搜尋結果

【最新到貨：新鮮滾熱辣上架】 半島之龍：越南脫離中國，追求自由與認同的原動力 小倉貞男｜林巍翰譯｜八旗  ISBN：9789865524319｜HKD$160    呢本係一本越南通史，由史前時代紅河流域嘅東山文明，以及青銅時代嘅百越同南越國，講到早期嘅越南王朝、征服南部嘅扶南、占婆國，再到西山起義、法國殖民、胡志明嘅共產革命、二戰、越戰，鉅細無遺咁交代咗幾千年嚟嘅中南半島。但同一時間，佢又唔完全係一本越南通史。透過講述越南嘅故事，作者探討嘅其實係越南喺唔同歷史時期入面，掙扎於大國夾縫之間，或者被大國統治繼而成功擺脫嘅過程。    大國夾縫，聽落係咪好熟？呢一點正正係東南亞好多國家同香港之間嘅共同點，亦都係閱讀佢哋嘅歷史能夠幫助我哋思考香港前途嘅原因。同香港一樣，越南喺悠長嘅歷史之中都難以完全擺脫「中國因素」。越南經歷過四次「北屬時期」，即被中國統治嘅時代，第一次係被西漢帝國征服、第二次係東漢、第三次係唐朝、第四次係明朝。而即使無被中國統治，都會被中華帝國視為藩屬和附庸，無法與之平起平坐。    然而，每一次嘅「北屬時期」，都會引起無數越南人嘅反抗，透過揭竿起義、發動政變、奪取權力等方式，將國家重新掌握喺自己手中，同時吸納周邊（主要係南邊）嘅其他國家同民族，喺兩千年之間逐漸形成「越南人」。不斷被中國征服，又不斷地重新爭取獨立，試圖掌控自己嘅命運，甩開大國嘅宰制（除咗中國之外，重要面對曾經嘅泰國、柬埔寨、爪哇等強權，到近代仲包括法國、日本、美國），亦都成為越南史最值得細味之處。  💡 法國之所以能進入越南，係因為當地阮氏政權借助佢哋嚟消滅西山王朝，而西山王朝之所以興起，係因為有一班嚟自廣東嘅海盜加入為佢哋打江山，而呢班海盜嘅頭目鄭一，就係張保仔後來嘅養父，歷史係充滿巧合。 【店長精選：唔好果本唔敢揀】 帝國煉金術：東南亞的民族主義與政治認同  Anthony Reid｜林瑞譯｜八旗  ISBN：9786267234167｜HKD$200    「殖民地」同「帝國」係每一個東南亞國家嘅歷史都會出現嘅重要主題。除咗泰國之外，東南亞無一個國家無曾經被殖民嘅經驗，甚至有啲曾經被多個國家殖民——主要就係呢本書關注嘅「海洋東南亞」，即馬來西亞、新加坡、印尼、汶萊、菲律賓。呢啲國家嘅近代歷史，基本上都依循呢個規律：被殖民、二戰、解殖、建國、內亂，最終形成現代國族。    但以上都只能講到「殖民地」嘅部分，而未講到「帝國」嘅部分，因為東南亞嘅「帝國」，從來都唔係淨係指嚟自西方嘅殖民帝國。早喺西方殖民者嚟到之前，無論係馬來半島、爪哇定係婆羅洲，都出現過大大小小嘅帝國，互相兼併同取代，呢啲歷史記憶都會留存喺東南亞唔同民族之間。仲未計現今東南亞唔同國家裡面，都會出現多數民族擠壓少數民族嘅問題，由馬來西亞嘅馬來人同沙巴人，到印尼嘅爪哇人同亞齊人、巴塔克人，都令東南亞成為世上種族衝突頗多嘅地區。    令問題更複雜嘅係，東南亞由古代到現在，都有好多外來嘅族群，加入埋本地各種族嘅混戰裡面。嚟自中國嘅華人、嚟自印度同阿拉伯嘅穆斯林，亦會被本地族群視為外來者，甚至係掠奪者。呢啲外來人有時壓迫本地族群，有時被本地族群排擠，亦無絕對嘅強弱勢之分。最後係東南亞嘅地理環境，造就好多與世隔絕嘅社會，國家政府同制度根本無法深入呢啲地方，遑論國族認同。東南亞嘅民族主義形成同整合過程，於是變得相當有趣。  💡 喺古代東南亞，曾經存在過一個室利佛逝帝國，範圍遍及爪哇、馬來半島，勢力龐大。基於呢段歷史，加上馬來西亞同印尼嘅語言同文化多少有啲相近，印尼獨立後曾經主張兼并馬來西亞，仲曾經爆發小規模戰爭。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 馬尼拉的誕生：大航海時代西班牙、中國、日本的交會  Birgit Tremml-Werner｜堯嘉寧譯｜衛城  ISBN：9786267052457｜HKD$227    菲律賓喺今日好多人眼中嘅形象可能都係「落後」、「窮」，或者好似陶傑咁形容為「僕人國家」。呢啲刻板印象固然有好多唔準確同誤導嘅成分，佢哋亦會令我哋更加難想象菲律賓群島曾經喺亞洲歷史上扮演幾重要嘅角色，尤其係呢個群島嘅中心，馬尼拉。你話，馬尼拉嘅歷史同香港有咩關係？點解我哋要知？好簡單，馬尼拉同香港一樣，都係一個貿易港口，亦係因殖民主義而出現嘅大都市。參考馬尼拉嘅故事，或者都能夠令我哋對香港嘅了解更深。    馬尼拉嘅故事，喺好多部分都同香港驚人地相似。呢兩座城市，都係帝國前進東亞嘅跳板，為咗令帝國可以開拓東亞大國市場而建立。西班牙喺十六世紀佔領菲律賓，經營馬尼拉呢個主要港口，就係要喺東亞做貿易。而同香港一樣，西班牙統治下，十六、七世紀嘅馬尼拉亦都成為咗亞洲最重要嘅交通樞紐。北面連接中國、臺灣同日本；西面連接中南半島、馬來亞，以至印度；南面連接今日印尼嘅香料群島；仲有東面，係連接住太平洋嘅另一端，中、南美洲嘅其他西班牙殖民地。    交通樞紐嘅特性，亦都令香港同馬尼拉成為唔同文化交匯嘅地方。穿梭於貿易路線上嘅，係好多嚟自唔同地方嘅人，帶住嚟自唔同地方嘅文化。就好似殖民地香港嘅人口由五湖四海而來，馬尼拉都匯集咗中國、日本、西班牙、馬來、爪哇，以及本地各族群嘅文化，點樣調和唔同族群嘅衝突，令佢哋可以和平共處，都係馬尼拉市政府相當頭痛嘅問題。而政治上，來自中國嘅鄭芝龍集團、日本嘅各大名、鄰近經營殖民地嘅荷蘭同葡萄牙，都各自喺馬尼拉有自己嘅勢力同利益。同樣處於大國夾縫之間，馬尼拉嘅自處之道，又同香港有無唔同？  💡 辣椒係美洲嘅原生植物，大約喺十六世紀末經菲律賓、澳門傳入中國。換句話說，如果無咗馬尼拉，世上就唔會有麻辣火鍋，亦都唔會有譚仔米線了。 【店長精選：唔好果本唔敢揀】 新加坡的非典型崛起： 從萊佛士爵士到李光耀，駕馭海洋的小城大國 John Curtis Perry｜林添貴譯｜八旗  ISBN：9786267234501｜HKD$187    新加坡係最常被人拎嚟同香港比較嘅亞洲城邦（至少喺香港仲可以同新加坡比較果陣）。值得比較嘅原因亦都相當明顯：同樣都係一座現代都市，同樣都係前英國殖民地，同樣都係以貿易起家，同樣經歷工業化同服務業經濟轉型，同樣都係以華裔市民為主，人口亦相去不遠，但係命運始終唔同，一個變成東南亞以至亞洲舉足輕重嘅國家，另一個就由亞洲四小龍之首墮落成國際金融中心遺址，點解？有啲咩係新加坡先有，而香港無？    殖民地年代新加坡嘅發展軌跡其實同香港都唔差得太遠。建立之初，新加坡一樣克服咗瘧疾橫行、貿易不振、貧窮人口、地緣政治嘅挑戰，先逐漸成為原本萊佛士設想中，作為東印度公司前進東亞嘅基地。甚至，香港同新加坡一樣，都唔係大英帝國原本擴張計劃嘅一部分，而係前線人員嘅個人意志促成嘅事。義律違背倫敦嘅意見，執意要揀香港為殖民地；萊佛士亦都係先斬後奏，得到新加坡之後，先向東印度公司報告。    新加坡同香港嘅命途開始走往唔同方向嘅時機，可能都真係星洲獨立嘅1965年。馬來西亞將新加坡踢出聯邦，令新加坡被迫獨立，成為一個無人睇好嘅國家。李光耀率領之下嘅新加坡，忽然之間要將呢座城市嘅首要目標，係「生存」。喺「生存」嘅需要驅使之下，新加坡必須要迅速地培養出令自己唔會被大國碾碎嘅實力。於是新加坡投放大量資源建設航運事業，把握地理上身處馬六甲海峽嘅優勢；又建立強大嘅軍隊，保障國土嘅安全；教育、工業、社會保障，新加坡都盡力投資。但最重要嘅，可能係喺呢幾十年間，新加坡人意識到，其實佢哋唔需要，亦都無辦法「背靠」任何國家，可以依靠嘅最終都只有自己。或者呢點就係新加坡同香港最大嘅分別。  💡 新加坡獨立之後，國防被視為必須儘快完善嘅部分，當時新加坡嘅取經對象，就係同樣有短時間內建立精良軍隊嘅以色列，兩國軍事合作至今仍然持續。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 太古集團與近代中國：十九世紀駛入中國的英國商人，如何參與商業零和遊戲？  Robert Bickers｜葉品岑譯｜麥田  ISBN：9786263104600｜HKD$260    太古呢間企業，相信大家都唔會太陌生。今日太古集團嘅業務涵蓋香港經濟嘅眾多領域，好多大家耳熟能詳嘅品牌，都係佢哋嘅生意，例如可口可樂嘅代理、國泰航空、太古城等等。太古集團同香港嘅關係非常深，香港開埠之初就已經喺呢座城市扎根，甚至可以話如果無咗太古，殖民早期嘅香港發展將會非常唔一樣，尤其係港島東部嘅開發，幾乎都係太古獨力完成，包括船塢、糖廠以及工商業所衍生嘅各式基建、設施同社群。曾經存在過，而家變成賽西湖公園嘅太古水塘，以及鰂魚涌吊車等等，都係太古塑造早期香港嘅痕跡。    但佢對香港嘅影響，並唔單只體現喺城市面貌上。太古係香港最重要嘅航運貿易公司之一，糖廠同船塢亦打下香港實業生產嘅基礎。而太古嘅故事，亦多少同好多其他十九世紀嚟到東亞嘅歐美企業相似——喺歐美發源，本來只做規模細嘅貿易生意，但機緣巧合之下進軍遠東，嚟到香港接觸龐大嘅中國市場之後一夜暴富，生意自然就越做越大，但係碰上二戰、國共內戰，繼而共產黨建政，為咗保命漏夜撤出上海、天津等基地，翻到香港嘅大本營默默耕耘，然後逐漸站穩陣腳，繼續發展。    亦因為如此，太古嘅成功與失敗，除咗關乎Swire家族各代成員嘅能力、識見、際遇之外，地緣政治、戰爭、全球化、經濟潮流，通通都會左右太古嘅走向。太古嘅歷史，其實就係東亞嘅近代史。  💡 傳說，當年Swire老闆要為公司起一個中文名，只見中國人門前貼「大吉」揮春，甚喜。所幸身邊有文膽意識到「大吉公司」有幾好笑，為佢加翻一點，抹走一劃，變成「太古」。不過，只係傳說，毋須認真。 【店長精選：唔好果本唔敢揀】 解鎖世界：從口岸城市看蒸汽世紀如何打開技術、商業、文化、意識形態、地緣政治、環境等全球化的關鍵發展與影響 John Darwin｜黃中憲譯｜麥田  ISBN：9786263100695｜HKD$217    太古、滙豐、怡和呢啲老牌英資企業當初之所以會進軍遠東，立足香港，深入中國，都同十九世紀航運嘅技術突破同網絡形成有關。以宏觀全球視野嚟睇，工業革命帶嚟蒸汽技術，而蒸汽技術帶嚟一波無法阻擋嘅全球化浪潮。不論係經濟、貿易、軍事，航海技術嘅飛躍發展，徹底咁改變咗世界嘅模樣。不論係商船定係軍艦，都唔再需要睇風做人，航線路徑以及航行時機嘅選擇都多咗好多，危險嘅地方唔再需要因為風向而夾硬去，亦都唔洗再因為等適合嘅風季而錯過貿易或打仗嘅時機。世界地圖上嘅航線網絡，都喺十九世紀重新畫過。    同一時間，管理一個港口城市（例如香港），要顧慮嘅東西亦都完全唔同曬。例如，之前嘅港口除咗上落貨嘅設施之外，只需要為船隻補給食物同水，以至提供一個維修嘅地方，就可以係一個完善嘅港口。但自從動力由風力改成蒸汽，港口必須要有能力供應煤炭先得，於是成個供應鍊都要重新規劃；每次貿易嘅航程都大幅縮短，每艘船每年都可以走多好多轉，咁夠唔夠貨賣？唔夠就要再深入內陸尋找供應，亦都要尋找更有效率嘅內陸運輸，aka 火車，係呀又係蒸汽機。全球化嘅浪潮，於是深入到地球上離海邊好遠嘅角落。    所有嘅帝國亦都需要重新思考，究竟維持新時代嘅貿易航線需要建立同經營幾多個殖民地，於是，地緣政治又有一份角色。仲未計交通變得更加發達之後，文化、觀念、人口、資訊嘅流動都會更加爆炸。要以咁宏觀嘅視角處理全球化、全球網絡咁大個議題，當然亦都要大師級人物嚟研究。所以呢本，就係大英帝國研究嘅神枱級學者，《未竟的帝國》作者 John Darwin嘅新作品。  💡 英式英文有形容上流文化為「Posh」者，有傳詞源出自十九世紀航運。英國前往印度嘅船上，去程左舷船艙同回程右舷船艙都能避免太陽直射，所以船飛較貴。呢個詞就係左舷去程（Port Out）、右舷回程（Starboard Home）嘅縮寫。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 The Voices of Macao Stones  Lindsay and May Ride｜Hong Kong University Press  ISBN：9789622094871｜HKD$200    澳門唔係只有賭場同中國遊客，相信對歷史有興趣嘅讀者都會明白。雖然面積比香港更細，但有超過五百年嘅殖民地歷史，澳門嘅文化底蘊絕對唔會比香港輸蝕。而要喺澳門尋訪呢啲歷史痕跡，都唔一定要走入博物館或者圖書館，只要我哋喺澳門旅行嘅時候，唔好淨係掛住葡撻同豬扒包，多啲留意路上身邊同腳下，都會有好多新發現——皆因好多澳門嘅歷史故事，都係刻喺石頭上面。    故事可以由媽祖閣嘅各式石刻開始講起，媽祖信仰好早期就已經傳入澳門，亦係澳門英文/葡文名Macau嘅由來；由「殷皇子大馬路」嘅街名牌同達伽馬紀念碑可以講著名葡萄牙歷史人物Henry the Navigator以及Vasco da Gama嘅航海故事；數之不盡嘅仲有亞馬留紀念碑、澳門舊城牆、何東花園、區華利像、得勝紀念碑……全部都埋藏住少有人留意到嘅過去。    相比之下，其實香港係一個大型紀念碑或紀念像相對稀少嘅城市。或者有啲朋友可以即時諗起中環和平紀念碑、昃臣像，或香港公園嘅英國軍人銅像等等，不過，以香港近代歷史嘅豐富程度嚟睇，值得紀念嘅人同事又點止咁少，亦唔會限於港島。相比起寸金尺土、發展至上嘅香港，似乎其他地方對於歷史記憶嘅態度都有啲唔同。  💡 香港最古老嘅廟宇係西貢清水灣大廟，已經至少有七百幾年歷史。澳門最古老嘅廟宇則係澳門半島嘅媽祖閣，相信建於十六世紀中葉。無獨有偶，兩間古廟都係以天后/媽祖為主神。 【店長精選：唔好果本唔敢揀】 An East India Company Cemetery Protestant Burials in Macao  Lindsay and May Ride｜Hong Kong University Press  ISBN：9789622093843｜HKD$250    如果要用石頭嚟講歷史，墳場一定都係唔可以忽略嘅部分。如果想睇香港歷史要去跑馬地墳場，咁去到澳門都唔可以唔去基督新教墳場。呢個位於大三巴附近、白鴿巢公園隔離嘅舊基督教墳場，已經有超過二百年歷史，喺1821年由東印度公司建立。無錯，雖然澳門係葡萄牙殖民地，但都仍然有好多英國東印度公司留低嘅痕跡。當時香港仲未開埠，但係英國一早就已經喺廣州同中國人做生意，佢哋能夠利用嘅貿易基地，自然就係澳門。    咁當然，既然有好多英國人喺澳門活動同居住，就同樣會有好多英國人死喺澳門、葬喺澳門。於是我哋走入呢個東印度公司墳場，唔難搵到好多我哋喺中史堂見過嘅人名——譯出第一部中文聖經同創辦英華書院嘅馬禮遜、喺東亞享附盛名嘅畫家錢納利、發明中文活字印刷術嘅台約爾牧師、丘吉爾個祖先亨利丘吉爾、二戰期間創立英軍服務團嘅賴廉士等等。  由呢個墳場可以觀察嘅歷史，又點止搵名人墓碑咁簡單。透過統計同分析葬喺呢個墳場入面嘅人，可以睇到澳門嘅發展脈絡——唔同時期喺墳場落葬嘅人，各自都有一啲共同點，反映喺呢段時間入面，白人喺澳門嘅主要角色，以及人口構成，都不斷咁轉變緊，唔會只係單純嘅「殖民者」。各種唔同墓碑嘅樣式同設計，都反映住為亡者設計墳墓嘅人諗緊啲咩，以及同亡者嘅關係。瞓喺墓入面嘅，唔係歷史書上嘅一個名，而係曾經活生生嘅人。  💡 呢個基督教墳場起源於當時中國嘅基督新教徒需要一個安息之地，但係唔可以葬喺中國範圍內，而天主教葡萄牙政府唔俾佢哋葬喺澳門城入面，所以就只能喺澳門舊城外就地掩埋。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 Decolonisation in the Age of Globalisation: Britain, China, and Hong Kong, 1979-1989  Chi-Kwan Mark｜Manchester University Press  ISBN：9781526171320｜HKD$880    知道呢本書出版果陣，我心入面嘅第一個諗法係：又有一本講主權移交嘅書。雖然話近年英國果邊新解密咗好多八、九十年代嘅檔案，為學者提供咗探討中英談判同主權移交呢段歷史嘅新資料，但係呢兩年好似都出咗一本又一本嘅書，好似張家偉《英國檔案中的香港前途問題》、C.L. Lim《Treaty for A Lost City》、Michael Sheridan《The Gate to China》，Dalena Wright出年仲會有一本《Diplomacy Ends at Midnight》。 咁麥志坤教授再寫一本，又會有啲咩新見解？    喺討論中英談判嘅時候，我哋有時會將焦點擺喺鄧小平一個人身上，好似鄧小平一個人就代表整個中國政府咁（雖然鄧小平的確喺黨同政府內部有極強嘅影響力）；而同一時間，我哋睇談判期間嘅英國，又會傾向講「英國政府決定乜乜乜」，好似成個英國政府嘅目標同行動都好一致，無任何一個官員有其他意見咁。所以我哋大概都知道談判期間鄧小平諗緊咩，但戴卓爾呢？除咗跌親好痛好柒之外，戴卓爾自己係呢個談判入面有啲咩考慮？    麥教授認為，戴卓爾自己嘅新自由主義政治背景，令佢喺談判果陣，其實唔單只係諗緊關於香港前途、同埋英國本土利益。佢信奉自由嘅國際貿易，認為咁先喺英國應對全球化嘅道路。同時見到中國改革開放，佢亦覺得係時候同中國建立更好嘅貿易關係，亦好希望將中國引導向自由資本主義嘅方向。於是，香港喺整個談判入面，都只係其中一部分。戴卓爾嘅影響下，英國嘅外交官員都積極咁同中國維持友好關係，唔希望產生太多衝突。但係，1989年六四，似乎最終都係令呢個目標變得徒勞無功。  💡 中英談判嘅過程期間，曾經討論過是否要有香港代表，英國就曾經提出由港督擔任呢個角色，而香港政治界亦曾經由鍾士元帶隊到北京表達香港人嘅意願，但兩者最終都受中國所阻，不得其門而入。 【店長精選：唔好果本唔敢揀】 Reluctant Exiles?  Migration from Hong Kong and the New Overseas Chinese  Ronald Skeldon｜Hong Kong University Press  ISBN：9789622093348｜HKD$195    1984年，英國同中國簽咗聯合聲明。兩個大國喺談判期間各自做咗啲妥協，亦都各取所需。不過，連參與談判都無資格嘅香港人，睇住主權移交嘅事實塵埃落定，都仍然會有自己嘅諗法。呢個結果就係香港歷史上其中一次大規模嘅移民潮，成千上萬嘅香港人紛紛申請離開香港，逃避不可預見形式，但一定會喺九七降臨嘅風險，然後落戶喺世界唔同嘅角落，尋找新嘅安居之所。    呢啲香港人離散到英國、美國、加拿大、澳洲、新加坡等國家，喺當地建立新嘅社群。咁，佢哋建立嘅係「華人」社群，定係「香港人」社群？佢哋去到係咪都會住喺「唐人街」？佢哋點樣適應當地嘅生活？住喺同一個國家，但唔同城市嘅香港移民，又會唔會有唔同嘅遭遇？離開之後，同香港仲可以保留幾多連結？或者翻番轉頭，呢班人係點樣決定移民？喺乜嘢條件同諗法之下，會影響佢哋移民嘅時機同目的地？    而呢啲問題可能正正就喺呢本書重要嘅地方。呢本書寫於1994年，正值九七前移民潮嘅最後一波，係設身處地嘅觀察。過往好多關於離散同海外華僑嘅研究，都必須要依賴零碎同難辨真偽嘅舊檔案、舊資料，或者係已經移居當地好耐嘅人甚至係第二、三代，先可以重新拼湊出人口遷移嘅過程。但八、九十年代嘅呢次移民潮，係學者第一次可以同呢個現象嘅發展同步咁進行研究，由啲人開始醞釀移民氣氛，一路追到佢哋去到當地落腳並適應，係一種完全唔同嘅研究方式，亦都能夠帶出好唔同嘅移民面貌。  💡 八、九十年代嘅移民潮似乎同近年嘅移民潮有一個共通點，就係呢兩批移民入面都有人會為自己離開香港呢件事有罪疚感，從而喺心理上放大自己喺移民過程中遭遇嘅痛苦，作為對呢種罪疚感嘅平衡。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 Disease, Colonialism, and the State:  Malaria in Modern East Asian History  Ka-che Yip｜Hong Kong University Press  ISBN：9789622095878｜HKD$295    1840年代初，香港殖民地成立，維多利亞城嘅開發如火如荼，周圍都係建築地盤。呢啲地盤好快就引發香港歷史上其中一次最嚴重的瘟疫——香港熱病。呢種病喺白人身上尤其嚴重，住喺香港嘅英帝國軍人、官員、商人、平民都大批咁病死，將啱啱開埠無耐嘅香港變成歐洲人嘅地獄。香港熱病喺1890年代左右被確認其實係瘧疾，由濕熱又唔衛生嘅環境中滋生嘅瘧蚊傳播。而香港殖民地年代嘅頭一百年，都會受瘧疾同其他傳染病嘅反覆困擾。    但呢本書講嘅唔止係殖民政府對抗瘧疾嘅故事。過去幾年相信我哋都學到一個教訓，瘟疫同政治係密不可分。不論係疾病嘅起源、傳播範圍、對社會造成嘅傷害，以至最終消失嘅原因，除咗用科學原理嚟解釋之外，更多時候都必須要考慮社會同政治嘅因素。用呢個角度去睇返香港嘅瘧疾，就可以問好多有趣嘅問題：點解成個十九世紀，香港政府都無辦法提出一個有效對抗瘧疾嘅方法？香港政府推動過嘅公共衛生政策，除咗防治疾病之外，仲有無其他考慮同目的？    更甚者，香港政府處理瘟疫嘅方式，同佢本身「殖民政府」嘅性質有無關係？要回答呢個問題，就要將視角再拉闊一啲，同東亞其他政府一齊比較。喺二十世紀對抗瘧疾嘅漫長過程中，同樣係殖民地嘅臺灣，以及唔係殖民地嘅日本同中國，喺決策果陣，考慮過咩因素、秉持住咩原則，又產生咩結果？殖民政府同非殖民政府嘅做法，會有啲咩唔同？呢啲問題嘅答案，或者都可以幫助我哋理解香港喺過去，甚至係現在，嘅公共衛生做法。  💡 喺十九世紀末，因為傳染病對白人殺傷力太強嘅緣故，香港已經成為死亡嘅代名詞。當時嘅倫敦，如果想咀咒對方，啲人會講「點解你唔去香港？」，意思大概就等於「咁多人死唔見你死？」 【店長精選：唔好果本唔敢揀】 Unruly People: Crime, Community, and State in Late Imperial South China  Robert J. Antony｜Hong Kong University Press  ISBN：9789888208951｜HKD$495    如果喺十九世紀東亞最令殖民帝國頭痛嘅問題之一，係瘧疾同熱帶傳染病，咁對大清天朝嚟講，最煩嘅應該就係無法控制嘅各種地方武裝組織、祕密會社同盜賊群體，以及隨之以嚟遍佈四周嘅各種械鬥、流劫、動盪甚至係民變同內戰。由十八世紀末開始，華南就成為中華帝國最躁動不安嘅地區，尤其係廣東，幾乎喺每一個縣，官府能夠控制嘅地理範圍同權力都不斷萎縮，人民必須組織起嚟自保同自我管理，而呢啲組織一旦武裝起嚟，好快又成為下一波亂源，進一步削弱官府嘅權威，成為惡性循環。    而呢種局面嘅一個主要原因（或者結果，睇你點睇），係連綿不絕嘅戰爭。十八世紀中後期開始，乾隆皇帝發動咗十場戰爭，完成所謂「十全武功」；十八世紀末至十九世紀初又有白蓮教起義、海盜興起（即係張保仔果陣）；之後好快就係鴉片戰爭、第二次鴉片戰爭、清法戰爭、甲午戰爭、八國聯軍；中間又有太平天國、洪兵起義、土客內戰，幾乎無一刻唔係打緊仗，毫無和平可言。    於是，我哋要問嘅問題係——咁喺呢種血肉橫飛，烽火連天嘅時代裡面，《大清律例》仲有無意義？喺社會已經崩潰淪落為完全奉行叢林法則，弱肉強食嘅情況下，民眾同官府對於犯罪嘅理解有無改變到？「犯」、「逆」、「匪」、「盜」、「奸」呢啲詞彙嘅意思，同佢哋指涉嘅人或行為，仲係唔係一樣？  💡 喺十八至十九世紀，每當有地區戰事爆發，而清朝正規綠營軍隊無法應付嘅時候，官府就會鼓勵，甚至要求地方士紳自己組織民兵，稱為團練或更練，守衛地方以舒緩官軍嘅壓力，甚至係直接支援官軍嘅行動。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 Imagining Asia: Cultural Citizenship and Nation Building in the National Museums  Emily Stokes-rees｜Rowman & Littlefield  ISBN：978153817955｜HKD$480    「每一間博物館，都會埋下一粒種子，喺啲人嘅腦袋入面」2002年呢本書嘅作者曾經同時任澳門美術館嘅館長對話，而佢咁樣講。博物館，尤其係政府嘅博物館，經常都會有一個權威嘅形象，令人直覺地認為博物館講嘅嘢一定係啱，於是喺參觀嘅同時，將館內展示同陳述嘅內容照單全收。    亦都因為咁，現實中嘅博物館往往都係能夠非常有效地塑造同強化身份認同嘅地方。透過篩選展示唔同嘅展品，更換唔同嘅描述同敘事，設計唔同嘅參觀路線，甚至係博物館嘅選址（由頭起過一幢新建築，定係改建原有嘅古蹟？咁改建邊座古蹟好？），都會喺參觀者心中建立一個對展覽主題嘅形象，改變或加深佢對某個國家或社會嘅睇法。    有啲國家會透過博物館，嚟到建構同加強市民嘅國族認同，尤其係新建立嘅國家，特別需要利用博物館敘事，抹除大眾原有承傳自前代統治者嘅認同，令佢哋開始認同新國家。亦有一啲地方，經歷過主權移交之後，博物館亦都會刻意擺脫前統治者嘅陰影， 令大家轉投新嘅政權。呢本書列出咗三個唔同嘅案例：新加坡、澳門、香港。呢三個地方都曾經係殖民地，但係佢哋嘅博物館設計又相當唔同。究竟呢啲地方，係點樣處理殖民地遺產，又點樣看待接替殖民政府嘅新政權？「本土認同」喺呢啲國家同城市嘅博物館入面，又有幾重要？  💡 時至今日， 新加坡仲有好多學校、街道、建築等等，都以建立殖民地嘅英國人萊佛士命名，反映殖民地遺產喺新加坡文化中仍然有好重要嘅地位。 【店長精選：唔好果本唔敢揀】 The Landscape of Historical Memory: The Politics of Museums and Memorial Culture in Post-Martial Law Taiwan  Kirk A. Denton｜Hong Kong University Press  ISBN：9789888528578｜HKD$620    除咗新加坡、澳門之外，臺灣嘅博物館，都同樣適合香港參考。臺灣嘅歷史複雜，而且充滿唔同族群之間嘅緊張關係，以至唔同政權更替所造成嘅傷痕。點樣喺博物館以至各種紀念場域展示呢啲歷史段落，就成為臺灣社會爭論不休嘅議題。尤其係，臺灣喺戰後好長嘅一段時間都係由國民黨政府實施戒嚴統治，呢段期間所有關於臺灣嘅歷史論述，都只能夠容納到一種聲音。戒嚴之後，臺灣史嘅書寫突然百花齊放，霎時間多咗好多唔同嘅觀點。於是喺臺灣展示歷史，又多咗一重世代嘅考慮。    臺灣嘅特別之處，在於好多歷史議題，都存在住至少兩種，有時係多種唔同嘅族群與認同互相衝突，而呢啲牽動住現實政治嘅族群認同，亦會反映係博物館上面。例如，同樣係紀念「烈士」，臺灣嘅忠烈祠關乎中華民國嘅烈士，其中唔少根本與臺灣無關，但另一邊廂嘅二二八紀念館，講述嘅卻係中華民國迫害臺灣人嘅故事；又或者，臺灣社會應該要「保存正統中華文明」，定係將注意力擺喺「立足臺灣本土嘅文化」？蔣介石應該係守護臺灣對抗共產黨嘅偉人，定係佔領同壓榨臺灣嘅侵略者？原住民嘅文化應該點樣展現？    而更重要嘅係，臺灣嘅博物館，由選址建造、建築設計、日常行政、歷史論述等各個層面，又如何承受每次政黨輪替帶嚟嘅衝擊？  💡 相比起香港，臺灣紀念二戰嘅氣氛更加薄弱，原因來自身份與歷史記憶嘅尷尬：戰爭期間係日本，但打完仗就係中華民國，咁紀念邊個好？ 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 歷史如何教？從閱讀到探究 林慈淑｜三民出版  ISBN：9789571476407｜HKD$143    嚟到二十一世紀，歷史都仍然係以文字為本嘅學問。點解歷史書本本都咁厚，點解全部都係密密麻麻嘅字，因為要清楚解釋一個歷史現象、講述一個歷史事件、探討一個歷史時代，都一定需要好多篇幅去交代時代背景同社會環境點樣影響事件嘅發生。一旦脫離脈絡，歷史論述就會變得空洞，亦都會多咗好多任意詮釋嘅空間。呢件事亦都體現喺歷史教育上面：如果因為課時不足或程度嘅緣故教科書上面嘅論述或者老師嘅講解太過簡略，好容易就會令歷史課變得非常沉悶，事關我哋會無可避免地拎走咗最有趣嘅時空脈絡同因果關係，最後就剩低必須死記爛背嘅名詞同年份。    咁問題就嚟喇：喺大家都無咁好耐性睇咁多字嘅年代，尤其係學生每日都接觸大量新嘅資訊同知識，根本無咁多精力大量閱讀嘅時候，歷史仲可以點樣教？如果我哋將歷史教育嘅方式徹底改變，唔再花大量嘅時間將基礎歷史知識夾硬塞入學生個腦入面，而係引導學生自己做探究，自己諗問題，然後透過整理資料，自己搵出答案。對好多人嚟講，睇到呢度可能已經覺得一早就應該係咁做啦，係啲官太迂腐先唔咁做之嘛。不過諗深一層，咁樣嘅方法做落手可能又有問題。例如係，對程度比較弱嘅學生嚟講，缺乏基本知識嘅情況下叫佢自己搵題目做研究，會唔會太吃力？又或者，咁樣嘅探究方式會唔會太講求學生嘅自主意志，導致一啲仍然對歷史唔敢興趣嘅學生，更加不為所動？  💡 臺灣早幾年開始歷史教育嘅改革，推出「108課綱」，其中最大嘅改變之一就係希望引入「探究與實作」嘅教學方式。幾年過去，喺臺灣嘅教育界都有相當兩極嘅反應，呢種新嘅做法到底會唔會成功，仍然有待觀察。 【店長精選：唔好果本唔敢揀】 歷史思考大未來：勾勒歷史教學的藍圖  山姆．溫伯格｜林慈淑、蕭憶梅、蔡蔚群、劉唐芬  三民｜ISBN：9789571467733｜HKD$183    相比起《歷史如何教》，呢本《歷史思考大未來》討論嘅係更加宏觀嘅問題，就係「究竟歷史科有啲咩存在意義？」呢度唔係講緊「歷史有咩意義」，係兩個問題嚟。「歷史科有咩意義」更加側重喺校園嘅環境入面，究竟中學生應該要知道啲咩歷史？又應該要知道得幾深入？我哋應該為咗培養一個良好公民，透過歷史教更多價值觀同思考方法；定係為咗培養文化素養，教多啲本國歷史同文化內涵？    喺學校嘅環境底下思考歷史，有好多需要考慮嘅部分。中小學教科書入面嘅歷史，必然都會比起學術界嘅最新研究，落後三五七年甚至幾十年（例如而家啲教科書仲教緊慈禧太后挪用海軍軍費），呢部分可以點解決？歷史科只係學生要讀嘅咁多科目入面其中一個，甚至唔可能係最重要嘅一個，起碼學生一定放多啲時間喺中英數身上先，咁歷史課嘅教學，係同其他學科呈現互補嘅關係，定係會有重疊嘅部分而互相競爭學生嘅精力？    再諗闊少少，歷史教育對於整個社會嚟講，應該擔當一個點樣嘅角色，應該要具備點樣嘅功能？除咗上文講過嘅「思辨能力及價值觀」同「歷史文化修養」嘅爭辯之外，喺歷史課入面要點樣處理身份認同嘅問題？要點樣呈現歷史記憶俾學生（尤其係慘痛嘅歷史傷痕）？如果社會開始出現同教科書完全唔同嘅歷史論述，咁老師應該點樣解釋俾學生聽？ 💡 好多喺教科書入面普遍存在嘅說法，其實都相當過時。就好似大家都學過嘅「宋朝積弱，重文輕武」，現今學界主流共識都已經拋棄呢個講法，認為宋朝能夠抵擋蒙古幾十年，其實都已經係相當強大嘅表現。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 The First Estates:  The Story of Fairview Park and Hong Lok Yuen with Documents  Roger Nissim｜Hong Kong University Press  ISBN：9789888528257｜HKD$190    而家公認香港最早嘅私人屋苑，係1968年開始入伙嘅美孚新邨，總共有九十九座，分八期落成，係好高密度，非常香港嘅建築群。之後陸續出現嘅大型私人屋苑，例如係標誌性嘅太古城、黃埔花園、沙田第一城等等，都係行緊同樣嘅路線——高密度，但係尚算舒適，五臟俱全嘅社區。不過，同樣係高尚住宅屋苑，原來都唔係一定要高密度。    有兩個大規模屋苑稍遲少少落成，反而屬於一個截然不同嘅風格——大埔康樂園同元朗錦綉花園，都係香港好早期嘅私人屋苑，但係極低密度、全由獨立屋組成。如果有讀者曾經進入過康樂園同錦綉花園，肯定都會得出「呢度唔係香港」嘅結論。呢兩個屋苑都完全違背我哋所理解「地少人多」，必須發展成「石屎森林」嘅香港。咁點解會有呢兩個屋苑嘅存在呢？兩者都喺七十年代動工，正係香港人口爆炸增長，同時政府積極覓地建立新市鎮同興建大量公共屋邨嘅年代，點解會容許呢種「浪費土地」嘅計劃出現？    按照作者嘅講法，呢個時代，同時亦係香港仲未有正式城市規劃系統嘅年代。喺無完整城市規劃可以依循嘅情況底下，發展商喺起錦綉花園同康樂園嘅時候，點樣同政府交涉，點樣收購需要嘅土地，點樣按照未來可能出現嘅需求而設計屋苑，就令到康樂園同錦綉花園成為值得被研究嘅城市規劃個案。  💡 錦綉花園同康樂園喺設計上，其實係繼承咗一種嚟自二十世紀初嘅城市規劃概念，就係花園城市。花園城市亦都唔係七、八十年代先喺香港出現，早喺一九二〇年代，九龍塘就已經係以花園城市概念而開發。 【店長精選：唔好果本唔敢揀】 一型徒廈的設計基：香港公屋原型 衛翠芷｜MCCM Creations  ISBN：9789887723813｜HKD$250    關於香港公屋嘅發展史，其實都已經有好多學者做過研究。最主流嘅論述，就係1953年嘅石硤尾大火一夜之間摧毀咗寮屋區，造成大量災民流離失所，於是政府喺緊急興建徙置區嘅同時，決心解決香港嘅房屋問題，而結果就係公屋。當然，近年嘅學者好多都已經開始質疑所謂「石硤尾迷思」，認為石硤尾大火只係觸發大規模公屋計劃嘅導火線，實際上政府喺六、七十年代嘅公共房屋政策，背後仲有好多其他政治同社會原因推動。不過，關於公屋歷史，仲有一個問題有待回答：點解公屋係咁嘅樣？    喺建築設計嘅角度嚟講，公屋算係徙置大廈嘅「進階版」，咁公屋點解係咁嘅樣，當然就係因為徙置大廈都係咁嘅樣。所以真正嘅問題其實係：徙置大廈點解又係咁嘅樣？尤其係考慮到，徙置大廈並唔係任何其他建築物嘅「進階版」，喺徙置大廈之前，香港係無咁樣嘅集體高密度、多單位屋邨。喺徙置大廈之前，就算同樣係為咗緊急安置災民而建立嘅平房區，都係「平房」，唔係屋邨大廈。當時香港最普遍嘅住宅建築物係唐樓，點解徙置大廈唔係好似唐樓咁起？徙置大廈嘅外觀上甚至無任何類似唐樓嘅設計。亦即係話，「屋邨」呢種建築物憑空咁喺香港出現，係從來都無喺香港起過嘅建築物。    於是乎，1954年落成入伙嘅第一型徙置大廈，就相當重要——究竟呢種屋邨嘅概念係點樣嚟？係因為乜嘢考慮而有咁樣嘅設計？更重要嘅係，一型徙置大廈對往後嘅公屋設計有幾大影響？如果我哋認同作者所講，一型徙置大廈就係公屋嘅原型嘅話，咁呢種短暫出現過嘅七層大廈，其實塑造咗我哋今日見到嘅香港城市景觀。   💡 最早期嘅一型徙置大廈，而家已經完全清拆，一幢都無剩低。不過，有一批一型徙置大廈曾經因應現代需求改裝過，而呢一批改裝一型，而家仲有最後一座獲得保留，就係石硤尾邨第四十一座，即係美荷樓。 此篇書訊刊於 每週一 發出的獅墨書訊，歡迎免費訂閱

文：蔚藍 【最新到貨：新鮮滾熱辣上架】 A Barrister in the Far East - Duncan McNeill: Memoirs of Extraterritoriality in China, Hong Kong and Japan (1891-1926) T M Thorp｜T M Thorp ISBN：9789887963899｜HKD$180 提起香港係英國嘅殖民地嘅時候，其中一樣必然會被提及嘅歷史遺物，就係普通法。如果你好奇普通法原則係點樣開始傳入香港，又想知香港殖民地時期嘅司法體系面對咩問題，不妨睇吓喺英國域外法庭工作多年嘅Duncan McNeil嘅回憶錄。 McNeil喺1889年英國取得大律師執業資格。自1901年起，喺東亞域外法庭擔任代表律師長達三十五年，亦曾喺上海擔任英國在華最高法院嘅「署任皇家律師」（Acting Crown Advocate）即代表英國政府嘅檢察官。簡單著眼喺十九世紀嘅外交層面嘅話，會睇到喺英國同東亞簽訂嘅條約下，英國嘅司法管轄權拓展到日本、上海、香港，處理涉及英人嘅糾紛。不過，條約只係一張紙，更加重要嘅係點樣執行。 McNeil就進一步用自己嘅觀察同經驗，點出喺司法實踐方面，英國屬地落實條約嘅現實係咩。當中包括英國在華法庭嘅限制、條約嘅模糊位、語言差異等等。當地政府又會點樣嘗試喺英屬法庭爭取返多少少自治空間？當地政治氣候又會點樣影響法庭裁決？而佢作為一個英屬律師，又會點樣睇依啲議題？ 條約、治外法權依啲法律嘢聽落好悶，但McNeil以第一視角書寫，好似講緊自己嘅人生故事，包括少少佢當時嘅生活同心路歷程。同時，佢用人話去敘述佢處理過嘅案例，並唔涉及專業術語。有趣嘅係，讀者喺行文之間可以睇到佢對某啲案件嘅反思，又或者係懊悔，以及作為律師嘅掙扎。 從佢一個人嘅眼睛都可以窺視到大時代嘅制度，雖然都會有偏頗。法制嘅歷史都未必要好死板噉讀。 💡McNeil係本書作者Thomas Murray Morph嘅曾祖父，佢個仔同樣喺上海做咗多年皇家律師直至英國域外法庭失去效力。 【店長精選：唔好果本唔敢揀】 Treaty for a Lost City: The Sino British Joint Declaration C. L. Lim｜Cambridge University Press ISBN：9781108976381｜HKD$350 討論完殖民時期，下一個司法體系轉捩點就到九七年主權移交。主權移交時，《中英聯合聲明》列明，香港現行嘅法制、權利同自由會保持不變。去到2022年，中英雙方對《聯合聲明》各有演繹。大家會好奇：《聯合聲明》有冇法律效力？ 中大法律系教授Chin Leng Lim喺依本書就由法制歷史入手，梳理大量官方文件，探討《聯合聲明》有冇建立民主政制嘅承諾。當年嘅《聯合聲明》係邊個草擬？點樣草擬？如果有法律效力，喺憲法層面上，又會否同現行嘅國際法以及國安法有所衝突？Lim教授嘅研究緊接住香港主要憲法（即基本法）同《聯合聲明》嘅關係。尤其係喺2020年，人大透過《基本法》附件三立下《國家安全法》，社會質疑此舉有違《聯合聲明》之嫌。 似乎好多關於「一國兩制」嘅憲制疑問浮返上面：「一國兩制」係咪真係實現過？而基本法條文由始至終有好多模糊地帶。法律學者又會點樣解答？ 💡「一國兩制」嘅爭議並唔係近年先出現。早喺董建華時期，廣為人知嘅「廿三條」遊行其實爭論緊同一條問題：香港有冇憲制責任就國家安全立法？ 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 Hilton Cheong-leen (張有興): First Chinese 'Mayor' Of Hong Kong Hilton Cheong-Leen , Gary Cheung, Oliver Chou World Scientific Publishing｜ISBN：9780241458730｜HKD$480 張有興喺今年初離世果陣，年輕一輩即使係關心政治圈子嘅人，恐怕都未必識得佢。事關嚟到2022年，張有興早就已經唔再係政治前線嘅人物，莫講話佢，新一代可能連司徒華都未必聽過。 但係去翻張有興活躍嘅年代，佢確實係香港戰後最重要嘅政治人物之一，係當時極力主張民主改革嘅領袖。早年嘅佢其實都係一個成功嘅商人，以文具同手錶貿易起家，好早就已經係商界嘅名人。但係從商以外，佢亦都係一個非常關注香港政治制度嘅人，主張建立完整嘅法治制度，以及循序漸進咁喺香港發展民主，甚至仲打埋國際線，親自去倫敦遊說英國政府支持香港嘅政制改革。 不過，張有興最為人所熟知嘅，始終都係佢喺市政方面嘅貢獻。1957年，佢成功當選市政局議員，成為當時香港唯一民選機構嘅代議士。一做，就做咗三十幾年，最後仲做埋市政局主席。由於市政局顧名思義就係負責確保政府妥善處理香港嘅日常市政，加上張有興嘅民望高企，因此仲得到「香港市長」嘅稱號。 而為佢立傳嘅作者，亦都唔係泛泛之輩。張家偉嘅著作包括《英國檔案中的香港前途問題》以及《六七暴動：戰後香港歷史的分水嶺》，係六七暴動研究嘅先驅之一，亦係香港政治史嘅權威。張家偉本身唔係歷史學家，而係政治新聞記者，當年仲參與採訪香港前途問題談判同主權移交，第一身經歷香港最重要嘅政治變動。所以佢執筆寫嘅張有興傳，除咗係一本人物傳記之外，亦係戰後政治變動嘅見證。 💡張有興雖然係香港政界重要嘅人物，但佢其實唔係香港出世，而係1922年嘅英屬圭亞那，即係而家南美洲嘅圭亞那共和國。佢去到九歲時先舉家移民香港。 【店長精選：唔好果本唔敢揀】 《香港最早期政黨及民主鬥士：革新會及公民協會》 曾奕文｜中華書局 ISBN：9789888572502｜HKD$128 講到張有興，仲有一個不得不提嘅面向，就係佢有份創辦嘅公民協會。公民協會嚴格嚟講唔算係香港最早嘅本土政治組織，甚至唔係最早提出政治改革嘅團體。戰前嘅九龍居民協會、香港憲制改革協會等等，亦都提出過增加參政權嘅要求。不過，公民協會就係香港最早兩個現實意義上嘅政黨，另一個則係香港革新會。 香港革新會嘅主張相對比較進取，期望香港嘅民主步伐可以更快，早期代表人物包括經常為底下階層發聲嘅杜葉錫恩，亦有出身上流，後來成為東亞銀行主席嘅簡悅強，以至係主張香港民主自治嘅馬文輝等。與之相對，公民協會就比較溫和一啲，可以接受緩慢嘅改革進程，等社會有時間適應同調整，另外亦投放比較多注意力喺照顧弱勢社群方面。 香港革新會同公民協會之所以會被稱為香港第一批「政黨」，係因為佢哋係最早開始積極參與選舉嘅政治組織。雖然市政局喺十九世紀末已經開始有民選議員，但係早期嘅參選人大多係政商名流以個人名義參選，而呢兩個政黨則會推出候選人進行選舉工程，所以係香港政治參與嘅歷史上一個非常重要嘅進展。到咗而家，革新會已經解散，而公民協會亦已漸趨低調，但仍然係香港歷史最悠久而仍然運作緊嘅政治團體。雖然呢兩個組織喺2022年嘅社會眼中已經失去咗鎂光燈嘅眷顧，但佢哋喺香港政治史入面嘅地位依然難以動搖。 💡早喺香港開埠之初嘅1845年，喺香港嘅英國商人已經開始提出政制改革嘅呼聲，認為香港要有自己嘅民選市議會，開創咗社會關於民主化討論嘅先河。 此篇書訊刊於 每週一 發出的獅墨書訊，歡迎免費訂閱

【最新到貨：新鮮滾熱辣上架】 重返《國史大綱》：錢穆與當代史學家的對話  王汎森等｜臺灣商務  ISBN：9789570535068｜HKD$182    大家認識嘅錢穆，可能有兩個唔同嘅身份，一個係堅定嘅反共學者，為咗守護同傳承正統中華文化（無論呢個正統指緊啲乜），免受中共摧殘，因此喺國共內戰果陣嚟到香港，建立新亞書院，後來更組成中文大學；另一個身份，係近代中國最重要嘅歷史學家，寫成《國史大綱》一書，成為中國歷史其中一本最經典嘅通史作品，享譽全東亞漢學界。呢兩種身份喺風雲變色嘅大時代入面結合埋一齊，會得出一個點樣嘅知識分子？    《國史大綱》當然會有強烈嘅民族主義味道喺入面，畢竟呢本書係以「救國」為目標而寫，但唔代表佢會被個人情緒影響，而令呢本書唔夠紮實同專業。佢曾經喺書入面講過，《國史大綱》要成就嘅係「新國史」，係用一種新嘅方式寫中國嘅通史。咩意思？新國史指嘅係一種回應時代嘅歷史書寫，呢本書喺寫嘅過程入面，錢穆就已經諗住「呢段歷史賦予俾我哋嘅知識，能夠為而家嘅中國帶嚟乜嘢啓示，能夠幫助中國解決啲咩問題？」所以書入面，常見「如果當初唔係咁咁咁，之後中國就唔會如何如何失敗」一類嘅寫法，正正係希望為現世嘅社會提供參考案例，如果想避免走到某個方向，就唔可以繼續咁咁咁做。    錢穆對中國歷史嘅觀察，亦都同當時民國知識分子嘅主流好唔同。錢穆極力宣揚中國文化嘅地位同特色，唔係因為佢係小粉紅，而係佢要對抗當時主流學者認為中國自秦漢之後就停滯不前，一無是處嘅主張。同一時間，當有啲歷史學家專注於資料考證，避免書寫論述，希望能夠維持史學嘅「客觀」同「科學」，錢穆亦都不以為然，認為考證之上，始終都係要有「著述」，先有意義。喺同中國主流學界漸現分歧之後，錢穆無跟隨佢哋遷移臺灣，反而嚟到香港，建立咗新亞書院。喺香港，錢穆似乎又得到新嘅土壤，堅持佢自己嘅理想。  💡 錢穆喺二戰期間，一路逃避到中國西南，喺戰火之中寫成《國史大綱》；無獨有偶，近代歐洲最重要嘅史家馬克・布洛克，都係喺二戰期間，身處游擊隊戰壕入面寫成名作《史家的技藝》。 【店長精選：唔好果本唔敢揀】 唐君毅與香港  趙敬邦｜聯經出版  ISBN：9789570867749｜HKD$120    唐君毅係新儒家之中重要嘅代表人物。所謂新儒家，身處喺五四運動以嚟，中國好多知識分子都「全盤西化」，主張拋棄中國舊有嘅種種文化同思想，要徹底擁抱西方文明嘅環境。但係新儒家學者一般認為中國文化仍然都有可取之處，儒家思想唔應該被輕言唾棄。不過，呢啲新儒家學者亦都唔係純粹嘅守舊同復古，發源於二千年前嘅儒家學說，到底嚟到二十世紀仲有啲咩價值？佢哋必須思考嘅係，點樣可以令儒家現代化，成為符合當代世界需要嘅哲學體系。    喺咁嘅環境底下，唐君毅成為一位中國新儒家哲學學者。更重要嘅係，當時係中共建政嘅時代，根本容不下新儒家。以至唐君毅雖然係一個重要嘅中國學者，但整個學術生涯，幾乎都係喺香港度過。於是乎，唐君毅嘅思想同學說，都同香港提供嘅土壤有關。唐君毅同香港之間係互相影響嘅，香港有相對嘅言論自由，文化上亦比起中國更側重傳統以及舊國學（港督金文泰功不可沒），國學、人本主義、儒家思想等等，喺香港都比起喺中國更容易被接受。    另一方面，唐君毅對香港亦都有好深遠嘅影響。除咗率領新亞研究所同中大決裂之外，更重要嘅係思考香港同中國之間嘅關係。佢最為香港人熟悉嘅著作可能係《說中華民族之花果飄零》，講嘅係中國變成共產黨主政，中國文化應該何去何從，而身在海外（海外包括香港喔）嘅「華人」，又應該在其中扮演乜嘢角色，先可以現代化之後嘅中華文化「回流反哺」入中國，同時喺香港內部亦都要大改造，為他日重投中國懷抱做準備。當然，呢啲諗法喺今日立足本土嘅我哋眼中簡直係莫名其妙，但上幾代香港人嘅「中華情結」都係真實存在嘅，而當中又有幾多係同唐君毅嘅思想系出同源？  💡 唐君毅最初並未視香港為歸屬，甚至對呢度身為英國殖民地感到鄙夷，覺得自己總有一日要翻去中國，先能夠真正專研中國嘅哲學。到後期，佢先開始關注香港，甚至認為學人應該運用知識推動香港進步。 此篇書訊刊於 每週一 發出的獅墨書訊，歡迎免費訂閱