搜尋結果

【最新到貨：新鮮滾熱辣上架】 《梅子林故事：鄉郊文化保育考見記》 鄭敏華、周穎欣、任明顥｜三聯書店 ISBN：9789620450907｜HKD$148 梅子林係新界東北嘅一條小村，規模唔算太大，亦都無咩好重要嘅歷史事件發生，即使係到近年，呢一區開始受行山人士同遊客歡迎，風頭始終都係被鄰近嘅荔枝窩拎咗，社會大眾對梅子林嘅關注始終唔係好多。 梅子林算係比較早建立嘅客家村，喺1661年建村，村民主要姓曾。喺十九世紀，佢哋參與鄉村組織沙頭角十約嘅其中一約，即係慶春約。今日到訪荔枝窩，仲可以見到「慶春約小瀛學校」，而慶春約每十年一度嘅太平清醮，最近一屆喺2019年舉辦果陣，梅子林村都有參加。 雖然係小村，但係因為佢嘅地理位置，以及沙頭角十約成員嘅身份，令梅子林村都有好深厚嘅文化淵源。但係隨住戰後局勢嘅變化，梅子林村都唔能夠倖免於五、六十年代嘅鄉村移民潮，好多村民都已經搬走咗，令梅子林人口稀少，生活方式同文化都幾近失傳。 近年，社會多咗注重保育嘅議題，好多大小團隊都開始進駐唔同嘅鄉村，做唔同嘅復育同保育工作，而梅子林就係其中之一。做鄉村保育同市區嘅其他保育工作好唔同，要面對自然環境、村民生活、文化流失等等嘅挑戰，當然都有資源缺乏嘅問題。梅子林得以變成而家咁嘅模樣，究竟保育團隊喺背後扮演緊咩角色呢？ 💡而家遊客絡繹不絕嘅荔枝窩村，其實係當初梅子林村同鎖羅盆村嘅祖先合力開發而成，但如今呢兩條村反而唔係咁多人知道。 【店長精選：唔好果本唔敢揀】 《禁區：夾縫中的沙頭角》 阮志｜三聯書店 ISBN：9789620446665｜HKD$128 放大啲睇，包括梅子林在內成個沙頭角區都係一個文化好豐富同歷史好精彩嘅區域。沙頭角位於新界嘅極東北面，如今係香港同中國之間嘅邊境地區。但係由十七世紀開始，沙頭角區就已經漸漸有人居住，多數都係客家人為主。 呢個地方經歷咗好多歷史嘅浪潮，包括慘絕人寰嘅遷界令，之後有政府招墾客家人入遷，又經歷咗十八世紀漫長嘅科舉權訴訟；去到十九世紀，沙頭角各村開始建立社會組織，集合五十幾條鄉村組成咗沙頭角十約，然後又建立咗沙頭角墟，又稱為東和墟，同深圳墟互相貿易同競爭。後來，佢哋更加設立咗叫做東和局嘅自治機構，將鄉村政治帶上另一個層次。 去到二十世紀，成為香港殖民地嘅一部分之後，沙頭角就變成香港同中國之間嘅邊境地帶，國界線將呢個地區一分為二，喺戰後，更加成為防衛森嚴嘅鐵絲網。冷戰時代，港界嘅沙頭角象徵住自由世界嘅最前線，華界嘅沙頭角則係共產國度嘅最邊陲。之後由六七暴動嘅沙頭角槍戰去到禁區嘅設立，都反映緊呢種對立。 由大國政治翻到去村民嘅視野，沙頭角喺過去幾百年嘅演變絕對值得好好記錄。如今禁區開放，遊客開始增加，香港人都係時候好好認識呢個承載住時代重量嘅地方。 💡沙頭角呢個地名，原本係出自一位清朝官員巡視果陣見到靚景而寫下嘅詩句，叫做「日出沙頭，月圓海角」，合埋一齊就叫做「沙頭角」。 此篇書訊刊於每週一發出的獅墨書訊，歡迎免費訂閱

【最新到貨：新鮮滾熱辣上架】 Inequality among Brothers: Class and Kinship in South China Rubie Watson｜Cambridge University Press ISBN：9789888390878｜HKD$388 講起新界，通常都好難唔即刻諗起原居民、丁屋，同土地爭議。但係呢啲問題通常都唔石頭包出嚟，而係有歷史源流可以追尋。究竟點解新界鄉村嘅社會、文化，同香港其他地方咁唔同？ 作者係來自美國嘅歷史人類學家，為咗了解呢度嘅鄉村社會，六、七十年代特登嚟到元朗嘅新田同廈村住咗幾年，同村民交流同收集資料，分析佢哋嘅社會特性同歷史。亦都因為佢呢種田野研究嘅方式，另佢可以得到好多歷史學家喺檔案文獻入面睇唔到嘅資料。 好多人都以為宗族嘅形成就係透過血緣關係自然發展而成，即係「同一個祖宗嘅人咪同一個宗族囉！」但原來有血緣關係，宗族呢個組織就會自然出現，而係要經歷一個「建構」嘅過程。廈村鄧氏嘅祖先雖然好幾百年前就已經嚟到香港，但佢哋嘅宗族建構，要去到十八世紀中先至發生。 透過興建祠堂、編修族譜呢啲活動，廈村鄧氏嘅人就可以脫離錦田鄧氏，自立門戶成為新嘅宗族，再以唔同嘅標準（例如係居住位置、對社區嘅貢獻等等），決定「邊啲係自己人，邊啲唔係」。於是，廈村友恭堂鄧氏宗祠就喺1751年建成，廈村鄧氏成為獨立嘅新宗族。不過，當呢個新嘅宗族開始出現公有資產，尤其係大片嘅土地，自然就會產生新嘅問題。 分配不均、階級差異、長幼之序，開始成為此後二百幾年困擾呢個新宗族嘅爭拗來源。 💡廈村鄧氏係歷史上元朗區內地位好高嘅宗族，所以都對族人嘅婚姻有好多要求，幾百年前嘅佢哋，係絕對唔會容許自己族人同一啲佃農村民結婚㗎。 【店長精選：唔好果本唔敢揀】 The Unruly New Territories: Small Houses, Ancestral Estates, Illegal Structures, and Other Customary Land Practices of Rural Hong Kong Malcolm Merry｜Hong Kong University Press ISBN：9789888528325｜HKD$630 嚟到現代，宗族社會同土地問題之間嘅關係又因為新界成為咗香港嘅一部分而變得更加複雜。1899年香港政府接管咗新界，第一件事就係進行土地丈量，然後批出集體官契，基本上推翻咗新界已經運作咗幾百年嘅地皮、地骨雙地主制度。 呢件事直接嘅結果，係好多原本嘅大地主無咗好多土地，加上六日戰爭嘅陰影，對香港政府同英國人懷恨在心；另一方面，好多原本只係佃農嘅小村民，亦因此得到一塊屬於自己嘅土地，而且唔再需要聽令於原有嘅地主。再加上鄉議局嘅建立，新界呢個地方嘅政治生態完全唔同曬。 就係因為新界嘅社會同政治環境係如此複雜，所以作者就用「unruly」嚟形容呢片對政府嚟講難以駕馭嘅土地。雖然話難以駕馭，但政府如果一直躺平，唔好太理會佢，其實基本上都係相安無事嘅。但係政府喺1970年代開始要發展新市鎮，無可避免地一定要面對新界超級複雜嘅土地問題，繼而衍生出「丁屋」。 喺七十年代，丁屋政策算係暫時地解決咗新界好多地主對政府收地嘅不滿，但同時亦都留低咗更多、更大，同更難以駕馭嘅問題。丁屋政策直接衍生出「原居民」呢個身份認同，好多原本祖先喺一百年前只係小佃農嘅村民，都開始拎「傳統權益」嚟講，控訴香港政府喺1899年「剝奪」咗本來就唔屬於佢嘅土地。 新界呢個地方，只會越嚟越複雜，越嚟越「unruly」。 💡新界所謂嘅雙地主制，係同一塊地有分地骨主同地皮主，前者向政府交稅，又向後者收租。由於地皮主嘅業權都係永久，所以久而久之佢哋都自視為地主。 此篇書訊刊於每週一發出的獅墨書訊，歡迎免費訂閱

【最新到貨：新鮮滾熱辣上架】 Reduced to a Symbolical Scale: The Evacuation of British Women and Children from Hong Kong to Australia in 1940 Tony Banham｜Hong Kong University Press ISBN：9789888390878｜HKD$350 香港再次出現大規模嘅移民潮，係眾人皆見嘅事。因為留喺香港會面對好多未知嘅危險，所以選擇離開。香港過往都因為類似嘅原因，觸發過大大小小嘅移民潮，但係原來唔係每一次，都係啲人自己選擇離開。 話說喺1940年，當時日本已經佔領咗廣東，香港政府亦都知道同呢個東亞強權終須一戰，遠東殖民地恐怕都係凶多吉少。於是乎就一道命令出現咗，要求所有喺香港嘅英籍白人婦孺撤離，以免留喺香港會有危險。點解係婦孺？因為男人全部都要參加軍隊，投入備戰嘅工作，唔可以離開。 咁撤離，要撤去邊呢？首先係撤去咗當時係美國殖民地嘅菲律賓先，之後再轉送去澳洲。但係，原來政府除咗同菲律賓、澳洲講好咗會送一批難民過去之外，基本上就無其他計劃。呢批難民被政府強制送去菲律賓同澳洲，後續嘅安排完全欠奉，莫講話係生活方式嘅保障、工作機會、同香港親人聯絡呢啲事，連最基本嘅衣食住行，政府都安排唔到，要啲難民自己張羅。 呢三千五百個英籍婦孺終於去到澳洲，同自己出生成長嘅香港相距千里，同自己嘅丈夫家人亦無辦法接觸，要自己獨力生活，終於等到五年後戰爭結束，但香港政府又忙於重建，亦無資源處理俾佢哋回流香港嘅事。呢批人，即使戰爭結束，好多都無辦法再翻嚟香港，仲有好多家庭被拆散，又有好多婦女同戰死嘅丈夫天人永隔，總之日子都唔係好過。 💡1940年時，好多英籍白人已經喺香港落地生根，以香港為家。因此，當時唔少人唔願意離開香港，唔願意離開家人，用盡方法拒絕被撤離。 【店長精選：唔好果本唔敢揀】 《遠在古巴》 雷競璇｜牛津大學出版社 ISBN：9780199429196｜HKD$110 除咗戰爭同政治之外，驅使人離開成長嘅家鄉在外顛沛流離，通常就係經濟因素。自香港開埠之後，大量嚟自香港同中國嘅人經過呢個殖民地出洋去到南洋、美洲同澳洲生活。主要原因無他，西方國家廢除奴隸制後，需要新嘅勞動力，而中國人普遍太窮，需要新嘅工作機會。呢個移民潮，去到二十世紀中葉都依然繼續。 於是，好多人就嚟到古巴。作者雷競璇嘅爸爸同阿爺，就係由香港出發，喺1950年代去到古巴。呢本書，除咗講作者自己家族嘅故事之外，仲有佢特登去到古巴尋訪仲生活緊喺古巴嘅華僑，得出嘅成果。作者自己係歷史學出身，有深厚嘅學術背景，所以呢本書除咗係感人嘅故事之外，仲係紮實嘅歷史研究。 講翻呢批華僑，雖然佢哋同上面講過嘅英籍難民唔一樣，佢哋唔係被強制送去古巴，但一樣要獨力面對喺異鄉生活嘅各種難題，甚至係一樣要面對戰爭同動盪。點解，因為喺1959年，即係作者嘅父輩到埗無幾耐，古巴革命就成功推翻咗舊政權，成為一個共產國家，自此成為冷戰嘅其中一個核心地帶。夾咗喺兩派古巴人之間、冷戰兩大陣營之間嘅華僑，日子肯定更加難過。 💡1961年，為咗推翻古巴共產政府，美國發動咗豬灣戰爭。原來當時有個叫余景暖嘅廣東人參戰，不過係以古巴民兵嘅身份，打美國支持嘅軍隊。 此篇書訊刊於每週一發出的獅墨書訊，歡迎免費訂閱

【最新到貨：新鮮滾熱辣上架】 《吳荻舟香港文存》 吳輝 編｜牛津大學出版社 ISBN：9789888747900｜HKD$160 年輕一代聽過吳荻舟呢個名嘅人，恐怕唔多。套黃子華嘅一句形容，佢就係「真正嘅共產黨員，恐怖嘅核心」。 當我哋成日聽人講，共產黨最叻玩滲透，過去幾十年都有無數嘅地下共產黨員偷偷地做好多統戰嘢，實際上嘅共產黨，係點喺香港運作㗎呢？ 吳荻舟喺1948年開始就喺香港為中國共產黨做滲透同統戰工作。一開始係做黨媒《華商報》編輯，跟住1949年策劃香港招商局投共，五十年代做《文匯報》社長，仲參與香港購買東江水嘅過程，最後喺六七暴動期間，因為被暴動左派認為太溫和，被共產黨下放咗去寧夏十三年。 呢本書輯錄咗吳荻舟喺香港工作期間寫嘅日記、書信、稿件等等，記錄咗呢個共產黨幹部究竟喺香港點樣做文宣、點樣籠絡各派政商要人、點樣向中共交代佢嘅工作、點樣同其他中共喺香港嘅人員互相合作同協調。吳荻舟嘅呢啲文稿，唔單止反映佢自己嘅職業生涯，更加反映咗中國共產黨喺戰後香港嘅地下活動，喺六七暴動爆發之前究竟已經醞釀同累積咗幾多嘢。 呢本書雖然係由吳荻舟個女編寫而成，立場一定係偏向吳荻舟或者中共，但仍然係珍貴嘅歷史見證。 💡六七暴動期間，左派曾經預備咗刀同槍等大批武器，諗住從中國運入香港，製造更多暴力同混亂，但被吳荻舟阻止。呢件事亦都導致吳荻舟失信於中共。 【店長精選：唔好果本唔敢揀】 《余英時香港時代文集》 余英時｜聯經出版 ISBN：9789570864281｜HKD$153 講完共產黨，咁反共嘅人又係咩一回事？舊年逝世嘅余英時係亞洲歷史學界一等一嘅學者，呢個大家都知。但同一時間，余英時亦都係積極評論時政，相當入世嘅歷史學家。佢對中國同亞洲嘅政治變化，有佢老人家自己嘅洞見。 余英時嘅立場，相信都係承傳自佢嘅老師，創立香港中文大學同新亞書院嘅反共文人，錢穆。當然，錢穆嘅反共，同余英時嘅反共，以至現代人嘅反共，可能都有唔同嘅含義，但係喺一啲基本目標上，仍然係一致。 余英時同錢穆一樣，都係同香港好有關係嘅人物。錢穆喺1949年創立咗新亞書院，余英時就係1952年第一屆畢業生。後來新亞書院變成中文大學，佢亦做過中大副校長同新亞書院嘅校長。因為佢嘅呢段經歷，即使佢人生大部分時間都喺其他地方生活，但仍然會關注香港，亦都寫下咗好多關於呢座城市嘅文章，一直到佢2021年離世之前，都仍有評論香港嘅局勢。 呢本書輯錄佢喺香港生活期間寫成嘅文章，從法國大革命講到文化大革命，由社會政治講到教育學術，當然都由中國講到香港。究竟由一個接受新儒家學說薰陶，自由主義出身，關心中國同時反共，畢生遊走中、港、美、臺等國嘅殿堂級史學泰斗，係點樣理解佢身處嘅世界，同呢個世界入面嘅呢一座城市？ 💡余英時其中一篇文章〈史學、史家與時代〉，係港、臺好幾間大學歷史系學生必讀嘅經典，當初原來係喺香港寫成，係佢1974年喺新亞書院發表嘅演講辭。 此篇書訊刊於每週一發出的獅墨書訊，免費訂閱

【最新到貨：新鮮滾熱辣上架】 The First British Trade Expedition to China: Captain Weddell and the Courteen Fleet in Asia and Late Ming Canton Nicholas D. Jackson｜Hong Kong University Press ISBN：9789888754106｜HKD$580 如果問：香港呢個殖民地係點嚟？咁就要再問：英國點解會揀香港？要知答案，仲要再問上去：英國係點樣嚟到東亞？ 當主流歷史論述嘅注意力，都集中喺英國點樣「侵略」同「欺凌」中國，英國人最初係點樣出現，好似就已經被人忘記咗。Nicholas Jackson 呢本書就提醒大家，英國人喺1637年就已經第一次抵達中國，果陣連清朝都未出現，仲係明朝。 當然，英國人嚟到東亞，唔係一開始就已經「船堅砲利」嘅，佢哋面對嘅，係數量上佔絕對優勢嘅中國，仲有已經盤踞咗澳門八十年嘅葡萄牙人，同埋家鄉嘅競爭對手東印度公司。英國人究竟係點樣克服呢啲重重障礙，喺歐洲對中國嘅貿易入面佔翻一個位置？ 呢本書鉅細無遺地，講返Captain Weddell，第一個踏足中國嘅英國人，由印度出發嚟到澳門同廣州嘅故事。呢位船長初嚟報到，好快就已經得罪曬所有人，被迫承諾永遠唔再翻到中國，但事隔兩年仍然唔肯放棄，又翻到廣州，努力爭取通商貿易嘅機會。佢最後回程期間，喺非洲好望角附近失蹤（好似話沉咗船），之後從此消失。 咁關香港咩事呢？話說Captain Weddell嚟到果陣就已經有考慮過佔領一個小島做貿易基地，仲差啲揀咗好近香港嘅內伶仃島添。唔止，為咗避開澳門嘅葡萄牙人，佢哋仲將船隊停泊喺大嶼山，又喺大嶼山遇到西班牙人。講咁多，都係想表達：香港喺未成為殖民地之前，其實就已經係貿易航線上重要嘅地點。 💡Captain Weddell 1637年喺大嶼山嘅停留，係目前已知最早英國人出現喺香港嘅記錄，之後就要等到1683年先再有英國人出現。 【店長精選：唔好果本唔敢揀】 Canton Days: British Life and Death in China John Carroll｜Rowman & Littlefield Publishers ISBN：9781538136294｜HKD$420 咁之後，英國人喺廣州仲發生過咩事？如果十七世紀嘅英國人好似上面咁講，喺珠江三角洲一帶都仲係被孤立嘅一個，咁去到十八世紀，英國人就已經喺廣州建立咗自己嘅社群，佔一席位。 《香港簡史》作者，香港大學歷史系高馬可教授嘅呢本新作，就係講緊由十八世紀中，去到十九世紀鴉片戰爭之前，喺廣州工作同生活嘅英國人，究竟面對緊一個點樣嘅世界。當主流嘅歷史論述都將呢啲英國人標籤為「殖民者」、「侵略者」嘅時候，如果將佢哋當翻做「遠渡重洋嚟打工或做生意嘅人」，用翻一個「人」嘅視角去理解佢哋，又會得出乜嘢結論呢？ 作者特別仲講咗三個十九世紀嘅人物故事，三個客死異鄉嘅英國人故事，包括死於澳門嘅律勞卑、死於香港嘅Captain Humphrey Fleming Senhouse，仲有自殺身亡嘅蘇格蘭商人Thomas Beale。佢哋嘅死，反映咗英國同中國文化嘅衝突，亦都影響咗喺廣州嘅英國人，點樣思考佢哋自己喺呢座城市入面嘅地位，以至最重要嘅，係英國喺中國究竟應該投放咁多心力落去。 鴉片戰爭係咪值得打呢？英國係咪真係需要喺中國建立一個殖民地呢？香港、廣州同澳門之間嘅關係，又應該點理解？ 💡第二任港督戴維斯，喺香港仲未成為殖民地之前，其實就已經喺廣州工作咗二十幾年，最初係東印度公司嘅人，後來先成為官員。 此篇書訊刊於每週一發出的獅墨書訊，免費訂閱

【最新到貨：新鮮滾熱辣上架】 《鐘樓憶舊：中電總部雜記》 香港社會發展回顧項目｜中華書局 ISBN：9789888807635｜HKD$298 其實我哋書店就好少會入「機構歷史」呢類書，更唔好講話推薦。事關好多呢類書，都係果間機構唔知幾多週年果陣俾錢搵人幫佢寫，基本上都只係公關工具。寫得好嘅，真係合乎史學標準嘅，少之又少。 咁點解店長會入呢本講中電嘅歷史書呢？原因在於編呢本書嘅團隊：香港社區發展回顧項目。佢地係由嘉道理家族支持嘅機構，管理呢個家族擁有企業同機構嘅歷史檔案，包括嘉道理農場、香港上海大酒店、山頂纜車公司等等，以及呢本書嘅主角，中電。 熟悉香港歷史研究嘅人都會知道，香港社區發展回顧係香港其中一個最重要嘅私人檔案館，亦都係管理得最好嘅其中一個，所以由佢哋用翻自己收藏嘅資料編寫而成嘅中電史，唔會差得去邊。淨係睇書後面嘅參考資料，其實就已經同果啲收錢交差式嘅公關書不可同日而語，都仲未計佢哋啲口述訪問。 呢本書除咗講中電呢間公司嘅歷史之外，亦都集中係加多利山嘅中電總部大樓。呢幢係戰前就已經建立嘅建築物，見證住呢間公司推動九龍同新界發展嘅歷史，亦都見證住嘉道理家族幾十年嚟投資喺香港本土嘅用心。本書雖好，不過再寫落去就會變中電繕稿，所以呢度講返一件衰嘢：呢座中電總部大樓原本三座建築組成嘅建築群，不過除咗有鐘樓果座之外，其餘都已經被中電拆咗，變成豪宅。 💡加多利山（Kadoorie Hill）嘅「加多利」原本應該叫做「嘉道理」，但政府人員唔知嘉道理中文譯名，就寫咗「嘉多利」，其後口耳相傳成為「加多利」。 【店長精選：唔好果本唔敢揀】 《由電線車說起：駛過百年的軌跡》 謝耀漢、John Prentice｜中華書局 ISBN：9789888807895｜HKD$268 講開香港嘅公共建設，交通都係重要嘅一環，而電車又係香港交通史上其中重要嘅一頁。電車係香港最早期嘅公共交通之一，係未有巴士同地鐵之前，係港島市民慣常出入嘅方式。亦因為佢係香港交通嘅角色咁重要，電車甚至會成為政治漩渦嘅中心，例如1912年香港政府停收中國銀元以保障貨幣體系，就引發一場杯葛電車嘅運動，成為中國民族主義喺香港冒起嘅一部分。 呢本書係作者喺2017年出版英文研究著作嘅中文翻譯本，作者分別係香港電車文化保育學會同埋英國電車及輕軌學會嘅主席，專門從事電車研究。所以，書入面嘅資料會比較扎實一啲，作者用嘅史料主要係舊報紙，輔以電車公司同政府嘅一啲檔案。要知道嘅係，喺香港要搵舊報紙主要都係依賴公共圖書館嘅電子資料庫，但呢個資料庫，老實講唔係最容易用嘅，所以要爬梳咁大量嘅報紙，係一啲都唔容易。不過美中不足係缺少資料來源，讀者要再追尋呢啲資料就比較困難。 呢本書有兩樣野多，一係圖片多，二係數據多，尤其後者更加難得。書入面舉凡唔同年代嘅車隊數量、車身規格、收費價錢、乘客人次、意外數字等等，一應俱全。考下你，1974年嘅香港，垂直樓梯同旋轉樓梯嘅電車分別有幾多架？答案係第93頁，自己搵。對於電車迷或者好想認真了解香港電車發展嘅讀者嚟講，你會想知嘅野都可以喺呢本書搵得到。 💡香港電車喺1904年投入服務，但係去到20年代，已經出現咗車身廣告，當時常見嘅係電影同百貨公司宣傳，主要以廣告牌掛喺車頭車尾同上層兩側。 此篇書訊刊於每週一發出的獅墨書訊，免費訂閱（請到首頁最底處輸入電郵訂閱）

【最新到貨：新鮮滾熱辣上架】 The Occupation of Hong Kong, 1941-1945 Philip Cracknell｜Amberley Publishing ISBN：9781398110274｜HKD$250 我知，鄺智文博士嘅經典《孤獨前哨》同《重光之路》已經絕版買唔到。咁不如睇下Philip Cracknell 嘅The Occupation of Hong Kong同埋Battle for Hong Kong？Philip Cracknell唔係傳統學院出身嘅歷史學家，但佢嘅研究同樣紮實。你知啦，寫香港保衛戰同三年零八個月嘅書真係好多，唔係每本都寫得好。 呢兩本書，由1941年嘅香港保衛戰，寫到之後嘅日治時期，鉅細無遺咁交代咗好多細節。舊年出版嘅前作Battle for Hong Kong由開戰前香港所做嘅備戰工夫開始講起，講到終於開戰，講到醉酒灣防線被突破、日軍砲轟同登陸港島，仲有黃泥涌峽嘅血戰、守軍嘅反攻，再到淺水灣同赤柱嘅last stands，最終喺聖士提反書院屠殺後，香港投降。 上個月先出版嘅新作 The Occupation of Hong Kong 則係比較全面嘅描述，由香港保衛戰開始講起，寫到日治時期嘅經濟活動、疾病饑荒以至係社會氣氛。除咗概括平民嘅生活之外，亦有講到戰俘營入面嘅生活，啲戰俘點樣被日軍虐待，佢哋又點樣捱到重光嘅一日。難得有咁仔細但又唔會太艱深嘅作品講二戰時期香港，該有嘅細節都有，如果錯過咗鄺博嘅書，呢兩本都一樣精彩。 💡每年嘅十一月十一號，都係「和平紀念日」，紀念兩次世界大戰中包括香港在內嘅參戰軍人。大家都會喺果日佩戴虞美人花（Remembrance Poppy）為記。 【店長精選：唔好果本唔敢揀】 Gunboats, Empire and the China Station: The Royal Navy in 1920s East Asia Matthew Heaslip｜Bloomsbury Publishing ISBN：9781350176188｜HKD$650 老生常談：英國皇家海軍自1805年打敗拿破崙嘅艦隊以嚟全球無敵，已經係公認嘅事。但時隔一百年，嚟到二十世紀，仲係唔係咁？大英帝國係一個靠海權維持嘅國家，海軍就係帝國嘅支柱。因為第一次世界大戰嘅緣故，大英帝國嘅國土達到巔峯，但同一時間，經歷咗第一次世界大戰摧殘嘅皇家海軍，要守衛咁龐大嘅帝國就更顯吃力。 十九世紀末開始，單係皇家海軍嘅中國艦隊（China Station），已經比任何東亞國家嘅海軍更強大。呢隊中國艦隊主宰東亞嘅海域，更加係英國喺東亞外交政策嘅後盾。但係嚟到二十世紀初，雖然大戰已經打完，表面上世界已經恢復和平，但東亞嘅局勢比一戰之前複雜咗好多，政治衝突同暗湧依然從未間斷。皇家海軍中國艦隊要遵從唔同嘅限制，例如係主權嘅界線或者係華盛頓海軍條約嘅規定，又要面對唔同嘅威脅，例如係動盪不安嘅中國、唔再係盟國嘅日本，仲有打極都打唔完嘅海盜。 而香港喺呢方面嘅角色就顯得更加重要。作者話，新加坡對於保衛帝國係必要嘅，但香港先係走向勝利嘅關鍵（第60頁）。甚至乎，香港正正就係皇家海軍中國艦隊嘅最主要基地。維多利亞港以至金鐘一帶嘅海軍船塢設施，喺成個大英帝國入面都係舉足輕重地重要。 呢本係海軍史新近嘅研究作品之一，對香港或英國軍事史有興趣嘅朋友都不容錯過呀！ 💡1920年果陣，中華民國海軍最大嘅巡洋艦海圻號，比皇家海軍最細嘅巡洋艦仲要細一千噸。同一時間，日本最大戰艦嘅火力，比全中國海軍加埋都強勁。 此篇書訊刊於每週一發出的獅墨書訊，免費訂閱（請到首頁最底處輸入電郵訂閱）

【最新到貨：新鮮滾熱辣上架】 📖It Won’t Be Long Now: The Diary of a Hong Kong Prisoner of War Graham Heywood｜Blacksmith Books ISBN：9789881376510｜HKD$138 以下呢個故事教訓我哋，拖延症嘅後果可以好嚴重。 話說喺1941年嘅12月8號，日軍派飛機攻擊啓德機場，香港保衛戰正式打響。除咗軍隊要準備作戰之外，其他政府部門都有一啲工夫要做，例如天文臺就需要緊急拆除同回收一啲郊外嘅設備，以免落入敵軍手中。 呢個任務，就落咗喺助理台長希活（即係呢本回憶錄作者）身上。希活喺呢個時候感受到嘅戰爭氣氛可能都唔算好濃厚，仲有種施施然嘅感覺。佢哋十一點先出發，十二點去到元朗嘅地磁站開工，但做咗一個鐘頭野又施施然咁食個lunch先，完全唔知道當時日軍已經越過邊境，向新界推進緊。 於是乎，去到下午三點，希活佢哋剛剛收工，就剛剛被日軍捉到正，成為香港保衛戰第一批被俘虜嘅白人。如果佢哋早少少出發，如果佢哋做完野翻出市區先食飯……個故事可能又會好唔同。 咁呢本回憶錄又唔係要懺悔點解被拖延症搞到自己被日軍俘虜，而係講佢被俘虜之後，跟住果三年零八個月係點樣喺唔同嘅戰俘營入面渡過。希活無參與過保衛戰，由一開始就喺戰俘營，經歷唔同嘅折磨、審訊，以至係各種傷痛、憤怒同絕望嘅情緒，但同時亦有苦中作樂嘅時候，有重拾希望嘅時候。最終佢捱過咗黎明之前至L黑暗嘅黑暗，1945年香港重光，佢放監出翻嚟，做埋天文台長直到退休。 💡開戰當日回收天文臺設備，然後被日軍俘虜嘅除咗希活之外，仲有一個同事叫黎明·星巴克（Leon Starbucks）。據講，佢同三十年後出現嘅連鎖咖啡店，係無任何關係嘅。 【店長精選：唔好果本唔敢揀】 📖Escape from Hong Kong: Admiral Chan Chak’s Christmas Day Dash, 1941 Tim Luard｜Hong Kong University Press ISBN：9789888083770｜HKD$195 牆內嘅人有佢哋嘅苦難，牆外嘅人亦有佢哋嘅戰鬥。留低嘅人失去自由，唔代表離開嘅人就會比較好過。希活被俘虜之後過咗十八日，香港投降。中華民國嘅軍官陳策隨即喺香港守軍嘅指示下，帶同一啲中英軍事要員，搭上僅存嘅魚雷艇由鴨脷洲出發，喺日軍嘅進逼之下逃離香港。 佢哋一路避開日軍，由鴨脷洲沿香港東面海域去到東平洲，穿過大鵬灣，喺南澳上岸，一路係敵人控制嘅地區行進。沿路要避開日軍嘅哨兵，要同游擊隊交涉，仲要照顧受傷嘅隊員。由陸路前進，行咗四日先可以去到稍為安全嘅惠州，再聽任軍隊調遣。因為佢哋成功逃亡，所以之後東江縱隊同英軍服務團祕密出入香港嘅路線，都係參考咗佢哋嘅做法。 喺咁艱難嘅時勢之下，除咗壯烈犧牲同奮勇抵抗之外，仲有一種做法係「留有用之軀」，例如係英國駐港情報處代表麥道高，戰後仲成為輔政司。仲有好多其他跟住陳策逃走嘅人，後來都係唔同崗位繼續為盟軍作戰，有啲參與咗緬甸嘅戰役、有啲去咗駐守印度嘅基地、有啲喺重慶做情報工作、有啲甚至打埋意大利同荷蘭，直到戰爭喺1945年結束。 💡陳策本身係中華民國嘅海軍中將，嚟到香港之前，佢喺廣東打仗，並因此失去左腳，被人叫做「獨腳將軍」。戰後陳策做咗一陣廣州市長，1949年自殺身亡。 *書介部分資料來自鄺智文博士（2021）。1941年香港戰役地圖。檢索於2022年10月9日，取自香港浸會大學圖書館《史庫》：https://digital.lib.hkbu.edu.hk/1941hkbattle/ 此篇書訊刊於每週一發出的獅墨書訊，免費訂閱