絕。香港好多左派工會同組織依然可以光明正大咁運作，AKEL甚至仲可以參與市議會選舉，並贏得唔少議席。而令到兩個政府咁做嘅原因，可能都係同社會入面民族主義情緒有關——香港政府生怕打擊共產黨會刺激華裔人口，而塞浦路斯人口以希臘裔佔多數，如果因為打擊共產黨而激發希臘裔居民嘅反英情緒，亦唔係好事。但當然，塞浦路斯最終走向獨立建國，同香港嘅命運就唔一樣了。  💡 二戰結束之後希臘陷入嚴重嘅政治真空，導致共產黨有機可乘，同皇室政府打一場希臘內戰。同國共內戰唔同嘅係，希臘共產黨最終被消滅。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 林蔭下教育：新界和離島學校的故事  李子建、鄭保瑛、鄧穎瑜｜中華  ISBN：9789888807826｜HKD$158    講香港嘅教育史，好多時都會集中喺市區嘅學校，以至係市區嘅名校，新界學校通常得到嘅關注比較少，鄉村學校又更少。眾所周知，香港島、九龍、新界都各有唔同嘅社會面貌，政府亦都有唔同嘅管治模式，所以新界學校嘅發展同市區自然都有好多唔同嘅分別。例如，就源起嚟講，市區大部分嘅學校都係由政府或私人辦學團體以西式教育嘅模式創辦，一開始就係推行緊現代課程。    相反，新界喺殖民地接管之前，就已經有好多學校存在，呢啲私塾同卜卜齋都係用緊科舉考試衍生出嚟嘅課程，同埋以儒家文化扣連嘅蒙學課程。咁究竟係由幾時開始，新界由呢啲舊式私塾為主，變成而家全部都係現代中小學？呢個過程肯定唔係進入殖民時代就會一夕間完成，而係循序漸進嘅。有幾多舊學校被新學校取代咗，又有幾多舊學校成功轉型？    然而，即使係採納咗現代課程，好多新界嘅村校都仍然同市區嘅學校相當唔一樣，分別大到，需要有一間專門嘅鄉村師範學校，培訓喺呢啲村校教書嘅老師。無論係校舍環境、財政資源、校園文化、師資來源、學生人數，都差天共地。所以，睇新界學校同教育嘅發展，某程度上都係睇緊新界同市區發展差距越嚟越大，然後又慢慢縮細翻嘅歷程。  💡 上水嘅鳳溪中學，最初就係由廖氏宗族嘅家塾演變而來。 【店長精選：唔好果本唔敢揀】 A Chinese Melting Pot: Original People and Immigrants in Hong Kong’s First ‘New Town’  Elizabeth Lominska Johnson and Graham E. Johnson｜Hong Kong University Press  ISBN：9789888455898｜HKD$550    近一百年嘅歷史入面，對新界社會面貌帶嚟最大衝擊同改變嘅元素，可以話就係「新市鎮」。香港政府喺1960年代開始建設新市鎮，先喺荃灣、葵涌，繼而喺沙田、大埔等地陸續動工。早喺新市鎮開始之前，新界就已經開始出現城市化，尤其係靠近九龍嘅荃灣、葵涌一帶，仲未計新界各地發展蓬勃嘅墟市。但新市鎮嘅出現將城市化嘅速度大規模地提升，徹底改造咗新界嘅面貌，將農田變曬做萬丈高樓。    但新市鎮為新界帶嚟嘅衝擊又點止係外觀同生態？新市鎮嘅建設提供咗大量房屋供應同社區配套，吸引大量人口由市區甚至係中國遷移過去。於是，大量非原居民同原居民混合喺同一個社區入面，會發生咩事？兩者嘅生活方式、社會風氣、文化習俗都不盡一樣。兩群人住埋一齊，又會產生啲咩效果？    呢本書嘅作者花咗好長嘅時間，深入研究被荃灣新市鎮所淹沒咗嘅鄉村，果啲原有村民喺荃灣點解自己嘅原居民身份，點樣理解自己同「外來」荃灣人嘅關係？香港嘅新市鎮，係咪可以同其他移民社會比較？咁樣嘅人口構成，係導致文化融合，定係更多衝突？  💡 荃灣係新界最早城市化嘅地區，早喺戰前已經大量開發。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 你不可能是漢族: 百年民族魔咒大破解  吳銳｜八旗  ISBN：9789865524128｜HKD$150    首先要請大家思考一件事。返返去中學嘅中史課本，孫中山曾經叫過兩句唔同嘅口號，分別係「驅除韃虜，恢復中華」，「韃虜」指嘅係滿洲統治者；以及「五族共和」，即漢、滿、蒙、回、藏融合而成「中華民族」。好，咁請問，喺孫中山嘅理想入面，到底滿族係唔係中華民族嘅一部分呢？係要「驅除」，定係「融合」佢哋？「中華民族」嘅內涵，其實可能無主流論述講得咁「自古以來」、咁「理所當然」，佢嘅內涵同意思其實都會隨時代而不斷變化。    1953年嘅中國人口普查，中國係由四百幾個民族組成；但大家由細到大讀書讀到嘅，都係話中國有「五十五個少數民族」，咁中間果三百幾個民族去咗邊？當然就係被歸類入其他民族裡面，而當中大部分人，相信都被改劃為「漢族」，無啦啦成為咗「炎黃子孫」。    但漢族嘅建構並唔係純粹將啲少數民族喺行政上劃嚟劃去咁簡單，而係整個二十世紀，將成個歷史論述由頭寫過一次，然後透過政府同知識分子控制嘅教育、媒體、宣傳體系，將呢套新論述滲入每個國民嘅腦袋裡面。而為咗自圓其說，呢套論述嘅好多細節都必須要重新書寫，例如係民族嘅起源——邊個創造中華民族、漢族？例如係民族嘅構成——邊啲人算係中華民族、漢族，邊啲係少數民族、外族？所有民族認同都係由人建構出嚟，最忌不假思索全盤接受。  💡 「中華民族」呢個概念，最早係知識分子梁啟超喺1902–1905年間提出，目的在於推進中國嘅民族主義，為中國建立完整嘅國族論述。 【店長精選：唔好果本唔敢揀】 何謂中華、何謂漢：追逐彩虹的草原男兒 後藤多聞｜鄭天恩譯｜八旗  ISBN：9789860763683｜HKD$200    「中華民族」呢個概念，係由近代嘅中國人發明出嚟，呢點毫無疑問。在此之前，居住喺中華帝國統治範圍內嘅人，並唔會自動獲得強烈嘅「中國人」身份認同。不過，究竟「何謂中華」、「何謂漢」呢啲爭議，可能喺古代就已經有表徵浮現。喺以前嘅歷史教科書裡面，所有非漢嘅「胡人」，都只為一個目的而存在，就係要「漢化」。無錯，好多「胡族」同中原帝國嘅關係都唔好， 甚至多有衝突同戰爭，但最終佢哋都係會「接受」呢啲「先進嘅中華文化」，然後成為「華夏」嘅一分子。    但呢本書要講嘅，並唔單係「呢啲外族並沒有漢化」，或者「胡人接受部分漢文化，並唔代表佢哋覺得中原文明好先進」，呢啲好多學者同作者都講過了。呢本書要針對嘅問題，係究竟中華帝國本身，係咪一個漢人帝國呢？會唔會其實一直同呢啲「外族」、「胡族」互動嘅中華王朝，本身就唔係「漢」？    尤其喺兩晉至隋唐之間，其實當時嘅中原政權，實質上都係多民族國家，漢族以外嘅其他民族都喺帝國內部有唔同嘅影響力同話語權，甚至統治階層嘅血統本身都係多種族構成。一直去到明朝，先真正開始算係一個以漢人為主題嘅朝代，當然清朝又唔多算係了。而我哋理解嘅「漢人」國家，可能真係要到民國時期先成形。  💡 享附盛名嘅「中國皇帝」唐太宗李世民，其實漢人血統比大家想象中少。佢嘅父系同母系祖先不斷同鮮卑貴族通婚，其實都係混血兒。 此篇書訊刊於 每週一 發出的獅墨書訊，歡迎免費訂閱