搜尋結果

【最新到貨：新鮮滾熱辣上架】 一切未曾逝去：越南與戰爭記憶  阮越清｜胡宗香譯｜馬可孛羅  ISBN：9786267156285｜HKD$197    「越南唔係一場戰爭，而係一個國家。」呢本書嘅推薦語上面有呢一句，相當精準地概括咗呢個國家嘅歷史係點樣被外來嘅強權定義，而呢度嘅人又點樣嘗試將話語權爭翻翻嚟。越戰係慘痛嘅歷史記憶，不論對越南人、美國人，甚至係同樣有參戰嘅韓國、中國等等都一樣。不過，唔同群體喺越戰期間經歷過嘅「慘痛」，好似有唔太一樣。例如話，同一場戰爭，贏嘅同輸嘅都係同一個國家嘅人，咁越南應該點樣紀念佢好？如果政府嘅立場係偏向勝利嘅北方，咁之後逃難嘅越南船民，又算係咩？    但其實，越戰嘅歷史論調，係唔係越南政府可以話曬事？對美國嚟講，越戰係一個重要嘅傷痕，代表大量美國人為咗另一個唔相干嘅國家而死，代表住美國嘅軍隊都唔一定係所向無敵。世人討論越戰果陣，幾乎都係集中喺「美國戰敗」或者「蘇聯戰勝」呢方面，而好少人真係在意究竟越南人喺呢場戰爭入面嘅角色係乜嘢，或者佢哋經歷過啲乜嘢。    而咁樣嘅戰爭，留低咗不可磨滅嘅傷痕，仲有好多實地嘅遺蹟，越南人本身又應該點樣處理？今時今日遊客去越南旅行，幾乎一定都會將「越戰」排入觀光行程入面，點都要去一次古芝地洞，或者參觀戰爭相關博物館，或者係參加一啲燒槍體驗活動，就算無都可能會買一兩件坦克車或槍炮嘅鎖匙扣、飾物，而好多越南人都係以提供呢啲服務同商品維生。咁佢哋又算唔算消費緊自己嘅戰爭傷痛？  💡 以越戰為背景嘅著名音樂劇《西貢小姐》，講述美國大兵被派到越南打仗，從而邂逅一位越南女性嘅悲劇故事，不過諷刺嘅係，呢套劇從來都無喺越南上演過。 【店長精選：唔好果本唔敢揀】 古代中國與越：中國南方邊境的自我認知與族群認同 錢德樑｜賴芊曄譯｜八旗文化  ISBN：9786267129975｜HKD$187    喺越南長久嘅歷史入面，「被外來大國主宰命運」似乎佔據咗唔少嘅篇章。近嘅，有越戰期間嘅美國，再早少少係二戰期間嘅日本，再之前係殖民主法國，而最重要嘅，可能就係長時間影響住越南社會同文化，甚至某幾段時期統治越南嘅中國。越南同中國嘅關係千絲萬縷，佢哋同屬於共產國家，文化上亦都有好多中國嘅影子，但中國侵佔同傷害越南嘅過去對好多越南人嚟講亦都依然歷歷在目。甚至喺追溯國家起源果陣，都難以擺脫同中國嘅關係。    究竟古百越人算係咩？佢哋係距今三千幾年前就出現嘅古老族群，主要分佈喺今日嘅越南北部以及中國嘅南方。佢哋同當時嘅中原文明相距甚遠，但係同越南嘅文化亦都有啲出入。喺現代人書寫歷史果陣，中國人會將百越人視作「蠻夷」，係漢族之外嘅野蠻人，但係同時又係「中國」嘅一部分；越南人會將百越人視作自己嘅祖先（或至少係祖先之一），但係百越人最主要活動嘅範圍其實都唔係越南。    咁百越人自己點睇自己？其實百越人本來都無一個劃一嘅身份認同，所謂「百越」其實係好多個生活喺唔同地方，有唔同文化嘅部落同族群，福建嘅百越、廣東嘅百越、廣西嘅百越、越南嘅百越，通通都唔太一樣。佢哋唯一嘅共同點，就係「同中原漢人唔同」以及「被中原漢人排斥」。中原漢人稱呼呢啲位於南方同自己唔一樣嘅所有人做「百越」，呢啲人漸漸亦都喺接觸、抗拒、接納漢人等等嘅互動過程入面，接受咗呢個身份。  💡 理論上，香港曾經係一個叫南越國嘅國家範圍入面，而喺越南官方史觀入面，南越國係越南嘅一個朝代，所以咁樣講嘅話，香港亦都係越南自古以嚟嘅一部分。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 時間怪獸：被歷史塑造的大英帝國進步假象 普莉亞・沙蒂婭｜苑默文譯｜時報出版  ISBN：9786263532052｜HKD$227    由十六世紀喺美洲建立殖民地開始，英國喺世界各地建立龐大嘅殖民帝國，到咗二十世紀初全盛時期，更加統治緊四分之一個地球。喺呢幾百年嘅歷史入面，大英帝國將文明散播到世界每個角落，喺好多原始嘅社會入面改善當地人嘅生活，帶領唔同嘅落後國家走入現代化嘅進程。以上係我哋慣常聽見嘅論述，不論係英國本土，定係好多唔同嘅前殖民地，都有唔少人認同呢個論述，出現將英殖歷史引以為傲甚至感謝帝國殖民嘅心態（我最近先知原來非洲尼日利亞社會入面，都會有老一輩人非常懷念英殖時代嘅現象），喺香港就更加唔洗講。    任何有基本歷史學素養嘅人，都會明白呢種論調唔會係史實嘅全部。當然，被殖民者唔可能完全無喺殖民過程之中得到任何好處，衰衰地點都真係有起到好多現代建設，有建立到現代嘅政治同法律體系。但係，好多學者都開始挑戰呢種論述——係咪無被人殖民過，呢啲國家就真係無辦法自己搞現代化呢？泰國、日本，甚至係非洲埃塞俄比亞都係反例。唔係話呢啲國家完全靠自己唔需要借助西方國家嘅力量，但至少無做過殖民地，一樣可以完成現代化。更唔洗講嘅係，現實中好多殖民地都經歷過大大小小嘅壓迫甚至屠殺。    既然如此，咁大英帝國象徵住「進步」嘅論述係點樣嚟，又點解會被咁多人接受？原來喺呢五百年入面，幾乎每一代嘅英國知識分子同社會精英，都會搵到一套自己嘅說辭，氹掂自己同社會大眾，去支持大英帝國嘅擴張。於是乎，所有嘅侵略都係「必要之惡」，所有嘅屠殺都係「打者愛也」，所有嘅壓迫都係「歷史規律嘅一部分」而與個別國家或個人無關，而呢啲說辭，甚至仲可以影響埋被殖民嘅人。而家再睇翻香港，喺我哋對過去百幾年嘅英治時代歷史嘅理解入面，又有幾多係公道嘅評論，有幾多係被人吹奏嘅神話？  💡 喺十九世紀，幾乎每次有英軍喺外地犯下暴行，例如係大屠殺之類，都會受到英國本土輿論嘅強烈譴責，但係呢啲輿論，又神奇地唔會動搖社會對帝國擴張嘅支持。 【店長精選：唔好果本唔敢揀】 帝國主義的末日：去殖民的風潮吹過亞洲與非洲，改變了二十世紀的世界版圖 歐斯特哈默、揚森｜傅熙理譯｜貓頭鷹出版  ISBN：9789862623824｜HKD$150    最近，印度政府討論緊好唔好將國名由「India」改做「Bharat」，理由係前者屬於殖民者對呢片土地嘅稱呼，後者先係「本土」嘅叫法。呢度想講嘅係，印度自1947年脫離大英帝國獨立，但係過咗七十幾年，都仍然需要討論「解殖」嘅問題。而解殖，其實係一個全地球都要面對（或者曾經面對）嘅事，皆因當今世上大部分國家，都曾經係殖民地。淨喺二戰之後脫殖獨立嘅國家，就已經有一百三十幾個。    但係，雖然喺亞洲同非洲幾乎個個國家都要面對解殖，但係同一時間每個國家嘅解殖經驗都完全唔一樣。亞洲嘅解殖大概喺四、五十年代開始陸續發生，過程有啲係相對和平（例如新加坡），有啲要打仗（法屬印度支那），有啲就算唔打仗，都要死好多人（印度、巴基斯坦），有啲脫離殖民地，但又馬上落入另一個外來政權手中（臺灣、東帝汶）；非洲嘅解殖浪潮相對差小小，六十年代先嚟到，當中牽涉嘅係反殖戰爭（阿爾及利亞）、無限輪迴嘅政變同內戰、仲有各種冷戰勢力嘅介入（安哥拉內戰連古巴都有參戰）。    香港嘅殖民同解殖經驗當然亦都相當獨特，好似九七主權移交咁樣嘅解殖方式，喺世上其實都唔多見。而香港人喺當中嘅反應、感受、認同，亦都同世上其他殖民地唔一樣，仲未計香港人嘅懷舊情緒，以及對殖民地時代嘅歷史記憶。或者應該問：其實香港有無真正解殖呢？有啲人覺得未，亦都有人認為其實我哋已經身處喺由政府安排嘅解殖過程之中（不論係晚期嘅英治政府定係而家嘅中國政府）。但無論如何，香港始終都有一日需要自己完成解殖呢個步驟，因為由外力執行嘅，往往都會有唔太一樣嘅效果。呢一日嚟到嘅時候，唔知我哋又可以由世界各國嘅解殖歷史入面學到幾多野？  💡 除咗印度之外，菲律賓政府早喺七十年代亦都曾經提出過要改國名，因為「Philippines」係紀念西班牙國王菲臘二世，而計劃中嘅新國名「Maharlika」就係本土菲律賓語入面「自由人」嘅意思。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 Oral Histories of Older Gay Men in Hong Kong: Unspoken but Unforgotten  Travis S. K. Kong｜Hong Kong University Press  ISBN：9789888528066｜HKD$210    講起戰後嘅年代，好多人都諗起黃金年代，經濟起飛、大興土木、文化燦爛。不過，對果個年代嘅同性戀者嚟講，佢哋所經歷嘅香港似乎唔太一樣。喺經濟上變得自由開放嘅同時，社會風氣仍然保守，相當排斥同「大家」唔太一樣嘅人。當然，社會拒絕承認同接納唔同嘅性取向，唔代表呢啲人唔存在。我地想象中嘅同志，或者係能夠出現喺媒體上嘅同志通常都係年輕人，並唔係因為同志全部都係年輕人，而係因為今日嘅社會，比起過去相對能夠讓同志被看見，但即使喺過去更封建嘅年代，同志依然存在。    咁呢啲已經上咗年紀嘅同志，經歷過嘅係一個點樣嘅年代？喺整個社會都將同性戀視為禁忌、淪落、疾病、甚至犯罪嘅年代，佢哋嘅生活經驗肯定會同現代嘅同志相當唔同。咁樣嘅環境之下，呢班人係點樣發現自己嘅同性傾向、點樣回應世界嘅目光、點樣接觸其他同志社群、點樣尋找伴侶，以至係點樣出櫃，又或者隱瞞同壓抑自己嘅性傾向而同異性組織家庭？    到咗現代，社會終於變得稍為寬容一點，對同志嚟講輕鬆一點。但係而家呢班老一輩嘅同性戀者已經年紀漸長，佢哋最有活力、最能夠探索自我嘅青春年華，已經喺壓抑之中錯過咗。咁喺二十一世紀，佢哋會點樣面對呢個已經轉變咗嘅社會？點樣面對下一代甚至下兩、三代嘅同志？又點樣面對此時此刻嘅自己？作者透過進行十三段口述歷史，研究十三段同志人生，剖析十三種喺封建社會之中自處嘅方法。  💡 由1842年開始，香港就遵從英國嘅制度，嚴格禁止同性性行為，直到1991年除罪化先解禁。不過，有關嘅規定只關男性事，而且有鉅細無遺針對男性之間嘅各種性行為逐一禁絕，但係女性嘅同性性行為，一直都係合法嘅。 【店長精選：唔好果本唔敢揀】 A Death in Hong Kong:  The MacLennan Case of 1980 and the Suppression of a Scandal  Nigel Collett｜City University of Hong Kong Press  ISBN：9789629375577｜HKD$278    香港同志平權嘅歷史有好多個里程碑——1991年嘅同性性行為非刑事化、2005年合法肛交年齡與異性戀性交睇齊、2008年第一次同志大遊行，再到2012年多位公眾人物相繼出櫃等等。不過，現時好多論者都有共識，近四十年嚟眾多嘅改變，都源自於1980年轟動一時嘅麥樂倫案。    1980年一月，時任督察麥樂倫（John MacLennan）喺何文田警察宿舍中被發現身中五槍死亡，引起軒然大波。事緣麥樂倫當時正面對緊一單官司，案情指出佢喺兩年前曾經喺警察宿舍入面侵犯一名華裔青年劉偉堂。被揭發之後，警方依照當時仍然禁絕同性性行為嘅法律，控告麥樂倫「粗曠性行為罪」，但係審訊之日，麥樂倫就倒於血泊之中。之後嘅死因聆訊，裁定麥樂倫死因不明，但係律政司又堅持話佢死於自殺，引起好多唔同嘅猜測——究竟喺咪警隊為咗掩飾同性戀醜聞，所以迫佢自殺，甚至殺人滅口？講到底，就算自殺都好，邊個自殺會連開五槍咁多？    案件嘅後續發展，以及輿論繼續發酵，似乎終於迫使香港人正面面對同性戀者廣泛存在於社會嘅事實，究竟喺要繼續將佢哋完全排除，定係應該放開心胸，接納佢哋都係正常人，都係社會嘅一分子？政府其實早喺1969年已經嘗試推動修改法例，將同性性行為除罪，但當時受到好多保守親中團體反對。麥樂倫案之後，社會輿論終於慢慢扭轉，即使八十年代中期愛滋病蔓延一度引起針對同志嘅恐慌，但係都無阻除罪化終於喺1991年實現，開啟往後通往平權嘅道路。  💡 麥樂倫案引起輿論廣泛質疑警隊滅口之後，政府曾經成立獨立調查委員會，由法官楊鐵樑主導（即係後來同董建華爭做特首嘅候選人），查證麥樂倫嘅真正死因。不過，獨立調查嘅結果依然佢係死於自殺，同死因裁判結果唔同，耐人尋味。   此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 尋蹤覓蹟：香港唐樓故事   陳國豪｜中華書局  ISBN：9789888860494｜HKD$128    其實唐樓有幾「唐」？唐樓顧名思義，就係唐人住嘅樓，係「華人」嘅居所。不過，華人歸華人，如果無英國喺香港建立殖民地，唐樓可能就唔會喺香港出現。事關唐樓就係因城市而生嘅建築物，未有殖民地之前，香港嘅只有各種形制嘅村屋。    但係，始終喺香港經歷咗百幾年嘅發展，唐樓其實都有好多唔同嘅變化。第一代唐樓用青磚建造，有好多木結構同瓦片屋頂，其實亦都有好多古代建築嘅影子；1903年，社會由鼠疫陰霾之中漸漸恢復過來之後，政府決定整頓唐樓規格，保證環境衛生，因此催生第二代唐樓，空間寬敞得多，而且石屎開始出現，設計上亦都開始有騎樓；1935年嘅《建築物條例》，則係第三代唐樓嘅開端，石屎基本上取代咗木同瓦，各式各樣嘅建築風格開始匯聚喺同一棟建築物身上，包括現代主義、新古典、Art Deco等等可能好多人都聽過但又講唔出其實係咩嘅東西；到咗戰後，隨住人口暴增同建築技術進步，政府放寬建築物高度限制，唐樓就開始不限於三、四層，以向五、六層嘅高度進發。    但除咗建築風格之外，唐樓嘅變化，同時亦都反映緊香港嘅歷史進程。由第一代到第四代唐樓，每個階段之間嘅演進，其實政府嘅建築規定都係好重要嘅轉捩點之一。換句話講，就係政府因為時勢所制定嘅政策，塑造咗果個時代嘅城市景觀。另一方面，唐樓嘅住客亦都不斷轉變緊——住喺第一、二代唐樓嘅，好多係開埠初期隻身來港嘅勞工租住劏房；第三代唐樓比較多花款（例如太子道西唐樓群、雷生春等等），顯然就係中產階級先能夠負擔；第四代呢，因應人口結構嘅變化，又變返市井少少咁。到咗而家，唐樓嘅形象又好兩極化，一係就又殘又舊唔好住，最好快啲重建；一係就覺得係文化瑰寶，必須保育。  💡 唐樓曾幾何時都可以係「摩登」嘅代名詞，例如係太子道西190號嘅戰前唐樓，係由比利時嘅建築公司操刀設計，果陣係相當現代前衛嘅建築物，連大廈名都叫「摩登公寓」。 【店長精選：唔好果本唔敢揀】 香港騎樓   林蔓莉、王新源｜中華書局  ISBN：9789888809745｜HKD$138    如果要仔細咁講唐樓嘅建築特色，「騎樓」又係一個難以迴避嘅主題。騎樓指嘅係唐樓上層延伸到馬路邊嘅部分，通常由兩條大柱棟落地支撐。香港常見嘅騎樓，又稱為「廣州式騎樓」，除咗香港之外，廣州亦都好常見。不過，「廣州式騎樓」嘅起源其實眾說紛紜，有人認為係廣州先出現，然後傳入香港，亦都有人認為其實騎樓首先喺香港出現，之後先傳入廣州。    而騎樓其實又唔係只有香港同廣州嘅唐樓先出現，喺亞洲好多唔同地方都有，例如係中國沿海城市嘅舊區、馬來西亞同新加坡嘅店屋，都仍然有騎樓。臺灣甚至有法律規定某啲地段嘅建築物一定要有騎樓設計，以代替行人路。但係呢啲地方嘅騎樓，又同香港見到嘅好唔同。    但無論如何，騎樓點都係戰前同戰後初期香港城市面貌嘅一個好重要特徵。成排嘅騎樓，為當時嘅人遮風擋雨，又為建築本身拓展空間。亦都因為如此，喺討論保留戰前唐樓嘅時候，如果只能保留單幢唐樓，其實係相當可惜，因為只有一幢嘅話，能夠再觀察嘅就只有建築物本身，而就唔能夠完整呈現街道嘅空間。成排唐樓都可以留住嘅話，「騎樓下行人」嘅城市生活經驗先能夠被保存落嚟。  💡 雖然普遍覺得「廣州式騎樓」想當然來自廣州，但亦都有人指出其實香港早喺十九世紀末已經有騎樓，例如1888年建成嘅灣仔和昌大押，比二十世紀初先有騎樓嘅廣州要早得多。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 敘香園往事  李恩霖｜中華書局  ISBN：9789888512669｜HKD$168    敘香園係香港著名嘅一間老字號酒家，1926年開業果陣只係一間小館，以相對低廉嘅價錢，提供午、晚市服務，亦有宴席同到會。不過，敘香園喺開業之初，已經唔係「小本經營」嘅家庭生意，事關創辦人林柱勳出身飲食世家，家族本來就已經喺廣州經營蔬菜批發同埋有四間分店嘅兆豐酒樓，到咗1920年代敘香園開業嘅時候，林氏家族亦都同時喺香港經營緊杏香園冰室、兩間公團飯店，仲有桃園酒家同華樂園飯店，已經成為一個飲食企業。    敘香園曾經有過五間舖，分別係中環創始店、1960年開業嘅銅鑼灣敘香園飯店、短暫存在過嘅嘅油麻地敘香樓、以及七十年代嘅尖沙咀敘香園酒樓同灣仔敘香邨。呢本書作者李恩霖係林柱勳嘅外孫，未曾參與敘香園嘅經營，但又喺敘香園入面長大。由半個局外人的角度，窺探呢間八十年代之前馳名香港嘅酒家品牌，究竟係點樣建立起嚟。    不過，本書另一個重頭戲，係結尾由專研香港飲食文化嘅黎的琛所寫附文〈敍香園背後的三本大紅書〉，透過三本敘香園當年的內部文件，分析果個年代嘅敘香園，以至香港粵菜酒家，係點樣運作。敘香園首先係一盤生意，由採購食材、設計餐單、廚房烹調、上菜待客，都有屬於呢個行頭嘅做法。所謂老店，好多時珍貴嘅除咗所謂人情味，或是老師傅嘅廚藝，仲包含唔同時代嘅經營之道。  💡 敘香園至少喺1974年嘅時候，仍然有野味入饌，例如係「冬筍北菇紅烤菓子狸」，反映時人對呢啲食材嘅接受程度同現代大有不同，菓子狸要到2003沙士之後先喺香港嘅食肆完全消失。 【店長精選：唔好果本唔敢揀】 香港遺美：香港老店記錄（修訂版） 林曉敏｜三聯書店  ISBN：9789888809509｜HKD$188    每逢有老店結業嘅消息傳出，就會有唔少人專程過去見證最後一面，如果係食肆嘅話仲會幫襯埋最後一次。好多時，呢啲現象都會引起一陣網上嘅討論，有啲意見認為好多人平時根本就唔會幫襯呢啲小店，只有去到要執笠過時先去「送殯」打卡，對保存呢啲文化根本一啲幫助都無。不過，由另一個角度諗，呢啲本來就唔太關心小店嘅人，都仍然會因為某間小店結業而走去打卡，表示至少佢都認同小店結業係一件可惜嘅事，不至於覺得呢啲地方毫無價值。而喺呢啲老店嘅最後階段，有好多人過去影咗相，發表過一啲感想，都算係一種記錄，至少大家都記得有呢間舖曾經存在過。    最理想嘅情況自然係老店都可以繼續經營，社會可以變返做一個小店林立，非常多元而又充滿人情味嘅環境。然而時代嘅巨輪不斷向前推嘅同時，香港社會整體嘅環境亦都不利於小店生存。咁嘅情況下，如果我哋接受小店同老店一間接一間咁結束係無可避免嘅話，至少我哋仲可以好好咁記低佢哋。    當然，打卡同認真做記錄又係兩回事嚟，甚至影張好靚嘅相同認真做記錄都係兩回事嚟。呢本書包括咗二十五間老店（而且唔限於食肆！），唔單只係相影得好，更能夠透過呢啲相講翻呢啲老店嘅故事，係對呢啲老店負責任嘅記錄。  💡 上個世紀嘅人喺珠寶同鐘錶行打工，恐怕係同二十一世紀相當唔同。喺械劫案橫行年代經營嘅老鐘錶店、珠寶店，最容易被人忽略嘅特色，係牆上可能會有當年持劫匪所留低嘅刀槍彈痕。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 民族重建：東歐國家克服歷史考驗的旅程 Timothy Snyder｜盧靜、廖珮杏、劉維人譯  衛城出版｜ISBN：9786267052822｜HKD$250    如果呢個世界上從來都無你呢個國家存在過，但係你又好清楚自己同以往統治緊你嘅民族完全唔一樣，咁你可以點樣憑空建立屬於自己嘅國家？講緊嘅，係東歐幾個國家喺過去幾百年嚟由形成民族，到塑造認同，到建立國家，再到捍衛國家嘅過程。烏克蘭就係一個咁樣嘅例子，直到1917年之前，世界上從來都未有過一個叫「烏克蘭」嘅國度，上千年以嚟，呢片土地都係波蘭、俄羅斯等鄰近大國嘅領土。但即使係咁，烏克蘭嘅人依然形成自己嘅文化、語言、生活方式，最終形成烏克蘭民族。但構成烏克蘭國族認同嘅，除咗文化之外，更要包含近一百年嚟被各敵對國家侵襲、清洗，以至係蘇聯恐怖統治所遺留落嚟嘅痛苦記憶。    至於其他東歐國家，情況又有啲唔同。立陶宛曾經同波蘭一齊建立過強大嘅聯邦國，但係又被其他國家瓜分同佔領，好不容易去到近代有機會重新建國，但係連首都應該定係邊都無辦法自己決定——維爾紐斯係立陶宛人嘅文化中心，但係人口就以波蘭人佔大多數，而歷史上大部分時間則係由俄羅斯同白俄羅斯統治，咁邊個先可以擁有呢座城市？至於原本同屬聯邦一員嘅波蘭，都唔好得去邊。波蘭被三國瓜分，一戰後短暫復國，但又喺二戰期間慘遭納粹蹂躪，跟住被蘇聯統治，最終喺九十年代先至建立穩固嘅現代國家，呢個故事大家都知道了。不過，長時間受外族統治之下，點樣先可以喺短短二、三十年間，走出呢啲傷痕，建立一個正常嘅社會，仲可以跟上歐洲其他國家嘅步伐？  💡 烏克蘭同俄羅斯之間糾纏不清嘅歷史，最早可以由九世紀嘅基輔羅斯講起。呢個古國以基輔為中心，但組成呢個國家嘅東斯拉夫人就係今日俄羅斯同烏克蘭人嘅祖先。至今烏俄兩國都聲稱本國歷史可以追溯到基輔羅斯時期。 【店長精選：唔好果本唔敢揀】 建國與國際政治：近代中印泰主權國家建構比較史（1893-1952）   莊嘉穎｜鄺健銘譯｜季風帶出版  ISBN：9789869745888｜HKD$163    如果我哋將國族建構嘅視角，由專注於東亞，放大少少去到東南亞，咁中國、泰國同印尼都會係值得擺埋一齊比較嘅例子。如果東歐嘅國族建構，係要諗辦法擺脫外國統治嘅陰影，咁亞洲呢三個國家嘅國族建構，反而係要依賴「外國勢力」先至能夠完成。中國喺鴉片戰爭之後，直到共產黨掌權嘅一百年之間，經歷咗幾多唔同外國勢力的出出入入，自不待言。近代中國嘅現代化、文化革新、國家想象、民族建構，無一不受外國影響。英國、美國、法國、德國、日本、俄羅斯/蘇聯，呢啲國家嘅東亞政策，全部都會左右中國嘅歷史進程。    印尼喺近代成為荷蘭嘅殖民地，又經歷過二戰同革命，變成我哋如今所見嘅現代民族國家。印尼係點樣喺被外國殖民嘅狀態下，吸收統治者嘅治理模式，亦都同外來嘅統治者互相利用，喺殖民地時代就已經開展民族建構嘅過程，如此先可以喺二戰結束之後，迅速發動革命，建立主權國家。但係即使係建立咗主權國家，佢嘅疆界，依然都係殖民地留低嘅疆界，同昔日嘅滿者伯夷帝國相比，仲係唔係同一件事？至於泰國又係另一個故事，同印尼唔同，泰國係成個東南亞唯一無做過殖民地嘅國家。位處大國夾縫之間（literally，夾喺英屬印度同法屬印度支那之間），泰國（暹羅）為求生存，幾任嘅泰王都好有意識地喺英國同法國之間食盡兩家茶禮，左右逢源咁一邊討好兩國，一邊希望喺佢哋身上爭取好處。點樣喺借助外力同確保自主性之間保持平衡，就由泰國歷史示範咗俾我哋睇。  💡 雖然唔能夠抹殺印尼民族主義者喺建國過程中嘅努力，但係印尼最終可以獨立建國，其實其中一個好關鍵嘅原因，係美國喺戰後馬歇爾援助計劃之中，對荷蘭開出嘅條件，就係要俾印尼脫殖獨立，而荷蘭基於經濟考慮同意。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 Bound to Emancipate: Working Women and Urban Citizenship in Early Twentieth-Century China and Hong Kong    Angelina Chin｜Rowan & Littlefield  ISBN：9781442215597｜HKD$1350    二十世紀初嘅東亞，度度都講緊要現代化，要開放引入外來思想，並且打破封建制度。除咗政治、文化之類，其中都有唔少影響力嘅，就係解放婦女嘅運動。由唔再紮腳，到自由戀愛，呢種風潮由中國各大城市興起，吹到落嚟香港。再加上身為英國殖民地附帶落嚟嘅西式女性想象，就形成殖民地時代香港嘅女性。    喺呢個時代嘅香港，社會同政府都擺咗好多資源同注意力喺保護底層婦女，包括同本地士紳成立保良局，拯救被拐帶嘅女童；廢除相當於奴隸制度嘅妹仔習俗；以至為妓寨和性工作者發牌，試圖杜絕逼良為娼等等。當然，香港政府做呢啲嘢，唔會單純係為咗拯救婦女咁好心，例如禁妹仔係迫於倫敦方面嘅壓力，或者向性工作者發牌，係為咗控制性病嘅傳播，諸如此類。    但係我哋仍然可以喺呢啲事件當中，觀察社會對女性地位嘅轉變過程。就好似「自梳女」同「馬姐」嘅出現，女性開始拒絕盲目婚嫁並自食其力，呢啲「解放婦女」嘅思潮，點樣衝擊舊有嘅思想？ Angelina Chin係新一代嘅香港史學者，呢本係佢第一本學術著作，探討二十世紀初解放婦女運動嘅風行，喺底層婦女嚟講實際上帶嚟點樣嘅效果。  💡 好多以前嘅女性行業，例如係馬姐、「女招待」等，以今日目光嚟睇會嚴重物化女性嘅工作，但對當時嘅女性嚟講，卻係代表自力更生，無需依靠男人賺錢，係女性平權嘅重要一步。 【店長精選：唔好果本唔敢揀】 Women, Crime and the Courts: Hong Kong 1841-1941  Patricia O’Sullivan｜Blacksmith Books  ISBN：9789887963981｜HKD$138    講起罪犯，可能好多人腦海入面浮現嘅都係一個男人嘅形象。當然，我哋都知道，女性都會犯法，都會被捕入獄。但對女性犯罪者嚟講，犯罪、被捕、審判、服刑，呢個過程同男性會經歷嘅，又有無唔同？殖民早期嘅香港，係一個男女比例嚴重失衡嘅城市。由於人口主要係由移民組成，所以單身寡佬嘅比例就非常之高，喺極少有人攜帶家眷落嚟香港嘅情況下，甚至有啲數據顯示十九世紀果陣，香港大部分華裔女性居民，都係服務呢啲單身寡佬嘅娼妓。    由呢個角度睇，咁香港女性犯罪嘅議題，就會同男性完全唔一樣。首先，好多喺香港生活嘅女性，都處於相對貧窮的狀態，而且佢哋所做嘅工作喺當時嘅社會道德規範入面，都係無法被大眾接受。因此佢哋犯法之後，喺面對警察、司法同監獄系統嘅時候，往往都比其他人更需要承受先入為主嘅批判目光，以至比一般情況更差嘅對待。    亦因為係咁，當時女性犯罪嘅傾向，亦都好多時同貧窮以及權力有關。尤其係日常生活入面經常面對無力感，過度壓抑嘅時候，只要一有機會，呢啲底層女性就會希望反撲，重新掌握自己嘅命運，繼而鋌而走險。 💡 由於人口比例嘅緣故，殖民早期嘅香港監獄入面，女性囚犯人數都相當少。不過，佢哋同男性犯人一樣，都會犯好多好嚴重嘅罪行，例如係謀殺、吸毒、甚至係製作炸彈進行恐怖襲擊。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 Ancestral Genealogies in Modern China:  A Study of Lineage Organizations in Hong Kong and Mainland China  Masahisa Segawa｜Routledge  ISBN：9781032146553｜HKD$560    講起香港嘅新界田野研究，首先浮現喺腦海中，往往都係嚟自英、美嘅人類學家同歷史學家，舉凡科大衛、裴達禮、許舒、夏思義、華琛等等。即使係熟悉新界研究嘅人，都未必馬上諗起日本嘅學者。但實際上，日本嘅人類學研究絕對唔比歐美學者遜色，香港對日本社會嚟講亦係一個值得關注嘅議題（arguably）。其中有幾位學者自八十年代起喺香港嘅新界進行田野研究，一直持續到而家。今日就同大家介紹其中一位：剛剛退休嘅東北大學瀨川昌久教授。    瀨川昌久教授最新出版嘅呢本著作，研究元朗八鄉嘅水盞田村（書入面為咗保護受訪者，村名改為「Sheung Tin」，不過花少少時間對比一下啲描述，唔難發現佢就係水盞田村）。透過水盞田村嘅李氏同張氏，作者分析呢啲非地主大族嘅宗族建構過程。咁係咩意思？宗族組織並唔係自然出現嘅東西，並唔係話只要大家同姓而且有同一個祖先，就當然地屬於同一個宗族。宗族組織需要有人刻意建立，透過編寫族譜、建立祠堂嘅方式，人為地決定邊啲人屬於呢個宗族嘅成員，邊啲人唔係；邊啲人可以參與宗族事務，邊啲人唔可以；邊啲人有資格住喺呢條村入面，邊啲人唔可以，諸如此類。  💡 一般嚟講香港嘅客家族群都集中喺新界東，大西北就主要都係本地廣府人，不過都係會有例外嘅，水盞田嘅村民就全部都屬於客家。 【店長精選：唔好果本唔敢揀】 中國的宗族與演劇： 華南宗族社會中祭祀組織、儀禮及其演劇的相關構造 田仲一成｜三聯書店  ISBN：9789620444401｜HKD$328    東京大學嘅田仲一成教授雖然都喺新界做咗好多田野研究，不過，佢就比較少討論族譜、歷史事件等等嘅範疇，而專注於觀察唔同鄉族嘅祭祀活動。呢套書係由田仲一成教授喺1985年出版嘅日文專書重新翻譯為中文出版，係作者喺八十年代初花咗三年半嘅時間嚟到新界各處鄉村，考察佢哋嘅太平清醮。原來喺唔同嘅神誕、打醮同祭祀活動入面，都會牽涉到好多「演劇」表演嘅元素，不論係做戲俾人睇，俾神睇，定係俾鬼睇。但無論呢啲演劇喺理論上要演俾邊個睇都好，實際上都係做俾人睇嘅。呢個時候，作者就開始思考究竟呢啲進行祭祀嘅宗族，點解要做呢啲戲？演劇嘅內容，同宗族內部與外部嘅利益有無關連？    於是田仲一成教授就開始走訪新界各地進行田野研究。為咗解釋佢嘅理論，呢本書入面就包含咗香港好多唔同地方嘅演劇，有啲係以墟市為中心，例如上水石湖墟、大埔舊墟、元朗舊墟、廈村市等等；有啲呢就係複姓鄉約嘅祭祀，打鼓嶺、林村同大埔都係例子；當然傳統大族都唔可以忽略，書入面就以龍躍頭鄧氏、粉嶺彭氏同河上鄉侯氏嚟表述；另外作者亦都用咗南洋嘅演劇嚟做比較研究。作者就受到日本嘅鄉村祭典所啓發，認為香港以至華南嘅呢啲祭祀演劇，除咗係為人們（以及神明）提供娛樂同社交活動之外，往往都有維繫社會組織，鞏固階級結構嘅功能。  💡 好多鄉村嘅太平清醮都唔係好似長洲咁每年舉行，隔得最耐嘅上水圍太平清醮，就係每六十年先會搞一次，想睇就要等到2066年。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 Covert Colonialism: Governance, Surveillance and Political Culture in British Hong Kong, c. 1966-97   Florence Mok｜Manchester University Press  ISBN：9781526158192｜HKD$1280    1966年，以天星小輪加價為導火線，香港市民埋藏喺心中已久，對於政府腐敗、社會不公嘅不滿一次過爆發出嚟，史稱九龍暴動。暴動雖然被防暴警察鎮壓落去，但係香港政府已經意識到管治出現問題，無法再迴避社會入面嘅情緒，於是啓動獨立調查，希望搵出可以改革嘅方向。不過，改革仲未嚟得切執行，民怨已經再次爆發。1967年，人造膠花廠嘅勞資糾紛，喺中國文革嘅影響以及共產黨嘅推動下，演變成六七暴動。    按照現時嘅學界主流說法，六七暴動後嘅香港，出現咗翻天覆地嘅轉變。踏入麥理浩時代，政府推行一系列福利政策，照顧民生，又經濟起飛，大量建設落成；同一時間，隨住香港身份認同嘅形成，香港民眾開始關心自己身處嘅地方，並勇於表達不滿，各式各樣嘅社會運動、抗議、遊行如雨後春筍出現。    但係，推行呢啲改革，以及應對市民嘅聲音，係港督話事，定係邊個話緊事呢？香港政府身為英國嘅殖民地政府，實際上有幾大嘅自主權決定點樣處理呢啲社會問題？係呢啲問題上，英國政府同香港政府之間嘅關係、互動、拉鋸嘅情況又係點？過往呢段歷史都係由政治或社會學者嚟書寫，用嘅係唔太一樣嘅研究方法。本書作者係新一代嘅香港史學者，透過歷史學嘅視野，將六七暴動後嘅香港，放翻喺「殖民地」嘅框架入面，理解作為世上少數戰後殖民地，香港官民之間嘅互動有咩特別。  💡 1884年，當香港嘅工人拒絕為法國軍艦服務而被香港政府打壓，倫敦方面就向港府施壓，認為咁做違反咗呢啲工人應有嘅權利，最終迫使港府撤銷唔少處罰。 【店長精選：唔好果本唔敢揀】 Hong Kong in Chinese History : Community and Social Unrest in the British Colony  Jung Fung Tsai｜Columbia University Press  ISBN：9780231079334｜HKD$600    講起香港社會運動嘅歷史，我哋經常都會諗起七十年代，中文法定語文運動、反貪捉葛柏、金禧中學抗爭等等。不過，罷工、遊行、抗議，呢啲嘢其實早喺開埠初期就已經喺香港出現。英國喺香港建立咗殖民地之後，隨住城市不斷發展，人口同經濟活動都越嚟越複雜，勞工爭議、社會不公等情況亦都必然地越嚟越嚴重。激烈嘅社會矛盾同衝突，自然都會伴隨以嚟。    1884年，喺清法戰爭嘅背景下，香港嘅港口勞工掀起一場反法運動，包括罷工、靜坐等，最終以警察鎮壓收場；1905同1908年，又相繼掀起反美同反日嘅運動，民眾罷買美國同日本嘅產品；1912-1913年間，政府停收中國貨幣引起杯葛電車運動，呢啲都係香港殖民早期歷史入面，重要嘅群眾運動，仲未計算1922年嘅海員大罷工，以及1925年嘅省港大罷工，仲有1860年代以嚟大大小小嘅勞資糾紛罷工。    相信大家都睇得出，以上所講嘅呢幾次社會運動，都有中國民族主義嘅情緒牽涉其中。開埠以嚟，中國（尤其係鄰近香港嘅華南地區）有啲咩事態變化，都好容易牽動香港境內嘅政治氣氛。但係，呢啲參與咁多場社會運動嘅香港市民，係咪真係只如中國史觀嘅論述咁，純粹地出於「愛國熱誠」而獻身？如果唔當佢哋係「祖國」可以呼之則來揮之則去嘅人，佢哋其實有幾多自己嘅想法，有幾大嘅主動性？  💡 1977年，金禧學校嘅財政混亂，引發社會對貪污問題不滿，演變成大規模抗議。呢次事件係香港社會運動發展嘅里程碑，亦都係教協奠定地位嘅標誌之一。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 香港非物質文化遺產系列：中秋節——薄扶林舞火龍 鍾寶賢、郭錦洲｜中華書局  ISBN：9789888809295｜HKD$168    每年中秋節，薄扶林村都會按照習俗舉辦舞火龍活動，村民會喺由竹、草紮成嘅龍身上面，插上大量燒緊嘅香，令成條龍都係火光，並散發濃煙。中秋節前夕，舞龍隊會帶住火龍巡遊全村每戶人家，象徵火龍對村民嘅庇佑；到咗中秋正日夜晚，火龍就會拜訪村入面嘅李寧仙姐塔同其他廟宇，然後巡遊附近區域，包括華富邨等等，最後去到瀑布灣入海，完成「龍歸滄海」儀式。    薄扶林村係港島上碩果僅存喺開埠前就已經存在嘅村落，條村本身都同舞火龍習俗一樣，值得保留同傳承。薄扶林村原本係一條客家村，而舞火龍亦都係客家文化嘅一部分。相傳，薄扶林舞火龍源起於十九世紀末嘅一場瘟疫（莫非係1894年香港鼠疫？），村民透過舉辦舞火龍同祭祀神明，嚟保護全村健康。而其實不論客家與否，香港好多地方嘅太平清醮、巡遊等酬神活動，其實都同驅除瘟疫有關。    呢本書係「香港非物質文化遺產系列」嘅其中一本，集中講述舞火龍嘅歷史、習俗、具體做法同演變，鉅細無遺地將呢種文化記錄落嚟。不過，值得思考嘅係，淨係記錄，夠唔夠呢？點解我哋只可以喺某種文化行將消失嘅時候，先想「記錄」佢？有無辦法，可以吸引更多嘅新人加入舞火龍嘅行列，而舉辦舞火龍嘅時候，可唔可以吸引到多啲人去睇？希望有朝一日我哋唔再需要懷緬式地「記錄」文化，因為呢啲文化唔需要消失。  💡 薄扶林村舞火龍巡遊嘅其中一站，係村中李寧仙姐塔。李寧仙姐係薄扶林村自己嘅神，亦係香港極少數發源自本土嘅神祇。 【店長精選：唔好果本唔敢揀】 香港非物質文化遺產系列：涼茶 鄧家宙｜中華書局  ISBN：9789888807130｜HKD$158    相比起舞火龍，涼茶嘅「保育需要」可能稍為無咁大。畢竟行入便利店，就已經可以買到樽裝嘅涼茶（雖然有啲人會覺得果啲已經唔可以算係涼茶），即使係較舊式嘅涼茶舖，仍然好多地方仲可以見到。雖然涼茶不死，但係喺呢種飲品適應時代變遷嘅過程入面，其實都有好多舊有嘅元素唔再一樣，因而值得仔細探究。    講起涼茶嘅歷史，好多論者都會講到涼茶舖嘅文化，以及涼茶舖喺戰後嘅香港，成為社區聚腳點嘅功能。涼茶舖有電視，有冷氣，成為不少家中未必有呢啲配備嘅勞工階層常駐消磨時光之地，況且涼茶亦唔貴。喺七十年代，每逢球賽或有咩受歡迎嘅電視節目播映，都會見到好多人聚集喺涼茶舖一同觀賞，而呢樣或者仲同英國嘅酒館文化有少少可比性添。    除此之外，涼茶值得討論嘅地方，仲包括佢所附帶嘅「健康」形象。相比起其他飲品，例如係珍珠奶茶，或者汽水、咖啡、酒，涼茶往往都係一個「健康」嘅代表。但係呢個「健康」嘅形象，亦都唔係無變化過。涼茶喺十九世紀最初出現喺香港嘅時候，係被人當係病果陣（又唔想睇醫生嘅時候）會服用嘅藥；之後呢，涼茶就變成「保健」飲品，平時習慣常飲，就可以保持健康；到比較晚近少少，就變成咳、生痱滋果陣飲，又有翻少少「醫病」嘅味道；當然到咗而家，飲涼茶嘅目的又更加多元，例如係為咗消暑，或者係打邊爐時需要清熱。  💡 1925年，香港參加咗倫敦嘅大英帝國博覽會，展出唔同嘅「香港特色」同「香港製造」商品，王老吉嘅涼茶就係其中之一。 此篇書訊刊於 每週一 發出的獅墨書訊，歡迎免費訂閱

文：蔚藍 【最新到貨：新鮮滾熱辣上架】 繁華都市小小神：香港市區中的土地神位 Michael Wolf, Lynne DiStefano, and Ho Yin Lee｜香港大學出版社  ISBN：9789888139934｜HKD$250    佢哋微小，但佢哋無處不在。唔知大家有無印象見過，好多大廈門口牆角，都會有一個小小嘅土地神位。土地公應該都算係諸位道教以及華南神祇之中地位最低微嘅其中一個，好好彩嘅話會有自己嘅一間土地廟，喺鄉村入面多數都會喺村口有個神壇，但如果係鬧市入面呢，通常就只會有一個好細嘅神位，擺咗喺無人會留意嘅牆角。    喺神明嘅世界入面，土地公屬於地方守護神，其實係一個職銜，每個地方都會有自己嘅土地公，專門保佑某間屋、某個鋪位、某幢大廈或者某條村，喺入面住嘅人都會出入平安，事事順利。如果做得好，令呢個地方風調雨順，咁土地公有時仲有得「升職」添，例如2011年，臺灣花蓮縣長就將某條村嘅土地公，升任做咗城隍。（無錯，除咗土地公之外，水鬼都可以升城隍，條晉升階梯係一樣嘅）    土地神位度度都有，又唔代表佢哋全部都一模一樣。有啲地方會有一個神龕，入面除咗土地神主牌外，會擺個香爐，都會擺啲供品咁；有啲雖然細啲，但都算係比較正式嘅神位，會有塊神主牌寫住「門口土地財神」，甚至仲會有個小屋簷幫佢稍為遮風擋雨；有啲就係就咁一塊神主牌貼喺牆上，前面再擺個小小香爐咁；再求其小小，可能就咁喺角落擺個香爐仔就當係。    但係無論幾簡陋都好，土地神位擺咗喺度，或多或少都代表緊某個人希望為自己同為家人、鄰里祈求平安嘅願望。呢本攝影集嘅作者走遍香港嘅大街小巷，記錄咗呢啲大大小小嘅土地神明，亦都留住許多尋常人家嘅微小期盼。  💡 喺尖沙咀海防道臨時街市旁邊，有一條好隱蔽嘅小巷，入面係尖沙咀唯一嘅古廟，入面拜福德正神，亦都即係土地公。 【店長精選：唔好果本唔敢揀】 淘汰中的公物：電話亭 徐振邦｜亮光文化  ISBN：9789888716593｜HKD$118    今時今日講起電話亭，我諗好多人都只會諗起英國嘅經典紅色電話亭。但即使係呢種貴為英國象徵嘅電話亭，都會面臨被淘汰同遺忘嘅命運。咁香港嘅電話亭呢？相信喺手機如此普及嘅今日，已經無乜人會再用電話亭。電話亭於是成為又一種獨處於城市角落，被完全忽略嘅歷史痕跡。    電話亭當然都有過佢風光嘅時代。香港第一座公眾電話亭喺1954年出現，位於中環嘅雲咸街。當年電話亭嘅外觀就同英國果款相似，不過係綠色，至於而家所見嘅藍色塑膠外殼電話亭，就係近二十年先出現嘅款式。喺傳呼機嘅年代，想搵人通常都要透過傳呼中心留低訊息，咁傳呼中心就會將一個指示發送去接受者嘅傳呼機。傳呼機一響，機主就會知道有人搵佢，咁佢就會去公眾電話亭打電話去傳呼中心，聽傳呼中心嘅員工讀翻個口訊俾佢聽。所以喺未有手機嘅年代，公眾電話亭大排長龍，係見怪不怪嘅事。    甚至仲有一個時代，電訊公司會為電話亭推出電話卡，用家喺儲值之後，喺電話亭插卡入機就可以用。1984年第一次出現電話卡之後，甚至仲有好多唔同花款，有啲人會好似集郵咁樣，四出收集，甚至仲出過書。不過嚟到今時今日，呢啲電話嘅副產品，仲有黃頁、電話簿，都已經成為上一代嘅集體回憶，或者收藏家嘅投資對象。  💡 除咗最常見嘅PCCW之外，環球全域電訊（舊稱和記）都有喺香港建立電話亭，不過而家全香港就只拆剩最後十個。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 Protecting Free Trade: The Hong Kong Paradox 1947–97  Lawrence Mills｜Hong Kong University Press  ISBN：9789888083985｜HKD$250    呢本書最主要討論嘅，就係作者提出所謂「香港悖論」嘅問題。喺冷戰嘅年代，香港喺政治上屬於奉行自由開放貿易嘅資本主義陣營，但係「被視為係資本主義陣營」呢件事，並唔會因為英國殖民地呢個身份而理所當然地發生，因為香港同時亦都非常接近共產中國，並與後者過從甚密。為咗被自由世界接納，為咗同自由世界嘅國家做生意，香港就必須接受世界圍堵共產中國嘅條件，包括各式各樣嘅禁運、貨品產地限制等等。接受咗呢啲條件，令到香港可以同世界市場接軌，刺激增長；但同一時間，亦都令呢座長期依賴與中國貿易嘅城市，喺最大嘅紡織產業上面對好大嘅發展限制，呢個就係所謂嘅「香港悖論」。    喺咁樣嘅情況底下，香港政府同商界就必須自己諗辦法，喺呢啲國際社會設立嘅貿易規限，同自身本土嘅經濟發展之間遊走。作者本身就係香港政府嘅首席貿易談判代表，當年直接參與經濟同貿易方面嘅對內決策同對外接觸。佢以戰後嘅紡織產業為例，重新演繹香港嘅「戰後經濟轉型」故事，講香港點樣喺世界唔同陣營之間左右逢源，一方面喺英美面前唔可以同中國有太多生意來往，另一方面又要稍為疏遠同英國之間嘅關係，以取得東南亞同其他發展中國家嘅信任，但同一時間又唔可以變成同中國喺第三世界直接競爭，以免「激嬲共產黨」，又更加唔可以令英美覺得香港投共。最終香港係點樣擺脫左右不是人嘅局面，行出自己嘅路？  💡 六十年代，美國對香港紡織業實行配額制，唔少香港廠家反而靠炒賣配額賺錢。 【店長精選：唔好果本唔敢揀】 Made in Hong Kong: Transpacific Networks and a New History of Globalization  Peter E. Hamilton｜Columbia University Press  ISBN：9780231184854｜HKD$350    全球化嘅巨輪喺二十世紀下半葉不斷推進，令到香港喺二戰之後，迫不得已經歷兩次經濟轉型。隨住國共內戰落幕，東亞冷戰格局形成，香港放棄與中國嘅轉口貿易，輕工業開始興起；但係到咗七、八十年代，真正令到香港經濟起飛嘅，就係服務業同金融業嘅擴張。正係因為第二次嘅經濟轉型，令到香港社會短時間內變得富裕，先有資源推動七、八十年代嘅各種社會福利改革同基礎建設，然後先至有「亞洲四小龍」、「紐倫港」呢啲稱號，繼而就係香港人努力拼搏，憑藉「獅子山精神」闖出一片天嘅神話。但係，香港嘅成功，係咪真係單靠香港人嘅「努力」就得？    香港經濟轉型嘅歷史，其實都已經好多人研究同講述過。不過，新晉歷史學家韓墨松就認為，喺呢場經濟轉型之中，有一批由中國逃到香港嘅難民擔當咗重要嘅角色，仍然值得大書特書。呢批人並唔係普通嘅底層工人，而係工業家、銀行家、學者，或其他專業人士。呢啲精英階層嘅人，除咗擁有可以貢獻俾香港嘅專業同技術之外（呢部分為止都算老生常談），仲同美國嘅政、商界有好多人脈同聯繫。呢批人將自己同美國嘅關係，變成文化資本傳咗俾自己嘅仔女，等佢哋建立更強大嘅企業。於是香港喺六、七十年代，好多生產出嚟嘅商品都去曬美國。呢啲後代，又更加推進咗香港同美國嘅關係，以至促使美國喺七十年代支持香港嘅經濟發展。  💡 七十年代，越嚟越國際化嘅香港係世界上送最多留學生去美國讀大學嘅地方之一。 此篇書訊刊於 每週一 發出的獅墨書訊，歡迎免費訂閱