搜尋結果

【最新到貨：新鮮滾熱辣上架】 Hong Kong Cantopop: A Concise History  Yiu-Wai Chu｜Hong Kong University Press  ISBN：9789888390588｜HKD$275    據說每一代嘅香港人，都會對下一代嘅本土流行音樂嗤之以鼻。喺1930年代聽粵劇嘅人，會覺得當年嘅粵語電影主題曲唔入流；到戰後，聽國語時代曲嘅人亦都認為用廣東話「方言」唱歌欠缺品味；六、七十年代，聽英文歌蔚為風潮，跟手俾人話崇洋媚外；跟住許冠傑登場，廣東歌就變成「低俗」嘅代表；八、九十年代，縱有粒粒天王巨星，「抄歌」、「流水作業」批評不斷；千禧年代嘅 Twins 等等，則係「首首歌都係情情答答」，又「唔識唱歌」；至於近年呢，唔同世代同派系之間繼續互片，一邊手持鏡安大法，另一邊就係「想香港樂壇死」嘅haters，沒完沒了。    但與此同時，所有嘅流行文化之所以會出現（或者之所以會流行），都一定係因為佢回應緊果個時代嘅需要，或者係適應緊果個時代嘅侷限。戰後初期嘅人鍾意聽時代曲，係因為北京話係「國語」，當時嘅人覺得呢種語言就係比較高級，而同時製作流行音樂嘅人，都係由上海逃難落嚟嘅人；後來香港識英文嘅人越來越多，聽英文歌感覺起嚟又「再高級啲」；但調翻轉，亦都有啲人發覺許冠傑果種廣東歌，完全能夠表達勞工階層嘅心聲，相當過癮；當然，廣東歌之所以流行，亦都要感謝香港經濟喺七十年代開始起飛，令家家戶戶都買得起電視同收音機。一般流行曲以外，八十年代尾至九十年代開始出現一批政治意味嘅歌（由〈借來的美夢〉到〈皇后大道中〉），同時代嘅關係就更明顯。  💡 根據朱耀偉教授喺書入面講，目前已知最早嘅粵語流行曲，係1930年嘅〈壽仔去拍拖〉，由黃壽年主唱，新月唱片發行。 【店長精選：唔好果本唔敢揀】 看見港漫：香港漫畫的過去與未來 漫遊者｜非凡出版  ISBN：9789888807673｜HKD$98    喺香港仲會睇本地漫畫嘅人，可能真係唔多，至少已經好難同上個世紀港漫嘅黃金年代比較。但係要話「港漫已死」，似乎又唔係太準確，因為的而且確仲有一啲新生代嘅漫畫家仍然努力地產出緊一啲好唔同嘅港漫。上一代嘅港漫點解會有人話「已死」，其中一個好大嘅原因係呢類漫畫喺題材上已經同2023年嘅香港脫節。香港曾經有過一個「功夫」、「武俠」當紅嘅年代，武俠小說、武打電影、武俠小說改編嘅古裝劇，當然仲有功夫漫畫，無一不受大人細路嘅歡迎。另一方面，黑幫題材亦開始崛起，由《小流氓》到《古惑仔》，一樣成行成市。    而「武俠」呢類題材之所以會喺過去嘅香港出現並且大行其道，無非就係當時嘅人對「中華文化」仍然充滿認同感。喺果個年代，讀者仍然能夠代入中國嘅武俠角色，喺故事入面打敗中國嘅敵人（或壞人），所以大家心目中嘅英雄，係「中華英雄」，即使係「小流氓」，耍嘅都係中國嘅功夫。黑社會主題會引起當時讀者嘅共鳴，同樣係因為香港曾經係一個罪惡率較高嘅地方，漫畫故事入面嘅內容，可以對照讀者喺現實生活入面嘅所見所聞。於是乎，我哋再次印證到流行文化必然係回應緊時代。時代改變咗，如果流行文化無跟住改變，自然就會被淘汰。而家仲有幾多小朋友會睇金庸？武俠嘅年代已經過咗，反而黑社會題材呢，如果加少少鄉郊元素，可能仲引人入勝。    💡 香港漫畫一般分為單行本同埋薄裝，前者係報章雜誌上連載嘅漫畫結集出版，後者則係以期刊形式每星期出版嘅漫畫書。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 Hong Kong Public and Squatter Housing Geopolitics and Informality, 1963–1985  Alan Smart and Fung Chi Keung Charles｜Hong Kong University Press  ISBN：9789888805648｜HKD$300    戰後，隨住國共內戰以及中共建政之後嘅種種混亂，大量嘅難民由中國移居到香港。呢啲身無分文，無能力喺正規房屋市場覓得安居之所嘅人，開始喺市區週邊未被開發嘅土地，自行搭建簡陋嘅房屋暫住。呢啲鐵皮、木板搭出嚟嘅屋，造就咗所謂嘅寮屋區問題，包括係極度惡劣嘅衛生條件、唔存在嘅防火意識、嚴重嘅黑幫同治安問題等等，當然仲未計侵佔政府土地本身。政府頭痛歸頭痛，但都要去到1984-1985年推行寮屋居民登記制度後，寮屋問題先開始逐漸解決（至少停止咗寮屋區嘅擴張）。咁個問題就係：點解由四十年代尾開始，要拖成四十年先可以解決呢件事？    當然有個好直接了當嘅解釋，就係呢四十年之間，由中國嚟嘅難民係無停過，不斷湧落嚟嘅中國難民不斷喺香港建立新嘅寮屋，令到呢個問題變得沒完沒了，而政府雖然喺呢四十年之間逐步建立咗唔同嘅房屋政策，包括係早期興建徙置區以安置低下階層嘅人，到興建公屋，再到十年建屋計劃，都幫助咗唔少人擺脫寮屋區嘅折磨，但係寮屋問題依然存在。於是作者就調轉問另外一個問題：既然呢個問題係咁棘手而拖幾十年到難以解決，咁點解會喺1984年開始，政府會忽然之間的起心肝決定登記同清拆寮屋區，一口氣了結咗件事？    傳統上，學術界俾出嚟嘅解釋係地緣政治。因為簽咗中英聯合聲明，因為香港必須交俾中國，所以英國人必須喺香港最後嘅日子做得好好睇睇，而其中就包括咗清除呢啲唔好睇嘅寮屋區。但係咪就係咁簡單？作者梳理大量嘅官方檔案，重新理解呢幾十年嘅時間入面，政府嘅決策過程，以及佢哋究竟係點樣將寮屋區，由「非正式」（Informal）嘅房屋生態，透過登記等程序，轉變成「正式」嘅房屋政策。  💡 1966以及1967年嘅暴動揭露咗社會大眾當時嘅普遍不滿，促成香港政府喺七十年代推出改善民生政策，包括「十年建屋計劃」。 【店長精選：唔好果本唔敢揀】 The Shek Kip Mei Myth: Squatters, Fires and Colonial Rule in Hong Kong, 1950–1963  Alan Smart｜Hong Kong University Press  ISBN：9789622097926｜HKD$195    1953年聖誕節，石硤尾寮屋區發生大火，燒咗成晚先救熄。呢場火災並未造成大量嘅傷亡，只有三人因此喪生，但就燒毀曬六條寮屋村（白田上村、白田下村、石硤尾村、窩仔上村、窩仔下村及大埔村），超過2500間寮屋，造成將近六萬名寮屋居民一夜之間無家可歸，而且家財盡失。喺以往嘅普遍認知同主流論述裡面，1953年嘅呢一次石硤尾大火促使香港政府痛定思痛，正面面對由四十年代尾開始形成嘅寮屋問題，推出徙置區政策。石硤尾大火因此成為觸發香港公共房屋建設嘅起源。    但現實之中，呢個政府嘅決策可能唔係真係咁純粹地出於「善心」，或者係要去救濟呢啲遭災嘅難民。而決定要解決寮屋問題嘅過程，亦都可能唔係好似主流見解咁講，咁果斷而迅速（畢竟災後翌年就已經開始興建七層徙置大廈），而可能係一個漫長嘅過程。作者於是透過研究石硤尾大火後十年內嘅政府決策，得出一個新嘅結論，認為政府係為咗整體嘅社會穩定，先決定要處理寮屋區。在此之前，其實政府一直唔太樂意撥出資源改善寮屋區嘅環境，一來係為咗節省資源，二來係唔希望承認呢啲寮屋區，變相鼓勵或助長違法侵佔政府土地嘅人。    石硤尾大火之後，當然對政府嚟講問題就變得無法迴避，而難民嘅處境越艱難，中共插手進行統戰嘅風險亦都越高，恐怕亦會危害香港嘅安全，但政府亦只能見步行步。但其實早喺1953年之前，政府就已經有意識想解決寮屋嘅問題，而現實中呢啲解決方案亦都唔係一步到位，石硤尾嘅前後其實亦都發生過多次嘅大火，係要經歷每一次大火令問題變得更嚴峻，先可以迫令政府進一步思考問題，逐步逐步增加處理寮屋嘅資源同改變決策，形成漫長嘅過程。呢本書係寫喺2006年嘅舊作，可以話係作者今年本新書（即係上面寫果本）嘅前傳，由1950年講到1963年；而新書，則由1963年講起，去到八十年代。  💡 石硤尾大火之後，政府最先興建嚟安置難民嘅其實唔係徙置區，而係兩層高嘅「包寧平房」，非常簡陋，但算係解決咗燃眉之急。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 提燈者言：廣華醫院護理教育歷史 黃文江、羅婉嫻、范永聰｜中華書局  ISBN：9789888809080｜HKD$138    現代化，通常都係一個漫長嘅過程，尤其如果你係呢片區域之內比較早就開始現代化嘅地方，更加要花好多時間喺慢慢摸索同試驗身上。好多時我哋都會直覺地，或一廂情願地覺得香港嘅現代化，好似喺1841年嘅時候就完成咗咁，好似一開咗埠，呢個地方就自動成為「文明」同「現代」嘅「大都會」。實際上，即使係由最有效率嘅改革者主政，所有嘅改變都必然係要時間醞釀、建立同完成。而香港嘅護士培訓體系，就係一個例子。    香港其實好早就已經有醫院，開埠七年之後，政府就已經喺西營盤建立咗國家醫院。但係有醫院唔代表會有護士，係㗎，呢間聽落好巴閉嘅國家醫院係無護士嘅，因為現代護士專業，要等多好幾年之後先由南丁格爾喺克里米亞戰爭中奠基，到1857年，香港性病醫院開始運作，先開始出現護士。但有護士，都未等於有護士教育，畢竟最早嘅所謂護士教育，就係護士長自己收留幾個「徒弟仔」喺身邊教，毫無體制可言。一直到1922年，廣華醫院先正式招收「看護生」，建立護士訓練課程。如果我哋好理所當然咁覺得「既然到有現代醫院咁就梗係有護士，自然都會有護士學校㗎啦」嘅時候，原來香港最早嘅護士訓練課程，已經係第一間醫院建立超過七十年之後嘅事。    所以現代香港並唔係奉旨地隨住開埠而出現，係要有好多唔同嘅前輩一手一腳去建立，而建立護士培訓體系嘅呢啲前輩，就係呢本書要講嘅故事。透過口述歷史，呢啲曾經喺廣華醫院護士體系入面工作過嘅人，就可以一點一滴咁講返自己嘅經歷，從而拼湊出比較完整嘅圖像。  💡 書名嘅「提燈者」，係西方對護士嘅雅稱。呢個講法，源自於當年報章描繪南丁格爾提住燈巡視病房嘅情形。 【店長精選：唔好果本唔敢揀】 戰後香港精神科口述史  李兆華、潘佩璆、潘裕輝｜三聯書店  ISBN：9789620441974｜HKD$98    近期社會對精神病嘅討論多咗，多咗人理解到暴力事件同精神病無直接關係。但係「精神病人」等於「黐線佬」等於「會發狂斬人」呢個刻板印象，究竟係點嚟？一直以嚟政府對精神病嘅處理，以及公共衛生嘅政策，有幾大嘅影響？喺殖民早期，莫講話社會大眾，連政府都假定精神病患者有暴力傾向，甚至將佢哋當做罪犯咁處理。喺未有精神病治療設施之前，所有嘅精神病人都一律被監禁於牢獄之中，然後遣送出境。要到1875年，香港先有一間「臨時癲人院」，1884年先有第一間精神病院。但係一直到二十世紀初，香港對待精神病人嘅方式，都係以羈留禁錮為主。    踏入二十世紀，隨住香港人口繼續暴增，西營盤高街精神病院明顯完全無法容納眾多精神病患，但係呢間醫院一直到1961年建立青山醫院之前，都係香港唯一嘅精神病院，大部分嘅病人最終都要轉送廣州芳村精神病院，可見政府對精神病治療嘅重視係幾咁低。一直到戰後，港中邊境關閉，香港嘅精神病人無辦法送去中國，政府先開始注意呢個問題，情況隨住青山醫院同葵涌醫院投入服務以慢慢改善。    政府嘅思維開始轉變，但民間呢？呢度必須提到一個重要嘅事件，就係1982年嘅元州邨事件。由於缺乏跟進服務，一位精神分裂症患者喺無再複診食藥之下，突然同家人起衝突，繼而拔刀殺死母親和妹妹，更走到附近一間幼稚園襲擊師生，最終導致六人死亡。基於社會輿論嘅壓力，政府不得不改變政策，倒退翻去將所有「暴力傾向」精神病人禁錮喺病院嘅時代，而所謂「暴力傾向」，又往往係精神科醫生一念之間嘅判斷，比法庭更不公正，而咁樣嘅制度，亦加深社會對精神科病人嘅偏見。  💡 由於當時香港娼妓盛行，十九世紀嘅精神病人好大部分都係先感染梅毒，然後病毒擴散到腦部而變成精神病。  此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 War and Revolution in South China: The Story of a Transnational Biracial Family   Edward J. M. Rhoads｜Hong Kong University Press  ISBN：9789888528660｜HKD$490    呢本係Edward Rhoads 嘅回憶錄。Edward其實就唔係啲咩好巴閉嘅人物，佢只係一位歷史學家。不過，Edward 嘅家庭背景，以及佢嘅身世，亦確實值得記錄同研究。佢出身喺廣州嘅一個混血家庭，同時亦係一個專業人士中產家庭，老竇係美國學者，而媽媽亦係速記員。生於1930年代嘅中國，所有嘅繁華都可以喺一夕之間轉變為硝煙，於是Edward就遇上咗中日戰爭。為咗逃避日軍嘅侵略，佢哋一家遷移咗落嚟香港暫避，但係好快香港都喺1941年淪陷。喺日治底下經歷咗兩年，佢哋轉移咗重慶，即係戰爭期間國民政府嘅行政中心。Edward 嘅父親喺果邊幫美國做事。日本投降之後，佢哋好快翻到廣州嘅老家，諗住終於可以過一啲安穩嘅日子。但係當然，大家都知道，國共內戰好快就爆發，而國民黨亦都好快就兵敗如山倒。面對共產黨即將殺到廣州，Edward一家又必須再次逃難，最終經過香港，前往美國。    生活喺二十一世紀嘅我哋，好難想象生活喺真正兵荒馬亂嘅「大時代」係咩感受，而Edward嘅童年以及青少年時代就係咁度過。呢本書對學術界嚟講比較重要嘅啓示，係揭露咗究竟二戰期間嘅中國南方，社會係點運作，啲人係點生活，可以用嚟同中國北方做比較，挑戰認為呢段時間中國北方遭受嘅兵災比南方更嚴重嘅主流講法。然而，對我哋嚟講，同樣值得注意嘅，係Edwards一家兩次喺香港停留嘅經歷。當然，書入面描述咗1930年代末，臨近戰爭前夕，仍然表面上歌舞昇平嘅香港；以及1950年代初，剛剛踏入咗冷戰、關閉邊境、難民潮嘅香港，呢啲都係好精彩嘅記錄。但更應該思考嘅係，點解每逢需要走難嘅時候，Edwards一家都會選擇嚟到香港？而佢哋絕對唔係特例，喺近百幾年嘅歷史入面，每次中國出現大變故，無論係天災抑或人禍，都會有大量人口選擇香港做避風港。究竟點解？  💡 喺日佔香港，混血嘅Edward同華裔嘅媽媽被迫與Edward爸爸分開，因為日軍將好多白人視作敵人囚禁喺集中營，但混血兒喺日軍眼中，唔算係白人。 【店長精選：唔好果本唔敢揀】 Unsettling Exiles: Chinese Migrants in Hong Kong and the Southern Periphery  Angelina Chin｜Columbia University Press  ISBN：9780231209991｜HKD$380    或者比起點解來自中國嘅人往往都會選擇香港作為逃避天災人禍嘅地方，更需要問嘅問題，可能係點解呢啲逃離落嚟香港嘅人，大多都同時唔打算喺香港長久居住？旅美香港史學者Angelina Chin嘅呢本新作，就係要探討呢個問題。一般嘅歷史論述提到之後嘅中國難民潮，都會話佢哋逃避中國嘅災難，嚟到香港之後就住咗落嚟，同時帶嚟大量嘅人力資源、資本同技術，推動咗香港嘅戰後工業化。不過，其實有幾多人嚟到香港之後，係無留低落嚟㗎呢？如果唔留低喺香港，咁佢哋又去咗邊？    對好多難民嚟講，香港本來就唔係佢哋嘅屋企。唔少人依然都相信中華民國有朝一日會「反攻大陸」，到時一天都光曬，就可以返去中國嘅老家，所以根本就無喺香港做定居嘅打算。所以，當呢個寄託係蔣介石身上嘅希望越嚟越渺茫嘅時候，有啲人就開始思考自己如果無辦法翻到中國，咁應該點？不過，實際上因為咁樣而決定離開香港嘅人，其實唔多。由於害怕挑動中國嘅神經，惹嚟呢個龐大共產帝國上門找麻煩，戰後嘅香港政府極力希望避免捲入國共嘅鬥爭之中，因此佢最唔想見到嘅，就係大量有強烈政治意識嘅難民湧入香港，繼而引起北京嘅主意。所以部分嘅難民，亦都因為咁而被列為「不受歡迎」，最終被轉移到臺灣或澳門。而呢啲現象，同時亦都反映緊過去好長嘅一段時間入面，香港受地緣政治嘅影響有幾嚴重，以至因為中國嘅緣故，連自主咁制定移民同難民政策都相當困難，而必須考慮鄰國可能嘅反應。  💡 除咗政治上對香港構成風險嘅人之外，香港政府都列咗其他種類嘅人為唔希望接受嘅難民，包括係殘疾人士、某啲長期病患，以及其他無法靠自己維生嘅人。  此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 Merchants of Canton and Macao: Politics and Strategies in Eighteenth-Century Chinese Trade  Paul A. Van Dyke｜Hong Kong University Press  ISBN：9789888028917｜HKD$595    中史書入面嘅十三行同埋廣州，永遠都只係一個背景：鴉片戰爭嘅背景。中史書都會講，因為啲「鬼佬」嚟到十三行，發覺中國人對西方商品唔感興趣，所以先要改為走私鴉片，最終引致林則徐硝煙跟住就打仗跟住香港就割讓咗了。但係，如果真係咁，外國商行喺中國唔靠鴉片就完全賺唔到錢，點解啲外國商船仲會持續成百年咁嚟廣州做蝕本生意？又點解啲十三行商人可以發到豬頭咁？到頭來，呢啲外國人唔係諗住侵略中國，亦都唔係要販毒害死所有中國人，佢哋只係想做生意賺錢搵食。    係時候認真理解呢啲人係點樣做生意。呢本書係歷史學家范岱克針對廣州貿易研究嘅上冊（下面介紹嘅另一本就係下冊），由商人嘅背景開始講起，包括正式嘅十三行商人，以及私底下經營嘅小商家，講到做買賣嘅方式、點樣安排翻譯、點樣簽訂合同、點樣向中國內陸生產商訂貨、點樣安排運輸同倉存、點樣管理風險、點樣繳納關稅（同賄款）、點樣應付中國嘅官府，等等等等。    范岱克係著名嘅商業史學者，以畢生精力研究東亞世界嘅海洋、貿易同港口，尤其專注於廣州。喺佢學術生涯嘅早段，范岱克係喺澳門嘅大學同學術機構起步，所以喺好多其他學者嘅研究入面好容易被忽略嘅澳門，都仍然可以喺范岱克嘅書寫之中佔一席位，都係一件難得嘅事。  💡 喺十八世紀初期，由於中國人唔算好開放嘅態度，加上葡萄牙人唔想同其他人分一杯羹，所以可以去廣州同澳門做生意嘅種族同國家的確好少，但隨住貿易需求嘅增長，到咗十八世紀末，基本上任何國家嘅人都可以了。 【店長精選：唔好果本唔敢揀】 Merchants of Canton and Macao: Success and Failure in Eighteenth-Century Chinese Trade  Paul A. Van Dyke｜Hong Kong University Press  ISBN：9789888139323｜HKD$595    呢本書連同佢嘅上集，更新咗好多對廣州貿易固有嘅理解，尤其係佢嘅多元同複雜性。例如係，好多時我哋對廣州貿易嘅印象，就係啲外國商人嚟大量採購茶葉，甚至有啲學者認為淨係研究茶葉呢個商品，就已經足夠了解廣州貿易。但實際上雙方買賣嘅商品其實係好豐富，除咗茶葉之外，瓷器、香料、絲綢、米，甚至係藝術品，包括書畫同刺繡等等。    同一時間，同呢啲外國人做生意嘅，亦都唔只係正式嘅十三行商人。過去嘅歷史學家，好多時都依賴官方的文獻，專注喺「正規」嘅貿易入面，而忽略咗一件事：搵到規則無顧及到嘅灰色地帶，係一件好容易嘅事。理論上外國商人只能同中國政府認定嘅十三行商人做生意，所有貿易都要經佢哋進行。但實際上，好多小本經營嘅商家，可能只係單靠幾隻舢板，喺廣州嘅外港同樣會同外國人做生意，而呢批人嘅貿易量加埋一齊，亦唔會輸蝕正規嘅行商。    而作者之所以能夠做到呢一層嘅理解，係因為佢唔只係專注於英美嘅商人。過去好多學者受語言嘅限制，亦都因為覺得英國、美國嘅商人最重要，所以淨係睇中、英文嘅史料。然而，現實中嘅廣州除咗有美國嘅商人、英國東印度公司之外，仲有法國、荷蘭、丹麥、瑞典、普魯士、葡萄牙、西班牙、希臘、奧地利、比利時（當時被奧地利統治）、意大利、匈牙利、亞美尼亞、印度、阿拉伯、東南亞，甚至係夏威夷同非洲嘅人。所以話，歷史學係一門對語言能力非常重視嘅學問。  💡 中國並唔係無機會建立自己嘅遠洋貿易，喺1730年代初就已經有一啲中國商人唔滿足於等待外國商船過嚟廣州，而打算自己運貨去英國同荷蘭。不過朝廷一聽到呢個消息，就即刻下令禁止，甚至將一啲已經開始實踐嘅商人定罪。  此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 沉默的中國 畢來德｜宋剛譯｜無境文化  ISBN：9789868599369｜HKD$50    無論你想唔想都好，都無辦法否認中國係對香港影響最大嘅一個國家。過去幾千年都受佢影響，到近二十幾年開始被中國統治，我哋對呢個毗鄰嘅龐然大物有幾多真實嘅了解？而我哋無辦法真正理解中國，可能係因為中國根本就唔容許外人理解，甚至係連佢自己嘅人都唔可以理解：中國係沉默嘅，唔會有任何資訊流出，亦都唔容許任何嘅討論。    作者認為中國嘅沉默有三種，包括無法討論佢嘅現況、佢嘅晚近歷史、佢嘅古代史。媒體同言論完全被鉗制嘅中國，係唔可能有針對社會現狀出現公共討論嘅空間，「對新聞的控制者頗爲有害的效果不是隱藏了某些真相，而是阻止了中國人就已知的事實表達意見，加以分析，得出結論」。而無法討論中國嘅近代史，則唔可能梳理呢段時間發生嘅各種慘劇同人禍，繼而反思歷史教訓。至於無法討論遠古嘅中國歷史，講緊嘅係對「古老歷史」加諸各種幻想同美化，而完全無法容忍任何批判。而作者認為，「這樣一種『古老偉大』其實是一個對自己的過去已經陌生化的社會才有的夢」。  💡 作者認為，中國主流嘅儒家哲學思想，係由秦漢開始，中華帝國建立之後，掌權者為咗鞏固政治權力而刻意形塑嘅觀念，因此係咁封閉、保守，亦充滿集體主義，無法容許個人存在。 【 一齊上架：新到書同步推薦 】 駁于連：目睹中國研究之怪現狀 畢來德｜周丹穎譯｜無境文化  ISBN：9789868599338｜HKD$50    「駁于連」嘅意思係要反駁于連呢個人，而于連（François Jullien）係一個法國漢學家。而作者畢來德想批判嘅，係好多歐美嘅漢學家都將著作「完全建構在中國的他異性這個迷思上頭」，即係假定咗中國必然係同西方世界好唔同，甚至截然相反、對立嘅社會。作者認為，呢種覺得中國係「人類經驗的另一極」嘅想象，可以追溯到十八世紀嘅伏爾泰，當時為咗對抗法國嘅皇室，而捏造咗一個同法國社會完全相反嘅「中國」：無帝王專權，無教士階級，而且係由文人哲學家嚟輔助開明嘅君主執政。    同一時間，中國人自己亦都好樂意將中國想象成同西方對倒嘅世界，而呢種思想，則係起源自二十世紀初五四運動，當中中國人為咗保存自己嘅身份認同，刻意將自己標籤為西方嘅相反。而呢種想法延伸到現代，就又影響咗一批來自西方嘅漢學家。作者擔心嘅係，當啲人咁樣將中國想像成同西方截然不同嘅「烏托邦」（至少係思想上嘅烏托邦），就無辦法認真理解同批判中國文明、文化同思想上封閉、壓迫嘅權力結構。  💡 《駁于連》係畢來德對于連下戰帖嘅一本書，兩人都係法國矚目嘅哲學家同漢學家，之後掀起咗一場論戰，時人認為畢氏「將中國哲學政治化」，而于連則「將中國哲學非政治化」。  此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 BomBan: Royal Hong Kong Police Inspector  Jack Humphreys｜CreateSpace Independent Publishing Platform  ISBN：9781537622743｜HKD$288    書名嘅「BomBan」好明顯就係「幫辦」嘅音譯。幫辦即係督察，呢本書就係一個來自英國約克郡幫辦嘅回憶錄。化名做 Jack Humphreys，呢位幫辦經歷過上世紀七、八十年代，見證住皇家香港警察由腐敗至極，到開始見到改善曙光嘅過程。    作者參與過呢段時間同警察有關嘅各種大事，可以話側寫咗警隊呢段時間嘅發展。佢寫到喺黑社會肆虐嘅年代，負責喺燈紅酒綠嘅灣仔行beat 巡邏嘅故事（大家估下，佢有無份收片勒索？）；1978年載住逃避越戰難民嘅「滙豐號」貨輪喺香港嘅港口同政府談判，佢亦有份上船處理；到八十年代，佢又參與打擊嚟自中國嘅「大圈仔」罪犯。    除此之外，佢亦都係皇家香港警察擴張同發展入面扮演重要角色嘅人。七、八十年代，警隊有好多新嘅部門成立，而佢有指揮過嘅，包括刑事情報科（CIB）、總區情報組等，甚至仲參與咗由英國陸軍航空特勤團（SAS）訓練建立嘅特別任務連，即係飛虎隊（SDU）。    當然，呢本書係督察嘅自傳，無可避免地會多講自己嘅好說話，將自己嘅形象塑造成威武、正義嘅模樣，但係當佢做一本精彩嘅故事書睇，都係過癮嘅。而佢側寫嘅大時代背景，亦都基本正確，同時反映出香港人心目中曾經係態度專業、武藝高強、裝備精良又紀律嚴明嘅皇家香港警察，係點樣建立出嚟。  💡 香港警察當初成立飛虎隊，除咗由英軍航空特勤團嚟訓練之外，亦都有參照美軍海豹特擊隊，係一支準軍事部隊。 【店長精選：唔好果本唔敢揀】 A Death in Hong Kong:  The MacLennan Case of 1980 and the Suppression of a Scandal  Nigel Collett｜City University of Hong Kong Press  ISBN：9789629375577｜HKD$278    講起英治時代嘅香港警察，當然同現代嘅警隊有好大差別，但係如果我哋因為腦入面兩個時期警隊形象嘅落差，而對前朝嘅皇家警察賦以完全正面嘅形象的話，就未免對呢個世界嘅理解過於單純。事實上，喺過去將近二百年入面，我哋所認知「廉潔」嘅「好」警察，幾乎只存在於1970年代未打後嘅短短二、三十年間，而警隊由1844年成立到而家，絕大部分嘅時間都係極其腐敗，即使係七十年代之後，都未能完全將之擺脫。    而呢本書所講嘅呢單案，可能都正正反映緊呢樣野。1980年初，外籍幫辦麥樂倫喺何文田嘅住所內被發現身中五槍死亡，引起社會轟動。警隊同政府好快就得出咗麥樂倫畏罪自殺嘅結論，理由係此前麥樂倫曾經性侵一名青年不遂，而呢名青年其後向警方告發麥樂倫，令麥樂倫被控粗曠性行為罪。喺1980年嘅香港，性侵係犯法，同性戀亦都係犯法。    究竟麥樂倫真係自殺，定係好似一啲傳聞咁講，係因為麥樂倫曾經受命調查過涉及政府高層嘅同性戀案件，因此被警察強迫自殺滅口？作者爬梳大量嘅史料，總算係釐清咗件事嘅來龍去脈。真相只得一個，就喺書入面。  💡 香港喺同志平權組織多番爭取之下，遲至1990年先至完成同性性行為除罪化，而麥樂倫案正正就係觸發社會討論嘅導火線。 【嚟緊書店嘅活動：今個禮拜】  【無論書有幾厚，至少我們還有彼此】     我諗好多人都一定試過，有啲書真係題材好吸引、作者好出名、觀點好獨到、資料好充足、論證好嚴謹，但係頁數太多，最後都係擺低咗，唔敢開始睇。呀，仲要係英文。    呢個時候，如果有人可以同你一齊睇呢本書就好了。係，無人可以代替你去刨書，無人可以代替你消化知識，但係至少可以陪你一齊逐頁逐頁啃曬佢，陪你走過呢段痛苦嘅路程。最緊要係，去到終點嘅一刻，係有一個人可以同你一齊分享喜悅，佢會明白，「係呀，你睇曬呢本超級厚嘅書，真係好唔容易，你好叻」。    就俾店長我嚟做呢個人啦，畢竟係我慫恿你買書，係我令大家買咗一堆好得人驚嘅枕頭翻屋企，都係應該要負翻啲責任嘅。    呢個系列，如果反應好嘅話會繼續搞落去，我已經諗定下一期睇咩書喇，可能會揀香港海洋史嘅書，或者係輕鬆啲嘅文化史都得。不過，首要條件都係今次夠人報名先得。準備同大家一齊睇嘅第一本書，就係夏思義博士成世人研究新界鄉村歷史嘅精華，2020年由城大出版嘅 Settlement, Life, and Politics 。喺征服呢本書嘅過程裡面，我哋會討論到古代新界嘅社會結構、經濟活動、政治版圖，仲有一啲關鍵嘅歷史事件同人物，亦都包含一啲鄉村傳說。    如果你對呢個主題有興趣，又準備好接受挑戰，可以睇睇活動詳情：    第一期「與你同行」線上枕頭書讀書會    閱讀書目：Patrick Hase, Settlement, Life, and Politics: Understanding Traditional New Territories    完成後滿足感：663頁    讀書會次數：四次  一、導論、結論  二、第1-2章：廈村與洪水橋  三、第3-4章：沙田與南丫島  四、第5-6章：馬灣與東平洲    讀書會日期：逢星期三  5月24、31號，6月7、14號    時間：夜晚八點至九點半  形式：ZOOM 網上讀書會    收費：  只參加讀書會 — HKD$400  只訂書 — 原價HKD$278  參加讀書會，兼以九折訂書 — HKD$400 + 250 = 650  全日制學生半價  ----------  章節目錄  Introduction  1. The Tangs of Ha Tsuen and Their History  2. Beside Blood-Stained Water:  The History of the Hung Shui Kiu Area  3. The Nine Alliance of Lek Yuen: Traditional Sha Tin  4. A Small Island in the Midst of the Sea:  The History of Lamma Island  5. By Violent Waters:  The History of Ma Wan  6. Tung Ping Chau:  Settlement and Society  Conclusion  此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 「牠」者再定義：人與動物關係的轉變 潘淑華、陳燕遐｜三聯書店  ISBN：9789620443404｜HKD$98    絕大部分嘅歷史，都係由人類嘅角度嚟撰寫，畢竟歷史學家都係人類，而「喺獅子學識寫字之前，所有關於打獵嘅故事，都係傳頌緊個獵人」。但係人類歷史學家其實都可以撰寫有關動物同大自然嘅歷史，尤其係人類同動物之間嘅互動。自然史的確都係近年國際歷史學界嘅一個潮流，就好似大家都聽過嘅《槍炮、病菌與鋼鐵》咁，好多歷史學家都開始注意到大自然嘅力量，例如係氣候、疾病、動植物等，點樣影響人類文明嘅發展。咁香港呢？石屎森林都係森林，森林係有動物嘅，而動物喺香港生活嘅歷史，明顯長過人類。    所以潘淑華同陳燕遐兩位學者就合編咗呢本書，用歷史、文學同倫理嘅角度，探討香港社會入面，人同動物之間嘅關係。由於我哋係歷史書店，所以呢篇書介集中介紹歷史嘅部分先。香港當然喺古代就已經有好多動物，翻查《新安縣志》就可以睇到好多野生或蓄養動物嘅記載。但係有政府主動保護動物嘅意識，就係相當近代嘅觀念，要到殖民地時代先開始有。潘淑華嘅文章講到，針對二十世紀初華裔香港人嘅文化習慣，香港政府實行咗一系列嘅措施保護動物，包括禁止虐畜同禁食狗肉等。當然，除了係要保護動物之外，呢啲措施係有其他考慮，例如係經歷咗1895年嘅大鼠疫後，政府有心改善城市衛生問題，而畢竟當時嘅香港政府對好多華裔居民嘅文化有唔少偏見。潘教授仲有另外一篇文章，講香港嘅動物園發展，尤其集中講大家都一定聽過嘅荔園，同入面果隻大象。  💡 除咗動物園之外，香港都有唔少被刻意引入嘅動物，例如金山一帶嘅馬騮，就係當年興建城門水塘果陣，為咗消滅有毒馬錢子而由政府引入。 【店長精選：唔好果本唔敢揀】 The Last Tigers of Hong Kong   John Saeki｜Blacksmith Books  ISBN：9789887554615｜HKD$138    大家可能都聽過一個講法，話九龍嘅樂富本來係叫做老虎岩，因為香港政府開發呢區嘅時候，覺得呢個名唔好聽，所以改做樂富，而老虎岩呢，就係以前獅子山一帶都有好多老虎出沒，所以大家叫果度做老虎岩。呢個就當然係傳說，無得證實，但香港曾經有老虎，卻係一件證據確鑿嘅事，有古代嘅文獻記載，到殖民地早年嘅報刊，都見到好多老虎嘅蹤跡。    會喺香港出沒嘅，係而家因為被中國人過度獵殺而成為瀕危物種嘅華南虎，早喺二、三百年前，就已經喺九龍群山以北嘅新界地區出沒。例如，當時住喺沙田嘅人通常都要前往九龍城嘅墟市做買賣，必須行獅紅古道，翻越獅子山，但係為咗保護自己免受呢一帶嘅老虎攻擊，佢哋都要喺沙田先集合，聯群結隊咁行，啲老虎先唔敢埋身，到傍晚完成買賣，佢哋又會先喺九龍城集合，再一齊行翻沙田。    一直到戰前，新界唔同地方都偶有老虎出沒，例如係二十世紀初嘅「上水之虎」，被警察動員獵殺後，而家虎頭標本仲喺警隊博物館展出。呢本書就係另一半香港少見嘅動物史作品，正正就係講緊香港老虎出沒嘅歷史，以及老虎點樣喺二次大戰同國共內戰之後，因為港中邊境關閉，以及中國大量捕獵而喺五、六十年代絕跡香港嘅過程。  💡 而家嘅赤柱天后廟入面，仲掛住一塊已被香火燻黑嘅虎皮。呢隻老虎，係1942年日佔時期誤闖赤柱拘留營，而被日軍派人射殺，後來交俾天后廟收藏。 【嚟緊書店嘅活動：今個禮拜】  【無論書有幾厚，至少我們還有彼此】    我諗好多人都一定試過，有啲書真係題材好吸引、作者好出名、觀點好獨到、資料好充足、論證好嚴謹，但係頁數太多，最後都係擺低咗，唔敢開始睇。呀，仲要係英文。    呢個時候，如果有人可以同你一齊睇呢本書就好了。係，無人可以代替你去刨書，無人可以代替你消化知識，但係至少可以陪你一齊逐頁逐頁啃曬佢，陪你走過呢段痛苦嘅路程。最緊要係，去到終點嘅一刻，係有一個人可以同你一齊分享喜悅，佢會明白，「係呀，你睇曬呢本超級厚嘅書，真係好唔容易，你好叻」。    就俾店長我嚟做呢個人啦，畢竟係我慫恿你買書，係我令大家買咗一堆好得人驚嘅枕頭翻屋企，都係應該要負翻啲責任嘅。    呢個系列，如果反應好嘅話會繼續搞落去，我已經諗定下一期睇咩書喇，可能會揀香港海洋史嘅書，或者係輕鬆啲嘅文化史都得。不過，首要條件都係今次夠人報名先得。準備同大家一齊睇嘅第一本書，就係夏思義博士成世人研究新界鄉村歷史嘅精華，2020年由城大出版嘅 Settlement, Life, and Politics 。喺征服呢本書嘅過程裡面，我哋會討論到古代新界嘅社會結構、經濟活動、政治版圖，仲有一啲關鍵嘅歷史事件同人物，亦都包含一啲鄉村傳說。    如果你對呢個主題有興趣，又準備好接受挑戰，可以睇睇活動詳情：    第一期「與你同行」線上枕頭書讀書會    閱讀書目：Patrick Hase, Settlement, Life, and Politics: Understanding Traditional New Territories    完成後滿足感：663頁    讀書會次數：四次  一、導論、結論  二、第1-2章：廈村與洪水橋  三、第3-4章：沙田與南丫島  四、第5-6章：馬灣與東平洲    讀書會日期：逢星期三  5月24、31號，6月7、14號    時間：夜晚八點至九點半  形式：ZOOM 網上讀書會    收費：  只參加讀書會 — HKD$400  只訂書 — 原價HKD$278  參加讀書會，兼以九折訂書 — HKD$400 + 250 = 650  全日制學生半價  ----------  章節目錄  Introduction  1. The Tangs of Ha Tsuen and Their History  2. Beside Blood-Stained Water:  The History of the Hung Shui Kiu Area  3. The Nine Alliance of Lek Yuen: Traditional Sha Tin  4. A Small Island in the Midst of the Sea:  The History of Lamma Island  5. By Violent Waters:  The History of Ma Wan  6. Tung Ping Chau:  Settlement and Society  Conclusion  此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 就係香港017：半山  2023年春季號｜就係媒體  ISBN：9789887481782｜HKD$140    「獅子山精神」大概是香港已經講到厭的主題，所有文創商品都係獅子山嘅山影，所有香港人到係住喺獅子山下。但係，其實太平山都係對香港嘅文化、社會、身份認同嚟講好重要嘅一座山。如果獅子山象徵嘅係努力嘅過程，包含當中嘅辛酸、刻苦，咁太平山象徵嘅可能就係努力嘅目標，係咁辛苦奮鬥之後最夢幻嘅目標。你諗下係咪？係最典型嘅香港人生故事入面，努力讀書，努力工作嘅目標，就係為咗賺夠錢，可以住喺半山。呢個係人人都想住洋樓，養番狗嘅社會，而呢座洋樓當然要喺半山先夠意思，咁先可以喺半山放呢隻番狗散步。    半山分為西、中、東、北半山以及山頂五個部分，各自都係富貴榮華嘅象徵，但又各自擁有唔同嘅格調，代表唔同嘅身份、階級、氛圍。西半山曾經係殖民地統治階級嘅心臟地帶，亦係香港大學嘅所在地；中半山有纜車，兼具各個殖民地時代重要嘅機構；北半山由太古洋行開發，如今成為寶馬山嘅豪宅區，象徵中產階級嘅貢獻；東半山則屬於最低調，同時亦最有錢嘅一群人。而山頂呢，本來應該係傲視山下一切嘅位置，不過而家已經變成最庸俗嘅遊客景點，以夜景之名消費山下無限加班拼搏，正在「獅子山精神」嘅打工仔。    今期嘅《就係香港》以歷史、攝影、建築、文化等等嘅角度，完整咁討論咩係「半山」，以及呢片位於香港心臟地帶，但又對好多香港人嚟講都好遙遠嘅地方。  💡 寶馬山上面有一個賽西湖公園，最初係太古公司滿足山下糖廠用水需要而興建嘅水塘，以前嘅人覺得同中國西湖一樣咁靚，因以為名，後來就填平變成公園。 【 一齊上架：新到書同步推薦 】 The Peak:  An Illustrated History of Hong Kong’s Top District   Richard Garrett｜Blacksmith Books  ISBN：9789887792703｜HKD$228    香港社會對「半山」呢個區域嘅崇拜，幾乎肯定同殖民地初期嘅發展有關。喺開埠之初，香港政府就刻意將重要嘅機關起喺半山區上面，包括港督府、政府合署、大館等等，為嘅就係可以居高臨下，輕易咁觀察維多利亞城入面嘅動靜。而好快到咗十九世紀末，山頂就已經被喺香港嘅上流白人視為逃避暑熱嘅地方，漸漸變成呢啲白人私家嘅遊憩之地。到咗1904年，香港政府通過《山頂保留條例》，呢度正式成為白人先可以居住嘅專屬區域。    自十九世紀開始百幾二百年嘅時間入面，白人普遍喺香港都擁有較高嘅社經地位，以「高人一等」嘅姿態出現，本來就係華人趨之若鶩嘅模仿對象。因此，只有白人先可以生活同出入嘅山頂區，自然都成為華人嚮往嘅地方，以至嚟到今時今日，半山明明係生活極唔方便嘅地區，但係仍然對好多人嚟講夢寐以求。    當然，住喺山頂區嘅白人，都唔係單純嘅「有錢人」、「殖民者」。百幾年以嚟，山頂區形成咗自己嘅社群，有自己嘅文化同氛圍，亦都有屬於山頂區嘅dynamics。作者係一位歷史學家，同時本身都係山頂區嘅居民，由山頂人嘅視角寫出嚟嘅山頂史，可能又同平民由山腳向上仰望嘅視角好唔同。  💡 山頂成為旅遊景點其實歷史都好悠久，早喺二十世紀初，《山頂保留條例》仲生效果陣，山頂嘅夜景就已經被當時嘅旅遊書譽為「旗山星火」，係「香港八景」之一。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 香港振翅：民航業與全球樞紐的發展，1933–1998 王迪安｜香港大學出版社 ISBN：9789888805686｜HKD$150 呢本唔係一半普通嘅航空界歷史書，唔係講啟德機場嘅發展，亦都唔係任何航空公司嘅公關品。呢本書，係要透過民航業喺香港嘅發展，睇香港喺二十世紀嘅世界入面，佔一個點樣嘅位置。究竟係香港嘅國際地位，造就咗啓德機場，定係啟德機場，造就咗香港嘅國際地位？國泰應該係一間香港嘅航空公司，定係一間英資航空公司？ 或者一切都要翻到去由地緣政治開始講起。近年唔少歷史學家，都意識到地緣政治可以話幾乎決定咗香港喺二十世紀嘅歷史走向，連航空業都唔例外。同中國之間空域問題、戰後英國重返亞洲、美國向遠東擴張、全球化浪潮，通通都同香港嘅民航發展有關。而同一時間，香港都可以唔止係被世界嘅潮流影響，而係可以有份影響世界。王迪安教授其中一個最重要嘅觀點，就係認為世界航空業喺戰後嘅急速擴張裡面，香港並唔單純係呢個新交通模式嘅「接受者」，而係其中一個推動者，扭轉咗喺過去航空史書寫入面香港嘅被動性。 而講到呢樣，自然唔能夠漏咗國泰。而家嘅國泰唔再係最令香港人自豪嘅企業，但係過去嘅國泰似乎又唔太一樣。喺政治、經濟嘅條件推動下，國泰喺七、八十年代成為香港嘅標誌。而呢間企業嘅成功，唔只係某個商人嘅聰明才智，佢承載住嘅係香港身份認同嘅改變、中產階級嘅崛起，甚至係香港嘅全球擴張，係香港由「地圖上面嘅一點」，變成「世界的香港」嘅過程。 💡香港歷史上第一架飛機，係1911年喺沙田升空嘅雙翼機，只係比萊特兄弟遲八年。而家機場入面嘅「沙田精神號」，就係當年果架飛機嘅仿製品。 【店長精選：唔好果本唔敢揀】 Early Flying Days in Hong Kong L.D.C Cowper｜Trafford ISBN：9781490707396｜HKD$320 如果我哋退一步，唔由咁宏觀嘅角度睇香港航空業變遷，而由參與其中果啲人嘅視角嚟觀察，又會別有一番滋味。呢本係Len Cowper 嘅回憶錄，佢本身來自新西蘭，喺五十年代尾到八十年代初，擔任國泰航空嘅機師。佢嘅職業生涯，就係國泰興起嘅過程。呢位機師見證住國泰由最初只係得三架螺旋槳飛機嘅規模，喺三十年嘅時間，擴展到有過百架波音747，繼而成為香港人最信賴嘅航空公司，甚至係香港人身份認同嘅一部分。 除咗買新飛機之外，好多國泰崛起嘅過程，Cowper都有角色，因為隨住年資漸長，除咗係機師之外，Cowper都參與咗一啲公司管理嘅工作，包括開拓新航線、改善空中服務、監督飛機維修之類。讀者甚至可以喺呢本回憶錄入面，睇到機師飛過嘅地方，亦都睇到當年香港身處嘅國際網絡入面。都係因為大英帝國留低嘅影響，Cowper先得以沿住國泰嘅航線，去過加爾各答（前英屬印度首都）。諗下，而家有幾多香港人會經常往返加爾各答？ 當然，一本好睇嘅回憶錄，一定都會有好多驚險刺激嘅小故事，Cowper呢本都一樣，講到接在愛丁堡公爵菲臘親王（即係英女王個老公）由倫敦去澳洲參與大英國協運動會，以至係運載十噸黃金果陣手心出嘅冷汗，又或者係喺颱風之中降落香港嘅驚心動魄（係囉，降落啟德機場本身就已經夠驚心動魄）。另一方面，啲人成日講航空界之中情慾嘅一面，雖然實屬刻板印象，同時引人入勝。Cowper本人就經歷咗四段婚姻，仲有好多非正式嘅關係，呢啲喺本書入面亦都寫得相當鉅細無遺，就留俾讀者自己探索了。 💡早期嘅航空業無飛行時間嘅限制，Cowper就曾經飛過一條航線，由香港經曼谷、仰光再到加爾各答，等於連續飛行二十小時。 此篇書訊刊於每週一發出的獅墨書訊，歡迎免費訂閱

【最新到貨：新鮮滾熱辣上架】 未竟的快樂時代：香港民主回歸世代精神史 徐承恩｜左岸文化 ISBN：9786267209172｜HKD$200 澳洲凱大熊教授為呢本書寫嘅推薦語劈頭就話：「一開始怎麽會有人相信中共會履行一國兩制的承諾？」喺現今世代嘅視角之下，「民主回歸論」簡直係俾「回歸」本身更加匪夷所思嘅想法。或者就好似黃子華喺棟篤笑入面講，話無人見過香港人上街慶祝「回歸」，但更奇怪嘅係，點解無人上街反對「回歸」？但係呢個疑問亦都唔係而家先有人提出，早喺十年前本土主義開始興起，其中一個討論位正正就係：「點解當初嘅民主派，會支持『民主回歸』？」 如此濃厚嘅中國認同、堅持要中國民主化嘅理想……上一代嘅社運人、民主派，經歷咗火紅年代、「認中關社」（認識中國、關心社會）、保釣等等嘅運動與思潮，造就咗「民主回歸」呢啲諗法。現實世界嘅事態發展，證明咗「民主回歸」係一場災難，不過，事已至此，將香港嘅慘狀怪責喺當初呢啲「民主回歸派」身上，又係咪公道？如果我哋理解到果一代戰後嬰兒潮出身嘅人，佢哋成長嘅環境就係大批中國人湧入香港嘅年代，就係戰後嘅香港教育，為咗躲避冷戰國共民族主義嘅鋒芒，而喺學生腦入面塑造出嚟嘅「文化中國」身份認同嘅年代，咁佢哋會得出「民主回歸」呢種想法，似乎又唔太令人意外。 但係呢個時候再拎果啲一係就過曬氣，一係就同香港人一齊面對壓迫嘅民主派（唔計二五果批）出嚟講，唔係要鞭屍，而係要理清楚香港人世代之間身份認同嘅劇變。世界雖然終究都係年輕人嘅，但呢一刻社會入面仍然有好多上一輩、上兩輩嘅人，佢哋都係香港人，佢哋嘅感受同身份認同都值得被理解。好似臺灣中研院學者吳叡人嘅推薦語入面講，再思考呢段歷史，「不是為了操控、擁有這段歷史，而是為了理解，為了前進」。 💡2006、2007年間嘅保衛天星、皇后碼頭運動，喺學界入面普遍被認為係本土思潮嘅起點，但喺後來冒起嘅本土派眼中，呢幾場運動嘅主辦同參與者通常都被視為「左膠」，亦與他們不和。 【店長精選：唔好果本唔敢揀】 Memories of Tiananmen: Politics and Processes of Collective Remembering in Hong Kong Francis Lee、Joseph Man Chan｜Amsterdam University Press ISBN：9789463728447｜HKD$1600 過去十年香港政治光譜入面，本土派與民主派嘅論爭，除咗「民主回歸」之外，可能嘈得更激烈嘅，係「六四」嘅問題。當上一代民主派覺得不解：點解年輕人可以輕易地忘記六四，點解年輕人唔肯傳承平反六四嘅理想；新生代同本土派會反問：究竟點解要跟隨支聯會悼念同爭取「平反」六四？ 中大新傳學院李立峯教授同陳韜文教授合著嘅呢本新書，係一本關於六四同香港嘅記憶研究。有時候，「六四」實際上係點發生，有啲咩細節經過、原因後果，都未必係最重要嘅事。重要嘅係，究竟唔同人記憶之中嘅「六四」，有幾大出入？呢件事對唔同人嘅衝擊，又有幾大分別？究竟民主派係「關心普世人權」，所以要追究屠城責任同爭取平反，定係因為「大家都係中國人血濃於水」？究竟本土派係要「擺脫中國民族主義嘅框架」，定係要「挑戰支聯會嘅權威」？ 作者喺呢本書入面，將1989至2019呢三十年之間，「六四」喺香港嘅轉變，並且分成六個部分，分別係「記憶嘅形成」、「記憶嘅動員」、「記憶嘅體制」、「記憶嘅傳承」、「記憶嘅修補」，同埋「記憶嘅巴爾幹化」。由支聯會嘅興起，講到維園六四晚會嘅流變、講到「經歷過」同「無經歷過」之間嘅世代隔閡、講到本土主義對支聯會嘅挑戰。你可能會諗，咁而家嘅香港，六四晚會已經無咗、六四紀念館亦都無咗、港大國殤之柱無咗、連支聯會同本土派都不復存在，討論呢啲嘢仲有咩意義？我諗，係風雨飄搖嘅時代，香港人嘅身份認同其實係咪真係好似我哋諗得咁堅定、咁牢固？如果唔係，咁我哋係咪應該好好整理所有構成香港身份認同嘅重要部分？而like it or not，六四係影響近三十年香港身份認同最重要嘅因素之一，應該都無咩異議吧。 💡「一國兩制」嘅爭議並唔係近年先出現。早喺董建華時期，廣為人知嘅「廿三條」遊行其實爭論緊同一條問題：香港有冇憲制責任就國家安全立法？ 此篇書訊刊於每週一發出的獅墨書訊，歡迎免費訂閱

【最新到貨：新鮮滾熱辣上架】 原來歷史可以這樣學 黃春木｜商周出版 ISBN：9789862728604｜HKD$100 「歷史不是死記硬背」呢句說話可能大家都已經聽都厭。但係話「學歷史係要學思考」，又虛無到爆，咁即係具體點學，要學啲咩？呢本書係一位臺灣資深中學歷史老師所寫成嘅心得，佢認為，學歷史要學「格局」，即係可以用宏觀視野嚟分析問題，同時都要識得用「自己」之外嘅角度嚟觀察。因此呢本書嘅第一部分，就係用地球嘅角度訴說人類歷史，橫跨萬幾年嘅時間維度，探討大自然同人類文明之間嘅互動。透過咁樣嘅例子，嚟嘗試示範書寫「大格局」，以及擺脫自身觀點嘅視角。司馬遷所謂「究天人之際，通古今之變」，正是如此。 另外一個透過學習歷史可以練習嘅東西，就係所謂「脈絡化思考」，即係具備呢種能力嘅人，可以比其他人更輕鬆地掌握唔同事件嘅發生過程，更容易搞清楚時間順序同因果關係。簡單嚟講，遇到有爭議嘅問題時，能夠脈絡化思考人會比較「心水清」，可以拆解唔同議題之間嘅關係，然後邏輯嚴謹地組織自己嘅觀點。呢本書嘅第二部分，就係希望介紹一啲「歷史思考方法」，幫助讀者培養梳理議題嘅能力。 但係讀歷史最重要嘅，其實可能係要學習點樣接受世界唔係非黑即白，好多嘢都可以有唔同嘅角度，要學識接納自己唔喜歡嘅觀點，都要學識批判自己喜歡嘅、或者係主流嘅觀點。作者刻意喺選擇例子同主題時，揀一啲中學歷史課入面會講嘅內容，提供唔太一樣嘅講法，補充額外嘅資料，俾飽受正規歷史課程荼毒嘅讀者，重新理解歷史嘅唔同面貌。 💡臺灣嘅歷史教育同香港好唔同，佢哋中、西史不分科，亦奉行專科專教，但同時都同香港一樣面對中國民族主義同身份認同嘅問題。 【店長精選：唔好果本唔敢揀】 《像史家一般閱讀：在課堂裡教歷史閱讀素養》 Sam Wineburg、Daisy Martin、 Chauncey Monte-San｜宋家復譯 國立臺灣大學出版中心｜ISBN：9789863501534｜HKD$117 教歷史要教思考方法，對好多歷史老師嚟講，其實都等於「山係石頭海係水」，同時喺課程框架、課時限制、教科書、公開考試面前，亦都屬於「Too good to be true」。不過，係咪真係完全無辦法呢？呢本書雖然係以美國嘅中學歷史科為基礎寫成，但係呢本書提供咗嘅八個教學範例，都仍然係好適合香港嘅老師參考。 作者透過呢八個美國史嘅教學範例，討論中學老師可以點樣喺正規歷史課程嘅唔同主題上面花心思，令到課堂可以真正發揮到歷史教育應有嘅效果。呢八個範例，分別要令學生明白：史料同歷史書寫之間有咩關係、歷史發展同社會現狀之間嘅因果、英雄人物嘅形象建構、當代政治點樣影響歷史書寫、「文化傳統」嘅發明同創造、理解小眾或弱勢群體嘅方式等等。每個章節都有解釋教材、教案同教學方法，唔係空談理論而係具體嘅實作示範。 當然，美國同香港嘅中學教育，各自有唔一樣嘅挑戰同限制，但係每一位專業、用心嘅歷史老師，都總會有辦法喺既有嘅制度、政治氣候同教科書裡面，搵到一啲可以利用嘅空隙，保住歷史教育嘅初心，將學生培養成為具備歷史素養、資料批判同獨立思考能力嘅公民。 💡雖然美國嘅歷史科通常都唔會有好似香港咁嘅「中國天朝史觀」，但係美國本身嘅民族主義以及政治角力，都仍然好影響歷史課程。 此篇書訊刊於每週一發出的獅墨書訊，歡迎免費訂閱