搜尋結果

【最新到貨：新鮮滾熱辣上架】 Cantonese Society in Hong Kong and Singapore:  Gender, Religion, Medicine and Money Marjorie Topley｜Hong Kong University Press ISBN：9789888028146｜HKD$350 喺身份認同嘅世界入面，廣東文化算係一種都幾模糊嘅元素。大家都知道喺香港嘅文化之中，來自廣東嘅影響係好大嘅。但係，其實咩先係「廣東文化」呢？喺廣東嘅廣東文化，同喺香港嘅廣東文化，又或者係新加坡、馬來嘅廣東文化，又有無唔同？而即使係同一個地域入面，「廣東文化」都可以係一個相當多元，涵蓋好多唔同面向嘅東西。 托普萊係東亞做城市人類學田野研究嘅其中一位先驅學者，研究城市社會入面唔同嘅次文化，而呢啲次文化又點樣影響返社會整體嘅結構、風俗同運作方式。佢自己都係女性，亦都特別關注城市入面，經常被社會學同歷史研究忽略嘅女性群體。佢喺英國學習成為一個人類學家，之後畢生嘅研究工作主要都係圍繞香港同新加坡等東亞地區，更加喺1959年參與重新建立皇家亞洲學會嘅香港分會，咁講大家就應該明白佢嘅江湖地位了。 呢本書係托普萊整個研究生涯嘅精華，將佢所有重要嘅文章都輯錄落嚟，涵蓋香港、廣東同新加坡嘅研究。呢本書好大程度上，關注廣東文化入面好少落入大眾目光嘅議題，例如係女性齋堂、冥婚、祕密會社、儲蓄觀念、自梳女、醫療健康觀念等等。所謂嘅「廣東文化」，遠遠唔只係「廣東話」、「茶樓」、「醒獅」一類日常生活見到嘅事物，仲有好多深藏喺社會肌理之間嘅細節，等緊大家發掘。 💡齋堂宗教有佛教、道教，也有不屬兩者的先天道，主要向公眾和信徒提供齋菜，早年也為獨身來港工作的女子提供安身之所。 【店長精選：唔好果本唔敢揀】 《地域文化與國家認同：晚清以來「廣東文化」觀的形成》 程美寶｜三聯書店 ISBN：9789620442803｜HKD$128 但係如果，「廣東文化」本身就係一個流動嘅東西，會隨住時間同地域而不斷變化，咁我哋所講嘅「廣東文化」，究竟係講緊咩？咁可能首先就要講下，究竟「廣東文化」呢個概念係點樣嚟，而「廣東人」又係幾時先開始認真思考咩係「廣東人」同「廣東文化」？ 「廣東人」呢個身份認同應該由來已久，地域（廣東省）或語言（廣東話），喺直到好近代之前，都係人們政治上身份認同最重要嘅部分，更甚於國家或國族。但去到十九世紀末、二十世紀初，當中國嘅民族主義開始興起，當「中國人」呢個身份認同開始出現並且廣為中國唔同地方嘅人接受，廣東人就被迫要面對究竟「廣東文化」同「中國文化」之間係乜嘢關係。「廣東文化」單純係「中國文化」嘅一部分嗎？究竟應該強調「廣東文化」嘅獨特色彩，還是強調「廣東文化」同「中國文化」嘅共同點？抑或喺「低俗」嘅廣東「方言」文化之上，又有「高雅」嘅「國語」文化呢？定係兩個都唔要，不如回到文言文嘅時代？仲有，「廣東人」除咗講廣府話嘅人，或者「本地人」之外，又包括咩人？客家人、潮汕人又算係咩？ 程美寶教授拎住呢啲問題，完成咗呢篇博士論文，後來再改寫成呢本書。喺書入面，佢透過種族、語言、學術、民俗、地方志等面向，分析當時廣東嘅知識分子，係點樣思考同界定呢啲嘢，最終得出「何謂廣東文化」嘅答案。 💡1940年，中國文化協進會喺香港大學馮平山圖書館舉辦廣東文物展覽，但絕大多數展品來自廣州一帶，忽略廣東省其他地區。 此篇書訊刊於每週一發出的獅墨書訊，歡迎免費訂閱

【最新到貨：新鮮滾熱辣上架】 《Colonial Hong Kong in the Eyes of Elsie Tu》 Elsie Tu｜Hong Kong University Press ISBN：9789622096066｜HKD$150 相信對戰後香港政治發展稍有認識嘅朋友，都唔會對杜葉錫恩呢個人名感到陌生。雖然改咗個中文名，但佢本身係白人，原名Elsie Hume，最初係四十年代喺中國傳教嘅一個傳教士。當然，傳教呢件事喺1949年後就無法再喺中國進行，於是佢就嚟到香港，開始參與香港社會運動。 杜葉錫恩係五十至八十年代香港非常重要嘅政治人物，加入咗革新會，並出選市政局仲做埋副主席。呢段期間，杜葉錫恩俾人嘅印象係「為民請命」，相對於政治改革，佢更着重於改善民生議題，例如係為清貧子弟辦學、爭取女性平權、向低下階層提供醫療服務等。同時，佢亦都勇於挑戰香港政府，要求改善貪污問題，以及要求官員多接地氣，了解民眾需求。1966年天星小輪加價引發暴動，杜葉錫恩就係極少數喺事前就公開反對加價嘅議員。 佢後期嘅政治立場一直備受爭議，佢偏左翼、反西方嘅思想令佢喺八十年代後期開始出現親中嘅傾向。呢個立場嘅轉變，令佢嘅民意支持開始下滑，1995年嘅市政局選舉，就輸咗俾司徒華，連立法會議員都無得做，直到中共委任佢入臨時立法會。主權移交之後，杜葉錫恩由支持廿三條，支持葉劉淑儀參選立法會，到公開批評反國教同雨傘運動，親中立場越嚟越明確。至於咁樣嘅轉變，係佢本來嘅立場如此，定係晚節不保，就留待讀者睇完佢嘅自傳後自己判斷。 💡杜葉錫恩當初為向清貧學生提供教育機會而創立嘅慕光英文書院，如今已經變成直資中學。 【店長精選：唔好果本唔敢揀】 《Paper Tigress:  A life in the Hong Kong government》 Rachel Cartland｜Blacksmith Books ISBN：9789881900388｜HKD$138 相對於杜葉錫恩，簡何巧雲（Rachel Cartland）係相對無咁多人認識嘅人物。佢喺1972年由牛津大學畢業，隨即加入香港政府成為政務官。歷任新界民政署（今民政署）、市政總署（市政局執行部門）、文康廣播科（今康文署）、社會福利署等，最終官拜助理署長級。 唔似杜葉錫恩係一個鎂光燈下嘅政治人物，簡何巧雲礙於公職在身，唔會咁高調出現喺公眾眼前，但佢嘅職業生涯，同樣見證咗香港社會喺七、八、九十年代以至千禧年間嘅變化。雖然八十年代中期有段時間簡何巧雲離開咗香港，陪同擔任香港駐日內瓦官員嘅丈夫簡德倫赴任，但前前後後仍然參與咗唔同嘅社會同文化決策。由1977年警察針對廉政公署嘅暴動、1991年有線電視發牌、1994年刪除《電影檢查條例》嘅政治審查條文、1995年藝術發展局成立，以至2003年沙士疫情，都有佢嘅身影。 主權移交後嘅簡何巧雲，立場同杜葉錫恩可以算係完全相反。佢喺少數過渡後仍然留任嘅英籍政府官員，但慢慢都開始對中國指揮嘅香港政府失去信心。佢2006年退休後，仍然關心香港社會事務，但亦都同香港政府漸行漸遠。2012年加入政府山保育運動，被時任發展局局長林鄭月娥點名批評；之後嘅2013年香港電視發牌爭議、2014年雨傘運動、2019年反送中運動，以至2020年嘅國安法，簡何巧雲雖然公開發言漸少，但都企喺政府嘅對立面。觀乎1997年前後嘅立場變化，杜葉錫恩以建制外政治人物嘅身份，由激烈反對香港政府嘅民主派，變成親北京立場；簡何巧雲則本來係政府官員，但就變成異見者，兩人嘅自傳拍埋一齊，都算係相映成趣。 💡簡何巧雲當初前來香港返新工，喺飛機上坐隔離嘅，係香港第一任船政司威廉畢打嘅後代。 此篇書訊刊於每週一發出的獅墨書訊，歡迎免費訂閱

【最新到貨：新鮮滾熱辣上架】 《香港六七暴動始末：解讀吳荻舟》 程翔｜牛津大學出版社 ISBN：9780190974732｜HKD$150 我哋日常喺網絡上接觸關於六七暴動嘅論述（而我哋又會覺得係credible嘅），其實好多都係來自殖民地政府方面，或者「反共方面」嘅資料。我哋會睇到「左仔」嘅暴行，會睇到林彬遇害，會睇到香港政府、倫敦政府嘅應對，甚至係政府內部官員對暴動嘅睇法等等。似乎我哋好少見到對家嘅想法，究竟中國係點樣處理六七暴動？究竟當時喺香港嘅地下共產黨員係點樣看待呢件事？ 對香港人嚟講，中國共產黨總會俾人一種神祕感，唔知入面嘅人諗緊乜、唔知佢哋嘅決策過程係點。當然咁係因為相關資訊少得嚟又唔公開透明，唔似得倫敦檔案館基本上係人都可以自出自入，我相信可以接觸到中國冷戰檔案史料嘅人少之又少。我哋對呢個時期嘅中國，好多時都只能依賴非官方嘅資料。 所以程翔拎到並註解咗吳荻舟嘅《六七筆記》，並寫成呢本書嘅重要性就係呢度。吳荻舟曾任《文匯報》社長，策劃過1949年香港招商局投共，係中共喺香港嘅地下領導人物，當然都係六七暴動入面嘅關鍵人物。《六七筆記》係當時吳荻舟自己嘅私人工作筆記，由吳荻舟嘅視角，記載咗好多中共內部討論，係好重要嘅左派方面六七暴動史料。程翔喺呢本書入面，提供咗《六七筆記》嘅全文註釋、寫咗好多對呢本筆記嘅解讀同討論，亦都輯錄咗部分吳荻舟嘅相關文稿。 💡根據吳荻舟喺筆記入面嘅講法，沙頭角槍戰係中共直接下令，由解放軍正規部隊執行。 【店長精選：唔好果本唔敢揀】 《六七暴動：香港戰後歷史的分水嶺》 張家偉｜香港大學出版社 ISBN：9789888083961｜HKD$160 六七暴動，可以話係除咗1941年香港戰役之外，最常被討論同拎出嚟講嘅香港歷史主題，坊間論述以至各式各樣嘅書都好多好多。大家當然都應該估到，唔係每個都適合小朋友獨自收睇，好多呢類書嘅道聽塗說、斷章取義、陰謀論，都令人十分失望。所以喺呢啲主題上面，揀啱作者，揀啱書，是如此重要。 喺學術界入面，公認奠基六七暴動研究嘅，就係張家偉呢本書。當然呢本書唔係完美，呢本書都受制於缺乏中國方面史料嘅問題，多少會有啲偏頗（由於中國嘅檔案館唔對外開放，呢樣其實都係大部分殖民地時代研究嘅共同問題）。但係張家偉勤於爬梳香港同英國嘅政府檔案，擅長由海量嘅史料入面搵出有用嘅線索。加上張家偉成為學者之前嘅背景本身係香港政治記者，長年對政治人物嘅採訪，令佢本身嘅香港政治觸角相當敏銳，完全了解殖民地時代香港政府嘅運作同決策模式。 呢本書討論嘅內容未必有程翔嘅《香港六七暴動始末》咁深入，角度亦都未必有咁特別，不過佢係一本全面而可靠嘅六七暴動史。如果你想要嘅係入門程度嘅六七暴動簡史，呢本係好完整又易入口嘅選擇。 💡除咗沙頭角槍戰之外，六七期間喺港中邊界其他地點，包括文錦渡等，都發生過衝突。 【嚟緊書店嘅活動：今個禮拜】 【當每個人都係歷史Page頁主：香港公共史學的發展與生態】分享會 「象牙塔的距離：從學院走入民間」系列 嘉賓：Reynold Tsang 香港社會所謂嘅歷史熱潮，同疫情一樣都玩咗三年有多，呢三年入面，大量新嘅歷史page出現，一批又一批嘅香港歷史書出版又再版，仲有數之不盡嘅香港主題精品喺各大店鋪市集貨如輪轉。但係熱潮總會有過去嘅一日，三年過後，大眾對本土歷史嘅熱情係咪已經逐漸同口罩一齊除低咗呢？熱潮過後，究竟邊啲歷史page、KOL、作者無著褲？社會入面，有幾多人會持續接觸歷史，幾多人翻到2019之前嘅狀態？ 但係歷史熱潮都唔係2019年由石頭度爆出嚟。早喺2019年之前，就已經有好多歷史page，以至係唔同嘅歷史愛好者、學者、掌故家等等喺唔同嘅媒體上面推廣香港歷史。喺香港做歷史推廣嘅前輩同行家，一直以嚟係行緊一條點樣嘅路？喺香港做面對公眾嘅史學，同外國有咩唔同？ Reynold 係牛津大學嘅博士生，研究香港同東南亞各個英國殖民地嘅博物館發展，同埋呢啲博物館點樣呈現當地嘅歷史論述。除此之外，佢都關注公共史學同歷史推廣嘅議題，一路留意香港歷史page嘅發展。嚟到「象牙塔的距離：從學院走入民間」系列嘅最後一場，我哋就邀請佢嚟同我哋分享佢嘅觀察。 立即報名！ 講者簡介 Reynold Tsang，英國牛津大學歷史學博士生，主要研究香港及東南亞博物館史，同時關注公共史學以及歷史論述。 網上ZOOM分享會 日期：3月14日（二） 時間：20:00 - 21:30（香港時間） 收費：HKD$100（附$20獅墨網店書券） 收費方式：PayMe、FPS、PayPal、信用卡 此篇書訊刊於每週一發出的獅墨書訊，歡迎免費訂閱

【最新到貨：新鮮滾熱辣上架】 《棕須一變：香港棕地的過去、現在與未來》 本土研究社｜本土研究社出版 ISBN：9789881409577｜HKD$108 喺香港，棕地呢個詞一般指嘅係已經荒廢嘅農地，呢啲土地好多已經用作工商業用途（例如露天貨櫃場、停車場等），從英文「Brownfield」直譯而來。新界好多唔同未發展成新市鎮嘅地方，都遍佈呢種棕地。隨住新界農業規模縮減，好多原本嘅農地都荒廢咗，或者被填平為工商業設施牟利。甚至，呢啲土地用嚟傾倒泥頭同垃圾，可能都比務農耕種更賺錢。不過，今日唔係要討論香港嘅農業政策（儘管一樣千瘡百孔）。 問題係，如果我哋一直都話香港「地少人多」，唔夠土地起樓，咁點解唔可以開發呢啲棕地？回望過去，其實「棕地問題」已經存在已久，不過「棕地政策」嘅歷史，就只能追溯到短短十年前左右。按照呢本書嘅說法，棕地政策（儘管當時未有政策）喺香港得到討論，始於2012年公共專業聯盟發表嘅研究報告，之後果十年，喺唔同嘅民間團體，包括公專聯、本土研究社、綠色和平等不斷努力下，政府終於開始面對呢個議題，但係距離願意開發棕地（而取代填海），仲有好遠嘅路要行。但點解？ 威權社會入面要推動任何政策改變，從來都係極度困難嘅事，要面對嘅政治形勢都完全唔同。喺新界嘅土地問題上面，實在有太多錯綜複雜嘅利益關係，政權、發展商、原居民、非原居民、鄉議局，仲未計唔上得枱面嘅勢力，都可以係既得利益者。 💡喺外國，棕地唔一定係農地，可以係被棄置嘅其他工商業用地，而可以被重複利用同發展。 【店長精選：唔好果本唔敢揀】 The Unruly New Territories:  Small Houses, Ancestral Estates, Illegal Structures, and Other Customary Land Practices of Rural Hong Kong Malcolm Merry｜Hong Kong University Press ISBN：9789888528325｜HKD$630 新界嘅土地同發展問題，性質係同市區完全唔同。箇中原因，唔係話要貶抑英治時代，但都好難唔由英治時代嘅政策開始解釋，甚至仲可以追到去香港接管新界之初。新界早喺成為殖民地一部分之前，在地嘅土地制度就已經同清朝官方或帝國其他地區好唔同。香港接管後，政府又無喺新界實施同港島、九龍一樣嘅土地政策，加上理民府、鄉議局呢啲市區所無嘅政治機構陸續出現，造就咗新界此後一百年完全唔同嘅發展軌跡。 去到六、七十年代之前，新界嘅土地問題基本上都唔難處理：反正政府都唔打算開發呢啲地方，即係唔洗處理。奈何政府開始需要建設新市鎮，就無可避免地要面對自己丟低咗六、七十年嘅新界土地問題。搬村、換地、丁屋呢啲政策應運而生，而由呢啲政策衍生嘅問題，終於亦都逐漸浮現。無他，呢啲政策本來就係當時政府嘅權宜之計，但係福利派咗就收唔翻，長久下去，到咗主權移交後，就更加演變得超級棘手，需要好有膽識、魄力同遠見嘅政府先可以處理，偏偏…… 作者針對戰後新界土地問題做咗好多研究，繼而提出非常之詳盡同完整嘅論述，講返由地皮、地骨權到丁權嘅土地制度變化，解釋我哋見到好混亂嘅新界地權，點解會變成咁，以至而家同未來嘅新界，仲有啲咩新嘅問題。呀，棕地。 💡原居民其實並唔係由接管新界開始就有嘅，而係因應丁屋政策，喺七十年代先出現嘅身份。 【嚟緊書店嘅活動：今個禮拜】 【當每個人都係歷史Page頁主：香港公共史學的發展與生態】分享會 「象牙塔的距離：從學院走入民間」系列 嘉賓：Reynold Tsang 香港社會所謂嘅歷史熱潮，同疫情一樣都玩咗三年有多，呢三年入面，大量新嘅歷史page出現，一批又一批嘅香港歷史書出版又再版，仲有數之不盡嘅香港主題精品喺各大店鋪市集貨如輪轉。但係熱潮總會有過去嘅一日，三年過後，大眾對本土歷史嘅熱情係咪已經逐漸同口罩一齊除低咗呢？熱潮過後，究竟邊啲歷史page、KOL、作者無著褲？社會入面，有幾多人會持續接觸歷史，幾多人翻到2019之前嘅狀態？ 但係歷史熱潮都唔係2019年由石頭度爆出嚟。早喺2019年之前，就已經有好多歷史page，以至係唔同嘅歷史愛好者、學者、掌故家等等喺唔同嘅媒體上面推廣香港歷史。喺香港做歷史推廣嘅前輩同行家，一直以嚟係行緊一條點樣嘅路？喺香港做面對公眾嘅史學，同外國有咩唔同？ Reynold 係牛津大學嘅博士生，研究香港同東南亞各個英國殖民地嘅博物館發展，同埋呢啲博物館點樣呈現當地嘅歷史論述。除此之外，佢都關注公共史學同歷史推廣嘅議題，一路留意香港歷史page嘅發展。嚟到「象牙塔的距離：從學院走入民間」系列嘅最後一場，我哋就邀請佢嚟同我哋分享佢嘅觀察。 立即報名！ 講者簡介 Reynold Tsang，英國牛津大學歷史學博士生，主要研究香港及東南亞博物館史，同時關注公共史學以及歷史論述。 網上ZOOM分享會 日期：3月14日（二） 時間：20:00 - 21:30（香港時間） 收費：HKD$100（附$20獅墨網店書券） 收費方式：PayMe、FPS、PayPal、信用卡 此篇書訊刊於每週一發出的獅墨書訊，歡迎免費訂閱

【最新到貨：新鮮滾熱辣上架】 《踏跡尋中：四十年華南田野之旅》 蕭鳳霞、余國良｜香港中文大學出版社 ISBN：9789882372542｜HKD$290 嚴格嚟講，其實蕭鳳霞並唔係研究香港嘅學者，佢自己都話唔係。我諗好多朋友都無聽過「華南學派」，但蕭鳳霞同裴達禮、華德英、科大衛、華琛等學者一樣，都係以華南地區為主要研究目標嘅歷史人類學家。 華南學派嘅興起有獨特嘅歷史背景。簡單嚟講，呢批學者最初希望研究嘅對象係中國嘅社會同文化，但係喺佢哋嘅時代，即係五、六、七十年代，共產黨統治下封閉排外又混亂嘅中國根本唔容許外國學者隨心所欲地做田野研究。於是，呢啲學者就選擇咗相對自由開放，而又保存類似中國式社會嘅香港、臺灣、華南以至東南亞等地。於是，學界就開始將佢哋稱為華南學派。 雖然佢哋最終嘅目標唔係要研究香港，但係因為時代嘅緣故，佢哋產生出嚟嘅知識，成為咗香港研究，尤其係新界研究最重要嘅基礎。更何況，蕭鳳霞畢竟同華南學派入面其他來自英、美國嘅學者唔同，佢本人就係喺香港出生同長大，佢喺中國研究以外，都仍然保留咗一部分香港關懷。呢本書主要係四十年嚟蕭鳳霞喺中國華南做田野研究嘅思考，但係講到香港嘅部分，尤其係香港嘅邊緣性、身份認同以及同華南之間嘅關係，依然精闢。 💡蕭鳳霞原本係喺美國深造，最初決定前往華南做研究嘅原因，係受當年美國吹捧共產黨嘅左翼思潮影響，對文革中國開始感興趣。 【店長精選：唔好果本唔敢揀】 《鄉土香港：新界的政治、性別及禮儀》 華琛、華若璧｜張婉麗、盛思維譯｜香港中文大學出版社 ISBN：9789629964689｜HKD$140 除咗蕭鳳霞之外，歷史人類學嘅「華南學派」入面，華琛同華若璧夫婦都係重要嘅人物。佢哋由六十年代尾開始進入新界做研究，係對新田同廈村兩個地區歷史寫得最詳盡同深入嘅學者。 佢哋係典型嘅人類學家，做研究果陣重視田野，即係親身進入當地，透過同當地人打好關係、參與同體驗當地嘅生活，嚟觀察同獲取所需嘅研究資料。當時，呢兩個美國人喺文革剛剛開始、冷戰高峰期間嚟到靠近港中邊境嘅新田，喺村入面租咗一間村屋，住咗一年幾，期間就係依靠為村民嘅子弟補習英文（以及理民府官員嘅協助）嚟取得村民嘅信任，完成佢哋嘅研究。如果我哋今日將果邊稱作「元朗國」，大家不妨想象下佢哋喺六、七十年代嘅元朗做研究，要面對幾大嘅困難。 但幾困難都好，佢哋都做咗好豐富嘅研究，為我哋提供咗新界鄉村嘅唔同生活面貌。呢本書係佢哋畢生研究嘅精華，由鄉村政治，講到盆菜同鄉村社會階級嘅關係，古代鄉村奴隸制遺留嘅痕跡，女性喺農村婚姻關係入面地位嘅變化，以至春秋二祭、山墳同埋「死亡」喺新界文化入面嘅意義。呢度講緊嘅，係撇除城市之外，屬於鄉土嘅香港。 💡雖然華琛已經係新界研究嘅代表人物，但係佢作為人類學家嘅成名作，其實係研究香港同東亞嘅麥當勞，點樣呈現當地嘅全球化。 【嚟緊書店嘅活動：今個禮拜】 【當教育離開大專院校】 「象牙塔的距離：從學院走入民間」系列 嘉賓：江啟明博士 @學識Hok6 網上教育平台 獅墨書店2023年第一個網上分享會系列「象牙塔的距離：從學院走入民間」推出第二場喇！呢個系列邀請唔同身份角色嘅講者，探討喺人文學科之中，學院同民間之間嘅互動。 今次我哋請到嘅，雖然唔算係人文學者而係一位工程學博士，但係江博士協助營運嘅「學識網上教育平台」就為大眾提供好多五花八門嘅網上課程，由科學到地理、社會、文學，當然到唔少得香港歷史。最重要嘅係，過往喺唔同嘅網上平台修讀課程，例如係Master Class之類，往往都係英文或其他外語，廣東話課程選擇好少，同香港主題有關嘅課程就更少。 大學教育講求學術專業，公眾學習又往往以興趣同實用為先，學院體制出身嘅江博士又點樣適應同平衡呢種差異？雖然話疫情以嚟網課大行其道，但係現實生活中大家對脫離課室嘅網上課程接受度有幾高？仲有可能係最重要嘅問題：其實香港願意為知識付出金錢嘅人，又多唔多呢？ 立即報名，聽下江博士有咩見解！ 講者簡介 江啟明博士，「學識網上教育平臺」 負責人、大學通識講師、工程學者（人工智能、金融工程、科學教育）。 網上ZOOM分享會 日期：3月3日（五） 時間：20:00 - 21:30（香港時間） 收費：HKD$100（附$20獅墨網店書券） 收費方式：PayMe、FPS、PayPal、信用卡 此篇書訊刊於每週一發出的獅墨書訊，歡迎免費訂閱

【最新到貨：新鮮滾熱辣上架】 《遇上1941的女孩：劇本及樂譜》 鍾志榮、周旭明｜演戲家族 ISBN：9789887661191｜HKD$400 「穿越劇」本身對香港人嚟講並唔是陌生嘅事物，「大台」電視劇不論係自己拍定係向外國買入，穿越劇都係最常見嘅劇種。只不過，香港題材嘅穿越劇少（唔係無，早幾年都有一套關於張保仔嘅爛劇），音樂劇亦少。 《遇上1941的女孩》係香港劇團演戲家族的經典名作之一，第一次演出係1993年，之後喺2000年同2014年分別重演，每次都稍有分別。呢本剛剛出版嘅劇本，就係2000年嘅版本。劇情講一個來自現代（1993、2000或2014，視乎你邊一年睇）嘅少年穿越咗去1941年，日軍攻打香港嘅前夕。果個年代嘅香港歌舞昇平，身處煙花燦爛嘅妓院飄香樓，令少年遺忘咗來自現代香港嘅哀愁（同樣，1993、2000或2014嘅香港都各自有唔同問題），但勢估唔到無耐之後戰爭就打響，摧毀咗眼前美好嘅呢片景象。故事就圍繞住男女主角「不管在地獄裡面/又或是天國的邊/能共你遇上便無怨」嘅浪漫，以及「若天有情/若有神仙肯聆聽/只求命運讓我自己決定」嘅無力之間展開。 雖然話係穿越劇，呢套音樂劇大部分嘅情節都係發生喺1941年。然而，同幾乎所有歷史小說或歷史劇一樣，作者想透過故事討論嘅始終都係現代嘅社會，歷史只不過提供咗討論嘅場域。睇呢套劇，唔會係了解1941年香港戰役嘅材料，但係就可以感受到千禧年（或1993或2014年）嘅社會氛圍。 💡《遇上1941的女孩》喺2014年重演果陣，仲搵埋張繼聰，不過係做配角，飾演一個客家新移民人力車夫。 【店長精選：唔好果本唔敢揀】 《迷魂》 鄧曉烔｜澳門日報出版社 ISBN：9789993732648｜HKD$50 同樣係穿越故事，同樣係以戰爭為背景，《迷魂》係澳門小說家鄧曉烔早期嘅名作。故事情節簡單嚟講，就係有個現代澳門嘅歷史雜誌編輯，無意間捲入咗一單刑事案件，喺配合警察調查期間誤打誤撞穿越咗去1622年。呢個歷史編輯甚至無經歷到歌舞昇平嘅階段，而係一嚟到就要開始面對戰爭。呢一場就係澳門史上極重要嘅澳門戰役，荷蘭喺當年為咗奪取同中國貿易嘅基地，而揮軍進攻澳門。於是故事主人翁就見證咗喺澳門嘅葡萄牙人點樣奮勇抗敵，最終將入侵者擊退。 相對《遇上1941的女孩》，呢本小說入面發生喺古代同現代嘅情節比例上平衡一啲，現代同歷史互相交織，更加顯出作者嘅意圖，其實係要講現代嘅澳門。如果《遇上1941的女孩》講緊嘅係香港喺面對1997主權移交，以及此後同中國之間難以觸摸嘅關係，仲有香港人面對大時代轉變嘅態度，咁《迷魂》講緊嘅就係澳門人喺唔同大國爭奪緊呢座城市嘅時候，點樣去思考「自己係邊個」嘅問題。須知道，澳門嘅身份認同問題，好可能比香港更加複雜。 💡《迷魂》當初喺澳門得到「澳門中篇小說獎」；喺出版六年之後，被翻譯成葡文版本，售價係原本嘅三倍。 此篇書訊刊於每週一發出的獅墨書訊，歡迎免費訂閱

文：蔚藍 【最新到貨：新鮮滾熱辣上架】 Strangers on the Praia: A Tale of Refugees and Resistance in Wartime Macao Paul French｜Blacksmith ISBN：9781802277760｜HKD$78 小說開首，作者Paul French已經同我哋講：「歷史冇將佢所知嘅過去全盤托出 (“History has chosen not to reveal all the details to us”)」。直到今日，大量研究者依然喺到挖出更多嘅故事，就例如French嘅小說《Strangers on the Praia》係建基於真人專訪以及近期嘅學術研究，講二戰時期兩個女性猶太難民點樣逃亡至澳門掙扎求存——一段鮮少人知喺澳門上演嘅故事。通過小說嘅敘事形式，我哋讀到嘅仲有血肉。 1557年，澳門成為葡萄牙嘅殖民地。喺近代歷史中，澳門嘅經濟發展似乎不及上海、北京同香港般亮眼。喺鴉片戰爭之後，香港嘅急速發展更加係吸引住西方嘅目光。但咁樣並唔代表澳門就係一個無趣嘅城市。依本小說帶我哋去到二戰時期嘅澳門，同時容許讀者企喺澳門嘅地理位置去望當時嘅香港，睇香港點樣受影響以及影響鄰地，從而洞悉二戰期間東亞嘅政治形勢。 1943年，葡萄牙政府對日本嘅軍事佔領保持中立，為咗平衡日本喺東亞嘅勢力，澳門成為相對安寧嘅「City of Peace」；同期，日本佔領香港。大量嘅特務活動喺澳門聚集，日本屬地嘅逃犯亦逃亡至澳門。喺同一塊地上，葡萄牙政府要盡力保持澳門嘅中立立場；國民黨嘗試協助國人逃至中（華民）國自由地區；特務活動持續滋生。由於較少完整嘅文獻記錄澳門嘅特務活動，依個亦都係點解依本書一半係「小說」一半係「歷史」。 💡《Strangers on the Praia》喺出版為長小說之前，原本只係香港電台Podcast系列入面嘅幾個故事。French後來加入更多自己嘅研究同訪問，拼湊一段「或者可能」嘅澳門猶太難民歷史故事。French都承認佢唔能夠肯定真係發生過。原來歷史放於文學仲可以咁樣玩！ 【店長精選：唔好果本唔敢揀】 迷魂 鄧曉烔｜澳門日報出版社 ISBN：9789993732648｜HKD$50 對犯罪同澳門歷史感興趣嘅讀者都可以睇埋鄧曉烔所著嘅魔幻小說《迷魂》。某日，一個受重傷嘅病人被送入醫院，喺昏迷之際不斷叫主角個名。而主角就係咁莫名其妙地被牽涉入澳門警方嘅罪案調查行動。有趣嘅係主角係一個歷史雜誌編輯，為咗破解案件，穿越到唔同時空嘅澳門，親身經歷過去，同時亦為讀者補充其時嘅歷史冷知識。故事背景都可見寫實嘅歷史元素，例如對城市景象嘅描述、經濟發展、軍事、政經人物等等。 小說劇情亦係以真實嘅澳門歷史作為時序：1622年，荷蘭東印度公司的軍隊攻打澳門，志在打破葡萄牙壟斷中國貿易情況。其實早喺1601年荷蘭已經攻擊過澳門，只係唔成功。喺1622年停戰協定結束後，荷蘭再次攻擊，依場澳門保衛戰喺荷蘭炮轟加思欄炮台下正式展開。而小說亦正正還原返依段保衛戰，可見小說故事緊湊，讀者一路查案之餘，亦學到唔少澳門歷史知識，甚至感受到身在炮火其中。 依本小說用字較為簡潔，適合作為輕鬆讀物。都適合中、小學生輕鬆學習澳門歷史。 💡點解有啲英文書叫澳門「Macao」、有啲叫「Macau」？澳門理工學院John Wheeler教授嘅研究就話，「Macau」一詞源自葡文，彰顯澳門嘅歷史同習俗；但為咗同向國際展示一致嘅城市印象，所以「Macao」作為英文拼寫都經常出現。 此篇書訊刊於每週一發出的獅墨書訊，歡迎免費訂閱

文：蔚藍 【最新到貨：新鮮滾熱辣上架】 Rescuing History from the Nation: Questioning Narratives of Modern China Prasenjit Duara｜The University of Chicago Press ISBN：9780226167220｜HKD$420 咩叫「歷史敘事」？唔知大家平時有冇留意到歷史學家書寫一本歷史書嘅時候，其實會有明顯「書寫嘅方式」，例如到底佢係點建構啲歷史事件呢？換言之，歷史嘅讀者永遠冇辦法見到最「真實」嘅歷史樣貌，即使書寫者以客觀證據作為寫作嘅基石。 美國著名歷史學家杜贊奇教授（Dr. Prasenjit Duara）開篇就講到：「現代社會的歷史意識無可爭辯地被民族國家所支配(“Historical consciousness in modern society has been overwhelmingly framed by the nation-state”)」，依個都係全書嘅中心。 我哋睇民族國家崛起嘅歷史嘅時候，好多時候會發現歷史學家會用「民族主義」嘅歷史敘事範式，亦即係話佢哋多數會以民族國家作為歷史主體，架構會非常宏大。就以中國為主例，會有歷史學家以「中國民族啟蒙」嘅敘事書寫，將「民族」講到好似係鐵板一塊、同一嘅主體，令到中國成為具「集體人格」嘅歷史人物。不過問題係，依種話語會將「帝國」同「民族國家」放喺對立面，而且又會掩蓋歷史嘅「真相」。而杜教授正正就喺書中仔細考究依種書寫方式點樣影響歷史嘅本質。 雖然話我哋冇可能清楚歷史嘅「真相」，但我哋應該從咩方式認識歷史先會最貼近「真相」？而杜教授所講嘅「拯救歷史」，又係要拯救啲咩？有冇咁嚴重要去到「拯救」？想知道答案，就快啲睇依本書。 💡喺二十世紀前期，「歐洲中心論」係最常見嘅歷史敘事範式。後來出現唔少嘅學者試圖論證「用歐洲作為觀看歷史嘅出發點」有幾唔合理。今期所講嘅「民族主義敘事」就係其中一種用於反抗「歐洲中心論」嘅敘事範式。 【店長精選：唔好果本唔敢揀】 In Search of an Identity: The Politics of History Teaching in Hong Kong, 1960s-2000 Edward Vickers｜Routledge ISBN：9780415865012｜HKD$650 學校點教歷史同「歷史書寫」都有關係？ 依本書嘅作者Edward Vickers原先係一間香港中學嘅歷史老師。佢開頭好奇怪嘅係，點解香港教育制度會將「歷史」同「中國歷史」分開咗截然唔同嘅兩科。而香港嘅歷史就從來唔會喺兩科入面出現；中國歷史科則係強調民族主義敘事嘅中國史。Vickers後來就發現，喺1996-1997年期間，唔少本土媒體會倡議歷史教育要移除晒所有「殖民主義」相關嘅元素。因此佢就寫咗依本書，去探究政治氣候如何影響住香港歷史教育課程。 睇返1960年到2000年嘅歷史教育進程，再到今日香港，政治因素依然影響緊一班中學生點樣學習香港歷史。2021年，教育局要求中史科側重於「香港與國家歷來的緊密關係」，並將香港殖民地嘅歷史詮釋為「中國被列強侵略」嘅史例。如果你好奇香港嘅歷史教育，甚至係本土史嘅敘事方法會點樣教授身分認同，依本書一定會幫到你。而歷史課程所帶嘅影響，唔只限於課室入面。當中嘅師資培訓、課程方向仲可能影響住香港未來一代點樣看待、點樣書寫本土歷史。 💡中學歷史、中史堂都會提及香港曾經係一個典型嘅殖民地。但你知唔知道其實香港唔係傳統殖民主義之下「一對一」嘅關係？英國佔領期間借香港作為中介同中國貿易，因此香港嘅治權唔單只受英國或者本土影響，其時都受到中國嘅影響。 此篇書訊刊於每週一發出的獅墨書訊，歡迎免費訂閱

文：蔚藍、Dexter 【最新到貨：新鮮滾熱辣上架】 Preserving Local Documentary Heritage: Conversations with Special Library Managers and Archivists in Hong Kong Patrick Lo｜City University of Hong Kong Press ISBN：9789629372378｜HKD$238 有冇諗過電視每日24個鐘播完嘅footage會去咗邊？又有冇諗過今日嘅檔案可能就係明日嘅歷史？（ “Records today are history tomorrow”） 去到2023年，香港係僅有嘅少數地方冇「檔案法」去監管政府一系列由開檔、移交檔案到檔案館，到銷毀或保存檔案嘅決定。可能你會問，點解要保存政府檔案？檔案對本土歷史研究有咩重要性？咁Patrick Lo所著嘅依本書就好適合你。 本書收錄咗多個圖書館管理員、檔案學家嘅訪問，俾讀者可以更深入了解「保管檔案」嘅職責同專業知識。甚至都有好多唔同範疇嘅檔案學家，你又知唔知呢？喺多個訪問之後，作者就發現檔案唔單止係俾市民監察政府施政，佢地更加係 “uniquely Hong Kong” 嘅歷史遺產。 而喺冇資源嘅情況下，一班檔案保管員多年黎默默耕耘，不斷救返本來要被燒毀嘅檔案。到底檔案有咩吸引之處？依班神秘嘅保管員有係咩樣貌？相信睇完書中嘅訪問，你就會明白佢哋嘅熱情所在，而且更加接觸到佢哋嘅真實樣貌。 喂，原來本土歷史研究都好需要有檔案保管。關心本土歷史嘅朋友就唔好錯過依本書！ 💡「檔案館」一般予人很「學術」、很「遙遠」的感覺，似是閒人免進。實際上，香港政府位於觀塘的歷史檔案處是歡迎所有香港居民查閱資料的，只需預約和登記即可。 【店長精選：唔好果本唔敢揀】 Ancestral Images:  A Hong Kong Collection Hugh Baker｜Hong Kong University Press ISBN：9789888083091｜HKD$350 不過，要保存歷史，又唔係淨係得文字檔案一種媒介。呢本書係香港新界研究元老級學者裴達禮嘅作品，亦都係少數唔完全依賴文字，而係用圖像嚟呈現歷史研究嘅書。呢本書中文譯名係「香港風俗談」，透過一百二十幅照片，述說新界嘅「各處鄉村各處例」，記錄咗好多唔同嘅風俗、生活以至文化面貌。 文字固然可以鉅細無遺咁表達好多作者嘅觀察，不過如果有圖像嘅話，就更加可以連作者自己無注意到嘅細節都保留翻落嚟，仲有好多畫面，係文字無辦法百分百呈現。呢本書入面嘅相，好多都係七、八十年代影低嘅民俗活動同鄉村生活，雖然好多鄉村而家仍然存在，但係呢啲風俗、節慶同生活方式都已經不復存在，或至少都改變咗好多，唔再係四、五十年前嘅模樣，所以有圖像甚至影像嘅媒介保存翻所有細微嘅特色，至關重要。 當然，呢本書都唔會只係一本相冊咁簡單。裴達禮係香港早期走入新界研究鄉村社會嘅先驅學者之一，喺上水同北區做研究嘅地位係無可憾動，而呢本書亦收錄咗喺皇家亞洲學會香港研究系列入面，係研究水準嘅保證。作者喺書入面用咗好多筆墨，註記呢啲相片特別之處，同埋解釋呢啲相可以話到俾我哋聽嘅資訊。對於剛剛入門新界民俗嘅朋友嚟講，呢本書係上佳嘅敲門磚。 💡裴達禮是來自英國的歷史人類學家，早在五十年代進入新界進行田野研究，大家耳熟能詳的「新界五大族」說，便由他提出。此說雖然已經過時，但裴達禮的學術地位仍可見一斑。 此篇書訊刊於每週一發出的獅墨書訊，歡迎免費訂閱

文：蔚藍 【最新到貨：新鮮滾熱辣上架】 Watching Over Hong Kong: Private Policing 1841-1941 Sheilah E. Hamilton｜HKU Press ISBN：9789622099005｜HKD$195 提到「治安」，我哋好可能即刻聯想到警察。「大頭綠衣」嘅殖民地警察形象大家冇見過都有聽過，但除咗警察，早期殖民地政府仲有咩方法可以維持治安？喺殖民地時期同法證部門合作超過四十年嘅Sheilah E. Hamilton發現香港歷史研究經常都忽略咗「私人警務」。正如作者指出，即使喺而家，我哋日常接觸看更、守衛嘅次數都比接觸警察多，不妨睇下舊時香港嘅佢哋又擔當住咩角色。 相信大家對歷史悠久嘅東華三院、保良局都唔陌生，但殖民時期嘅佢哋（或佢哋前身）原來涉獵埋「私人警務」，到底係點解？本來只係負責維持地方治安嘅團防局，又點樣同衛生政策有關？治安當然唔止係市區要面對嘅問題，咁新界地區又係以咩方式維持治安？如果你對呢啲問題都有興趣，噉就要睇呢本書喇！ 前皇家亞洲學會香港分會會長Michael Broom喺書評寫到，作者Sheilah E. Hamilton好善於向外行人解釋非常複雜嘅法證內容。喺本書當中就尤其可見佢好清晰噉同讀者交代治安制度係點樣演變、受咩因素影響。睇呢本書，大家千祈唔使怕佢艱澀。 💡大家或者都好好奇點解一個法證科學家會對殖民時期香港「私人警務」有興趣，又投放咁多心力落去研究呢個似乎相當冷門嘅領域。前皇家亞洲學會香港分會會長Michael Broom猜想，作者嘅興趣或者同佢同法證部門合作嘅經驗有關。係咪因為呢個原因，作者似乎冇表明，大家不妨搵下有冇蛛絲馬跡。 【店長精選：唔好果本唔敢揀】 Policing Hong Kong – An Irish History Patricia O’Sullivan｜Blacksmith Books ISBN：9789887792734｜HKD$148 睇得多香港疑案嘅你，又有冇睇過殖民時期香港嘅犯罪故事呢？ 1918年香港，灣仔機利臣道就上演咗一場街頭槍戰，五位警察倒地身亡。事件震驚全港，甚至有一半嘅香港人口都出席咗五位警察嘅葬禮。其中一名死者黎自嘅愛爾蘭鄉村小鎮紐馬克特，而依本書就依名愛爾蘭督察嘅故事為線索，引領讀者一步一步去睇當年香港警察係如何應付罪犯。刺激犯罪故事背後仲有一段歷史底蘊：1864-1941年期間，29個紐馬克特男人舉家來港，佢哋係點適應？日常生活係點？依班來自愛爾蘭小鎮嘅警察喺香港嘅社會地位又係點？ 作者帕特里夏·奧沙利文 (Patricia O’Sullivan) 就利用咗佢自身嘅家庭記錄，展示好多未曾出現喺歷史研究嘅資料，話畀我哋知原來當時香港人口仲包括一班歐洲工人階級。佢哋嘅家庭用咗85年去建立出香港嘅「小愛爾蘭」。甚至係香港著名歷史學學者John M. Carroll都話，佢哋嘅故事實在非凡。 💡作者帕特麗夏·奧沙利文 (Patricia O'Sullivan) 係其中兩名逝世警察嘅孫女同侄孫女。原本佢冇研究家族故事嘅打算。但2009年當佢探望九十歲嘅姨媽嘅時候，姨媽請佢調查當年佢舅父喺機利臣道死亡嘅真實原因，就引起咗佢嘅好奇心去探究依29個愛爾蘭人的故事。 此篇書訊刊於每週一發出的獅墨書訊，歡迎免費訂閱

【最新到貨：新鮮滾熱辣上架】 Crossing Continents: A History of The Standard Chartered Bank Duncan Campbell-Smith｜Allen Lane ISBN：9780241458730｜HKD$480 主流論述成日都將「國際金融中心」掛喺嘴邊用嚟形容香港，但係呢個「金融中心」係點嚟？金融同銀行業喺香港嘅歷史進程入面扮演緊乜嘢嘅角色？喺殖民地時代，大部分時間香港最重要嘅肯定都係所謂「英資」嘅銀行，而當中最常被討論嘅係滙豐。不過，另一間一樣咁舉足輕重嘅銀行，可能就被大家忽略咗，佢就係渣打。 渣打銀行嘅故事同滙豐好唔同，佢唔係一開始就喺香港成立，亦都唔係一開始就諗住主力投資香港嘅本地業務。1853年成立果陣，渣打銀行嘅全名係叫做「印度新金山中國渣打銀行」，顧名思義，就係要做印度、新金山（即澳洲）同中國之間嘅匯兌生意。咁國際化嘅金融業務，一定要搵一個地理位置方便，而發展穩定嘅地方落腳，於是香港就出現咗呢間銀行好早期就建立嘅其中一間分行。 呢本書係渣打銀行嘅全史，而渣打銀行呢間企業本身，都同大英帝國一樣，延伸到世界各地，而且去到每個地方都各自精彩。所以呢本書唔會只係討論香港嘅渣打銀行，但係我哋可以翻過嚟睇到香港喺渣打入面，喺金融業入面，喺大英帝國入面，以至係喺世界體系入面，曾經佔有過一個點樣嘅位置。 💡「渣打」係呢間銀行英文名入面Chartered嘅音譯，意思係呢間銀行獲得皇家特許狀Charter，係政府所支持嘅企業。1969年佢同南非標準銀行合併，所以英文名就叫Standard Chartered。 【店長精選：唔好果本唔敢揀】 China Bound: John Swire & Sons and Its World Robert Bickers｜Bloomsbury Publishing ISBN：9781472949943｜HKD$350 香港「英資」企業嚟講，都仲有好多「唔係最大果間，但係絕對唔可以忽略佢」嘅公司，太古就係其中之一。正如渣打成日俾滙豐搶咗風頭，歷史討論嘅焦點經常都放咗喺怡和（渣甸），而唔係太古。但係無咗太古呢間公司，香港歷史嘅走向肯定會完全唔同曬。 呢啲企業為香港所帶嚟嘅唔單止係GDP咁簡單，仲係literally 建設香港嘅一分子。銅鑼灣一帶最初嘅開發好大程度上都要歸功於怡和集團，咁太古公司呢？咪開發咗太古囉。由太古城到鰂魚涌，由柏架山到寶馬山，好多地方都仲可以見到太古企業開發嘅痕跡。發展咗百幾年，太古喺歷史上涉歷果嘅業務非常多元，由船廠、糖廠，汽水以至林林總總嘅實業，到航運、貨運，收購國泰，再到地產等等，百足咁多抓，同好多大型財團一樣，深入香港社會嘅每一個角落。 但亦都同好多外資企業一樣，太古嘅命運都同香港以至亞洲嘅歷史變化扣連。中國同日本嘅現代化、省港大罷工、二戰、共產黨建立政權，都完全改變咗太古公司嘅發展方向。呢本書嘅作者唔係太古嘅人，而係英國重要嘅香港史學者Robert Bickers，專門研究香港以及其他亞洲地方（例如上海）同大英帝國商業、政治網絡之間嘅關係。所以呢本書絕對唔係好似好多企業史咁係太古公司嘅公關品，而係紮紮實實嘅歷史研究，將呢間企業放翻入歷史脈絡入面觀察。 💡傳說太古呢個名係來自當初創辦人見到啲揮春寫「大吉」覺得好鍾意，後來被中文師爺加添筆畫而成。不過，呢個終究係傳說，其實太古呢個名係佢哋特登請漢學家幫佢哋改嘅。 此篇書訊刊於每週一發出的獅墨書訊，歡迎免費訂閱

【最新到貨：新鮮滾熱辣上架】 《酬神與超幽》 蔡志祥｜中華書局 ISBN：9789888572823｜HKD$258 首先要強調一件事：太平清醮唔係長洲獨有嘅嘢嚟，香港好多唔同嘅鄉村都各自有太平清醮嘅習俗，而且每處鄉村都完全唔一樣。由主要祭祀嘅神明、儀式嘅形制同組合、出席同觀禮者嘅身份，以至舉辦嘅時間，每個鄉村都可以完全唔同。而講到研究香港嘅太平清醮，中大歷史系蔡志祥教授就係呢方面嘅權威。 但可能你都會問：其實咪就係圍村佬嘅迷信嘢囉，即係好大規模咁拜神之嘛，有咩好研究？或者咁講，日本啲祭典其實都係拜神，不過迷信以外，仲有好多值得觀察嘅東西。呢本書分上、下兩冊，上冊叫做「香港傳統中國節日的歷史人類學視野」，用香港唔同地方嘅打醮文化，透過觀察其中嘅細節，可以反映出呢啲鄉村社會究竟點樣運作，例如係地區上嘅聯繫、鄉村社區網絡嘅建立、宗族成員之間嘅關係、節日文化同生活嘅連結，以及歷史記憶嘅傳遞。 第二冊，叫做「1980年代香港新界清醮的影像民族誌」，用翻一般人嘅語言嚟講，可以譯做「圖解新界的太平清醮」。作者喺八十年代走訪好多唔同嘅太平清醮，影低咗好多相，而家就利用呢啲相去解釋醮會入面每個細節，以及點解每個鄉村嘅醮會都唔一樣，仲有道教科儀兩大派別，正一派同全真派（係呀，就係武俠小說果個全真派）各自有咩做法。 💡唔係所有太平清醮都會每年舉辦，喺新界好多地方，隔年或每五至十年先舉辦一次係常態，最耐嘅係上水圍同西貢大網仔，每六十年先有一次！ 【店長精選：唔好果本唔敢揀】 《中國的宗族與演劇：華南宗族社會中祭祀組織、儀禮及期演劇的相關構造》 田仲一成｜錢杭、任余白譯｜三聯書店 ISBN：9789620444401｜HKD$328 講到香港宗族社會嘅研究，除咗華裔同白人學者之外，都唔可以忽略一班來自日本嘅人類學家，而東京大學名與教授田仲一成就係其中最重要嘅一位。呢本書嘅書名雖然係《中國的宗族與演劇》，但其實入面研究嘅全部都係香港嘅鄉村，由上水、大埔，講到元朗，再講到離島。 咁咩係「演劇」？其實都係講緊打醮同祭祀。之所以講「演劇」，是因為醮會入面，其實有好多儀式同環節都有戲劇表演嘅成分，只不過係做戲俾人睇，定係做戲俾鬼神睇咁解。 田仲一成呢本經典作品同樣分上、下冊，但唔同於蔡志祥論述醮會同整個社會嘅關係，田仲一成主要集中喺唔同宗族體系入面嘅醮會。上、下冊各兩個主題，第一係關於宗族主導墟市嘅名義嚟舉辦嘅醮會，例如係鄧氏主導大埔舊墟所舉辦嘅天后神誕，以及長洲太平清醮、長洲墟同南頭黃氏長洲分支嘅關係；之後，作者講到以鄉村組織名義舉辦嘅醮會，例如係打鼓嶺六約嘅坪輋天后誕同埋大埔林村約嘅天后誕等。 至於下冊講嘅主要就係大宗族獨自舉辦嘅醮會，主要分為兩類，其一係以單姓大村為名義舉辦嘅，例如係以彭氏為主嘅粉嶺圍舉辦太平洪朝；其二就係大宗族內部嘅醮會，係以宗族本身嘅名義舉辦，而唔係村落，例如錦田鄧氏嘅元宵祭祀。作者透過大量關於祭祀儀式嘅資料，加上實地考察，分析祭祀同宗族嘅連結，以及當中錯綜複雜嘅權力關係。 💡最早嘅長洲太平清醮其實並無飄色巡遊，但由於長洲早期已經係一個繁榮嘅墟市，風氣相對自由，所以商戶為咗令醮會更吸引人而增設咗呢個環節。 此篇書訊刊於每週一發出的獅墨書訊，歡迎免費訂閱